Rabu, 27 Mei 2020 10:42:00

Jamita Pesta Parningotan Parjolo Hasasaor ni Tondi Porbadia: "Tondi ni Jahowa na Manogu tu Hasonangan" (Jesaya 63: 11-16)

Pdt Dr Robinson Butarbutar
Oleh: Pdt Dr. Robinson Butarbutar, KRP

Angka Dongan Ruas ni Pamatang ni Kristus hinaholongan di sandok Indonesia,

Sada barita na mansai uli na sai taingot, tahalashon dohot tapestahon di Parningotan Ari Hasasaor ni Tondi Porbadia tu angka na porsea di bonana di Jerusalem dohot udut ni i sahat tu nuaeng, i ma hamamasa nasotarasam on: "Diparsaori Debata ngolunta jolma na gok dosa dohot hagaleon on dohot TondiNa na badia i, ndang laho manguhum hita, alai laho manogihon hita tu hasonangan, tu inganan malua sian marragam mara."  

Molo ala ni hahuranganta gabe ruar TondiNa sian hita dohot sian punguanta, susa ma ngolunta, ndang marhasonangan, ndang margogo mangalo musu, mangalo marragam pangunjunan mardosa, ndang margogo patupa na denggan dohot mandungdung nauli na taparsinta; jala ndang marnasahat tu inganan na marhasonangan di ngolunta, nuaeng nang sogot pe. Molo sahat hita tu partingkian na songon i, na gabe ruar TondiNa sian ngolunta marsasahalak dohot marsasapunguan, ndang adong dalan na asing ia so manungguli Debata na hea do Ibana mamarsaori hita laho manogihon hita tu hangoluan, asa dung i tauduti mangido tu Ibana asa diingot Debata na Ibana do Jahowa Debata jala Sipalua hita sian pardangolanta.   

I do na pinatupa ni panurirang Jesaya di tangiangna na tarsurat di Jesaya 63: 11-16. Disungguli ibana Debata Jahowa na hea marningot ulaonNa di partingkian ni si Musa. Uju i  atik pe nunga pola marmusu Debata maradophon bangsoNa ala diarsahinasida TondiNa (ay 10), alai di na patupa marragam ulaon na balga paluahon bangsona i sian angka musunasida, dipatupa Debata do lobi sian na hinirimnasida (ayat 11 dohot 14), i ma  "Mamparsaorhon/mansagihon TondiNa tu bangsoNa laho manogihon nasida  tu sada ingangan na marhasonangan/hasonangan. I do sialana umbahen na dung i dihabaranihon panurirang i mangulahi mangido songon pinatupa ni si Musa mangondihon bangsoNa, i ma asa  "Manatap Debata sian banua ginjang tu bangsoNa ala holan Ibana do Jahowa Amanasida, Sipalua nasida" (ayat 15-16) nang di partingkian ni si Jesaya, atik pe ndang tarpatudos hasatiaon nasida ujui  tu ompunasida si Abraham na so sanga mananda nasida  (ayat 16).

Ala ni i, hamu angka Dongan, di tangiangta ganup sadarion nang diariari na ro, taingot jala tahamauliatehon ma Ari Hasasaor ni Tondi Porbadia tu hita, nang di na sai dihaliangi mara Covid 19 on dope hita. Tahabaranihon ma manungguli Debata, na so apala ala ni hasintongan dohot habadiaonta, alai ala asi ni rohaNa do, umbahen na diparsaori Ibana hita dohot TondiNa, Tondi Porbadia i sahat tu tingkion laho manogihon hita tu ngolu na marhasonangan, nuaeng di portibion sahat tu ngolu sogot di surgo, malua sian angka mara. 

Dung tasunggulhon i tu Ibana, tauduti ma songon si Musa dohot si Jesaya,  mangidohon tu Debata dohot Sipaluanta i asa unang ditadingkon TondiNa i hita, alai manongtong diparsaori TondiNa i hita di ariari na ro on, asa hot ditogihon hita marhasonangan, monang maradophon pangunjunan, isara patupa kekerasan di bagasta be uju Pandemi Covid 19 on maradophon parompuan dohot dakdanak, dna, malua sian nasa mara, isara Covid 19 i; asa dipatau dohot dipatogu TondiNa i hita satia, ndang lemba patupahon angka dalan  na denggan, na taboto boi pasidingkon hasasahat ni Covid 19 i tu hita ganup, nang mangorui  harararatna, pinomat di toru 1 Curva RO (R-naughtna) marhite: Manjaga Jarak Fisik Sosial 1-2 meter, Marmasker, dohot satia marhaiason hita, dna.  Molo diparsaori TondiNa i hita, tarbahen hita do satia patupa i, jala ndang apala ingkon diparentahon Presidenta tuat massif  TNI dohot Polri mamungka 26 Mei 2020 tu angka titik-titik keramaian laho patangkashon na  satia hita natorop patupa i.  Amen.