Sabtu, 01 Februari 2020 22:00:00

Jamita Evangelium 2 Pebruari 2020 Minggu IV Dung Epiphanias "Halak Na Martua Mangihuthon Jesus"

Pdt Dr Robinson Butarbutar

Oleh: Pdt Dr. Robinson Butarbutar, Sian Parsameanta, STT-HKBP Pematangsiantar

Hamu angka Dongan angka ruas pamatang ni Kristus hinaholongan,
Sian na mamungka di bortian ni Dainang sahat tu na tatadingkon hangoluan di portibion adong be do sintasintanta songon jolma sasapunguan dohot marsasahalak, songon pomparan ni Natorasta, songon warga negara, nang songon ruas ni pamatang ni Kristus Nabadia i di portibion dohot songon angka pangula/pekerja di ganup ulaonta i. Molo tardungdung hita do sintasintanta i, manghilala ma hita angka na martua.

Alai molo ndang tardungdung hita na taparsinta i, ndang apala las rohanta. Ndang tahilala na martua hita. Baliksa do na tahilala. I do umbahen didok donganta hata on tu hita taringot tu hita manang tadok tu donganta hata on taringot tu donganta na asing: "Martua ho da, nunga dapotan ulaon ho dung sidung sikkola mi," "Martua ho do, nunga sohot, dapotan ulaulaon, jala marpahompu na burju ho," "Ianggo Ibana, martua do daba, ai burju amantana tu ibana." Boi do bahat tagoari angka hat ana uli sisongon i didok donganta tu hita, manang  tadok na  denggan taringot tu donganta naung mandungdung pinarsintana.

Holan i, marragam do suhatsuhat parhatuaon naung pinatolhas ni angka jolma sian tingki na robi sahat tu tingki on di sandok portibion. Nang di tingki na naeng ro lam martamba do suhatsuhat parhatuaon i. Boi mangulahi naung pinatolhas ni angka sundut naparjolo. Alai boi do tong imbaru, saurdot tu parhosingan ni zaman. Songon siihuthon Jesus, ringkot do tatangihon songon dia Gurunta i, i ma Jesus Kristus Sipalua i, na ro sian banua ginjang, Anak ni Debata i, naumboto lomo ni roha ni Debata i dia do suhatsuhat ni angka jolma na martua. Angka ise do, angka jolma na songon dia do na digoari Jesus angka na martua, jala boasa digoari angka na songon i na martua?

Pangajarion ni Jesus tu angka natorop ni halak Jahudi na pinatolhasNa di atas dolok di bagasan panangihonon ni angka siseanNa naparjolo i taringot tu hata hatuaon nunga dijangkon angka siihuthon Ibana sian abad parjolo sahat tu nuaeng. Jala  i do na gabe jamita di hita di bona ni bulan Pebruari 2020 sadarion, 2.2.2020, di Minggu IV Dung Epiphanias, asa taboto dia do hinasiholan ni Tuhanta Jesus sian hita angka siseanNa, dia do sipatupaonta tu joloan ni ari on. Mansai ringkot hita dipaingot pangjarionNa, asa unang gabe angka ajar ni na asing tapangke mambahen suhatsuhat hatuaonta.

Molo tapamanat hata Gorikna jala taida terjemahan-na di hata Batak maninggoring, asa ummura taida hinabagas pangajaran ni Tuhanta Jesus, boi do tabahen pambagian ni isi ni jamita pangajarion ni Jesus di dolok na ginurithon ni panurat Evangelium Mateus di Mateus 5: 1-12 i tu bagasan dua bagian bolon. Suhatsuhat pambagianna taida di kata kerja pinangke ni Jesus. Adong hatana i na mamangke kata kerja partingkian nuaeng, digoari present tense di hata Inggris. Laos adong na mamangke partingkian na naeng ro, future tense ninna di hata Inggris. Na mamangke present tense i ma na tarsurat di ayat 3 dohot 10-12, pamonai dohot pangujungi. Na mamangke future tense i ma na tarsurat di ayat 4 tu 9, parsitongaan ni ayat 1-112 i. Nanidokna, di bona dohot di ujung ni hata hatuaon i, hatuaon di tingki on do, di ngolunta sinuaeng dipalumehon tu hita panghorhon ni hatuaon i. Alai ndang holan di tingkion manghirim angka siseanNa, alai ingkon sahat do di tingki na ro daionnasida parbue ni hatuaon i. Boi idaonta hahomion partondion na mansai bagas na mangihut on:

1. Martua hita di ngolunta nuaeng ala di hita harajaon banua ginjang i nuaen,  i ma dua na mangihut on: Na pogos tondi dohot na pinaburuburu ni halak ala ni hatigoran. Tamba ni i, ia na martua di ngolu nuaeng ala dijalo nasida upa na bahat di surgo nuaeng,  i ma na diinsahi, dipaburuburu, dipatubutubu ragam ni hata na roa na sotutu taringot tu ibana ala siihuthon Jesus Ibana. Tabona i. Molo taadopi na songon i hape, martua hita ala dapot hita nuaeng bahat arta banua ginjang i.

2. Jala molo na mangihut on do hadirion niba daion ma na tonggi na mangihut on, i ma:
Opat angka na marhadomuan tu roha: (i) Molo marsak roha niba hape, na martua do iba muse, ala siapulon do iba; (ii) Molo lambok rohaniba martua do iba ai gabe teanon do tanoon; (ii) Molo parasi roha iba hape siasian do iba muse; (iv) Molo ias roha hape idaon do Debata di tingki na ro.
Dung i, na martua do iba molo mauas male iba mida hatigoran, ai sipabosuron do iba.
Jala martua do sibahen Dame ala goaron ma nasida angka anak ni Debata.

Sudena i ndang adong na manghaporluhon pangalapation asing ni napogos tondi. Molo di Evangelium Lukas ndang apala didok napogos tondi, alai napogos do (Lukas 6: 20). Dia do nidok ni napogos Tondi? I ma angka na mangharingkothon dohot manghasiholi Debata di ngoluna, na so mangasahon gogona sandir di ngolu on, na manghilala ndang mararga ngolu on, ndang adong jambar niba di ngolu on molo ndang marsigantung iba tu Debata ngolu on.

Asa, ndang jadi iba hape manghilala na so martua molo na pogos tondi iba, na mangharingkothon Debata iba. Na so marsigantung tu hagogoon na asing iba. Baliksa na martua do iba. Jala ndang jadi iba manghilala sisurang molo dipaburuburu halak iba ala hatigoran, keadilan, dikaiosune na niula. Di Evangelium Mateus, hata dikaisune gomodang do tinujuna keadilan. Boasa?

Ala di iba do hape harajaon banua ginjang i molo sai hinasiholan marhite pambahenan hatigoran di ngoluniba nang di humaliangniba.  

Asa, ndang jadi iba hape manghilala sisurang, baliksa na martua do iba hape, ala diinsahi, dipaburuburu, dipatubutubu ragam ni hata na ro na so tutu maradophon iba ala ni Jesus, ai upaniba di surgo bahat do nuaeng.

Asa ndang jadi iba hape manghilala ndang ampit molo marsak roha niba, ai siapulon do iba. Ndang jadi sipasohoton marroha na lambok, ai siteanononniba do tano on siala ni i. Ndang jadi ibana mansohot marasi roha, ai siasian do iba muse. Ndang jadi iba mansohot gabe parroha na ias, ai idaon ma Debata.

Asa ndang jadi iba hape mansohot manghasiholi masa hatigoran, ai i do dalan asa jumpangniba do hatigoran molo sai nitultulan memperjuanghonsa. Ndang jadi iba hape mansohot mambahen dame, ai goaron do iba anak ni Debata.

Boasa ma mansai ringkot di hita angka Halak Kristen Batak Protestan manangihon jamita hatuaon pinasahat ni Tuhanta tu hita di minggunta sadarion tarlumobi di na mangarade sundut na umposo hita manomunomu sintasinta ni bangsonta di taon 2045 gabe bangso na maju, na mardohat, na tigor, na marpenduduk na patupa dame, na lomo roha marasiroha, jala na so gok gabus rohana, alai na ias sian angka hajahaton?
(i) Suraon do ala nunga manghilala naung namora hita di bagasan tondi, gabe ndang be manahan hita paimaimahon ulaon ni Debata di ngolunta marsadasada? Ala ni i gabe ndang di hita be harajaon banua ginjang i. Baliksa gabe dao hita sian i?

(ii) Suraon do ala nunga sai tapadao patupa hatigoran ala mabiar hita gabe dipaburuburu halak, hape molo talului hatigoran gabe hita do nampuna harajaon banua ginjang i?

(iii) Suraon do ala  menet rohanta uju marsak, sai tapasiding arsak ni roha, gabe ndang angka na mandai apulapul hita sian Tuhanta?

(iv) Suraon do ala  nunga angka parroha na koras rohanta, gabe ndang tatean tano on, baliksa gabe agoan tanoon hita, hape holan marroha na lambok do dalan tu ngolu na manean tanoon?

(v) Suraon ala nunga ndang tauduti be na marasi roha tu donganta jolma na mangharingkothonsa, gabe hita pe ndang be mandai asi ni roha sian Tuhanta i?

(vi) Suraon do ala nunga sai taloas rohanta dipalitok angka na sangkapsangkap hajahaton, ndang tarbahen hita be manjagai rohanta asa tongtong ias, gabe ndang tarbahen hita be marnida Debata di ngolunta? Angka sibolis dohot tondi nahodar i nama na taida jala tadongani manghatai?

(vii) Suraon do ala nunga lumomoan rohanta patupa angka hagaoron, konflik, ndang be dame, gabe dang be angka anak ni Debata be hita digoari halak, baliksa gabe angka anak ni hajahaton?
Ala ni i mansai ringkot hita patupa pamailangmilangon, patupa pangarujian: Ise do ahu? Na martua do ahu mangihuthon suhatsuhat pinatorang ni Jesus? Manang baliksa? Nuaeng dohot di tingki na mangihut?

DIpargogoi Tuhanta ma hita ganup patupa i, asa targoar na martua hita.
Amen.(*)