KSP Makmur Mandiri
Kamis, 12 Januari 2017 05:34:00

Daompung Nahinan

Oleh : Sampe L. Purba
BAGIKAN:
Dok/Sampe L Purba
Daompung
Tardok do jolma nahinan Daompung nahinan. Jolma nahinan ima sundut na mengalami zaman Boladda, Nippon, Sukarno sahat tu masa ni Suharto. Tukkang do Oppung doli. Hira sude do na berbahan hau boi ditukkangi. 
Nunga manang na piga palas palas/ menara giring-giring ni gareja dijama Oppung uju haposoonna. Tarmasuk mai palas palas ni Huria Sabungan na di huta nami nang na di ibukota kecamatan na jolo (andorang so direhab dope). Pinsur do palas-palas jala timbo. Ingkon na paja jala ndang parlomos do asa hum mangalotakkon labang sahat tu bubungan partimboi. 
Alai ndada holan gareja, dohot do parsikolaan, jambatan hau, balerong nang jabu dipature. 
 
Hira sude nahinaporluhonna, ditukkangi sandiri do (self sufficient). Ai tung mahal/ jarang/ maol do adong hepeng. Ompung on do  namamande undung-undungna songoni nang bagas ni akka anakna (tarmasuk mai jabu nami najolo). Ndada holan na manukkangi, dohot do tu na mangaririti  parhauna, manobang sahat tu na  manggargaji papan, tiang dohot angka ransangna di tombak. Tarup ni jabu berbahan hadudu, ijuk manang butar tong do naditukkangi sandiri. Integrated value chain di istilah nuaeng 
 
Marpadati do mamboan parhau ni ruma tu huta. Ndang adong padati ni Oppung. Alai ala ibana do manukkangi padati ni adong sisolhotna tarmasuk mai sorha roda nabalgai, gabe boi ma dipinjam padati nasidai.  Ummura ma ongkosna.
 
Songon i do tong nang perabot/ parkakas ruma tangga. Mulai sian Lamari, Meja, Panguhatan (tempat penampungan air), Hiong (bambu seruas untuk mengambil air dari mual/ sunge), losung hau, sapa (semacam talam berbahan kayu), panutuan (gilingan cabe), saong lompit (sejenis tudung payung  berbahan raso), tambe  sahat tu sonduk dasar sitedak nang tambal ni sasabi. 
 
Ndang diwarisi Damang dohot ahu bakat ni oppung doli on. Ai tung mangalotakhon labang pe so boi ahu denggan. Gari mangganti bohlam, olo gabe cangkang paniopannai lepas.  Laos songon i do nang Damang. Nanggo manolang panggu pe ndang ampit. Jadi asal adong tarbege songon soara na mandoltak doltak, pintor ro do Ompung dompak alamannami.
 
 Ompung on do tong na mamakkas/ manggusting obuk nami. Hea do dipangkas damang ahu. Makan waktu hampir dua jam, ipe martangga-tangga. Ndang rapi. Dukkon nii, gabe hira kewajiban moral ma di Ompung na mamakkas hami akka pahompuna tubu ni Bapa. Ai ianggo akka Amangtua dohot Amang uda, diwarisi do keterampilan ni Oppung on. Boi do nasida mamakkas anakna be. Songoni nang martukkang.
 
Relatif sinur do pahan-pahanan ni Ompung. Horbo, hoda, pinahan dohot manuk. Ompung on do mambahen harihir ni dorbiana (gelang rotan yg ditusuk ke hidung kerbau sebagai sangkutan tali), sungil-sungil dohot hulang-hulang ni pinahan lobu, songoni nang  mambahen harang (sejenis keranjang rumput khusus terbuat dari rotan besar/ sulpi). 
 
Malo muse do ibana paiashon/ mangkasing/ katastrasi/ mengkebiri anak ni pinahan lobu (pinallo). Ai adong do anggapan, molo ndang dikebiri anak ni pinallo, gabe holan na marbibit ulaonna, ujung ujungna marniang jala maol balga.  Sude do pinahan tunggal dikebiri, dung marumur hira onom bulan.   Ndang sude natua-tua parpinahan na mahir teknik mengebiri. Jadi jot jot do Oppung dijou halak laho paiashon pinahanna. 
 
Sangat sadis do idaon na paiashoni. Ai tanpa suntikan pembuat kebas do. Anak ni pinahan i disikkang, dirungrung uluna sian tangga ni balatuk, dibola ambal-ambalna laho mencungkil buah pelirnai, dungi langsung disosophon sira marlaok asom tu kantong lobang pengebiriani. Marngiak ngiak do pinahan mangangguki selama dalam  proses nai. 
 
Pada umumna pinahan cencen na marumur di toru ni onom bulan do na gabe pejantan tu pinahan betina mulai sian remaja, na magodang dohot inana sandiri. Ai ndang masa adong pinahan na khusus untuk pejantan dipiaro di huta. [Ini termasuk adaptasi evolusioner pinahan lobu, yang bibit cencennya matang sebelum waktunya demi mempertahankan kelangsungan dan regenerasi]. 
 
Ditukkangi Ompung do sulangat (alat penangkap ikan sejenis jaring bertangkai bambu). Molo binsat jala binong Aek Sibundong, tonga borngin pe laho do Ompungon marsulangat. Ndang mabiar tu begu.  Hira diboto ibana do didia asar ni dekke. Ndang dung luangan Ompungon. Sai gok dekke do hadang hadanganna si manogot i. Hira tolu hali do sataon musim ni marsulangat, tergantung tu haroro ni udan. 
 
Molo dung lewat  masa ni suanon, migrasi do pidong sipehet sian Utara tu arah Khatulistiwa, tepatna tu luat nami. Sipehet ima sejenis burung sebesar tekukur pemakan cacing tanah berparuh panjang  yang banyak di kawasan sub tropis, turun ke Selatan mengikuti angin monsoon. Holan dua bulan do sipehet i di hamian. Pintor dipasang Ompung on do sejenis jorat/ taon-taonan na ginoar Sambil, laho manjail. Jadi tardok bergizi do sipanganon, ai godang sipehet dapot. Tabo do sipehet dilaok tu ikkau rata. Jorot do Ompung on di taon taonanna, hira na diboto dompak dia bogas dohot pamolusanna. (Nb. ndang ro be migrasi pidong sipehet belakangan on).
 
Olat ni taon pitu pulu, marisap do Ompung. Alai ndang sigaret. Disuan do timbaho. Dung matang bulung ni timbaho i, diirisma tipis halus halus, dengan tehnik dan peralatan khusus. Ikkon dijomur do kering, ipe asa boi isapon. Jadi molo tu onan ibana, ditonai do hami asa hatop mandaik timbaho unang sanga ro udan.
 
Disuan Oppung on do sandurguk sakkabona tanaman teh. Ima tarsongon teh pucuk sinuaeng. Adong muse do sabatang pinang dohot napuran. Ima siatup atupon ni Ompung boru. Ai mardemban/ marnapuran do ibana hatihai. Ido kudapan ni akka ina, sambil mangaletek amak.
 
Ompung boru pe, tong do typical ni jolma nahinan. Adong do keahlian khususna, ima mandampol akka na taralit, sala urat, ombun-ombunon. Alai na paling fenomenal ima keahlian sibaso/ tabib yang membantu persalinan. Holan dua halak do sibaso di huta nami. Hampir sude jolma na bersalin di tahun 1930 an - 1970 an, nasida do menangani. Termasuk ma tingki tubu ahu. Nian di pertengahan tahun 1970an nunga adong mulai Bidan di luat nami. Alai hira na maila do sebagian ina molo melahirkan di rumah sakit. 
Jala molo manjou Bidan kesanna na so lancar do persalinan. Dung pe belakangan, dung lam matua Ompung boru, jala lam maju pendidikan, gabe manjou bidan manang rumah sakit akka ina molo naeng melahirkan. Dan memang itu lebih higienis. 
 
Ndang adong upah hepeng dijalo Ompung molo mangurupi ina na naeng melahirkan. Alai ditamuei do ibana marsipanganon di hari pertama parsorang ni poso-poso i - didokmai mardahan sae-saena. Jala ia dung tolu minggu manang sabulan, diboan inana ma dakdanaki tu onan. Dituhor do pisang, jala dilehon deba tu Ompung on. Di dok ma goar nii.. tuhor-tuhoran paronan ni si butet manang si unsok. Dung dijalo Ompung pisang i, didok ma mauliate, huhut songon na martonggo asa lam tu dorgisna jala imbur-imbur magodang poso-posoi. 
 
Pardaging na metmet jala pendek do Ompung boru. Tar 150 cm kotor. Alai dorgis jala padot do mula ulaon. Sai ramos do pargadonganna, porngis haumana songoni nang parkopianna. Ndang tarulang. Mabiar do halak jama-jama tu ladang/ porlakna. 
 
Adong do kearifan lokal pandaonion ni Ompung on. Molo akka na tarjukjuk simalolong (hal yang sangat lumrah tu akka na bersentuhan dengan ramba), holan bulung ni gadong do diengge jala dilahoppon tu simalolong i. Malum do tutu. Husukkun aha rahasiana, ndang adong ninna. Ai parbinotoan nadiwariskan amana doi tu ibana.  Pangubati/ datu huta na tarbarita do amana na jolo, marhuta di toru ni Dolok Na bolon, bariba ni Aek Silang margoar luat Sibatu-batu. 
 
Uju adong pangula nasida di balian,  robo jala marhobuk mangholom ari, dibuat Ompungon ma sampohul indahan. Martonggo ma tu Debata asa dipasisi udan i unang lola pangulana di balian.  Ndang huboto manang na adong dope nuaeng pinomparna na mewarisi akka parbinnotoannai. 
 
Tarmasuk pahompu hasian do ahu di Ompung. Mardomu mai ala pistar jala bisuk natua-tuai mangellem manubut roha nasida.
 
Di Siantar do ahu sikkola, jala lobi do opat kilo meter sian inganan nami tu parsikolaan, di Jalan Pane. “Unang malojahu mardalan pat”, ninna Ompung. Dungi digadisma pinahanna, laho manuhor sepedakku (ai adong be do pinahan masing-masing nasida, di luar pinahan bersama keluarga). Ndang dung dibahen Ompung na songoni tu akka pahompuna na asing.
 
Di tikki wisuda Sarjana ahu di Medan, dohot do Ompung  tu Medan. Sahalii do ibana tu Medan. Loja na marmotor i, mohop jala ponjot muse jabu ni keluarga tempat menginap, alai gok las rohana.
 
Dung karejo ahu di Jakarta,  selain tu Natua tuai, hutonai do asa dohot tu Ompung dipasahat  Bapa sebagian sian gaji pertamai. Surat ni Bapa paboahon, so i nama balga ni rohana, manjalo tongosan ni pahompunai. Mirjak irjak manortor-nortor  marende  Ompung nadua mangerbanghon rupia naumbalgai, huhut pasahat tangiang pasu-pasuna tu hami pahompuna. 
 
Sihol rohaniba, boi ma nian muse sejarah berulang, akka dakdanak nami on, boi dope di tingkina haduan mangihut manjalo pasu-pasui mambahen silas ni roha  tu hami natua-tuana, songoni nang tu Ompungna. Ale amanami  Martua Debata, tatap ma sihol ni roha nami. Patulus ma sikkop pasu-pasum, tu hami Pomparan ni Ompung.(Sampe L Purba)
  BeritaTerkait
  • Puisi : Monacco Toba

    4 tahun lalu

    di haetehon ni damang tagan haposoon ni daompung tusam nungnga disuan di dolok rahis ni huta nami dingkan holbung topi ni huta dingkan rura topi ni tao

  • Daompung Parpoda Na Tur " Haserepon "

    3 tahun lalu

    Di musim mudik nantoari sada, husiluhon do mandapothon sada tokoh. Natua-tua, naung marumur 84 taon.  Belakangan on dung dijalo nasida ulos matua nunga bakkol be  laho tu Jakarta/ Bandung

  • Gabe Partogi na Tigor jala Sintong

    2 tahun lalu

    Oleh: Pdt Dr Robinson Butarbutar, Ketua Rapat Pandita HKBPPartogi na so tigor, i ma na menikmati ulaon ni pangalambungina na jumonok (Dongan saripe)  na so tigor, na memutar balikkan fakta jala m

  • Jamita Minggu Estomihi, 23 Pebruari 2020 "Jahowa Partanobatoanku" (Psalmen 31: 1-9)

    4 bulan lalu

    Oleh: Pdt Dr. Robinson Butarbutar, sian Parsameanta, STT-HKBP PematangsiantarHamu angka dongan angka na porsea di ulaon ni Debata di tongatonga ni ngolunta. Sian na mamungka di bortian ni dainang

  • Santabi Sangapmu

    11 bulan lalu

    Oleh: Sampe PurbaAdong do Amangborukku marga Sinambela. Mangihuthon pandok ni akka natua tua, adong dope hubungan kekeluargaan nasida dohot keluarga Sisingamangaraja. Boi do ra tutu on, nang pe so har

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb