• Home
  • Agama
  • Minggu XVI Dung Trinitatis, 6 Oktober 2019, Evangelium: Ulaon 20: 21-31, MARHOBAS DI ADOPAN NI JAHOWA
KSP Makmur Mandiri
Sabtu, 05 Oktober 2019 17:22:00

Minggu XVI Dung Trinitatis, 6 Oktober 2019, Evangelium: Ulaon 20: 21-31, MARHOBAS DI ADOPAN NI JAHOWA

BAGIKAN:
Ist
Robinson Butarbutar
Oleh: Pdt Dr. Robinson Butarbutar

Di pardalanan ni ngolu dohot ulaon ni Debata di portibion sai dipangke Ibana do angka jolma na tinompaNa i mangula rap dohot Ibana pasauthon angka sangkapNa mansai uli maradophon hajolmaon nang natinompaNa na asing i, i ma - na sumurung sian saluhut - asi ni roha (Gorik: charitos)-Na mida hajolmaon i, unang mago jolma i, alai dapotan hangoluan na sasingkopsingkopna dohot na saleleng ni lelengna marhite na manongos anakNa nasasadai, Jesus Kristus i.  Sian partingkian ni Jesus na mangula pasauthon sangkap ni AmaNa na manongos Ibana  di abad parjolo tu hasiangan on, i ma tu Palestina sahat tu nuaeng on, sai dijou, dipatau, didongani jala dipasupasu Debata do angka na porsea di hadirion dohot haluaon di bagasan Jesus Kristus i gabe sitindangi di asi ni rohaNa i.

Dohot di panindangion i pangajarion taringot tu songon dia asa boi dapotan asi ni rohaNa i, i ma marhite hamubaon ni roha (Gorik: metanoia) dohot haporseaon (Gorik: pistis) di hadirion dohot ulaon ni Kristus i jala, dung i, songon dia ngolu ni naung niasian ni Debata i, i ma mardalan di bagasan ngolu naung pinaimbaruNa marhite TondiNa songon angka naung masuk tu harajaonNa. 

Di abad parjolo dijou, dipatau, jala ditongos Jesus do angka siseanNa na tubu jala mangolu di Palestina laho manindangi di asi ni roha ni Debata I disi nang di duru ni luat i. Mangula do nasida di Palestina nang di duru ni Palestina. Nang sian tongatonga ni angka na tubu di duru ni Palestina pe dijou Jesus Kristus naung hehe i do angka na olo patupa panindangion di asi ni rohaNa i. Sada sian nasida i  ma apostel Paulus na mansai hobas manindangi di angka kota na adong di Kekaisaran Romawi di abad parjolo. Jala dung tubu huria di kota Roma Ibu Kota Romawi jala di angka kota na asing di Kekaisaran Romawi dijou Jesus Kristus do marhite angka dalan na gok halongangan angka na olo borhat manindangi di asi ni rohaNa, ndang holan di hutanasida sandiri, alai dohot do tu huta ni na asing, na jonok sian hutanasida sahat tu na dao situtu, pola sahat tu benua na asing, lintas benua, na so haru neang patupaon, alai digohi marragam parungkilon na godangan ndang tartuhuk ni hatauon ni pamatang ni jolma i, alai tartuhuk ni angka sitindangi i siala ni pandonganionNa.  Sahat do nasida tu tongatonga ni halak Batak di abad pa-19-hon sahat tu abad pa-20-hon. 

Jala sian tongatonga ni halak Kristen Batak pe dijou, diparade, ditongos, dipasupasu, didongani, jala disarihon Jesus Kristus do angka na rade manindangi di asi ni rohaNa i, ndang holan di tongatonga ni angka na naung manghaporseai Jesus Kristus, tardidi jala gabe ruas ni huria nang harajaonNa, alai dohot do tu tongatonga ni angka na so mian di tongatonga ni halak Kristen Batak. Sahat do nasida manindangi asi ni rohaNa i tu angka houm na soding, suku-suku terasing, isara di Pulau-pulau Mentawai, Enggano, Rupat, dna,  jala adong do tong na tinongos ni Huria Kristen Batak tu tano Jerman, tu Srilanka, Philippina,  Amerika, tu Australia dna. Adong dong do na tinongosNa ndang marhite Huria Kristen Batak Protestan laho manindangi di asi ni rohaNa i, i ma rap dohot angka badan misi na marragam i. Jala di zaman digital nuaeng, bahat situtu do angka halak Kristen di portibion, dohot ma halak Kristen Batak, na manindangi di asi ni roha ni Debata i marhite komunikasi internet, i ma na ginoaranna parbaritaan barita nauli digital, online, atik pe tong do mardalan ulaon mamaritahon barita nauli di asi ni rohaNa i bohi tu bohi, off-line, so ingkon mamangke komunikasi internet. Di sandok portibion mardalan do i. 

Jala, dung dipatupa Pdt Dr. Martin Luther haimbaruon, reformasi di pangantusion taringot tu ise do na tardok marhobas di adopan ni Debata, ise do angka naposoNa i, ise do angka parhaladoNa i, ise do na targoar sitindangi di asi ni rohaNa i, sian pangantusion na so haru singkop tu pangantusion na sumingkop, gabe lam bidang jala singkop ma pangantusion taringot tu ise do na marhobas di adopan ni Debata. I ma: Ndang be holan na pinaojak dohot pinaborhat ni huria ni Kristus, i ma angka parhalado ni Huria, ia na ginoaran angka naposoNa i, alai dohot do angka na pinaojak dohot tinurgashon ni pamarenta/negara nang angka na mangula di ulaon na marragam di duru ni huria i - isara perusahaan dohot na asingna i na so hagoaron sadasada dison. Nasida sude targoar do angka na marhobas di jolo ni Debata. Ulaon nasida di angka ulaon siganup ari i diida songon panghobasion di adopan ni Debata, manindangi di asi ni roha nang holongNa sadenggandengganna. 
 
Ulaon panindangion di asi ni roha ni Debata i ndang holan asa muba roha ni halak jala marhaporseaon di asi ni roha ni Debata, alai dohot do tu ulaon marmahani, mangoloi tona ni Jesus Kristus tu apostel Petrus (Joh 21: 15-19), asa unang diroro angka babiat panoro angka na porsea di asi ni roha ni Tuhan i, ala ndang holan sian tongatonga ni angka na so porsea di asi ni roha ni Tuhan i ro angka babiat panoro i, alai sian tongatonga ni angka na porsea na lilu pe olo do ro angka babiat panoro I (Ulaon 20: 28-31).  

Laho mangulakhon panjouon ni Debata tu hita marsadasada nuaeng di abad pa-21-hon on, di taon 2019 on, dipangido hita asa parsidohot manghatindangkon asi ni roha ni Debata i, asa olo muba roha ni donganta jolma, tubu haporseaon di nasida di asi ni rohaNa i jala asa tongtong diulahon ulaon marmahani angka na porsea i, dienet ma jamita evangelium sian panindangion ni apostel Paulus na tarsurat di Ulaon 20: 21-31 on.

Panindangionna i dipasahat ibana tu tongatonga ni angka sintua na ro sian Miletus dohot na adong di kota Epesus di ujung ni panghobasionna di bagian Timur ni Kekaisaran Romawi andorang so borhat ibana tu Jerusalem laho mamboan parbue ni ulaon asi ni roha pinatupana pangkeon ni angka na porsea na marpogos di Jerusalem. Taboto, dung sahat ibana di Jerusalem, ditangkup do ibana.

Sada hata na marulakulak dipangke sada Sitindangi di asi ni roha ni Debata na tarbarita i,  apostel Paulus di Ulaon 20: 21-31, i ma hata Gorik diamarturomai (sian hata kerja martureo), na marlapatan manindangi marsitutu, manindangi mardongan parsitutuon. Hata on do na dipangke apostel Paulus manariashon ulaonNa manindangi di asi ni roha ni Debata nang di harajaonNa i (ida ayat 21, 23, 24, 25). Ala ni na dipatupa ibana ulaon manindangi mardongan parsitutuon i do umbahen na tarbahen ibana mamolus marragam tali (Gorik: desma, na marlapatan  hurungan) dohot haporsuhon (Gorik: thlifseis). Jala ala ni panindangion na marsitutu i do umbahen na barani ibana manghatindangkon (Gorik: marturomai) tu angka sintua na ro sian Miletis dohot Epesus i na lias do ibana sian sapata ni mudar ni saluhut nasida (ay 26). Jala panghatindangion di asi ni roha na songon i do na mambahen ibana barani manghatindangkon di jolo nasida na so adong dibuat apostel i sian nasida. Sude nasa tahi ni Debata dipabotohon tu nasida (ay 27).  Panindangion na marsitutu i do na mambahen ibana mangulahon ulaon marmahani angka naung porsea i, songon na pinatupa ni apostel Paulus di tongatonga ni halak Kristen di Miletus dohot di Epesus i arian dohot borngin mardongan iluilu. 

Boasa ma apala panindangion na marsitutu di asi ni roha ni Debata dohot di harajaon ni Debata pinatuduhon ni Apostel Paulus i, asa adong hamubaon ni roha dohot tubu haporseaon, jala ulaonna marmahani angka na porseai arian dohot borngin mardongan iluilu na dienet gabe jamita di tongatonga ni halak Kristen Batak sadarion di partingkian haheheon ni angka haporseaon nang ugamo na so haru mangondolhon asi ni roha ni Debata dohot harajaonNa na marsisihon hatigoran, hasintongan, pardamean dohot holong ni roha i? Molo marhobas di jolo ni Debata, ndang jadi songon i boti, alai ingkon di bagasan parsitutuon do, ndang tambatamba ni ulaon, alai prioritas do ulaon marhobas manang manindangi i.

Parjolo, atik na so marsitutu do nasailaon nang nuaeng hita halak Kristen Batak manindangi di asi ni roha ni Debata di bagasan Jesus Kristus dohot di harajaonNa i? Nian nunga ungkap dalan mamaritahon barita nauli nuaeng on marhite angka dalan na so adong di tingki na salpu ala nunga jumotjotan jolma nuaeng on meret sian inganan hatutubuna tu inganan na asing mangalului ulaon na imbaru dohot na dumenggan (migrasi dohot imigrasi), mansai denggan  transportasi darat, laut nang udara, godang angka alat bantu mamarsiajari hata na leban, bahat hepenng di portibion mandopang ulaon manindangi i, panindangi do na hurang, jala nunga ummura nuaeng pabotohon angka asi ni roha i marhite internet. 

Marsitutu do ganup huria nang ruas ni huria  ni Huria Kristen Batak nuaeng on manguduti tradisi ni angka apostel, i ma manindangi di asi ni roha ni Debata di bagasan Jesus Kristus i di bagasan parsitutuon asa boi tadok na lias do hita sian angka mudar ni na so porsea i, ai nunga sude tapabotohon taringot tu tahi ni Debata i? Suraon do ala lalap hita holan manghalashon naung diasii Debata i hita, lupa hita jala ndang hiras, hurang marsitutu hita patupahon ulaon panindangion di asi ni roha ni Debata i. umbahen ndang tapatupa angka pesta sending, pangajarion nang pelatihan patupa pandinangion di asi ni roha ni Debata tu angka na adong di humaliangta mamangke asi ni roha ni Debata. Nunga diparuar kantor pusat HKBP pedoman ulaon manindangi nian, alai beha do ganup huria, dipatupa do ulaon patauhon angka sitindangi, mamungka dakdanak dope?

Suraon do siala ndang tapatupa i di bagasan parsitutuon umbahen na gabe hita do baliksa gabe angka na umbege panindangion ni parugamo dohot parhaporseaon nang ideologi na asing di tingki on? Di ujungna, gabe adong ruas ni HKBP na di Humbang Habinsaran isarana na gabe manjalo panindangion ni na asing dung gabe pusat parawisata nasional Tao Toba dohot angka huta di humalingna.  Boasa ma ndang apala bahat parbarita nauli ni HKBP di duru ni HKBP? Boasa ma menet rohanta marnida ulaon ni angka parbarita naulinta di angka suku-suku terasing, gumodangan gogonta dohot sinadonganta tapatupa tu na ringkot di parmingguonta, dirinta? So tung ndang tarbahen hita di ujungna mandok n alias hita sian mudar ni angka na mate di duru ni asi ni roha ni Debata di bagasan Kristus i? Boasa ndang ringgas ruasta naumposo marbarita nauli, hape angka ruas ni ugamo na asing songon i nama militansina maniop dohot pararthon dakwah nasida. Boasa ma nang di panindangionta marhite angka ulaonta siganup ari di angka profesi na marragam i, ndang hiras rohanta patandahon asi ni roha ni Debata i marhite parangenta nag ok holong i, parangenta na patuduhon angka anak ni harajaon na gok hatigoran i, hasintongan dohot pardamean i hita? 

Paduahon, atik na so marsitutu be nuaeng hita halak Kristen Batak patupahon ulaon parmahanion arian dohot borngin mardongan iluilu, di tongatonga ni huria nang di duru ni huria I, gabe bahat ruas ni huria i na diroro babiat panoro, gabe marlomolomo angka tondi na jahat manegai masyarakatta, isara tondi parmusuon, tondi hamongkuson nang tondi mamingkiri diri?

Molo ndang apala marsitutu hita manindangi di asi ni roha nand di nilai-nilai ni harajaon di Debata asa tubu hamubaon ni roha dohot haporseaon di asi ni roha ni Debata i saleleng on, mansai denggan do asa tarimangrimangi muse songon dia do dirinta, hurianta marsadasada nang hatopan patupahon ulaon marhobas di jolo ni Debata marhite na manindangi di asi ni roha nang di harajaon ni Debata i. Molo dung taula i, tauduti ma, maniru apostel Paulus i. Amen.
  BeritaTerkait
  • Jamita Evangelium, 13 Oktober 2019, Minggu, XVII Dung Trinitatis: Mangolu di Dalan ni Jahowa (Psalmen 25: 8-15)

    3 hari lalu

    Oleh: Pdt Dr. Robinson ButarbutarParsameanta, STT-HKBP PematangsiantarSada siingotonta songon halak Kristen di  Negara Republik Indonesia i ma na mangihut on: "Sahat tu nuaeng sada bangso na maru

  • Jamita Evangelium, 30 Juni 2019, Minggu II Dung Trinitatis "Martua Halak Na Pinintoran ni Debata" Psalmen 32: 1-11

    4 bulan lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar, 0812-62472015Udut ni hatani Debata di minggu na salpu na manosoi hita asa manghangoluhon ngolu na badia asa saut hita masuk

  • Jamita Evangelium 18 Agustus 2019, Minggu IX Dung Trinitatis: Janghon ma Habisuhon sian Debata

    2 bulan lalu

    Oleh: Pdt Dr. Robinson Butarbutar, sian Parsameanta, STT-HKBP, HP/WA 0812-62472015Di ujung ni abad pa-20-hon sahat tu bona ni abad pa-21-hon, adong do sada hata na manggombarhon dia hasurungan manang

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    2 tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium, 14 Oktober 2018 Minggu XX Dung Trinitatis: Pir ma Tondim jala Marsihohot (Josua 1:-6-9)

    12 bulan lalu

    Oleh: Pdt Dr Robinson Butarbutar, Na tongon di Sipoholon dope dung mandohoti Sinode Godang HKBP 8-12 Oktober 2018, HP/WA: 0812-62472015Dipangke Debata Pargogo Nasohatudosan i do hita angka jolma, angk

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb