• Home
  • Agama
  • Jamita di Pesta Parningotan di Hananaek ni Tuhan Jesus, 21 Mei 2020: "Mamaritahon Barita Nauli tu Nasa na Tinompa" (Markus 16: 15-20)
KSP Makmur Mandiri
Selasa, 19 Mei 2020 16:21:00

Jamita di Pesta Parningotan di Hananaek ni Tuhan Jesus, 21 Mei 2020: "Mamaritahon Barita Nauli tu Nasa na Tinompa" (Markus 16: 15-20)

BAGIKAN:
ist
Pdt Dr Robinson Butarbutar
Oleh: Pdt Dr Robinson Butarbutar, Ketua Rapat Pendeta HKBP

Hamu angka Amang dohot Inang, Naposo Bulung nang angka dakdanak, ruas ni Huria ni Kristus hinaholongan di sandok Indonesia. Horas ma di hamu saluhutna. 

Tarjaha ahu do dua minggu na salpu sada barita di majalah elektronik ni Spiegel  marhata Jerman sada barita na hulapati mandok tona na mangihut on: "Andorang so masa Covid 19 ndang marna marhasil dope  usahanta manggotap parnangkok ni mohop ni sandok portibion di toru ni 3 Derajat Celsius, global warming, ala tung maol situtu do togihonon patupa i angka pamarenta di negara napogos, berkembang, dohot na mora/maju, nang angka pengusaha na metmet sahat tu naumbalga, songon i nang bahatan jolma pasohothon mohop ni portibion. Nang soara na gogo ni sundut na umposo parpudi on na mangido tu hita unang holan hata, madabu tu pinggol na nengel do.  Alai dung tolu bulan ne ma mansohot mangula industri na marragam i siala pandemic Covid 19 gabe so do hananangkok ni mohop ni portibion. Sian i boi do pastihononta na, dung monang hita maralohon Covid 19 on muse, mulak do muse pamohoponta portibion, jala aeonta sude angka na tinompa ni Debata i ma panghorhonna, na so dung taae dope saleleng dung adong jolma i. Mangae ma sude hita, nang angka pinomparta, ndang mardia imbar manang ise. Dumangol sian panghorhon ni Covid 19 on pe boi ma taae.

Ala ni i, di pesta parningotan ari hananaek ni Tuhanta Jesus tu banua ginjang laho hundul di siamun ni Ama i sadarion, songon na tarsurat di Evangelium Markus 16: 15-20 i, tung tahamauliatehon do panatapan na dao pinatupa ni Tuhanta Jesus uju i. Ditatap Ibana do hinaringkot ni angka siseanNa di sude partingkian dohot di sude inganan mamaritahon barita nauli tu sandok inganan di portibion, dohot tujuan: Asa naporsea dohot tardidi dapotan haluaon sian hamatean na manongtong i (ayat 16)  dohot asa marhamonangan mangadopi marragam parungkilon di ngolu nuaeng on hita jolma nang sandok natinompa ni Debata (Gorik: pase ktise). Monang hita maradophon angka sibolis, ulok, rasun, sahit. Jala tau hita marhata na imbaru (ayat 17-18). Tarbahen hita ma tong manarihon angka na tinompa na asing i.

Ala ndang neang, baliksa gok paroloon do tahe patupa ulaon mamaritahon barita nauli na songon i tu sandok na tinompaNa - ala sai margurasa dope hagogoon ni  hamatean na manongtong dohot angka parungkilon ni hajolmaon i,- angkup ni nauli na sahat tu na porsea ala tardidi i haluaon dohot hamonangan i, dibagabagahon jala dipahot Tuhanta do on tu hita  parbarita nauli, i ma: "Rap dohot hita, bersinergi dohot hita (Gorik: sunergountos) do Ibana (ayat 20). Ndang holan Ibana manang ndang holan hita na patupasa. Ber-sinergi. Rap do hita."

Mansai ringkot taauhon na ber-synergi i Tuhanta dohot hita: Di na manjagai haulion nang ngolu ni angka na tinompa na asing i. Di paraloonta mangadopi Covid 19. Tarlumobi ala ndang tarbahen dope hape rade vaksin naung taruji tu Covid 19 di sude di ujung ni taon on di tingki na jempek. Jala, mangihuthon WHO na boi do rap dohot hita jolma dope virus on tu lima taon na ro. Ala ni i, nang nunga tasangkapi di Indonesia na boi ma hita di ujung ni bulan Juli dohot di bulan Agustus taon on mulak muse mangula di duru ni jabunta, nunga tong dibonai Presidenta di minggu na salpu manosoi hita mamonai satibutibuna mardame dohot manang mangolu di hasomalan na imbaru, i ma mangolu rap dohot virus on. Dalanta hot do, i ma hot hita manjaga jarak, marmasker, dohot marhaiason. Jala marsiajar hita mar-ngolu ekonomi imbaru. Ndang be songon nasailaon. Nang di na imbaru i rap dohot hita do Tuhanta i. Pos ma rohanta. Amen. 
  BeritaTerkait
  • Jamita Evangelium, Pesta Parjolo Parningotan ni Haheheon ni Tuhan Jesus 1 April 2018: Gabe Sitindangi Haheheon ni Kristus (Ulaon Apostel 10: 39-43)

    3 tahun lalu

    Oleh: Pdt. Dr. Robinson Butarbutar, Sian Parsameanta, STT-HKBP PematangsiantarBarita nauli taringot tu haheheon ni Jesus Kristus sian hamatean nunga marrumangkun barita klassik di portibion mamungka s

  • Jamita Evangelium, 25 Desember 2018, Pesta I Paringotan Hatutubu ni Tuhan Jesus: "Immanuel: Donganta do Debata" (Mateus 1: 18-25)

    2 tahun lalu

    Oleh: Pdt. Dr. Robinson ButarbutarSian Parsameanta, STT-HKBP PematangsiantarHP/WA: 0812-62472015 Selamat ari Natal ma di hita saluhutna. Ganup sahat hita tu ari parningotan di hatutubu ni Tuhanta J

  • Jamita Minggu V dung Trinitatis, 1 Juli 2018 Evangelium: Markus 16: 14-20 "Mamaritahon Barita Nauli tu nasa Natinompa"

    2 tahun lalu

    Ndang mansohot turgas mamaritahon barita na uliSian di bonana i sahat tu nuaeng, sian abad parjolo dung hehe Jesus Kristus sian hamatean sahat tu na naung hundul Ibana di siamun ni Debata Ama i di ban

  • Jamita Evangelium, 21 April 2019 Pesta Parjolo Parningotan Ari Haheheon ni Tuhan Jesus "Haporseai ma Kristus Naung Hehe i" (Johannes 20: 34-31)

    2 tahun lalu

    Oleh: Pdt Dr. Robinson ButarbutarSian Parsameanta, STT-HKBPHP/WA: 0812-62472015.Sian tingki tu tingki, sian tingki na robi di abad parjolo sahat tu abad padua pulu sadahon nuaeng, sada ulaon ni angka

  • Jamita Pesta Parjolo I, Parningotan Ari Haheheon ni Tuhan Jesus 12 April 2020

    7 bulan lalu

    Pinatolhas ni Pdt Dr Robinson Butarbutar, Ketua Rapat Pendeta HKBP"Huaso ni Haheheon ni Jesus" (Mateus 28: 1-10)Selamat Paskah ma di hamu saluhutna, angka Dongan.   Barita na mansai uli siau

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb