• Home
  • Agama
  • Jamita Minggu I Dung Epiphanias, 10 Januari 2021: "Pasangap ma Debata di Bagasan Habadiaon (Psalmen 29: 1-19)"
KSP Makmur Mandiri
Minggu, 10 Januari 2021 07:47:00

Jamita Minggu I Dung Epiphanias, 10 Januari 2021: "Pasangap ma Debata di Bagasan Habadiaon (Psalmen 29: 1-19)"

BAGIKAN:
Edward Tigor Siahaan
Pdt Dr Robinson Butarbutar
Pinatolhas ni E0phorus HKBP Pdt Dr R.Butarbutar

I. Pamonai

1. Hamu angka ruas dohot parhalado ni HKBP na pinarbadiaan ni Debata Sitolusada. Tabe ma di hamu saluhutna sian sude uluan ni hurianta  periode 2020-2024 on di tirket hatopan dohot di tirket distrik songon i nang sian sude parhobas ni kantor pusat HKBP di Pearaja dohot di angka lembaga pendidikan, zending nang diakonia, toropna 650 halak, dohot sian sude pandita ni HKBP na manguluhon ulaon ni hurianta rap dohot angka parhalado partohononan dohot parhalado na so partohonan di sandok distrik, tarlumobi sian nasida na mangula di distrik DKI, na so tarbahensa ro sadarion di ulaonta mangojakhon Praesesta na imbaru tumorop sian na boi andorang so sahat Covid 19 tu hita on, alai na dohot di bagasan tangiangnasida sian inganannasida be.  Horas ma di hamu saluhutna. Tuhanta pardenggan basa i ma manggohi rohamuna dohot las ni roha siala haluaonta i, jala na mamasumasu hamu nuaeng, nang di na laho ruas sian bagas noroNa on.

2. Hamu angka dongan, ganup dipanghulingi Debata hita marhite hataNa na tarsurat di Bibelta on, sai  lam bagas do panandaionta di Tuhanta i, lam tumangkas tatanda hadirion ni Debata. Taingot do hataNa tu hita di tanggal 27 Desember i, di na dijouhon tu nasa na adong mamujimuji Debata, i ma angka na adong di banua ginjang, di hasiangan on, dohot di portibion, angka dolok, sunge, rura, suansuanan, jolma i, angka raja, sundut na tumua dohot sundut na umposo, ai Ibana do na manjadihon hita sude, Ibana mangaturhon, jala Ibana patimbo tanduk ni bangsoNa.  

3. Dung i dipanghulingi Debata hita di taon naimbaru tgl 1.1.2021 i marhite hataNa na tarsurat di 4 Musa 6: 22-27 i na mamasumasu hita marhite angka naposoNa dohot pasupasu na ringkot di ngolu pardagingonta on, unang mabiar hita mandalani taon na imbaru on di tongatonga ni pandemic Covid 19. Jala di ari Minggu tanggal 3 Januari na salpu i dijouhon tu hita asa mamujimuji Ibana ala ni marragam pasupasu partondion na sian banua ginjang di bagasan Jesus Kristus i domu tu haluaonta, i ma: Ulaon ni Debata naung millit Debata hita andorang so ojak dope hasiangan on, nunga ditodo Ibana hita gabe angka anakNa, nunga dipalua Ibana hita marhite mudarna, nunga dapotan partalian hita, nunga disahaphon Tondi Porbadia tu hita, jala gabe sitean arta banua ginjang i hita, jala dilehon di hita kesempatan umbege hataNa jala gabe porsea. Sudena pasupasu partondion i mangonjar hita asa mamuji Ibana di bagasan hasangaponNa.

II. Jamita: Pasangap Debata di bagasan habadiaon

1.Di Minggunta sadarion, diuduti ma manjouhon tu hita ndang holan mamujimuji Ibana, alai asa pasangap Debata di ngolunta ganup, alai pasangaphon Ibana di bagasan Habadiaon. Didok di hata Batak: "Marpahean marhadohoan."  Ala ndang tarbahen hita pasangaphon Debata di bagasan dosa. Ndang tarbahen hita pasangaphon Debata molo mian di bagasan dosa ngolunta, sai mangolu di bagasan dalan-dalan na gok dosa ngolunta. Dijouhon tu hita asa talehon hamuliaon dohot hasangapon tu Debata, ndang baliksa hamuliaonta dohot hasangaponta tatuju, taparaeahi di ngolu on. Mansai ampit do joujouNa i tu hita halak Batak na marfalsafah ni ngolu marhasangapon. Denggan situtu do hasomalan ni halak Batak na marminggu marpahean na denggan, na uli. Alai ndang tuk i sambing. Alai ingkon sahat do tu ngolungolunta siganup ari, di jabunta, di masyarakat, di na taula jabatanta i, di partigatigaon, di angka usahanta na marragam i.

2. Laho mangurupi hita patupa i, i ma ulaon mangalehon hasangapon tu Jahowa i, dipatuduhon ma tu hita boasa tama lehononta hasangapon tu Tuhan i (ayat 1-2), i ma hagogoonNa marhite soaraNa. Pola pitu hali dipatolhas 'soara ni Debata i,' jala ganup marsoara Debata ndang tarbahen so angka hitir, ndang tagamon so berreaksi angka na tinompaNa i. Di ayat  i 3-10 dihatindangkon na  panindangion na dao gumogo do hagogoon ni soarani Debata sian hagogoon ni  angka na tinompa i. Gariada tuk do soara ni Jahowa parohon ronggur. Soarana manaluhon angka hau ares  di Libanon, mambahen humuntal halongonan isara halongonan Kades, manggurasahon jillam ni api, marasar angka tini, mambahen aek na sumar. Di toru ni huasoNa do angka i. Molo tu angka i tarbahen Debata do patupa sudena i marhite soaraNa, denggan situtu do molo nang hita mangalehon hasangapon dohot hamuliaon nang hagogoon tu Ibana. Ndang hita sipasangapon. Ndang hita na marhagogoon. Ndang hita na marhamuliaon. Molo tung adong i dipalumehon Debata tu hita, unang tadok na hita do na marhasangapon dohot marhamuliaon nang marhagogoon. Ibana sambing do.

3. Na mansai bagas di haposi parPsalmen, i ma, na tarsurat  di ayat 11. Dung dijouhon tu hita asa tapasangap Debata, jala diurupi hita patupa i marhite na patorang hagogoon ni soar ani Debata na mangatasi angka na boi disura jolma i sihabiaran dohot sipasangapon dipatolhas ma na lehonon ni Jahowa do pargogo tu bangsoNa, jala tumpahanNa bangsona di ari sogot mardamedame.  Nian ndang apala didok, 'molo talehon hasangapon tu Debata Jahowa, lehononna ma pargogo dohot mardamedame ma bangsoNa.' Alai, na boi do diantusi mata partondionta na apala i do nidok ni parPsalmen: Ulaon pasangaphon Debata mampanghorhon di na mangihut on: Lehonon ni Debata ma tu hita pargogo na dipangke Debata patupa hadameon di ngolunta.  Di na tapasangap Debata di bagasan habadiaon, marpahean marhadohoan, palumehonon ni Jahowa do tu hita sude, huria nang masyarakat nang bangso dohot negaranta pargogo dohot hadameon, syalom. 

4.Asa mansai denggan do hita patupa pangarimangrimangon di bagasan sadarion.  Taboto do parugamo bangsonta. Alai boasa ndang marna hehe angka pargogo di ganup tirket di negaranta on na tuk hatop patupa hadameon di tongatonganta, sian desa sahat tu pusat?  Nunga dipatuduhon Presidenta Keteladanan beha manguluhon sada bangso i ma marhite na pasangap Debata di bagasan integritas. Alai sai bahat dope na so apala mangurupi tu sintasintanta membangun Indonesia na tigor dohot mardohar, gok dame? Suraon do ala ndang talehon dope hasangapon, hamuliaon tu Debata di bagasan habadiaon? 

5.Boasa hurianta ndang tuk dope patulushon visinta gabe pasupasu tu portibion? Suraon do ala ndang tapatupa dope ulaon pasangaphon Debata di bagasan habadiaon. Sotung maon sian Ephorus sahat tu angka sintua, parhalado na so partohonan dohot parhalado partohonan, nang ruas marsadasada ndang dope pasangaphon Debata di bagasan habadiaon? 

6.Ala ni i, marojahan tu joujou ni Debata marhite parPsalmen, mansai denggan do hita marsada-sada, dohot ma Praesesta naung diojakhon di tangal 3.10 i dohot sadarion tgl 10.1 laho manguluhon hurianta di ganup distrik na 32 i mangarimangrimangisa: Di na tapasangap Debata di bagasan habadiaon, tubu ma, lam bahat ma tubu angka pargogo sian tongatonganta di tongatonga ni bangsonta Indonesia on, nang di portibion, i ma angka pargogo na paro syalom, hadameon na hibul.  

7.Beha ma asa boi on masa di bagasan periode on dohot tu ariari na ro: Ingkon tapatupa ma ulaon membentuk karakter anak-anak HKBP na rade jala olo pasangaphon Debata di bagasan habadiaon. Ai ia so i, na boi do gabe dapotan hita hasurahan di haroro ni Kristus.  Jala i do ulaonta angka partohonan di HKBP, membangun sada generasi bar una transformatif, na saurdot pamujionNa tu Debata dohot ngoluna na marhabadiaon, membangun sada generasi HKBP na berintegritas, na bersih, yang kudus.

  BeritaTerkait
  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    4 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium, 25 Nopember 2018, Minggu Ujung Taon Parhuriaon, Daniel 7: 9-14: Harajaon ni Debata Na Manongtong

    2 tahun lalu

    Oleh: Pdt Dr Robinson ButarbutarDi bagasan lobi dua taon parpudion sahat do tu ganup hita barita masa na mangihut on: Tongon marusaha do angka bangso na balga jala na gogo manggulut huaso na tumimbo d

  • Jamita Evangelium, 9 Desember 2018, Minggu Advent II, 1 Petrus 2: 11-12 : Manomunomu Tuhan i Marhite Parange na Denggan

    2 tahun lalu

    Oleh: Dr. Robinson Butarbutar, sian Parsameanta, STT-HKBP Pematangsiantar, 0812-62472015.Nunga sada fakta na ingkon adopan ni angka bangso di portibion nuaeng na siala ni marragam sibonsiri na mansai

  • Jamita Evangelium Minggu Epiphanias, 6 Januari 2019" MANGOLU DI BAGASAN LOMO NI ROHA NANG SANGKAP NI DEBATA" (Jakobus 4: 13-17)

    2 tahun lalu

    Oleh: Pdt Dr. Robinson ButarbutarSian Parsameanta, STT-HKBPHP: 0812-62472015Di hita halak Kristen Batak, di ujung taon Romawi na buruk dohot di bona ni taon Romawi na imbaru, sai marpungu do ganup kel

  • Jamita Evangelium, 13 Januari 2019, Minggu I Dung Epiphanias "Debata Manogunogu/Mandongani BangsoNa" (2 Musa 33: 12-17)

    2 tahun lalu

    Oleh: Pdt Dr. Robinson Butarbutar, Parsameanta, STT-HKBP. HP/WA 0812-62472015Sada hata na dipangke rakyat Indonesia manggombarhon panghirimon ni rakyat idaonna patupaon ni angka pamarenta di sude tirk

  •   komentar Pembaca
    Copyright © 2021 Pelita Batak Online. All Rights Reserved. Design by. heriweb