• Home
  • Agama
  • Jamita Minggu Evangelium, 3 Nopember 2019 Minggu XX Dung Trinitatis :"Saroha Sapingkiran di Bagasan Tuhan i (Epesus 5: 22-33)
KSP Makmur Mandiri
Sabtu, 02 November 2019 11:55:00

Jamita Minggu Evangelium, 3 Nopember 2019 Minggu XX Dung Trinitatis :"Saroha Sapingkiran di Bagasan Tuhan i (Epesus 5: 22-33)

BAGIKAN:
Ist
Robinson Butarbutar
Oleh: Pdt Dr. Robinson Butarbutar
Sian Parsameanta di STT-HKBP

Dung marjongjongan angka punguan ni angka na porsea tu diri dohot ulaon ni Jesus Kristus na paluahon angka pardosa di hau pinorsilang i di angka kota di Kekaisaran Romawi mamungka sian dekade paopathon sahat tu dekade papituhon abad parjolo migor tibu do disoarahon, diondolhon, diajarhon, ditorushon jala dipatogu angka uluan ni angka punguan i do angka ruhut-ruhut ni parsaoran ni halak Kristen, ndang holan sama nasida, alai dohot do parsaoran nasida dohot angka dongan hombar jabu nang angka dongan saulaon nasida di tongatonga ni masyarakat nasida. 

Mansai ringkot do i tibu dipatupa, ala ndang tarbahennasida be marhangoluan songon nasailaon. Ndang tarbahennasida be marparsaoran dohot dongannasida saripe, sahombar balok, sahuta nang saulaonnasida be tahe songon nasailaon. Ai nunga meret nasida sian ngolu na so tumanda Kristus Jesus tu ngolu naung tumanda Ibana. Ala ni i songon dia nasida marsaor dohot dongannasida jolma ganup ari nunga ingkon marojahan tu pangajarion, lomo ni roha dohot pangidoan ni Jesus Kristus, ai Ibana nama siihuthononhon. Songon dia nasida marsaor nunga ingkon marsorminan tu pambahenan ni Kristus Jesus maradophon samanasida, marsasahalak dohot marsasapunguan (Jaha: marsahuria). 

Na songon i do isarana  na sai dipatorang apostel Paulus tu angka huria na dipajongjong Debata marhite ulaon pamaritaon barita nauli pinatupana, isara tu angka ruas ni huria di Tessalonika, di Galatia, di Roma, di Korintus, dohot na di Filippi. Na songon i do tong na pinatorang ni panurat ni surat 1 Petrus tu angka na porsea bangso Jahudi dohot na so Jahudi di parserahan di kekaisaran Romawi asing ni na di Propinsi Syria-Palestina.  Na songon i do tong na pinatorang ni na manurathon surat 1 dohot 2 Timoteus nang surat Titus. Ndang marimbar  nang ginurithon ni panurat ni surat tu angka ruas ni huria di Kolosse nang di Epesus. Laos angka na tarsurat di angka surat i do na diihuthon angka rus ni huria dung abad na parjolo sahat tu nuaeng di angka inganan na marragam i di sandok portibion, ndang marimba di angka punguan ni halak Kristen Batak mamungka sian abad pa-19-hon sahat tu tingki on, ndang holan di tano Batak, alai dohot do di parserahan di sandok Indonesia nang di duru ni Indonesia, manang di dia pe nasida mian, mangula dohot marsaor. Pangulahonon na songon i do dalan ni angka siihuthon Jesus i patuduhon hadirionnasida songon sira dohot panondang ni portibion, ndang baliksa gabe sarombangnasida/hita dohot portibion. 

Isarana, songon na tarida tangkas di surat Epesus 5: 22-33 on, dialusi panurat ni surat on ma sungkunsungkun on: Songon dia ma parsaoran ni Ama dohot Ina di tongatonga ni parsaripeon ni halak Kristen?" Masiboan lehengna do manang, rap mardalan, saroha? Rap patupahon tanggung jawabna be do, ndang masisoluhon, ndang masituganan, manang masipasombu tanggung jawabna be. Ala dua gabe sada daging do nasida, beha ma asa ganup patupahon na ingkon patupaonna be. Masipatupa lomona do manang saroha mangadopi siadopan, patupa sipatupaon, mandungdung sidungdungon, uju las ni roha dohot uju masa arsak ni roha? Songon Ama di duru ni huria i mamereng Ina donganna saripe do manang marasing sian i? 

Isarana, somal do di bahat bangso di portibion mamungka sian tingki na robi andorang so ro Kristus, nang dung ro Kristus, andorang so millennium parjolo dung Kristus nang sahat tu dung millennium paduahon dung Kristus, panatapan dohot pambahenan na marnida ina dongan saripe ni sada ama songon nampuna manang arta ni ama i, situhoron, di toru ni huaso ni ama i. Jolma kelas dua do boruboru i. Songon i do ama siihuthon Jesus marnida donganna saripe? Ndang be antong. I do ginurithon ni apostel Paulus tu huria na di Galatia bindu 3: 26-28. Naung tardidi tu bagasan Kristus dos do hadirionna di jolo ni Kristus.  Jala, molo tung pe di jolo ni angka budaya ni sada bangso di portibion, ia ina di sada parsaripeon/keluarga i  ingkon unduk jala marhabiaran tu ama di pardongansaripeonna, di tongatonga ni pardongansaripeon ni halak Kristen ndang songon i boti cara marnida ni ama siunduhokonon dohot sihabiaran ni ina i maradophon ina dongansaripena i. Laos songon i do tong pangantusion ni ina i maradophon ama donganna saripe i.  Marasing do haunduhon ni ina i tu ama i. Marasing do pamerengon ni ama i tu ina i. 

I do na pinatolhas ni na tarsurat di Epesus 5: 22-33 i. Sian sampulu dua ayat ni Epesus 5: 22-33 i holan opat ayat do na dipangke mangondolhon songon dia ina i mamereng ama donganna saripe, i ma na tarsurat di ayat 22-24 dohot ayat 33b. Alai ualu ayat ma dipangke laho paimbaruhon pamererngon ni ama maradophon ina i jala dia sipatupaonna tu ina i (i ma na di ayat 24-32a). Tung ganjang do dipangke laho manguba pamerengon ni ama i maradophon ina i. Duansa, i ma songon dia ina i maradophon amantana dohot songon dia ama i maradophon inantana dipatorang ndang be dos tu songon dia nasida mamereng ganup di duru ni Hakristenon uju i. Ndang be songon nasailaon be. Alai adong naimbaru. Nunga marasing. Dia ma i? I ma ingkon marsiajar sian ulaon dohot pamerengon ni Jesus Kristus maradophon huria i. Songon dia huria i maradophon Kristus, songon i ma ina i marnida amantana.

Parjolo, haunduhon na hibul (Gorik: hupotasso) ni ina tu ama i songon haunduhon ni huria i tu Tuhan i do, i ma Jesus Kristus i, ai baoa i do ulu ni ina i do songon Kristus i ulu ni huria i. Songon dia hita ruas ni huria unduk tu Kristus, ingkon songon i ma haunduhon ni ina i tu amantana. Songon pamerengon ni huria i tu Kristus, i ma Kristus do uluan ni huria, songon i ma pamerengon ni ina i maradophon amantana.  Unang migor tapasunghunhon boasa tu boruboru dipangke hata unduk hibul, hupotasso? Boasa tu baoa annon ndang i, i ma manghaholongi? Mardingkan? Boti,  di ayat 21 nunga didok ganup do ingkon unduk tu ganup, hupotasso. Nunga i ojahan ni parsaoran sama naporsea, ruas ni huria.

Paduahon, asa unang songon portibion pamerengon dohot pambahenan ni ama i tu ina donganna saripena, diajari ma ama i asa mamereng ina donganna saripe i songon Kristus Jesus mamereng dohot mangula patupahon nauli tu huria i. Dia ma i? 

I ma manghaholongi ina songon dirina sandiri (ayat 29) marhite na so jadi manghosomisa alai baliksa marmudumudu dohot marpainuhonsa (ayat 29). I do umbahen na ingkon tadingkonon ni baoa i ama dohot inana mangangkupi dongansaripena asa sada daging nasida (ayat 31). Ulaon manghaholongi ina donganna saripe i i maniru Jesus Kristus na patupa naopaton maradophon huria i do (ayat 25), i ma: 

(i) Tu pamatang huria i songon pamatangsna, sipalua (Gorik: Soter. Bibel tingkos Batak huruang, Sipangolu.) do Jesus (ayat 23b). 

(ii) Manghaholongisa marhite na mangalehon diriNa manghophopsa (ayat 25)

(iii) Mamparbadiaisa dung paiashonsa di bagasan pandidion i (ayat 26)

(iv) Mamparbadiaisa, pola so marlindang, so marhalingking, so hasurahan (ayat 27)
Ala ni i boi dohonan songon on: Holan ama naung mananda, manghalashon ulaon ni Kristus tu huria i do na tuk denggan, marasing manghaholongi ina donganna saripe. Holan ina naung mananda, manghalashon haunduhon ni huria i maradophon Kristus naung patupa angka na uli tu huria i do na tuk denggan unduk tu ama donganna saripe.   

Boasa ma nuaeng ingkon i na gabe jamita di tongatonga ni hita ruas ni HKBP di partingkianta nuaeng?

Parjolo, suraon do ala ndang unduk be angka ina maradophon angka amantana siala ndang be unduk be huria i di tingkion tu Jesus Kristus i? Holan lomolomona nama na dipatupa, ndang lomo ni roha ni Kristus?
Paduahon, suraon do ala angka ama di tongatonga ni hurianta nuaeng nunga pabahathu mangido asa unduk dongansaripenasida tu nasida, hape ndang dihaholonginasida be angka ina dongan saripenasida songon Kristus na patupa naopat di ginjang i tu huriaNa? Suraon do ala ndang be ditanda, diauhon dohot dihalashon angka ama di pardongansaripeon ni halak Kristen Batak di tingkion be angka ulaon ni Kristus i tu huriaNa sahat tu tingkion? Ala songon i nasida, gabe marlea ma Kristus dibahennasida ala pambahenannasida na so manghaholongi ina dongan saripenasida i, baliksa gabe patupa angka na maralo tu angka ulaon na denggan na pinatupa ni Jesus Kristus tu huria i?

Denggan do tapareso songon dia nuaeng di angka keluarganta be haunduhon ni ina i tu ama i? Denggan do tong tapareso holong ni roha ni ama i tu angka ina donganna saripe. Sotung nunga alo ni na pinatupa ni Kristus tu huriaNa i na pinatupa ni angka ama tu inantana, isara patupa Kekerasan Rumah Tangga tu nasida, ndang holan kekerasan fisik alai dohot do kekerasan psikologis?Taon 2016 torop hamamasa kekerasan rumah tangga maradophon boruboru di Indonesia: 259.150.  Di taon 2017 adong 300.000 pengaduan kasus kekerasan Rumah Tangga maradophon boruboru. Marragam sibonsirina, termasuk ma i ala ni alkoholisme, budaya patriarkhi, dohot hapogoson.

Denggan ma hita mangarimangrimangisa. Muba ma hita molo alo ni hata ni Tuhanta i na sanga tapatupa saleleng on. Tauduti ma patupahonsa molo nunga na pinangido ni hata ni Tuhanta i taulahon saleleng on maradophon amanta donganta saripe dohot maradophon inanta donganta saripe.(**)
  BeritaTerkait
  • Jamita Evangelium, 4 Nopember 2018 Minggu XXIII Dung Trinitatis 2 Tim 1: 6-14 "Paratarata ma Silehonlehon ni Debata na Sahat tu Ho"

    tahun lalu

    Sian Parsameanta, STT-HKBP, Pdt Dr. Robinson ButarbutarDung manjonok marumur dua ribu taon pardalanan ni huria ni pinajongjong ni Jesus Kristus di portibion marhite ulaon ni TondiNa Tondi Porbadia di

  • Jamita Evangelium 23 Juni 2019, I Dung Trinitatis: Ngolu na marhabadiaon di jolo ni Debata (Pang 22: 12-17)

    5 bulan lalu

    Oleh: Pdt Dr. Robinson Butarbutar Parsameanta, STT-HKBP (0812-62472015)Hamu angka dongan,Di Minggu Parjolo Dung Trinitatis sadarion, di na tapabagas panandaionta di Hadirion, Ulaon nang Lomo ni Roha n

  • Jamita Evangelium, 15 September 2019, Minggu XIII Dung Trinitatis "Mangolu di Bagasan Serep ni Roha" (Lukas 14: 7-11)

    2 bulan lalu

    Oleh: Pdt Dr. Robinson Butarbutar, sian Parsameanta, STT-HKBPDi tongatonga ni parsaoran hajolmaon sian narobi sahat tu nuaeng on, sai dipodahon angka natuatua dohot pangajari do hinaringkot ni serep n

  • Minggu XVI Dung Trinitatis, 6 Oktober 2019, Evangelium: Ulaon 20: 21-31, MARHOBAS DI ADOPAN NI JAHOWA

    satu bulan lalu

    Oleh: Pdt Dr. Robinson ButarbutarDi pardalanan ni ngolu dohot ulaon ni Debata di portibion sai dipangke Ibana do angka jolma na tinompaNa i mangula rap dohot Ibana pasauthon angka sangkapNa mansai uli

  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

    2 tahun lalu

    Oleh: Pdt Dr Robinson Butarbutar, Dosen STT HKBP1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb