• Home
  • Agama
  • Jamita Minggu Evangelium, 17 Nopember 2019: "Marpanarihon tu Dongan Jolma" (Filippi 4: 10-20)
KSP Makmur Mandiri
Sabtu, 16 November 2019 19:54:00

Jamita Minggu Evangelium, 17 Nopember 2019: "Marpanarihon tu Dongan Jolma" (Filippi 4: 10-20)

BAGIKAN:
Ist
Pdt Dr Robinson Butarbutar
Sian Parsameanta, STT-HKBP Pematangsiantar
Pdt Dr. Robinson Butarbutar, 0812-62472015

Di sejarah ni ulaon pamaritaan barita nauli pinatupa ni halak Kristen mamungka sian abad parjolo sahat tu nuaeng on, tarjou do ganup na porsea asa borhat mamaritahon barita nauli tu sandok portibion, anggiat boi tong taruli di barita nauli i angka donganta jolma na asing di sandok portibion, di inganan na jonok, na dao jala na dumao sian inganan parmiananta.

Alai ala ndang haru sude hita boi borhat maninggalhon ulaonta di hutanta be, boi do hita halak Kristen mamaritahon barita nauli tu angka na asing na mian dao sian tongatonganta  marhite angka parbarita nauli na borhat tu luat na asing i. Songon dia dalanna?

I ma marhite na dohot manumpahi nasa na ringkot di parbarita nauli na borhat tu luat na asing i. Marhite ulaon ni parbarita nauli  na tinumpahan i dohot do iba marpanarihon tu donganniba jolma, asa taruli nasida di barita nauli na sian Tuhanta Jesus i.  Songon i do na pinatupa ni halak Kristen di kota Filippi di taon 50-an abad na parjolo. Tangi do nasida di hata ni Debata pinatolhas ni apostel Paulus  jala na ginurithononna muse di Filippi 2: 4 taringot tu tondi marpanarihonon ni angka na porsea i tu dongan jolma, i ma: "Unang ma holan na ringkot di hamu be matahon hamu, dohot ma na di dongan." Ditumpahi nasida do ulaon pamaritaan barita nauli pinatupa ni apostel Paulus i di angka luat na asing di Kekaisaran Romawi , ndang holan na manongos sada sian tongatonganasida, i ma si Epaphroditus laho mangurupi apostel i mangulahon ulaon pamaritaan i, alai dohot do marhite na manongos sinadongan (jaha: Hepeng) nasida pangkeon ni apostel i tu na ringkot di ongkos pardalanan mardarat dohot markopal, parbornginan, manuhor sipanganon dohot na asing na ringkot di ulaon i.

Dipatupa nasida i sian bonana mamungka dung borhat apostel  Paulus sian Filippi tu kota Tessalonika. Ulaonna di Tessalonika marparbue na lomak do. Bahat di Tessalonika na manjalo barita nauli binaritahonna disi. Bahat disi na manadingkon angka debata sileban, manomba Debata na mangolu i di bagasan Jesus Kristus. Dipatupa nasida i atik pe marhite tanganna sandiri mangula do tong apostel Paulus i manggohi na ringkot di ibana dohot di angka donganna sapardalanan di ulaon mamaritahon barita nauli i. 
Songon i ma parsidohoton ni halak Kristen na di Filippi i di ulaon manarihon dongannasida jolma asa dapotan di asi ni roha ni Debata di bagasan Jesus Kristus sampe pola adong pangantusion di roha ni apostel  Paulus dohot di roha nasida na mandok  na "saparsaoran" manang di hata Indonesia bermitra do nasida di ulaon pinatupa ni apostel Paulus i. Holan huria Filippi on do pola sahat tu na bermitra dohot apostel Paulus manarihon dongan jolma marhite ulaon mamaritahon barita na uli.  Nian dao gumodang do sinadongan ni halak Kristen na adong di kota Korintus sian sinadongannasida. Alai ndang tarbahen apostel Paulus "saparsaoran" manang bermitra dohot halak Korintus ala lomo roha ni halak Korintus mamereng toru angka na dapotan pangurupion sian nasida. 

(Catatan na ringkot: Ia hata na dipangke apostel Paulus manurathon "parsaoran" i di hata Gorik i ma ekoinonesen, bentuk aorist sian  kata kerja koinonoo, ahu marsaor. Di hata Batak migor dilapati tu parsaoran/kemitraan di bidang parhepengon: "donganku mangetong hepeng" (Filippi 4: 15). Nunga masuk disi penafsiran di Bibel pangalapation ni hata Batak i, ala taringot tu hepeng dihatai di ayat 16-18. Na sumintong mangalapati hata ekoinonesen i ma "nunga saparsaoran"/bermitra).

Di hata "saparsaoran" manang bermitra i ndang adong na manghilala ibana mangalehon turgas tu sasahalak, na asing manjalo turgas sian ibana, alai rap saparsaoran manang rap bermitra nasida di ulaon manarihon dongan jolma marhite ulaon mamaritahon barita nauli. Apostel Paulus dohot angka donganna na borhat mamaritahon barita nauli, alai halak Kristen Filippi manarihon na ringkot tu ulaon i, i ma personalia di hadirion ni Epaphroditus dohot hepeng, sahali ro di dua hali. Songon i ma balga ni tanggung jawabnasida di parsaorang manarihon dongan jolma i, ndang ala hurangan apostel i, jala ndang ala ndang tuk ibana di ngolu na marhahurangan, alai gabe boi diida apostel i na uap na husus do pinarade nasida i songon pelean halaean halomoan ni roha ni Debata (Filippi 4: 16-18). Alai pelean tu Debata do i dilehon nasida dihaposi apostel i do na gohan ni Debata do tu nasida na ringkot di nasida hombar tu hamoraonNa i di hasangapon i di bagasan Kritus Jesus. Asa, ala ni parsaoran di ulaon manarihon dongan marhite mangalehon na ringkot tu apostel i ndang na gabe hurangannasida, alai baliksa gabe gohan ni Debata do na ringkot di nasida.

Parsaoran manang kemitraan manarihon na ringkot di dongan jolma marhite panumpahion di ulaon mamaritahon barita nauli pinatupa ni Apostel Paulus sisongon i do na tongtong diula angka naporsea i sian partingkian ni apostel Paulus sahat tu nuaeng on. Bahat do parbarita nauli na sai borhat dope mamaritahon ulaon mamaritahon barita nauli i di hutana, di luat na asing, di negara na asing, dohot di benua na asing na patupahonsa di bagasan parsaoran dohot angka na porsea di Jesus Kristus. Adong do i marhite na pajongjong sada lembaga manang badan pamaritaan barita nauli, isara di Rheinische Mission Geselschaft manang na ditanda halak Batak songon RMG manang Barmen Mission. Di bonana halak Kristen Jerman marsasahalak do na mangalehon sinadonganna laho patupa ulaon pamaritaan barita na uli di tano Batak nang di benua Afrika songon dalan nasida manarihon halak Batak na so mananda Kristus dope. Nasida do na paradehon na ringkot tu ulaon ni angka misionaris na mangula di duru ni Jerman, ndang marimbar dohot di tano Batak. Gabe dapotan asi ni roha ni Tuhan Debata nasida. Songon i do tong Overseas Missionary Fellowship na manongos Hudson  Taylor tu China. 

Di laonlaon ni ari ndang apala ruas ni huria i be na langsung manarihon na ringkot tu ulaon misi, alai angka hurianasida nama. Ditumpahi nasida ma huria nasida marhite pelean na dipapungupungu.  Nuaeng on pe adong do angka parbarita nauli na so apala borhat tu huta na asing, alai marhite ulaon pamaritaan barita nauli na digital naboi mandungdung na asing marhite digitalisasi. Di na patupa i nasida adong do na diurupi angka ruas ni huria na ulaonna di ulaon di duru ni marbaritat nauli, i ma mangula di ngoluna siganup ari. Di tongatonga ni hurianta pe dipasahat ulaon ni huria i tu angka parhalado partohonan na gok tingki, dohot parhalado na so partohonan. Nasida na so parhalado i manumpahi angka ulaon ni angka partohonan i laho manarihon sude ruas ni huria i di bagasan huria i nang di duru ni huria i marhite ulaon mamaritahon barita na uli dohot ulaon parasi ni rohaon.
Uju sanga margurasa pangantusion na mandok ia dalan na dao dumenggan manarihon dongan jolma i ma parsidohot mamaritahon barita nauli ni Jesus Kristus asa porsea bahat jolma di Jesus Kristus, holan ulaon na songon i do diida ulaon manarihon dongan jolma. Holan mendukung ulaon ni parbarita nauli asa porsea jolma di Jesus Kristus do na dirajumi dalan na dumenggan manirhon dongan. Angka evangelis dohot pandita nang na so pandita ma na diurupi mangulahon ulaonna. 


Alai dung dohot tong margurasa pangantusion na ia ulaon manarihon dongan jolma I martujuan ndang holan asa porsea jolma di Jesus Kristus, alai nunga dohot tong asa pistar jolma mangatur ngoluna dohot asa dapotan hahipason jolma i, ba dohot mamaritahon barita nauli ndang holan angka evangelis dohot pandita dna, alai dohot do angka dokter dohot angka na tau jala pistar mangajari di daerah-daerah misi na dohot diurupi angka na porsea i, dalan nasida parsidohot manarihon dongannasida jolma di inganan dohot di luat na asing. Ndang holan dokter dohot angka paramedis dohot pangajari tahe, alai dohot do angka na malo patupa pengembangan masyarakat dohot na mangalo angka na manggosagosa hajolmaon, mangalo angka na manindos donganna jolma dohot angka na tinompa na asing pe tahe.  I do umbahen na maherbang jala mangulahon ulaon na denggan ma angka lembaga swadaya masyarakat na marusaha asa lam tau angka na pogos jongjong di atas ni patna sandiri, boi angka buruh dapotan angka hak-haknasida, dohot angka consumer (Jaha: situhor angka situhoron) terlindung angka hak-hak ni consumer sian angka partani dohot peternak na so jaga di angka hahipason ni angka produknasida, dohot nang angka na tinompa ni Debata na asing ndang gabe mago boti ala marmatean (Jaha: biocide).
Holan manang piga contoh do i. Bahatnari na so hagoaran dison. Tubu nang angka lembaga swadaya masyarakat na manarihon angka korban bencana alam. Tubu angka lembaga swadaya masyarakat na manongos angka dokter tu angka inganan parporangan, isara Doctors Without Borders. Angka Dokter na so marbatas. Dna.
Jala dilaonlaon ni ari, dung tubu pangantusion di tongatonga ni Hakristenon Protestant tarlumboi di tongatonga ni Hakristenon na marsiajar sian ajaran ni Reformator Martin Luther, na mandok  na dos do di jolo ni Debata panjouonNa di angka naposoNa na mangula di tongatonga ni huria dohot angka naposoNa na mangula di tongatonga ni ngolu siganup ari di duru ni ulaon ni huria, nunga diida angka ruas ni huria di portibion ndang marimba ruas ni HKBP na ulaonnasida di tongatonga ni negara nang di tongatonga ni perusahaan na metmet sahat tu na umbalga na marhite mangula disi disarihon nasida do angka donganna jolma marhite na mangulahon ulaonna i sadenggandengganna.  

Molo politisi ibana, marhite ulaonna di Dewan Perwakilan Rakyat na marragam tirket i nang Dewan Perwakilan i ma nasida manarihon angka dongannasida jolma marhite na manjagahon hak-hak nasida na marragam i, i ma patupa undang-undang manang peraturan daerah, dohot mamastihon na dipadalan angka pejabat negara di tirket na marragam i do tingkos undang-undang nang peraturan daerah i nang di negara.  Molo abdi negara ibana diulahon ibana ma sadenggandenggan ulaonna songon abdi negara na marragam i sadenggandengganna songon dalanna manarihon donganna jolma, marhite kinerja na bekerja keras, bekerja cepat, bekerja marparbue na tangkas, bekerja imbaru, bekerja sedernana, dohot bekerja saurdot tu uhum, ndang na mangalo uhum.  Molo pengusaha na bermodal ibana, na metmet sahat tu na umbalga, disarihon ibana ma donganna jolma marhite na patupa ulaon tu angka donganna jolma marhite usahana i tarlumobi tu angka na baru lulus kuliah dohot na holan lulus SMA manang lulus SMK sambing pe tahe marhite na patupahon angka pelatihan-pelatihan tu nasida asa boi denggan mulaulaon di angka ulaon na marragam i, di pabrik-pabrik, di bidang pariwisata, dohot na asing.

I do na pinatupa ni program prioritas ni Presiden Jokowi di periode 2019-2024 nuaeng dung membangun angka infrastruktur di periode 2014-2019 na salpu, asa boi angka pekerja (workforce) ni bangsonta tau, lam tumau jala malo mangula di angka ragam ni industri di tongatonga ni bangsonta. Dung songon i pe asa boi bangsonta masuk tu negara maju di taon 2045.

Asa nuaeng, ndang holan mangalului karejo marhite na gabe tenaga kerja ni sada halak manang sada perusahaan be dipingkiri jolma nuaeng jala marhite i manarihon jolma marhite na mangula di perusahaan i. Alai nunga sai dihasiholi, diparsiajari jala dipatupa angka sundut naumposo nuaeng patupa ulaon tu angka naasing laho manarihon donganna jolma. Dipatupa nasida i ndang holan marhite ulaon na dos dohot angka ulaon di tingki na salpu andorang so era revolusi industri napaopathon nuaeng on, alai nunga dohot dalan na mansai imbaru na saurdot tu partingkian sinuaeng, isara perusahaan start up Gojek, Gocar, Grab,Gofood, dohot angka angka na asing, ai ndang tarbahen ni angka perusahaan-perusahaan na somal i be manarihon dongan jolma, ala ndang be mangalehon hak-hak pensiun be nasida tu angka pangulana, asa boi dapot untung na godang, holan mangalehon ulaon marsasabulan, mardua bulan dohot marsatonga taon nama diula.

Sada isara na boi dohonon dison i ma na pinatupa ni Amang Edward Tigor Siahaan dohot Inang i Vera br Hutauruk, ruas ni HKBP Tebet, na manadingkon ulaon nasida na somal di Jakata, borhat, mangolu jala mangula di Lobusiregar di Siborongborong marhite na mangajari angka dakdanak  di huta i dohot di humaliangsa marhata Inggris laho mendukung sangkap ni Pamarenta mambahen angka Kabupaten di sekitar Danau Toba gabe hasahatan ni pariwisata nasional, dohot pajongjong usaha Lapo Kopi, digoari Piltik Coffee, jala dung i maherbang saotik gabe Piltik Coffe dohot Homestay, asa marhite i boi ibana patauhon angka sundut naumposo di luat nang di duru ni luat Lobusiregar i boi manamuei tamue na ro tusi sadenggandengganna sian ruhut-ruhut kepariwisataan na denggan jala na hipas na boi satirket dohot angka luat pariwisata na denggan di Indonesia dohot di negara-negara maju isara Jepang pe tahe.

Asa, sian na di pinatorang ni na diginjang i, nunga marragam pangantusion ni na manarihon dongan jolma i na boi patupaon ni angka na porsea di Jesus Kristus. Ndang holan mamaritahon barita nauli taringot tu haluaon sian Jesus Kristus be, ndang holan na manumpahi dohot saparsaoran dohot na mamaritahon goar ni Tuhanta Jesus Sipalua i be, alai nunga sahat tu na manarihon na asing songon dalan patupa holong tu nasida marhite na mangula sadenggandengganna di inganan ulaonniba di negara, di perusahaan, di angka Bank, di pertanian dohot di peternakan, dna. Jala nunga sahat tu na patupa ulaon tu angka dongan jolma di partingkian sinuaeng on, sian na mansai metmet sahat tu na balga situtu, dohot ma i di pertanian dohot peternakan.


Bahatnari dalan na boi goaronta di ngolu on tarlumobi di partingkian sinuaeng on dalan patuduhon pangoloionta di joujou ni Tuhanta marhite hataNa sadarion tu hita asa marhangoluan na manarihon donganta jolma.  Na rumingkot i ma tondi ni hata i na mandok: “Ndang sai holan mangarop asa disarihon donganta jolma ma/be hita on, diringkon, alai nunga ingkon lam taharinggashon songon ruas ni HKBP ngolu na marpanarihonon di donganta jolma, mamungka ma i di bagasta sandiri, alai dohot ma tong di humaliangta, marhite angka hatauon nang sinadongan na tajalo sian Nampuna hangoluan i, ai sarihononNa do hita sian mahoraonna i, asa boi hita tutu situtu gabe pasupasu di portibion. Nunga ingkon pasohotonta satibutibuna marnampunahon hangoluan na mambahen hasusaan tu donganta jolma, na holan mamingkiri na ringkot di hita. Nunga ingkon tauduti sadenggandengganna  ngolu na patupahon angka na tuk jala denggan manarihon donganta jolma, sian na ummetmet sahat tu na umbalga, ai dihaholongi Debata do nang nasida.  Sian i do tangkas bahenonta hamauliateon ni rohanta tu Debata naung mangalehon ndang holan hangoluan na arga tu hita alai naung mamasumasu angka usahanta patauhon dirinta marnampunahon marragam angka hatauon. Amen.

  BeritaTerkait
  • Jamita Minggu Evangelium, 3 Nopember 2019 Minggu XX Dung Trinitatis :"Saroha Sapingkiran di Bagasan Tuhan i (Epesus 5: 22-33)

    satu bulan lalu

    Oleh: Pdt Dr. Robinson ButarbutarSian Parsameanta di STT-HKBPDung marjongjongan angka punguan ni angka na porsea tu diri dohot ulaon ni Jesus Kristus na paluahon angka pardosa di hau pinorsilang i di

  • Jamita Evangelium Minggu Epiphanias, 6 Januari 2019" MANGOLU DI BAGASAN LOMO NI ROHA NANG SANGKAP NI DEBATA" (Jakobus 4: 13-17)

    11 bulan lalu

    Oleh: Pdt Dr. Robinson ButarbutarSian Parsameanta, STT-HKBPHP: 0812-62472015Di hita halak Kristen Batak, di ujung taon Romawi na buruk dohot di bona ni taon Romawi na imbaru, sai marpungu do ganup kel

  • Jamita Evangelium, 10 Nopember 2019, Minggu XXI Dung Trinitatis "Manjangkon Dohot Mangulahon Poda" (Poda 19: 20-29)

    satu bulan lalu

    Oleh: Pdt Dr. Robinson ButarbutarSian Parsameanta, STT-HKBP di PematangsiantarDi tongatonga ni Hakristenon sian bonana sahat tu nuaeng, mansai ringkot do ulaon pamaritaan Barita Nauli. Barita nauli na

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    2 tahun lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  • Jamita Evangelium, 4 Nopember 2018 Minggu XXIII Dung Trinitatis 2 Tim 1: 6-14 "Paratarata ma Silehonlehon ni Debata na Sahat tu Ho"

    tahun lalu

    Sian Parsameanta, STT-HKBP, Pdt Dr. Robinson ButarbutarDung manjonok marumur dua ribu taon pardalanan ni huria ni pinajongjong ni Jesus Kristus di portibion marhite ulaon ni TondiNa Tondi Porbadia di

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb