• Home
  • Agama
  • Jamita Minggu, 16 Pebruari 2020, Minggu Sexagesima Evangelium: "Sintong mangaradoti patik ni Debata" (Markus 7: 1-8).
KSP Makmur Mandiri
Sabtu, 15 Februari 2020 13:13:00

Jamita Minggu, 16 Pebruari 2020, Minggu Sexagesima Evangelium: "Sintong mangaradoti patik ni Debata" (Markus 7: 1-8).

BAGIKAN:
dok
Pdt Robinson Butarbutar
Oleh: Pdt Dr. Robinson Butarbutar, sian Parsameanta, STT-HKBP Pematangsiantar

  
Di angka parugamo di portibion, sai adong do ruhutruhut parugamoon, na dipatupa laho mangatur parsaoran na denggan dohot Debata nang dohot sama dongan jolma. Adong do ruhutruhut i na gabe mangojahi ruhutruhut parngoluan di tongatonga ni kemasyarakatan, parbangsoon dohot parnegaraon. Adong do i na bulus disirang sian ruhutruhut kemasyarakatan, parbangsoon dohot parnegaraon. Alai laos adong do na mamangke sabagian, ndang apala sude.  Adong batas-batasna. Naparjolo i dipatupa di angka negara-negara agama, Religious State. Napaduahon i masa di negara-negara ateis, Atheistic State, Communistic State.  Naparpudi i adong do dipangke di negara-negara sekuler, i ma na mangojahi aturan-aturan dohot paraturan di negara i ndang holan di ruhut-ruhut na adong di buku nabadia ni angka ugamo isara Bibel ugamo Jahudi manang Hakristenon manang Alquran di Silom, alai dohot do mangojahisa di angka nilai-nilaifilsafat hajolmaon na humanis, humanism.

Di tongatonga ni bangso Jahudi di partingkian ni Jesus, tarlumobi di Palestina, atik pe ia bangso i dirajai Kekaisaran Romawi do, adong do tong uluan/parhuaso ugamo di nasida, i ma na niuluhon ni angka Malim Bolon di Jerusalem, na marhuaso di bagas joro di Jerusalem. Nasida ma panungkunan nang na mangaturhon songon dia do bangso Jahudi uju i marsaor dohot Debata nang dohot dongannasida jolma di ngolu siganup ari. Rap dohot manang mandongani nasida adong do angka uluan pangajari, isara angka halak Saduse, halak Farisi, angka rabbi, nang angka sibotosurat. Atik pe marasing be pangondolion/pangdondolhonon ni pangajarionnasida, alai sada do sangkapnasida, i ma mangurupi ganup parugamo Jahudi mangantusi dohot mangihuthon ruhutruhut parugamoon na mangaturhon parsaoran dohot Debata nang dohot dongan jolma. Sangkapnasida i ma beha asa boi unduk ruas ni bangso i tu patik ni Debata, tarlumobi tu patik habadiaon. Ia patik habadiaon i ndang holan taringot tu songon dia do na badia manomba Debata nasida di Jerusalem.  Alai dohot do nang songon dia ma manongtong badia di ngolunasida signup ari di jabu, di parsaoran dohot dongan jolma nang di ulaon siganup ari na marragam i.  Isarana, na mardomu tu parmanganon dohot sipanganon, ingkon jagahonon do tarlumobi dia sipatupaon andorang so mangan iba, i ma jolo marburi. Jala jamothononhon do sipangano na songon dia na boi dohot na so boi panganon.  Ai molo so jamot iba disi, ninna gabe rumar do pamatangniba.  Ramun do iba di jolo ni Debata molo ndang jolo binuri tangan on andorang so mangan. Ramun do bahan sipanganon na tinuhor di onan molo so jolo diuras. Asing ma molo onan i onan ni halak Jahudi na manggadis sipanganon na boi panganonnasida, i ma ginoaranna kosher, naung diida taruras.  

Asa, andorang so dilompa manang andorang so dipangan sipanganon i ingkon jolo diuras. Di hata Gorik di ayat 4 dipangke hata baptizontai (sian hata baptizo), paiashon diri ni sasahalak mangihuthon ruhutruhut habadiaon partondion.  Ndang haiason higienis (hahipason kesehatan medis) ianggo na tinujunasida, alai hahipason habadiaon do. Songon i ma hinaringkot ni hahipason habadiaon i di nasida umbahen na migor ditihainasida halak Farisi dohot Siboto Surat do manang ise na so jolo marburi andorang so mangan, ai ndang unduk be nasida tu ruhut-ruhut habadiaon.  Jala, di nasida, ramun do manang ise na manganhon sipanganon tinuhor di onan so jolo diuras. 
Nunga dipatupa halak Jahudi jala nunga diajarhon halak Farisi dohot Sibotosurat pangantusion marparangehon habadiaon si songon i songon sada adat, napinungka ni sijolojolo tubu, ndang jadi so patupaon. Ndang jadi aloon. Nunga gabe hasintongan. Gabe mangihoti tu sude.  Di hata Gorik didok panurat ni evangelium Markus ma i di Markus 7: 4-5 dohot Tradisi, adat (Gorik: Paradosis) ni/sian angka natuatua.  Na so patupahon sisongon i digoarinasida marasing sian nasida, pardosa, na so tama marsaor dohot nasida. Songon i ma gogo ni paradosis i pola gabe diida nasida paradosis i gabe uhum, gabe patik na mengikat (Gorik: entalmata, ida ayat 7) binahen ni jolma, alai gabe dihilala na ro sian manang niaturhon ni Debata.  Ala ni i do umbahen na di turpuk jamitanta ditihai halak Farisi dohot Siboto Surat naung tuat sian Jerusalem tu sada huta tondongkon ni Genesaret  (Mrk 6:53) do angka sisean ni Jesus na diidanasida tongon jojor mangan roti so jolo marburi (Mrk 7: 2, 5). 

Denggan do panghangoluhon ni patik ni Debata na songon i? Denggan do manihai dongan na so sapangantusion dohot iba di ruhutruhut habadiaon domu tu sipanganon  sisongon i, na mamaksahon tradisi, paradosis, adat na niantusan tu angka na so sapingkiran dohot sapambahenan sisongon i?  Mangihuthon Tuhanta Jesus, ndang denggan. Gariada tahe, di panghataionNa dohot natorop dung panghataion dohot halak  Farise dohot Sibotosurat na sian Jerusalem i, dumao sian i dope dipatorang Jesus. Ima: Ndang holan pamarangehon patik ni Debata na songon i ditulak Jesus, alai dohot do alus tu sungkunsungkun boi do sipanganon mambahen ramun iba di jolo ni Debata manang ndang. Dua na mangihut on ma didok Jesus tu nasida mangojahi alusNa: 

Naparjolo, parparange pangansi (Gorik: hupokrites) do nasida. Marhite na mamangke hata ni Debata piatolhas ni panurirang Jesayas  didok ma na ia nasida angka na pasangaphon Debata di pamangan, alai di roha nasida padao diri sian Debata (Jesayas 29: 13, Mrk 7: 6) do. Patik ni jolma do na diradoti nasida, ndang patik ni Debata. Dos do manihai dongan na so mamparengehon pangantusion nasida i tu na manggantihon patik pasangap natoras dohot pasahat korban (Mrk 7: 9-13).
Paduahon, gariada, pangantusion na mandok boi sipanganon mambahen ramun jolma i pe dialo Jesus do: "Ndang na masuk tu pamangan ni jolma i na mambahen ibana rumar manang ndang badia. Alai na ruar sian jolma i do na mangaramuni ibana (Mrk 7: 14-15). Jala, dipabagas Jesus do i marhite na mangajarhon songon on: "Na ruar sian jolma i do na mangaramuni ibana. Ai sian bagasan, sian roha ni jolma i do ro pingkiran na jahat, parmainanon, panangkoon, pamunuon, pangalangkupon, pangahution, hajahaton, pangansion, pargadombuson, pangorgangon, panginsahion, ginjang dohot neang ni roha" (Mrk 7: 21-22).

Boasa ma ingkon gabe jamita tu hita nuaeng paraloon ni Jesus tu pangantusion mamparangehon patik ni Debata pinahembang ni halak Farise dohot Sibotosurat marojahan tu tradisi/adat ni angka natuatua si songon i? Boasama ma paraloon ni Jesus tu pangantusion na mandok: "Na boi do iba ramun/ndang badia di jolo ni Debata molo so jolo binuri tanganniba jala molo so jolo niuras sipanganon na pinangan"? Boasa ma gabe jamita tu hita paraloon ni Jesus tu parange ni pangulahonon ni patik binahen ni halak Farise dohot Sibotosurat na migor manihai angka sisean ni Jesus na so jolo marburi andorang so mangan? Boasa ma gabe jamita tu hita nuaeng on paraloon ni Jesus tu pangantusion na mandok naboi do iba ramun di jolo ni Debata  molo so marburi jo dohot ala ni sipanganon na pinangan? Parange pangulahonon ni patik na pangansi (Gorik: hupokrites) do parange pangulahonon na songon i, i ma mamuji Debata marhita pamangan, alai padao diri sian Debata di roha.  

Parjolo, suraon do ala tongon margurasa di tongatonga ni Hakristenon nuaeng on na lam mangondolhon songon niondolhon ni halak Farise dohot Sibotosurat i, i ma na mandok na boi do ramun iba di jolo ni Debata siala ni cara niba mangan manang dia na pinangan?  Di Hakristenon di ujung ni abad parjolo sanga do margurasa na songon i. Laho mangalo i disurat angka uluan ni huria i ma angka surat na marragam i, isara surat-surat Pastoral (Titus, 1 dohot 2 Timotius) songon i nang surat Judas. Sanga do tong di pardalanan Hakristenon sian abad paduahon sahat tu abad pa-16-hon margurasa situtu pangantusion na songon i. Dung pe ro partingkian reformasi asa dialo angka huria na protestan ma pangantusion na songon i. Sian abad pa16-hon sahat tu nuaeng pe sai tubu jala maherbang do na nialo ni Tuhanta Jesus dohot na nialo ni Reformasi. Pangantusion Reformasi, i ma na mulak muse tu pangajarion ni Jesus songon na tarsurat di Markus 7: 1-8 i, na diongku, dipeop jala dipatupa HKBP, dohot ma i taringot tu sipanganaon. Na boi do tarunjun halak Kristen di Indonesia nuaeng mangulahi maniop pangantusion mamparangehon patik ni Debata taringot habadiaon songon na niajarhon dohot niondolhon ni halak Farise dohot Sibotosurat i, ala taida lam maherbang di tongatonga donganta sabangso sian bagian ni na saugamo dohot hita na mandok na boi do hita on gabe ramun ndang holan ala ni sipanganon, alai dohot do ala ni parabitonta. Di tongatonga ni bangsonta nuaeng pola do adong angka donganta na manghalomohon marpahean na manutup sude pamatang on asing ni simalolong (Jaha: Cadar), ala didok na mamangkesa lam bahat pahalana marhite i. 

Adong do tong di tongatonga ni halak Kristen patupa songon na binahen ni halak Farise dohot Sibotosurat i.   Diida nasida ndang hibul dope, ndang masuk tu surgo, angka na so sapingkiran, dohot na so sapangantusion di dalan patupa patik ni Debata i didoknasida. Ndang tubu paduahalihon dope didok nasida hita, ndang masuk surgo dope. HKBP ndang hea manjalo dohot mangajarhon pangantusion na songon i. Tutu, adong do pangantusion teologis dohot ruhut-ruhutta na taihuthon. Alai ndang tadok angka na so sapingkiran dohot hita songon pardosa, angka na ramun.

Paduahon, suraon do ingkon manghuling pangaloon sinoarahon ni Jesus i nuaeng, ala lam martumbur jala maherbang taida torop ni na mamujimuji Debata di pamanganna, pola mansai balga biaya dipangke tusi, naboi parpudion dipataridahon marhite mangendehon dohot mandok na denggan mamuji Debata di medsos, digitalisasi, alai di rohanasida – jala tarida do i di parange siganup ari di jabu, di parsaoran nang di ulaon – sai dipatupa angka na maralo tu patik ni Debata.  Bahat do contoh naboi do bahat tapatolhas dison.  Angka nasida na songon on hatop-hatop do manihai na so sapangantusion dohot nasida.

Patoluhon, alai na tong mansai ringkot siparateatehononta domu tu topik ni Jamitanta on, i ma hinaringkotta meret sian holan na manulak pangantusion na tinulak ni Jesus i naung tagoari di ginjang i (i ma Mamujimuji Debata, alai di roha dao sian Debata) tu na mangulahon pangantusion na denggan na niajarhon ni Tuhanta Jesus uju mangalo na so denggan i, i ma na manjagahon asa pangulahononta di patik ni Debata i ingkon marharoroan sian rohanta i do, na niida ni Debata, i ma roha na sai pajonok diri tu Debata, sai manghasiholi mangulahon lomo ni roha nang patikna.  Di Hakristenon i ma patik holong tu Debata na dos dohot tu dongan jolma. Angka na jahat na adong di rohanta i ingkon taalo do. Jala angka na denggan na ruar sian rohanta i na gabe siulahononta.  Songon na tinonahon ni apostel Paulus tu halak Filippi, songon on ma rumang ni i siulahonon: "Angkup ni i ale angka dongan pingkiri hamu ma nasa parange na sintong, na daulat na tigor, na bontor, na uli, na denggan begeon ro di sude na targoar haburjuon, na tau pujipujion. Ulahon hamu ma na ginuruhononmuna, na jinalo, na binege jala na niidamuna di ahu; dung i donganan ni Debata Sipardame i ma hamuna" (Filippi 4: 8-9). Laos di hita halak Kristen Protestan ringkot do pangantusion on tapeop: "Umbahen tasangkapi dohot taulahon pe patik ni Debata ndang asa tigor jala tumigor manang umbadiaan hita di jolo ni Debata nang di jolo ni jolma, alai ala naung pinatigor pinarbadiaan jala pinasupasuNa i do ngolunta, pola dipelehon Ibana AnakNa di hau pinorsilang. Mardonganhon hagogoon dohot habisuhon na sianIbana do hita patupahon i di ngolu, ulaon nang parsaoranta.  Molo tung ala ni hagaleonta madabu hita tu bagasan dosa, taingot ma muba marhite na manjohoni habangsa parasianNa i."(*)

  BeritaTerkait
  • Jamita Evangelium 22 Maret 2020 Minggu Letare, Marlas ni roha ma hamu "Las ni roha di bagasan Tuhan i" (Psalmen 69: 30-37)

    3 bulan lalu

    Sian Parsameanta, STT-HKBP di PematangsiantarPdt Dr Robinson ButarbutarDi tingkion di sandok portibion, di tongatonga ni angka jolma na marTuhan dohot na so marTuhan, na manomba Debata nang  angk

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    3 tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium, Minggu Rogate, 6 Mei 2018 2 Musa 32: 7-14 "Debata Manghaholongi jala mamasumasu hita"

    2 tahun lalu

    Oleh: Pdt. Dr. Robinson Butarbutar, Parsameanta, STT-HKBP Pematangsiantar1.Hamu angka dongan, di minggu Rogate on, di sada minggu di na ditogutogu hata ni Debata hita asa lam marpos ni roha di latapan

  • Minggu IX Dung Trinitatis, 29 Juli 2018: Evangelium, Mateus 16: 24-28 "Gabe Sisean Namarsihohot Mangihuthon Jesus"

    2 tahun lalu

    Oleh: Pdt Dr. Robinson Butarbutar, Parsameanta, STT-HKBP1.Sian tingki tu tingki, mamungka di tingki mangula di Palestina dope Tuhanta Jesus Kristus nidonganan ni angka siseanna na sampulu dua i s

  • Jamita Evangelium, 27 Januari 2019 Minggu III Dung Epiphanias "Unduk ma tu Debata Sitompa Saluhut" (Jesaya 45: 18-25)

    tahun lalu

    Oleh: Pdt. Dr. Robinson Butarbutar, Parsameanta, HP/WA: 0812-62472015.Sada ulaon na dokdok do maminsang pardosa na so olo muba. Alai dumokdok do patupa ulaon pasahathon uhum na ingkon masa tu marsasah

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb