• Home
  • Agama
  • Jamita Evangelium Minggu XII Dung Trinitatis "Monang Maradophon Huaso Hagolapon" (5 Musa 18: 9-14)
KSP Makmur Mandiri
Jumat, 28 Agustus 2020 19:48:00

Jamita Evangelium Minggu XII Dung Trinitatis "Monang Maradophon Huaso Hagolapon" (5 Musa 18: 9-14)

Oleh: Pdt. Dr. Robinson Butarbutar, Parsameanta, STT-HKBP Pematangsiantar
BAGIKAN:
Edward Tigor Siahaan
Pdt Dr Robinson Butarbutar
Dung tubu Hakristenon di bona ni abad parjolo, tibu do diida, diantusi, diauhon dohot dihaporseai ganup hita halak Kristen na bangso pinillit ni Debata do hita. Ndang holan bangso Israel ia bangso ni Debata i, alai dohot do hita. I do umbahen na togu situtu hata ni Debata taringot tusi na tarsurat di 1 Petrus 2: 9i: 

"Alai marga na pinillit do hamu, hamalimon na raja, bangso na badia, houm na ginomgomanNa, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronNa halongangan i." 

Jala i do tong natahaposi sahat tu tingki on.  Ala i do hita, tajangkon do tong pangantusion taringot tu lomo ni roha ni Debata naung mamillit hita gabe bangso na pinorbadiaNa, i ma: "Ala bangso na pinillit do tong hita halak Kristen, ingkon tong do pasidingonta dia nidok ni Debata tu bangsoNa Israel najolo taringot tu angka pangalaho niula ni angka bangso na so mananda Debata Na mangolu i, Debata na palua nasida sian parhatobanon, Debata na mangalehon tano Kanaan tu nasida, Debata na manongos Jesus Kristus laho palua dohot mangajari hita taringot tu lomo ni rohaNa i.  

Di na masuk nasida bangso Israel tu tano Kanaan dung ruar sian parhatobanon ni Misir, ingkon pasidingonnasida do na hinasogohon ni Debat i. Songon i do nang hita. Dia angka pangalaho na pinatupa ni angka Ompunta uju ndang dipillit Debata dope gabe bangsoNa na badia marhitehite Jesus Kristus, ingkon tadingkononta di na masuk hita tu haporseaon na sintong di Debata Sitolu Sada i, di naung tardidi hita tu bagasan goarNa, jala di na naung masuk hita tu bagasan harajaonNa jala gabe sitean hangoluan na so ra suda.  Ndang tarbahen hita di tingki na dos marDebatahon Ibana, alai dohot tong mangulahon angka na hinasogohonNa. I do na niajarhon ni apostel Paulus tu hita: Jolma na imbaru do hita. Ala ni i tatadingkon ma angka ulaon dohot parange ni jolma na robi.
Dia ma sipasidingon dohot sialoonta i di ngolunta siganup ari songon angka bangso naung pinillit ni Debata jala pinorbadiaanNa i? I ma opat na mangihut on: 

(i) Mamelehon dakdanak na hinasomalhon ni na so mananda Debata na tutu, 
(ii) Mangido pangurupion sian Pangarunding (Indo: Petenung), Sijujur Ari (Indo: Sitabasi ulok (Indo: Peramal), Parsibalik Mata (Indo: Penelaah), Sibahen Panutupi (Indo: Penyihir), Partondung (Indo: Pemantera), dohot 
(iii) Manungkun begu (Indo: bertanya pada arwah), jala
(iv) Manungkun begu ni na mate (Indo: meminta petunjuk pada orang-orang mati).  

Sian mamungka ro parbarita nauli tu tongatonga ni halak Batak di abad pa-19-hon, dung tubu Huria Kristen Batak Protestan sahat tu tingkion di abad pa-21-hon marhite jamita, panindangion haporseaon dohot Ruhut-ruhut Parmahanion dohot Paminsangionta sude do hita, parhalado nang ruasta, mangalo angka pangalaho na mangulahon naopat i. Satia do hita mangalo opatsa. Ta-RPP do na mangulahonsa, asa muba jala mulak muse gabe ruas ni huria na polin, unang diuhum Debata nasida. 
Taalo i ndang holan ala naung sahat tu hita hapistaran (Pencerahan) na mandok ndang adong angka i - songon na pinatupa ni toropan angka halak Kristen di negara-negara maju/sekuler di sandok portibion, alai situtu ala dihasogohon Debata do angka na patupa sisongon i. 

Jamot hita, dilehon Debata do tano Kanaanajolo n tu bangsoNa Israel, ala dipatupa angka bangso na mian disi do angka pangalaho sisongon i. Hita pe, unang dipatupa Debata tu hita na songon i - i ma ditait Debata pasupasuNa na marragam i sian hita marsadasada, marsapinormpar, marsasahuria, - unang ma/be taulahi, tauji, dohot tauduti patupa sisongon i.

Boasa di partingkianta nuaeng dipangido Debata tu hita ruas ni Huria Kristen Batak Protestan asa pasiding mangalo angka ulaon na songon i mangasahon parbinotoan na tontu taringot tusi dohot mardonganhon huaso ni Debata Sitolusada i? 
- Suraon do ala, atik pe nunga 159 taon halak Kristen Batak masuk tu punguan ni na porsea, adong/sai adong dope sian tongatonganta, ruas nang parhalado, na tarunjun, ringgas, mangulahi mangulahon opat ulaon hinasogohon ni Debata naung ginoaran nangkin?  
I ma Mangido pangurupion sian Pangarunding (Indo: Petenung), Sijujur Ari (Indo: Sitabasi ulok (Indo: Peramal), Parsibalik Mata (Indo: Penelaah), Sibahen Panutupi (Indo: Penyihir), Partondung (Indo: Pemantera), manungkun begu, dohot manungkun begu ni na mate?
- Adong do dope jolma di tingkion, siala ni marragam sibonsiri - isara siala ni hapogoson dna - na mamelehon dakdanak nasida sandiri dohot dakdanak ni bangsonta on, asa boi nasida mangolu manang marhamoraon, isara marhite perdagangan seksual, pekerjaan paksa tu angka dakdanak na mambahen nasida ndang boi mangolu songon dakdanak na ringkot marmeam dna i.
- Manang, suraon do ala, songon na mamungka tarida di era digital nuaeng on - ndang holan manghaposi patupa angka sisongon i na mangunjuni hita di tingkinta nuaeng, alai dohot do tu na manghaposi teknologi digital on dipatupa, pola sahat tu na mamparDebatahon i jolma i nuaeng on, lobi sian na mamangke i tu na ringkot mangorui halojaon ni jolma di tingkion. Ndang holan mangido pangurupion tu artificial Intelligence dipatupa, alai dohot do manghaposi na angka i do alus tu sandok pargulmiton ni ngolu on. Pola manomba nasida. Ndang holan Debata be disomba.

Diurupi Debata ma hita marnida dia dope na dipatupa donganta saripe, sahuria, sabangso, saompu, nang humaliang taringot tu angka ulaon na dihasogohon Debata i. Molo masa dope i, unang ma taihuthon angka na pinatupa nasida i. Taalo ma mangasahon huaso ni Debata (Epesus 6: 10-20), pinomat tapasiding ma sian ngolunta be. Amen.
  BeritaTerkait
  • Jamita Evangelium, Minggu I Dung Trinitatis, 3 Juni 2018 Pangungkapon 16: 1-7, "Hagogoon ni Huaso ni Debata di Portibion"

    3 tahun lalu

    Oleh: Pdt Dr. Robinson ButarbutarDi angka Minggu dung Trinitatis, ia tinuju ni angka hatani Debata na marsaringar disi i ma patoguhon angka sitangihon jamita asa marsihohot manghaporseai Debata. Disos

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    3 tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    3 tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"

    3 tahun lalu

    Oleh: Pdt Dr. Robinson Butarbutar, Parsameanta, STT-HKBP1.Panghataion ni Jesus dohot siseanna sandiri dung sidung mangula di bagas joro na di Jerusalem i do turpukta on (24: 1, 3), i maudut ni panurir

  • Jamita Evangelium, Minggu Misericordias Domini 15 April 2018: "Mangolu di bagasan Asi ni roha ni Debata"(Mika 7: 14-20)

    3 tahun lalu

    Oleh: Pdt. Dr. Robinson Butarbutar, sian Parsameanta, STT-HKBP Pematangsiantar.1.Dung songon i tangkas jala bagas di ari Minggu na salpu di panghulingi hata ni Tuhan Jesus Kristus ganup siseanNa mamun

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb