• Home
  • Agama
  • Jamita Evangelium Minggu Jubilate, 3 Mei 2020, "Marolopolop ma tu Debata" (1 Kronika 16: 31-36)
KSP Makmur Mandiri
Jumat, 01 Mei 2020 13:11:00

Jamita Evangelium Minggu Jubilate, 3 Mei 2020, "Marolopolop ma tu Debata" (1 Kronika 16: 31-36)

BAGIKAN:
ist
Pdt Dr Robinson Butarbutar
Pinatolhas ni Pdt Dr. Robinson Butarbutar, Ketua Rapot Pandita HKBP

Hamu angka dongan sahaporseaon di sandok Indonesia. Hasurungon ni na togu marhaporseaon di Debata i ma: Dipatau Tuhanta do ibana mamujimuji Debata atik pe tongon marungkil.  Di Minggu Jubilate sadarion ditogihon hataNa do hita naporsea di sandok portibion mamujimuji Debata nang uju manang apala uju taadopi parungkilon bolon nuaeng, ai apala disi do tarbahen haporseaonta marnida dohot manghilala hagogoonNa palua hita. Domu tusi dienet jamitanta sian 1 Kronika 16: 31-36 na, sangombas patolhas pamujion tu Debata pinatupa ni bangso Israel niuluhon ni si David marhite parendenasida, i ma si Asaph dohot angka hahaanggina (ayat 8-34), alai sangombasnari, tong pasahat pangidoan na mansai ringkot tu Debata. Duansa, na masirainan, naeng mamanghulingi hita di tingki parungkilonta nuaeng.

Sangombas, ditogihon hita marsiajar sian bangso Israel najolo na marolopolop  tu Debata ala, so mardongan mara, marhasil  nasida mamboan Poti Parpadanan ni Debata na badia i sian bagas ni si Obed-Edom, naung gabe tarpasupasu i, tu Jerusalem  (Ida 1 Kronika 13: 6, 13-14, dohot 15: 3-16:7), asa gabe tarpasupasu nang bangso i ai mian di tonga nasida Debata.  Ala ni i, mansai ganjang diendehon hinatimbul ni Debata Raja i, hinabalga ni ulaonNa di pardalanan ni ngolu ni bangso i, nang hasintongan ni panguhumonNa, jala dijouhon parsidohoton ni bahat na asing marolopolop tu Jahowa, i ma angka bangso na so tumanda Debata, angka langit dohot tanoon, laut, angka ladang nang tombak pe tahe. Lobi sian i dope, digoari do tong sialana boasa ingkon marolopolop tu Debata, i ma: Ala ro Ibana manguhum tanoon, ala na basa do Ibana, jala ai ro di saleleng ni lelengna do asi ni rohaNa (ayat 33-34).

Sangombasnari, ditogihon hita marsiajar sian bangso i na barani patolhas pangidoan tu Debata asa palua nasida sian parhatobanon (Heber: yisyanu; Indonesia: selamatkan), asa papungu nasida (Heber: kabetsenu), jala asa palua nasida sian angka mara sian musu (Heber hatsyilenu; Indonesia: lepaskan), asa  tarbahen nasida dung i mamuji goarNa na badia i ro di saleleng ni lelengna (ayat 35-36).

Asa, di tingkinta nuaeng, di na martongtang dope hita mangadopi harararat ni Covid 19 on, na manusai hahipasonta, mamboan ngolunta tu parmaraan, dohot manegai ngolungolunta siganup ari, mansai ringkot do marsiajar hita sian duansa. Parjolo, tasangahon mangolophon Debata siala sude angka na balga naung pinatupaNa saleleng on di ngolunta marsasahalak, marsasaripe, marsasahuta, marsasabangso, marsasahuria. Ai dung tatatupa i, paduahon, tubu jala lam togu ma pos ni rohanta pasahathon tu Jahowa Debata Tsebaot i pangidoanta na ampit mangadopi ragam partontangonta di tingki on. Gabe pos rohanta ro mangido tu habangsa parasianNa i palua hita, songon naung pinaluaNa bangsoNa Israel na jolo sian parhatobanon nang alonasida. Asa paluaonNa hita, ala naung dipalua Ibana hita sian huaso ni dosa dohot hamatean na so ra suda i, ala naung diparmudumudu Ibana hita saleleng on. Asa dipalua Ibana hita maralohon Covid 19 on, musunta na naeng mamolgak ngolunta. 

Udutonta ma tong mangido asa dipapungu Ibana hita sude, asa sada hita, unang marbolatbolat, unang marserak, marasingasing pingkiran nang langkanta pasohothon harararat ni Covid 19 on songon naung pinangido ni pamarentanta. Di sude inganan ingkon sada sude hita. Holan marbolat hita, holan lemba sabagian sian hita, torus ma hita dihaliangi Covid 19 i. Tapangido ma di ende tangiangta asa ro Debata marhite hasadaonta i paluahon bangsonta sian panggosagosa ni Covid 19 on. Marhite hasadaonta do boanon ni Debata hatuaonta, monang hita pasohot harararat ni Covid 19 on. Tarbahen bangsonta ma manguduti pembangunan ni bangsonta gabe bangso na maju. Jala siala ni i, tarpuji hita ma Ibana muse. Amen
  BeritaTerkait
  • Jamita Evangelium, Minggu Jubilate, 22 April 2018: Marlas ni Roha di Bagasan Tuhan i (1 Tessalonik 2: 13-20)

    2 tahun lalu

    Oleh: Pdt Dr. Robinson Butarbutar, Sian Parsameanta, STT-HKBPJubilate = Marolopolop tu Debata Sandok Tanoon1.Molo tajaha surat 1 Tessalonika on sian bona sahat tu ujung, tangkas situtu do digurithon&n

  • Jamita Evangelium Minggu Rogate, 17 Mei 2020: "Tangiang Hamauliateon" (1 Kronika 17: 16-27)

    2 bulan lalu

    Pinatolhas ni Pdt Dr. Robinson ButarbutarHamuna angka dongan sahaporseaon di sandok Indonesia. Sintong do ra pandohan na mangihut on  taringot tu partangiangon ni naporsea di Debata parpudi on na

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    3 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium, 27 Januari 2019 Minggu III Dung Epiphanias "Unduk ma tu Debata Sitompa Saluhut" (Jesaya 45: 18-25)

    tahun lalu

    Oleh: Pdt. Dr. Robinson Butarbutar, Parsameanta, HP/WA: 0812-62472015.Sada ulaon na dokdok do maminsang pardosa na so olo muba. Alai dumokdok do patupa ulaon pasahathon uhum na ingkon masa tu marsasah

  • Jamita Evangelium, 12 Mei 2019, "Mian di bagasan Jesus Kristus asa Marparbue", Johannes 15: 1-8, Minggu Jubilate

    tahun lalu

    Oleh: Pdt Robinson Butarbutar, STT HKBPTingki ndang ndang adong dope media komunikasi ni angka peduduk ni portibion marhitte Internet andorang so taon 1950-an, marungkil do ama dohot ina nang angka da

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb