• Home
  • Agama
  • Jamita Evangelium Minggu I Dung Trinitatis: “Unang mangaleai Tondi Porbadia” (Markus 3: 20-35)
KSP Makmur Mandiri
Sabtu, 05 Juni 2021 08:02:00

Jamita Evangelium Minggu I Dung Trinitatis: “Unang mangaleai Tondi Porbadia” (Markus 3: 20-35)

BAGIKAN:
Edward Tigor Siahaan
Pdt Dr Robinson Butarbutar

Pinatolhas ni Pdt Dr. Robinson Butarbutar, Ephorus HKBP


Hamu angka Dongan sisean ni Jesus Kristus hinaholongongan,

Molo tajaha  Evangelium Markus 3 on sian bona sahat tu ujung taida ma tangkas na adong lima hamamasamarnida pambahenan ni Jesus, tarlumobi ulaonna pamalum torop angka na marsahit dohot marparniahapan na porsuk naung ro mandapothon ibana, ndang holan di sada parguruan, alai dohot do di tungkan tao naung  ro sian luat Galilea, Judea, Idumea dohot ipar ni Jordan  ro di na humaliang Tirus dohot Sidon (ayat 1, 7-8) ingangan haroro ni angka natorop na marsahit dohot pinamalumNa.

Na parjoloi ma pambahenanni angka tondi na hodar (Gorik: ta pneumata akatharta) di sada ingangan tungkan topi ni tao i, i ma manomba Jesus huhut mandok na “Anak ni Debata do Jesus’ (ay 11).

Na paduahon i ma panjouon ni Jesus di sada dolok tu sampulu dua siseanNa na naeng suruanNa marjamita dohot pabalihon angka sibolis (Gorik: ta daimonian, ay 15).

Na patoluhon i ma haroro ni sisolhot ni Jesustu sada jabu (Gorik: oikos) naung binongotan ni Jesus (ay 20) laho mangalap Jesus ai didok nasida na rintik do Jesus (ay 21).

Napaopathon, hata ni Sibotosurat naung ro sian Jerusalem  mandapothon Jesus  naung tuk pamalum bahat na marsahit i, mandok na ‘Sibolison( marnampunahon Belzebul) do Jesus jala induk ni sibolis (Gorik: archonti ton daimonion) do dipangasahon Jesus pabalihon angka sibolis (Gorik:  daimonian, ay 30). Dialo Jesus do hasalaan ni pandohan nasida I (ay 22-30).

Napalimahon, hata ni Jesus tu natorop na hundul humaliang Ibana di jabu i taringot tui se do angka anggi, iboto, dainang ni Jesus, i ma angka na hundul di humaliangNa i na mangulahon lomo n iroha ni Debata (Gorik: thelema tou theou, ayat 35).

Sian naopat na parjolo i taida na marasing sian angka tondi na hodarna tuk mananda huaso ni Jesus naung pamalum bahat situtu angka na marsahahit, jala siala ni i dohot manomba (Gorik: prosepipton) Jesus, jala huasoNa pabali angka sibolis (Gorik: daimonian) dipasahat tu siseanNa,  ianggo angka siboto surat na ro sian Jerusalem baliksa mandok na sibolison, manang marnampunahon sibolis ia Jesus i. Ndang holan i. Alaipola mandok induk ni sibolis  (Gorik: archonta ton daimonion) do pinangasahon ni Jesus pabali sibolis. Gari angka tondi na hodar manomba Jesus, hape angka siboto surat (Gorik: Grammaeteus) mandok dua dosa manang hajahaton, i ma mandok sibolison Jesus dohot mangasahon induk ni sibolis dipabali Jesus angka tondi na hodar. On ma na digoari Tuhanta Jesus na ro sian banua ginjang i dos ana mangaleai (Gorik: blasphemeo) Tondi Porbadia. Dosa na songon on do na so tarsesa ro di salelengna (ayat 28-29). 

Ala ni i do gabe topik ni jamitanta na mangihut on: “Unang mangaleai tondi porbadia.” I ma mandok na maralo tu hasintongan taringot tu hadirion nang ulaon ni Jesus pabali sibolis. Diboto angka siboto surat i do na so sibolison Jesus, alai pabali sibolis do diula. Alai sibolison didoknasida ia Jesus i. Anak ni Debata na marhuaso do Jesus mangihuthon angka tondi na hodar, alai di bagasan huaso ni induk ni angka sibolis do didoknasida Jesus pabali sibolis. Boi do halak jala bebas do halak ndang manghaporseai, gabe sisean ni, jala mangihuthon nang  manomba Jesus Kristus Anak ni Debata i. Alai mangaleai (Gorik: Blasphemeo; Inggris: Blasphemy) Ibana, i ma mandok na maralo tu hasintongan taringot tu ise Jesus dohot songon dia Ibana pabali tondi na hodar. Hata blasphemeo i ma hata na so marojahan, na so sintong  dohot na nionjar ni sogo ni roha nang roha parmusuon pinatolhas ni sasahalak taringot tu sasahalak na asing, i ma pinatolhas ni angka siboto surat taringot Jesus, Anak ni Debata, hape didok sibolison, na mangula marojahan tu huaso ni Debata, alai didok mangasahon induk ni sibolis.  Manang ise na patupa na dosa di partingkianta nuaeng maradophon Jesus Kristus Anak ni Debata i, dipajamot ma dirina, sotung masuk ibana tu sada ulaon dos ana so tarsesa ro di saleleng ni lelengna. Molo ndang porsea di Jesus, ndang pola beha i tu dirim. Alai dosa do jala dos ana mian manongtong do mandok na so sintong taringot tu hadirion dohot huason ni Jesus Kristus i. Ai dosa mardophon Tondi Porbadia na umboto na sintong, na manindangi di hasintongan jala na mangalo na so sintong.

Ala ni i, dijouhon jamita on do tu ganup hita, na porsea di Jesus Kristus dohot na so porsea di Ibana asa unang mangaleai Tondi Porbadia marhite na mangaleai Jesus Kristus, ai dosa na so tarsesa saleleng ni lelengna do i.

Sian i, dijouhon do tong tu hita ganup na mangihuthon Jesus asa pasiding hata maradophon angka donganta jolma na mandok na so sintong taringot tu nasida nionjar ni sogo ni rohanta, parmusuon dompak nasida asa unang porsea halak di hadirion, haporseaon, nang ulaon nasida. Mansai ringkot do taoloi sosososo on tarlumobi dipartingkian nuaeng na digohi ujaran kebencian, pandohan na diojahi sogo n iroha maradophon halak na asing, haporseaon na asing, ugamo na asing. Ndang ala na so tangkas diboto ia hata siala ujaran kebencian i, alai dionjar sogo n iroha do. Molo tapatupa i boi hita gabe diboan tu uhum, jala manaon uhum siala ni i. Jumamot ma hita di ariari na ro on. Tarlumobi, mandok na so sintong marojahan tu sogo ni roha maradophon haporseaon dohot ugamo ni na asing ma na taula. Tarlumobi ma di partingkian internetisasi segala sesuatu, na manimpan gomos manang aha pe hata na tapatolhas, na tahatahon dohot nasurathon.Unang taoloi tarunjun mandok na so sintong taringot tu na asing.

Baliksa ma na taula, i ma pasiding hata nang pambahenan na mamboan hita tu dosa na so tarsesa maradophon Tondi Porbadia. Molo tung ingkon tadok manang tasurathon hata taringot tu na asing, marojahan tu hasintongan dohot nionjar ni holong maradophon angka donganta jolma ma hatanta i. Molo maralo do i tu hasintongan tinuturan ni Tondi Porbadia i, tapasiding ma i, asa unang gabe mardosa hita maradophon Tondi Porbadia. Molo ndang taleai Tondi Porbadia nunga taula lomo ni roha ni Debata. Marhite i do tapatuduhon na sisolhot ni Jesus hita (ay 31-35). Amen.

  BeritaTerkait
  • Jamita Evangelium, Minggu XVIII Dung Trinitatis, 11 Oktober 2020: “Naposo na manghobasi” (Markus 10: 35-45)

    8 bulan lalu

    Pdt Dr. Robinson Butarbutar sian ParsameantaPinutushon manggoari topik ni jamitanta di minggu on ndang songon na di Almanakta i – na marojahan tu Terjemahan Bibel Bahasa Batakta, i ma ‘Nap

  • Jamita Minggu V dung Trinitatis, 1 Juli 2018 Evangelium: Markus 16: 14-20 "Mamaritahon Barita Nauli tu nasa Natinompa"

    3 tahun lalu

    Ndang mansohot turgas mamaritahon barita na uliSian di bonana i sahat tu nuaeng, sian abad parjolo dung hehe Jesus Kristus sian hamatean sahat tu na naung hundul Ibana di siamun ni Debata Ama i di ban

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    4 tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    4 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Minggu IX Dung Trinitatis, 29 Juli 2018: Evangelium, Mateus 16: 24-28 "Gabe Sisean Namarsihohot Mangihuthon Jesus"

    3 tahun lalu

    Oleh: Pdt Dr. Robinson Butarbutar, Parsameanta, STT-HKBP1.Sian tingki tu tingki, mamungka di tingki mangula di Palestina dope Tuhanta Jesus Kristus nidonganan ni angka siseanna na sampulu dua i s

  •   komentar Pembaca
    Copyright © 2021 Pelita Batak Online. All Rights Reserved. Design by. heriweb