• Home
  • Agama
  • Jamita Evangelium Minggu Dung Natal, 29 Desember 2019: Marningot Angka Pambahenan ni Debata" (Psalmen 77: 6-16)
KSP Makmur Mandiri
Minggu, 29 Desember 2019 07:32:00

Jamita Evangelium Minggu Dung Natal, 29 Desember 2019: Marningot Angka Pambahenan ni Debata" (Psalmen 77: 6-16)

BAGIKAN:
Ist
Pdt Dr Robinson Butarbutar

Oleh: Pdt Dr Robinson Butarbutar

Sian Parsameanta,  STT HKBP
HP 10812-62472015

Hamu angka Dongan sahaporseaon,

Di pesta Natal parjolo di tanggal 25 Desember i tabege do barita nauli taringot tu bahat surusuruan parbanuaginjang na mamujimuji Debata siala nunga tubu Sipalua i di huta ni si Daud, Sipalua ni sandok bangso di portibion.  Jala nunga taida,  tatanda jala tadai haSipaluaanNa i di ngolunta marsadasada, gabe angka naung dipalua hita.  Di sude portibion do angka na porsea i marpungu patupa panombaan pamujion tu Debata uju pesta Natal i. Mamujimuji Debata siala ni hamamasa na balga i do na tapatupa. Ngolu na mamujimuji Debata tama do siudutonta di ngolunta on. 

Di bagasan Minggu dung Natal sadarion ditogihon dope hita patoguhon pamujionta di Debata, i ma mamuji Ibana dung marningot angka denggan ni basaNa di ngolunta siganup ari, di pargulmiton ni ngolunta mamungka dung adong hita di bortian ni Dainang dung tubu sahat tu sadarion,  mamolus ragam ni tirket ni pardalanan ni ngolunta.  Jala ditogihon Debata hita mamuji Ibana marhite na marningot angka pambahenanNa di ngolunta  ndang holan uju mansai denggan ngolu i tabolus manang tadai,  alai apala dina tahilala nunga ditadingkon Debata hita,  ndang dialusi Ibana tangiangta,  hira dihilala tondinta na diambolongkon hita,  tongon ro rimasNa mida hita, hira so dung ibana mardenggan basa tu hita,  hira so marasi ni roha Ibana tu hita,  hira pesan bahabagaNa tu hita, hira holan sahalakta do na mangadopi angka na dokdok siadopan i.

Sahalak Teolog na tarbarita di huria Roma Katolik,  Hans Kueng, di bukuna martitel "Dia na huhaporseai" (Was ich glaube, terbit taon 2009/2010, hal 154-159) manurathon songon hirahira songon on: "Apala uju sahat hita tu sada panghilalaan na so tarbahen hita manang aha mangadopisa,  apala di na tahilala nunga madabu hita sabagasbagasna,  nunga na talu hita di ngolu on,  nunga ndang tarbahen hita be hehe, apala disi do boi sahalak jolma manghilala na adong kesempatan naimbaru di ibana manghilala na adong do Debata,  na mangula do Debata di ngolunta on, na disi do Ibana patauhon hita mamamungka naimbaru, marpanghiriman na imbaru." Manang didok sahalak uluan ni huria di sada negara apartheid songon on: "Apala di na tahilala na di bagasan haholomon hita, apala sian i do tarida sinondang na manorangi dalan ni ngolunta."

Apala na dos do dipatuduhon do na ParPsalmen i di tangiang parungkilonna na mansai bagas dohot panindangion haporseaonna na mansai togu.  Apala uju jala dung dihilala Ibana tung dao situtu do Debata sian pardalanan ni ngoluna,  apala disi do ibana patolhas tangiang haporseaon na mansai togu,  i ma: "Mamuji Debata dung marningot angka pambahenan ni Debata" na dung bortik tu ibana, sahat tu sipareonna dohot pingkiran nang tondina. "Sai hupingkiri do angka ari na robi, angka taon naung leleng salpu. Sai hupaingotingot do pamiltikhu di parhinaloan bornginna I, sai marhusari do rohangku jala sai manangkasi do tondiku." Marhite panulingkiton di ngoluna i, na diida digohi angka parungkilon ni ngolu, ro ma panungkinionnana mandok siala ni angka ondeng do umbahen songon i masa di ngolungku: "Tung saleleng ni lelengna nama ulaning mambolonghon Tuhan i, jala ndang be ulahanNa mardenggan basa? Tung naung marujung salelenglelengna nama ulaning asi ni rohaNa, tung pesan nama bagabaga I marsundutsundut? Tung naung lupa ma ulaning Debata marasi roha? Manang naung ditiopi angka si ni rohaNa i dibahen murukNa? Ida ayat 8-10.
Alai apala uju dipatolhas ibana di tongdina angka sungkunsungkun i, tubu ma di rohana laho mangudutisa marhite pamujian, ndang baliksa ibana manadingkon haporseaon na mangolu di Debata.

Tolu hata dipangke parPsalmen laho mangojahi pamujionna tu Debata, i ma na manaringoti ulaon ni Debata na gok hagogoon (ida ayat 11-16)  Naparjolo, i ma pambahenan ni Debata. Napaduahon, halongangan sian angka narobi, dohot ma paluahon bangsoNa sian Misir.. Napatoluhon,  jadijadian ni Debata.  Tolunsa, i ma pambahenan, halongangan dohot jadijadian ni Debata ginoaran ni parPsalmen i tuk mambahen angka sungkunsungkun pinatolhasna i gabe tu pudi, ndang be di jolo, ai tolunsa patuduhon habalgaon ni Debata nab oi pamasaonna laho pabangkit ngolu ni naung talu, naung so mardihadiha, nang manghilala naung mate ibana. Tolunsa i do tutu na tuk mangurupi angka na manghilala nunga marujung ngoluna, marnida sada kesempatan na imbaru di duru ni kemampuanna. 

Duansa na parjolo i ndang habilangan ni hita jolma di ngolunta marsadasada dohot marsasapunguan, marsanegara nang marsapotibion. Jala na patoluhon, jadijadian ni Debata na tinompaNa sian na so adong boi pabangkithon haporseaon di sada kondisi na imbaru di ngolu on. Naumporlu Ii ma ingkon taloas, tapangido jala tajou Debata patuduhon hasintongan ni i di ngolunta marsadasada.  Ndang holan di jaman batu parningotan di pambahenan, di halonganan pinatupa ni Debata jala di jadidianNa mura dapot roha ni na porsea, alai dohot do nang di era revolusi Industri paopathon on boi taida hagogoon ni Debata. Ndang tuk ra tingki di ngolunta manggoari angka pambahenan ni Debata, angka halonganganNa nang marnida angka na uli na jinadihonNa, naung diparade Debata parsaulihononta. Ala ni i do adong na manurathon Ende na tarbarita i di hata Inggris, naung diterjemahon tu hata Indonesia dohot Batak, Carl Boberg halak Swedia di taon 1885, How Great Theou Art. Songon on ma hatana, di hata Batak: "

O Lord my God, When I in awesome wonder, Consider all the worlds Thy Hands have made; I see the stars, I hear the rolling thunder,  Thy power throughout the universe displayed.
Chorus:
Then sings my soul, My Saviour God, to Thee,  How great Thou art, How great Thou art. Then sings my soul, My Saviour God, to Thee,  How great Thou art, How great Thou art! 
When through the woods, and forest glades I wander,  And hear the birds sing sweetly in the trees. When I look down, from lofty mountain grandeurAnd see the brook, and feel the gentle breeze.

Then sings my soul, My Saviour God, to Thee,  How great Thou art, How great Thou art. Then sings my soul, My Saviour God, to Thee,  How great Thou art, How great Thou art! 

Boasa ma apala pamujion ni Debata na boi masa dung taingotingot angka pambahenan,  halongangan dohot jadijadian ni Debata na songon i dienet gabe jamita di hita ruas ni HKBP dung minggu Natal,  andorang do taujungi taon 2019 on jala andorang so masul hita tu taon naimbaro 2020?

Suraon do ala adong sian tongatonganta tongon mangadopi niadopan ni parPsalmen i,  isara mangadopi parungkilon na imbaru diadopi apala di tingki minggu Natal i sahat tu sadarion,  isara parsirangan sian hasian,  harugion di usaha,  parsahiton na tompu ro? 
Suraon do ala adong di tongatonganta ruas ni punguan na porseai na songon I pardalan ni ngoluna saleleng on, hira na so marasi roha Debata tu Ibana, gariada hira na tarrimas Debata tu ngoluna, hira so dung digohi Debata bagabagaNa marhite hataNa, gabe naeng ditandingkon ibana marhaporseaon tu Debata?

Suraon do ala nunga meret hita halak Kristen di tingki on sian na marhaporseaon na hibul - i ma na so holan maniop gomos Tuhanta uju suksuk pasupasu i tajalo alai dohot do  uju maol sidalanon i,  dokduk situhuon i -, tu na  marhaporseaon tu Ibana molo sai taida hagogoonNa di ngolunta,  sumurut mamuji goarNa holan dokdok taadopi siompaon i? Suraon do ala nunga gabe tajalo teologi sukses na mansai gogo dijamitahon angka parjamita na so sapangantusion partondion dohot hita, i ma angka donganta na mandok molo ndang sukses ngoluniba marararti do i na so adong haporseaon di ngolunta?

Haporseaon sisongon i do na ringkot rimangrimangonta nuaeng on: Nunga sahat hita tu tirket ni happrseaon songon parPsalmen on, songon panurirang Habakuk, songon haporseaon ni bahat halak Kristen Batak naung parjolo sian hita? 
Dipargogoi Tuhanta ma hita marhaporseaon na hibul, i ma na maniop Tuhanta di tingki na lehet dohot na so lehet.
Amen. 

  BeritaTerkait
  • Jamita Evangelium di Minggu Okuli, 24 Maret 2019: Jesus do Batu Parsuhi (Psalmen 118: 22-29)

    12 bulan lalu

    Oleh: Pdt. Dr. Robinson Butarbutar, Parsameanta STT HKBP (HP/WA 1812-62472015)Di hita ganup ruas ni punguan ni angka na porsea di Jesus Kristus mamungka sian abad na parjolo sahat tu nuaeng di abad pa

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    3 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium, 30 Juni 2019, Minggu II Dung Trinitatis "Martua Halak Na Pinintoran ni Debata" Psalmen 32: 1-11

    9 bulan lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar, 0812-62472015Udut ni hatani Debata di minggu na salpu na manosoi hita asa manghangoluhon ngolu na badia asa saut hita masuk

  • Jamita Evangelium, 15 Desember 2019, Minggu Advent III: Haroro ni Jesus dohot Ujung ni Portibion (Mateus 24: 3-8)

    4 bulan lalu

    Oleh: Pdt. Dr Robinson Butarbutar, sian Parsameanta STT-HKBP Pematangsiantar (0812-62472015)Mangihuthon panindangion haporseaon ni halak Kristen Batak, marmula jala marhaujungan do nasa na adong di ha

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    3 tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb