• Home
  • Agama
  • Jamita Evangelium Malam Natal, 24 Desember 2019 Matius 1: 18-23, "Hasisinghop ni Bagabaga ni Debata"
KSP Makmur Mandiri
Selasa, 24 Desember 2019 15:54:00

Jamita Evangelium Malam Natal, 24 Desember 2019 Matius 1: 18-23, "Hasisinghop ni Bagabaga ni Debata"

BAGIKAN:
Ist
Pdt Dr Robinson Butarbutar

Oleh: Pdt Dr. Robinson Butarbutar

Sian Parsameanta, STT-HKBP, Hp/WA: 0812-62472015

Hamu angka Dongan, ruas ni pamatang ni Kristus hinaholongon.
Di borngin Natal on, di na marsaor hita angka naung pinalua ni Debata di bagasan Jesus Kristus Tuhanta i marpesta parningotan di hatutubu ni Sipalua i, na gabe jamita di hita dienet sian hataNa na tarsurat di Evangelium Matius 1: 18-23 i. Disi adong opat barita na mansai uli na mamanghulingi hita di tingki on.

Naparjolo, i ma barita na tontu na mandok ia pesepese na margoar Jesus i tubu ndang sian sangkap-sangkap  manang tahi-tahi ni jolma, sian parsaoran ni daging ni Josep dohot si Maria,  alai na sian Tondi Porbadia do.  Nunga denggan pamatang ni si Maria uju so marsaor dope pamatang si Josep dohot ibana.  I do sada halongangan na sai diingot portibion hamamasa ni Hatutubu ni Jesus Kristus. Hita on sude tubu songon parbue ni parsaoran pamatang ni  Natorasta baoa dohot dohot natorasta parompuan na pinasupasu ni Debata.

Alai ianggo si Maria nunga jolo denggan pamatangna andorang so marsaor ibana dohot si Josep. Hagogoon ni huaso ni Debata do na mambahen boi masa songon i. Ndang tarbahen ni jolma patupa na songon i. Asa, mamujimuji Debata di haradeonNa patuduhon hagogoon ni huasoNa i, i do na mambahen unduk rohanta marsomba di joloNa. Borngin on i ma borngin di hita laho mamujimuji goarNa.

Napaduahon, barita na tontu na mandok na ia hatutubu ni Jesus sian Tondi Porbadia i ndang masa boti, ndang kebetulan, ndang coincidence, alai nunga disangkapi Debata di tingki na robi, hagogogok ni naung sinangkapan ni Debata do hatutubu ni Jesus i. Sangkap na so dapot piningkiran ni jolma do sangkap hatutubu ni sada pesepese sian Tondi Porbadia i, alai ingkon masa ala nunga Debata sandiri manangkapisa. Jala nunga parjolo dipabotohan Debata sangkap i marhitahite panurirangon ni panurirang Jesus. Ndang buni sangkap i. Alai nunga tibu disoarahon Debata tu hita jolma marhite bangsoNa Israel, naung mangadopi habuangan, i ma ngolu na dangol situtu. Asa, di na marpesta hita di bagasan borngin on, taarahon ma tong simalolongta tu Debata na marsangkap na denggan tu ngolunta, ngolu hajolmaon on.  Sangkap i nunga saut masa, jala nunga saut di angka bangso na tinujuna. Ringkot do lam tahaposi Hagogoon ni Debata pasauthon sangkapNa di parngoluanta di portibion.  Ala ni i, di borning Natal on, sipatoguonta do haporseaonta di hagogoon ni Debata na mangula di tongatonga ni portibion.

Napatoluhon, ia na tinuju ni Debata di na manangkapi dohot pasauthon sangkapNa marhite hatutubu ni Jesus sian Tondi Porbadia i, i ma: Paluahon bangsoNa dohot mian/rap dohot bangsoNa di ngolu nang ulaon nasida di tano on: Immanuel.  Ise do bangsoNa sinurirangkon ni panurirang Jesaya i, na ginurithon ni panurat ni Evangelium Matius i? Ianggo naparjolo umbege panurirangion ni panurirang Jesaya, alus ni sungkunsungkun i ima: BangsoNa Israel naung mamolus habuangan i. Dipalua Debata do tutu bangsoNa ndang sadia leleng dung manurirangi Jesaya. Alai songon halak Kristen naung pinalua ni Debata marhite Jesus Kristus na tapestahon hatutubuNa i, ia alus tu sungkun-sungkun i i ma ndang holan bangsoNa Israel, alai sandok bangsoNa na ro sian sandok bangso di portibion do. 


Tu angka naung pinaluaNa marhitehite ulaon ni Jesus Kristus, jinouhon ma asa marlas ni roha hita jala tasomba Ibana di bagasan roha hamauliateon ala nunga masuk bilangan ni angka naung pinaluaNa i hita. Tu angka na so dapotan haluaon marhitehite haporseaon di Jesus Kristus i, jinouhon ma asa jangkon hamu sangkap ni Debata na sumurung i: Asa dohot nang hamu paluaonNa marhitehite ulaon ni Jesus Kristus i. Ala ni i, di borngin Natal on marlas ni roha ma hita halak Kristen Batak, ala nunga masuk tu bilangan ni angka na pinalua ni Jesus Kristus i hita.  Ndang holan i tahe, sihalashononta do tong na dung dipalua Debata hita angka bangsoNa ia na tinuju ni Debata parohon Jesus tu portibion marhite na tubu sian Tondi Porbadia i ma laho pabotohon dohot pasauthon sangkapNa nauli i do, i ma: Ibana, Debata rap dohot hita di ngolunta di portibion.  Jala i do didok Tuhanta Jesus tu angka siseanna di abad parjolo uju mangajari nasida Ibana sahat tu nuaeng marhite hataNa na tarsurat di Matius 18: 20: "Ai anggo pungu dua manang tolu pe marhitehite goarHu, sai dongananku do nasida." Dung malengse pe bagasa joro ni Debata di Jerusalem di taon 70, ondol ma tu angka siihuthon Jesus na di bagasan Jesus rap dohot hita do Debata. I do haporseaonta umbahen tahaporseai jala tahaposi na rap dohot hita do Debata di gareja nang di angka inganan asing ni gareja di borngin on di na tapuji goarNa. Uju dipaborhat Ibana pe angka siseanNa di abad parjolo nang dung i manorushon ulaon mamaritahon barita nauli didok Ibana do tu hita: "Ai idama, sai na dongananku do hamu ganup ari, rasirasa ro ajal ni hasiangan on" (Mat 28: 20). Nang di partangiangianta pe, diajari Jesus do hita marpos ni roha di hataNa na mangihuton: "Angkup ni i hudok ma di hamu, molo mardos ni roha manang dua sian hamu di tano on tumangiangkon manang hata dia pe, jaloonmuna do i sian Damang na di banua ginjang" (Matius 18: 20). 


Ndang holan tu si Josep natoras ni Jesus hata barita nauli i manuju dohot pasauthon ulaon paluahon bangsoNa dohot patuduhon na Debata donganan ni Debata do si Maria na tongon mamingkiri beha ma bahenonna marnida hasasaut ni sangkap ni Debata i, alai dohot do tu ganup hit ana mangolu nuaeng di portibi na lam mohop on. DongananNa do hita patupahon nasa lomo ni rohaNa. Ibana do donganta patupahon nasa na denggan di ngolu on. Debata di rohanta, dipingkiranta, di ateatenta, di jolonta, dipudinta, di hambirangta, rap dohot hita. Ingkon pos do rohanta disi.

Napaopathon atik pe na Debata do na manangkapi sangkapNa nauli i di na mambahen tubu sian Tondi Porbadia ia pesepese i, alai tong do haradeon ni si Josep manjangkon sangkap i dohot marsaringar tu tungatonganta. Ai molo ndang rade si Josep ndang manirangkonn si Maria, ra boi do asing barita Natal i, i ma ndang pasauton ni si Josep mangalap si Maria. Mansai ringkot do tong taenet sian i jamita na mangolu na mandok: Di jolo ni Debata, laho pasauthon sangkapNa paluahon hita dohot mandongani hita, mansai ringkot do pangoloionta, panjangkononta di hataNa tu hita. Mansai ringkot do pangulahononta di ngolunta.  I do umbahen na di evangelium Mateus on mansai ringkot do barita nauli on: Ndang holan manghaporseai hat ani Jesus ia na pinaimaNa, alai pangulahononta di hataNa i do. Ala ni i do didok Jesus songon on tu angka na so mangulahon lomoNa, tu angka na holan hata: "Ndang dung hutanda hamu; laho ma hamu sian lambungkon, hamu angka na mambahen na so jadi" (Mat 7: 23).  

Jala di hata partadinganNa dohot siseanna didok do: "Laos ajari hamu ma nasida mangaradoti nasa hata naung hupatikkon tu hamu" (Mat 28: 20). Ala ni i di tingki Natal on, dung tahamauliatehon tu Debata hasasahat ni dohot hasasaut ni sangkapna patuu Jesus sian Tondi Porbadia, i ma laho paluahon hita dohot asa rap Ibana dohot hita ganup ari, ganup tingki. Ndang be dao Ibana sian hita. Ndang be marmusu dompak Debata be hita ala ni dosanta, alai asa dongananNa do hita ganup ari.

Ala ni i halashon, jangkon dohot tiop ma na tinuju ni Debata di hatutubu ni Jesus Kristus sian Tondi Porbadia i, i ma laho paluahon hita dohot laho rap dohot hita di sude ngolu nang ulaonta dohot parsaoranta.

(i) Boasa ma naopat barita na mansai uli na di ginjang i, na ingkon manggohi las ni rohanta di bagasan Borngin Parningotan Hatutubu ni Jesus i di bagasan sadarion 24 Desember 2019 on?

(ii) Boasa porlu gohan ni hataNa rohanta dohot barita taringot tu hagogoon ni Debata na patupa hamamasa ni hatutubu ni Jesus sian Tondi Porbadia, halongangan bolon? Suraon do ndang porsea be hita di hagogoon ni Debata di ngolunta songon angka na porsea di Ibana?
Boasa porlu gohan ni hataNa rohanta dohot barita taringot tu hasosonggop ni sangkap ni Debata di hatutubu ni Jesus i? Suraon do na tarimpu ndang dohot be Debata manangkapi sangkapNa nauli di partingkianta nuaeng, di na idaon sai adong dope angka donganta jolma na manangkapi angka sangkap na jahat, jala angka donganta na burju nunga lam so marsitutu be manangkapi patupahon ulaon na denggan? Asa di tongatonga ni i, ndang jadi hita putus asa marnida hinamaol ni patupahon na denggan di ngolunta nuaeng.

(iii) Boasa porlu gohan ni hataNa rohanta dohot barita taringot tu hataridaan ni sangkap nauli ni Debata marhite hatutubuNa laho paluahon bangsoNa dohot laho mandongani hita? Suraon do ala ndang tahilala be di ngolunta ulaon ni Debata paluahon hita, dohot ulaonNa mandongani hita?

(iv) Boasa porlu gohan ni hataNa rohanta dohota barita taringot tu pangoloion ni si Josep di hata ni Debata mangoloi sangkap ni Debata? Suraon do ala ndang sai rade be hita mangulahon hata dohot sangkapNa nauli di ngolunta, gabe ndang be marngolu na digohi angka pasupasuNa be ngolunta, ngolu ni keluarga nang bangsonta?
Molo ingkon tapillit sada sian naopat i gabe jamita di hita di borngin Natal on, dia ma na boi tajangkon di ngolunta? Molo boi nian ganup na opat i, ai sada do naopat i masirainrainan. I pe, molo tung sada sian na opat i pe tajangkon, martua do hita.(**)

  BeritaTerkait
  • Jamita Evangelium Minggu Dung Natal, 29 Desember 2019: Marningot Angka Pambahenan ni Debata" (Psalmen 77: 6-16)

    4 minggu lalu

    Oleh: Pdt Dr Robinson Butarbutar Sian Parsameanta,  STT HKBP HP 10812-62472015 Hamu angka Dongan sahaporseaon, Di pesta Natal parjolo di tanggal 25 Desember i tabege do barita nauli taringot

  • Jamita Borngin Parningotan ni Hatutubu ni Jesus Kristus 24 Desember 2017, Pukul 19.30 "Jangkon ma hapataron ni hahomion ni Debata."

    2 tahun lalu

    Oleh: Pdt Dr Robinson Butarbutar, STT HKBP Pematangsiantar1. Ndang tarbahen sude naporsea ra marpungu dohot angka donganna na porsea di bagasan borngin on tanggal 24 Desember 2017, laho mamuji Debata

  • Jamita Evangelium, Advent I 2 Desember 2018, 4 Musa 24: 15-17: Managam Haroro ni Sipalua

    tahun lalu

    Oleh: Pdt Dr. Robinson Butarbutar, di Parsameanta, STT-HKBP Pematangsiantar, HP-WA; 0812-62472015. Sada na mansai uli situtu na jumpang hita di angka tona ni Debata di Bibelta i, i ma na mangihut on:

  • Jamita Evangelium 16 Desember 2018 Minggu Advent III "Jahowa Pamalumhon Angka Namulak tu Ibana (Hosea 14: 2-9)"

    tahun lalu

    Sian Pdt. Dr. Robinson Butarbutar Dung tabege  di Minggu Adven I  barita nauli taringot tu sangkap ni Debata paro Mesias uju di bona ni pardalanan ni bangsoNa Israel sinoarahonNa marhite Bi

  • Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21

    tahun lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar.HP/WA 0812-62472015Di Minggu Advent Paopathon on,sadari nari andorang tapatupa borngin parningotan hatutubu ni Siaplua i (24

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb