• Home
  • Agama
  • Jamita Evangelium 22 Maret 2020 Minggu Letare, Marlas ni roha ma hamu "Las ni roha di bagasan Tuhan i" (Psalmen 69: 30-37)
KSP Makmur Mandiri
Jumat, 20 Maret 2020 05:52:00

Jamita Evangelium 22 Maret 2020 Minggu Letare, Marlas ni roha ma hamu "Las ni roha di bagasan Tuhan i" (Psalmen 69: 30-37)

BAGIKAN:
ist
Pdt Dr Robinson Butarbutar
Sian Parsameanta, STT-HKBP di Pematangsiantar
Pdt Dr Robinson Butarbutar


Di tingkion di sandok portibion, di tongatonga ni angka jolma na marTuhan dohot na so marTuhan, na manomba Debata nang  angka debata na asing i, tongon mangadopi paraloon bolon do angka anak ni Jolma i, i ma paraloon maradophon Virus Covid 19, mangalului vaksinna marhite penelitianmedis di tongatonga ni angka negara naung timbo parbinotoan ni angka penelitina, dohot pasohothon harararatna tu sama jolma marhite marragam cara, sian na paiashonsecarar medispamatangta, nang angka inganan parjumpangan, ingangan parsaoran,nang inganan mangula dohot ingangan parmianan, sahat tu na manjaga jarak pajumpang sian dongan jolma, songon i nang pahinsathon hahipason ni pamatang, patimbohon immunitas ni pamatangta on, dohot na pola ingkon mangorai penduduknaung terinfeksi virus i ruar sian inganan parmiananna nang kota, daerah nang negarana pe tahe asa unang diboan virus tu ingangan na asing. 

Di partingkian na songon i, atik pe sai tasosoi do dirinta asa unang pola panik hita, alai asa hot ma demak hita huhut marbisuk, unduk tu angka dalan pinutushon ni pamarentanta sipatupaonta songon rakyat na denggan, na boi do tong hita hajolmaon manghilala songon na hinilala ni parPsalmen 29 ayat 1-29 i, atik pe marasing sibonsirina, i ma hira naung manang naeng lonong tahilala hita tu bagasan gambo lisok, maol ruar sian i sian gogonta sandiri, nunga pola tolhas hita tu lintong laut angka nabagas i, jala dihuphupi galumbang i hita (ayat 1). 

Ra nunga joujou hita tu Debata dung bortik hajajadi dohot harararat ni virus on parjolo di Wuhan China, songon na hujouhon di Youtube na huparurar di tanggal 14 Februari i, asa dipasohot harararat ni virus on di portibion, uanng pola gabe pandemic, hape nunga gabe pandemi, nang di negaranta pe nunga sahat, na so holan di DKI, Jatim, Jateng nang Kerpri be tahe, alai nunga dohot tong tu Sumut. Songon i ma hita joujou di tangiangta asa dipasohot Debata harararat ni virus on, pola maheu tahilala binahen ni joujounta i (ayat 3-4). 

Alai taida hira lam rarat do, lam meret virus on sian sada donganta jolma na sada tu donganta jolma na asing, ndang marimba rumang ni hulitna, ndang marimba timbo ni hadoraonna, sude ndang marimbar. Nunga bahat angka negara termasuk Indonesia na patupa Bencana Nasional ulaon pasohothon hararat ni virus on, anggiat sada usahamangalo virus on, songon sinosohon ni Dewan Kesehatan ni Parsaoran ni angka Bangso (PBB). Masa Bencana/darurat nasional on pe di negaranta nunga dipaganjang BPBN sahat tu tanggal 29 Mei, asa haru tangkas boi tapasohot.  Angka sikkola nang universitas pe nunga adong na patupa parsiaran online.Ndang ingkon marsiajar di kelas alai nunga sian ingananta be. Nung adong na mangula sian jabu, ndang be ingkon tu inganan ulaon. Amanta Presiden Jokowi pe pertanggal 19 Maret nungan dua hali marrapot dohot angka ruas ni Kabinet Indonesia maju marhite video conference. Alai atik pe songon i martamba dope torop ni na terinfeksi. Tuani ma bangso naung torbang hita, na so muraura be dipalilulilu ala ni angka na masa. Tontu tongtong dope marpanungkun hita tu Debata ala ni holongta tu ngolunta songon na tinompana sungkunsungkun on: Beha nama hami Tuhan?

Alai angka dongan, apala di minggu huria minggu Letare sadarion, apala sian bagian parpudi ni Psalmen nagok tangiang hoihoi on do dienet mamanghulingi hita angka na porsea di Debata di partingkian paraloon tu Covid 19 on, i ma: 

"Apala molo tapuji do Debata marhitehite ende jala tapasangap Ibana marhitehite pujipujian ndang marimbar di dia, apala disi do taingihonon ni Debata angka na mangalului Ibana, angka na pogos, angka na manghilala dirina naung taruhum, naung tarbuang. Ai tu angka na manghaholongi goarNa marhite pujipujian do paulion ni Debata angka hutanta, paluaonNa sian angka mara (ayat 32-37). 
Marsihot ma hita patupa pamujion i manang di dia pe:

(i) Di bagas joro (Gareja) untuk sementara di Minggu tgl 22 Maret on, i ma di gareja marhite syarat-syarat na ketat, isara naung  dipaias marhite penyemprotan dohot mamangke alat disinfektanma gareja i, diparade ma dipintu gareja disinfektan pangkeon ni ni na laho bonogot tu dohot ruar sian gareja, parhundulan pe diatur jarakna, na marsahit ndang polar o, dohot tujuan unang laos di gareja rarat virus i songon naung ditonahon ni manang piga uluan ni Distrik HKBP di angka surat parmahanionnasida tu angka ruas disi;

(ii) Manang, songon na huhaposi dao dumenggan sahat tu tingki dung tataluhon virus on, di jabu ni ruas ganup na diurupi angka na ringkot tusi (liturgi, jamita tercetak nang youtube), na diida pamarenta songon dalan na dumenggan pasohot penyebaran ni virus songon pinangido ni Presidentadohot semboyan ‘beribadah di rumah’, jala na dipatuduhon HKBP Menteng Jalan Jambu Jakarta Pusat niuluhon ni Pdt Tulus Ompusunggu MTh, dohot songon haputusan ni angka uluan huria Kristen Katolik dohot Protestan di Jerman na rap mangula dohot pamarenta, i ma mamungka ari Minggu Okuli tgl 15 Maret na salpu i ndang paadonghon parmingguon di Gareja, na dihaposi songon dalan na mansai jeges pasohothon penyebaran virus i, so ingkon maralo tu partondion tarlumobi pangantusion patupa patik paopathon di tingki normal, manang parmingguon ingkon di gareja, manang marnida haputusan i hira palas roha ni Sibolis i;

(iii) Nang di pardalananta be pe tahe. Tapatupa i di inganan na suhi dohot inganan na bungbung, marsasahalak  manang rap dohot angka dongan na marjarak, so pola ingkon dais tu donganta lam ma marsijalangan, marmasker manang ndang, marpelean na mansai arga isara jonggi manang lombu sitingku tanduk na martambirik, manang ndang. Mamuji Debata i ndang pola ingkon marpelean na balga manang arga situtu, tarlumobi ma di partingkian na manghilala hita tongon mangadopi mara bolon. Di Ibana pamujianta sian roha na tutu do hinasiholanNa. Boi do i marhite Ende di Buku Endenta na tatanda jala taingot, dohot Ende pamujion na tatanda di ngolunta asing ni na di buku Endenta i.

Apala i do ditogihon tu hita angka ruas ni huria HKBP di na mangadopi virus Covid 19 on nang angka marragam parungkilanta ganup marsadasada di ngolunta ganup  di Minggu Letare on: Mamuji Debata nang di tingki parungkilon bolon.  Ndang mansohot mamuji Debata. Baliksa, lam tapuji ma Debata so ingkon adong pelean na arga tu Ibana. Tatangiangkon ma asa dipatau Debata hita sahat tu parhaporseaon songon parPsalmen i, i ma tuk mamuji Debata tongtong atik pe tongon naeng lonong ngolunta on tahilala.

Beha, tolapta ruas ni HKBP do apala di tingki on, di Minggu Letare uju mangadopi virus Covid 19 on, mian di bagasan las ni roha marhite na mamujimuji Debata na tatanda di bagasan Jesus Kristus i, i ma Debata na marhagogoon situtu paluahon hita, Debata na marhagogoon marhite hagaleon na tarida di silang ni Kristus i, Debata na mandok marhite hataNa ginurithon ni apostel Paulus: "Di  bagasan hagaleon do sun timbul hagogoon" (2 Kor 12: 9). Ndang marlas ni roha hira na leas mida ancamanana ro on, alai di bagasan las ni roha ala ni Tuhanta pargogo na so hatudosan i. Lam marsurak jala manongtong hita hita mamujimuji Debata di inganan na buni, marsasahalak dohot marsasajabu ruas ni HKBP mamujimuji Debata, disi do ro halongangan na sian Debata marhite angka dalanNa paluahon hajolmaon on sian virus on, marhite angka dalanNa na marragam i, naboi taantusi nang na so tarantusan ni pingkiranta, ndang ingkon sian dalan dos dohot dalan na taantusi saleleng on, alai tung dalanNa na mansai denggan di rohaNa paluahon hita jolma hinaholonganNa, songon dalanNa di bagasan Kristus na so tarantusan ni pingkiranta alai mansai uli paluahon hita hita hajolmaon on, hita angka na manghaporsea ulaon ni Kristus na mansai uli i. 

DalanNa i ndang ingkon na pinatupa ni angka na manghaporseai Ibana. DalanNa i boi do tong dipatupa Ibana sian angka na so mananda dohot manomba Ibana. Dalanna  i boi do tong masa manang marharoroan sian angka na manomba Ibana songon panombaanta manang na manomba Ibana ndang songon panombaanta.  I do tonaNa tu hita, apala di na marusaha hita sian nasa gogo nang parbinotoanta mangalo virus on dohot mangadopi angka tantangan ni ngolu na taadopi ganup asing sian virus Covid 19 on.  Asa, apala pamujion tu Debata do dipangido sian hita ganup ruas ni HKBP di  minggu on, di na taalo sagogonta dohot intap ni parbinotoonta pasohon penyebaran ni virus on. 

Pamujionta i ndang holan mamujimuji Ibana di bagasan roha na martangiang, alai ingkon dohot do tu pamujian marhite na patupa na denggan tu donganta jolma nang di partingkian mangadopi virus on, i ma marhite ulaonta mangurupi angka na manaon ala ni virus on dohot na kerja keras mangubati angka na terinfeksi. Ndang sintong hita mamuji Debata hape ndang angka na pasohot hararart ni virus on na tapatupa, alai apala na mambahen rarat do, i ma na mambahen angka ulaon na mambahen marmara angka donganta jolma ala lomolomonta bepergian, atik pe nunga taboto adong sahitta, adong di hita virus i, jala taboan ngolunta tu bagasan mara marhite na mangulahon angka na nioraan ni pamarenta sipatupaonta di partingkian mangalo virus on. Pamujion tu Debata na mansai denggan do ulaon solidaritas na mansai tibo. Pamujion tu Debata do binahen ni angka dokter nang paramedis mangubati angka na terinfeksi, atik pe bahat resiko disi. Mamuji Debata do mangalului dohot patupa vaksin ni virus on.

Pamujion tu Debata ndang holan patupa na denggan tu dongan sabangso, sauhaporseaon, saugamo, saideologi. Mamuji Debata do patupa na denggan tu dongan jolma manang songon dia pe latar belakangna na marragam i. Mamuji Debata do patupa na denggan tu dongan na tinompa, jolma manang ndang. Mamuji Debata do patupa na denggan dohot angka prakarsa-prakarsa na innovatif, na pangoluhon, na padengganhon, dohot na paimbaruhon.

Pamujionta i ndang ingkon sai di gareja, sian dia pe uli do. Alai molo apala di tingkion tatadingkon pamujion di goarNa siala tadok ndang tuk Debata paluahon hita sian na dokdok na  taadopi on, apala disi do luangan hita di asi ni roha ni Debata di angka na hinaholonganNa. Molo mamujimuji Debata ganup ruas ni HKBP sian bagasna be dohot sian ingangan ulaonna, di bagasan roha dohot marsoara na gogo, sahat ma tu pinggol ni Debata na Tumimbul i angka pamujionta i. Lomo ma rohaNa mida hita. Asi ma rohaNa mida hita. PasupasuonNa ma angka na tapatupa manghamonangkon paraloonta maradophon angka tantangan na taadopi i. Tapapos ma rohanta disi. 
Amen
  BeritaTerkait
  • Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita

    2 tahun lalu

    Oleh: Pdt Dr. Robinson ButarbutarA. Dihasiholi Debata asa marlas ni roha jolma i.Songon angka na porsea ni Debata Sitompa, Sipalua, Siparmudumudu ngolunta sian bortian ni dainang sahat tu sadarion, ta

  • Jamita Evangelium Minggu Dung Natal, 29 Desember 2019: Marningot Angka Pambahenan ni Debata" (Psalmen 77: 6-16)

    8 bulan lalu

    Oleh: Pdt Dr Robinson Butarbutar Sian Parsameanta,  STT HKBP HP 10812-62472015 Hamu angka Dongan sahaporseaon, Di pesta Natal parjolo di tanggal 25 Desember i tabege do barita nauli taringot

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    3 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium di Ari Jumat, 30 Maret 2018 Parningotan Ari Hamamate ni Tuhan Jesus, EvangeliumJohannes 19: 28-37 "Panotnoti Jala Haposi Na Tarsilang i"

    2 tahun lalu

    Oleh: Pdt. Dr. Robinson Butarbutar, Parsameanta, STT-HKBP PematangsiantarPatujoloDi taon 2018 on, di tonga-tonga ni Parningotanta di Ari Hamamate ni Tuhan Jesus di hau pinorsilang i hira-hira 2015 tao

  • Jamita Evangelium, Minggu Jubilate, 22 April 2018: Marlas ni Roha di Bagasan Tuhan i (1 Tessalonik 2: 13-20)

    2 tahun lalu

    Oleh: Pdt Dr. Robinson Butarbutar, Sian Parsameanta, STT-HKBPJubilate = Marolopolop tu Debata Sandok Tanoon1.Molo tajaha surat 1 Tessalonika on sian bona sahat tu ujung, tangkas situtu do digurithon&n

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb