• Home
  • Agama
  • Jamita Evangelium  Minggu Invokavit, 1 Maret 2020: "Molo Joujou Ahu, Dialusi Ho do Ahu"
KSP Makmur Mandiri
Jumat, 28 Februari 2020 11:57:00

Jamita Evangelium  Minggu Invokavit, 1 Maret 2020: "Molo Joujou Ahu, Dialusi Ho do Ahu"

BAGIKAN:
Ist
Pdt Dr Robinson Butarbutar
Oleh: Dr Robinson Butarbutar, STT HKBP 

 Di Minggu Invokavit dijou Debata do hita marhite hataNa asa lam porsea jala pos rohanta na molo joujou hita tu Ibana sai na alusanna do hita. Haporseaon di haradeon ni Debata mangalusi hita uju joujou i ringkot lam togu di ganup panggulmiton ni ngolunta, di na patupa angka na denggan di ngolu on tu donganta jolma, di na mangadopi tantangan na so tarhamonangkon hita, nang di na mangadopi parsahiton na so tarpamalum ni angka parbinotoan medis, psikologis nang sosial di partingkianta nuaeng on. Di minggu Invokavit di partingkian di na so songon i timbo dope hatauon ni jolma mangadopi angka tantangan ni ngolu i, jumotjot jala gumodang do pangondolion ni jamita di hinaringkot ni manghaporseai haradeon ni Debata mangalusi joujounta, ai haposan do Ibana. 

 Alai di partingkianta nuaeng, di na lam timbo parbinotoan dohot hatauon ni hadirion ni jolma mangadopi siadopan di ngolu on, lam timbo hatauon teknologi na marragam i na so tararop hita di dua pulu taon na salpu, jala di na lam tamba torop ni angka na so manghaporseai haadongon ni Debata dohot hatauon nang haradeonNa mangurupi jolma i ringkot do tong jamita di minggu Invokavit tong mangalehon roha tu haradeon ni jolma i manjoujouhon Debata di ngoluna. Boasa? Ai lam manghilala do jolma i di tingki on na so haru diharingkothon be kehadiran ni Debata nang huasoNa di ngoluna. Ndang adong be tingkinta manjou Debata. Molo tung dijou pe Debata, ndang mardongan haporseaon di huaso ni Debata mangalusi joujouNa i. Siala ni i do taida annon di hatorangan ni jamita na mangihut on, dipillit do jamita na dienet sian Evangelium Mateus 9: 27-31 sada turpuk na di bagasanna adong sungkunsungkun ni Jesus tu dua halak namapitung na mangido asi ni roha ni Jesus tu nasida manang na porsea nasida di hatauon ni Jesus patupa na pinangido nasida i, i ma asa diasii Jesus Anak ni si Daud i nasida. 

Asa, ndang holan haradeon ni Jesus Kristus mangalusi joujounta na ingkon sijamitahonon dohot sihaporseaonta, alai ingkon dohot do haradeonta manjou Ibana songon I nang haporseaonta di hatauon hagogon ni Debata tong ingkon jamitahonon dohot jangkonon di rohanta dohot di ngolunta. Catatan: Holan angka Atheis do na mansoadahon angka i. Isara nidok ni Atheis na tarbarita ni Inggris, negara na dua hali lipat torop ni na Atheisna di dua dekade parpudi on hape torop ni halak Kristen holan 38 persen nama, Richard Dawkins na di bukuna, God's Delusion mandok na mangihut on: Mangihuthon penelitian di America ndang adong pengaruh ni joujou marhite tangiang di hamamalum ni sahit ni na marsahit. Ingkon marsigantung tu hatauon parbinotoan medis nama jolma i. Lam timbo parbinotoan medis i lam so diharingkothon be huaso ni Debata, na di nasida ndang adong. Bahat do angka contoh di Bibelta i taringot tu joujou ni na porsea i tu Debata jala alus ni Debata tu joujounasida i. Ndang holan joujou ni na porsea marsasahalak, alai dohot do joujou ni marsasapunguan dohot marsasabangso. Angka contoh na mangihut on porlu tariashonon laho mangondolhon i: Parjolo, di 1 Musa 21: 17b-18-20, dibaritahon hinatinggil ni sipareon ni Debata ni si Abraham manangihon soara na dipangiar sian pamangan ni si Ishamel anak ni si Abraham na sian si Hagar i naung dipeakhon inongna di toru ni ramba na metmet di halongonan Bersyeba. 

Disi sigop do Debata bertindak paluahon si Ishamel sian hamatean, gariada sahat tu na mambagabagahon tu inongna na pasupasuonna ma ibana gabe bangso na balga: "Jadi ditangihon Debata ma soara ni dakdanak i, joujou ma suruan ni Debata sian banua ginjang di si Hagar, ninna ma mandok ibana: "Aha di ho ale Hagar? Unang ho mabiar, ai nunga ditangihon Debata soara ni dakdanak i sian hapeahanna i. Hehe ma ho, pahehe ma dakdanak i jala togu ibana dohot tanganmu ai bahenonku do ibana gabe bangso na bolon. Dung i dipatonggor Debata ma mata ni si Hagar, gabe diida ma sada mual. Jadi laho ma ibana manggohi tabutabu i dohot aek, jala dipainum dakdanak i. Dung i ditumpak Debata ma dakdanak i magodang…" Paduahon, i do tong na hinatindangkon ni barita na tarsurat di 1 Samuel 1: 11, 13, taringot tu sada boruboru margoar Hanna na marbortian na hol binahen ni Jahowa (ayat 5) na joujou mardongan tangis situtu tu Debata di tangiangna di jolo ni bagas joro di Jerusalem di bagasan arsak jala dung leleng gabe so marsoara be ibana alai ubitubit bibirna so marsoara gabe disura Malim Elia hira na mabuk. 

Songon on ma tanginangna: "Ale Jahowa Tsebaot! Molo ditatap rohaM pardangolan ni naposomon, jala diingot Ho ahu, jala ndang halupahononmu naposomon, jala dilehon Ho tu naposomon sada anak, lehononku ma ibana muse to Jahowa saleleng mangolu ibana, jala ndang hona raut parnabung uluna." Patoluhon, laos i do na pinatupaNa tu angka angka imigran/paisolat pomparan ni si Jakob di Misir na joujou tu Debata di na mangadopi panggosagosa dohot panindosan ni raja Firaun (2 Musa 3: 7-8): "Nunga tangkas huhida pardangolan ni bangsongku na di tano Misir i, jala nunga hutangihon anggukangguknasida i maradophon angka na pasosaksosak nasida; ai nunga huboto parniapan nasida i. Ala ni umbahen tuat Ahu paluahon nasida sian tangan ni halak Misir, jala paruarhon nasida sian tano on tu tano na denggan jala na lambas, tu tano habaoran ni susu dohot situak ni loba…" 

Paopathon, laos i do na pinatuduhon ni Jahowa tu sahalak na agoan gogo margoar si Simson siala tinadingkon ni Tondi ni Debata ibana dung dipaboa ibana so sipaboan tu boruboru margoar Delila jala dina dirante jala direhei bangso Pilistim ibana di jolo ni debata ganaganaannasida (Panguhum 16: 28, 30). Songon on joujouna tu Debata: "Ale Tuhan Jahowa! Sai ingot ma ahu, jala pargogoi ahu nanggo sahalion dope, ale Debata, asa hutubolhon sahalinari matangku na dua i tu halak Palistim." Taboto do dia na masa dung i. Dihaol ibana ma tiang partunggul ni inganan parpunguan ni bangso i, laos diaithon, sada tu siamunna, jala sada di sihambirangna. Gabe runggang ma bagas i na di ginjangna 3000 halak, laos matema gumodang dibahen ibana sian na uju mangolu ibana. Nang di ngolu ni angka na porsea i na so disurathon di Bibel i, dohot na so disurathon di Surat Kabar manang Buku Biografi dohot Diari pe tahe, mansai bahat do angka pengalaman ni na porsea i na joujou tu Debata, jala dialusi Debata joujounasida. 

 Di Evangelium Mat 9, 27-31 i, tung tangkas do dipatuduhon na marhagogoon do joujou dohot soara nagogo (Gorik: krazontes kai lalountes) tu Jesus Anak ni Si Daud i, Tuhanta pargogo na sohatudoan i, jala ala joujou i mardonganhon haporseaon di Jesus na tarbahen manggohi pangidoannasida asa diasii (Gorik: Eleeson) Jesus nasida, gabe dipatupa Jesus ma mambahen Gabe marnida matanasida dung jolo diampehon Jesus tanganna tu simalolongnasida na mapitung i. Joujou nasida, dipatangkas Jesus manang na porsea nasida di hatauon ni Jesus patupahon na pinangidonasida i, jala dung tangkas i dijamata Jesus mata nasida songon Dokter jala dung i marnida ma nasida. Songon i ma hasisintong ni na asi ni roha ni Jesus tu nasida na mangalusi joujounasida gabe dipaboaboanasida ma tu bahat halak di saluhut hutanasida na masa i atik pe diorai Jesus nasida patupahon i. 

Beha do hita angka siihuthon Jesus Kristus di abad pa-21-hon on di angka inganan ngolunta na marragam i, hitatarlumobi angka na marsaor di bagasan sada huria ni Kristus di portibion, i ma Huria Kristen Batak Protestan, di du ana mangihut on: Parjolo, joujou dope hita tu Debata uju taadopi tantangan na so tartaluhon hita, dohot ma i di na so taralo pamatang nang rohanta sahit na saor jala na ro sian duru ni pamatangta tu pamatangta on, dohot ma i di na tongon mangadopi virus Corona hajolmaon di tingkion, virus naung sahat tu Italia Utara, naung menginfeksi lobi 200 halak disi jala mambuat ngolu ni pitu halak sahat tu tgl 26 Pebruari i, nang di Jerman pe nunga adong naung terinfeksi, gabe pola Menteri Kesehatan nasida mandok na parade diri ma bangso i mangadopi epidemi i di tongatonga nasida? Jouou dope hita asa diasii Ibana hita on? Manang ndang be, nunga marpangusandean be hita tu hatauonta sandiri, hatauon ni jolma i? Manang, nunga sahat hita tu bagasan ngolu na marpandelean? 

 Paduahon, di na joujou i hita, porsea dope hita di hatauon ni hagogoon ni Debata Sitolusada i patupahon na tajouhon i tu ibana, i ma asa diasii Ibana hita? Tu dua na mapitung na di tingki abad parjolo di Palestina - na di tingki i diida jolma ndang adong na tuk mambahennasida marnida - nuaeng on pe adong do hapitungon na so tarbahen parbinotoan medis na timbo mangatasisa asa boi marnida, dipasungkunhon Jesus do haporseaonnasida di hatauon ni Jesus patupa na pinangido nasida i, i ma asa boi nasida marnida. Beha do hita angka na porsea nuaeng on? 

 Patoluhon, dialusi Debata do angka joujounta tu Ibana di tingki on? Ringkot do sungkunsungkun on taalusi. Tapuji goarNa di na taida alusNa i. Molo adong sian tongatonganta naung joujou tu Tuhanta sian nasa haporseaonna, hape ndang diida ibana Debata na tangkas mangalusi joujouna i, beha do tona ni hata ni Debata tu ibana di minggu Invokavit sadarion? Molo gabe ndang manghaposi hinasintong ni hataNa, i ma na alusonNa do joujou ni na joujou tu Ibana, ra ndang siulaonta i. Na boi do idaonta muse tu pudi jala manungkunhon tu dirinta manang na di bagasan haporseaon tu hagogoon ni Debata patupa na tapangido i di na joujou tu Ibana manang ndang. 

Alai boi do ndang disi hapeahan ni alus di sungkunsungkunta i. Na boi do hita na porsea di Tuhan i mangauhon alus na mangihut on: Debata do umboto boasa ndang dialusi Ibana natajouhon i uju i sahat tu nuaeng. Inkon lehononta do kebebasan ni Debata mamillit rumang ni alus tu na tapangido i: Mangoloisa manang ndang mangoloisa. Patupa songon na tapangido i manang marasing sian na tapangido i. Alai ianggo gabe ndang manghaporseai hataNa i taringot tu hatoguon ni alus ni Debata tu joujounta i ndang siulaonta. Molo tung ro alus ni Debata ndang apala dos tu rumang ni na tapangido i, sai dipatau ma hita manjangkon manang songon dia pe rumang ni alusna i. Margogo ma hita mangarimangrimangi na tolu pangarimangrimangion na di ginjangi mardonganhon Tuhanta Sitolusada i. Amen.
  BeritaTerkait
  • Jamita Evangelium 22 Maret 2020 Minggu Letare, Marlas ni roha ma hamu "Las ni roha di bagasan Tuhan i" (Psalmen 69: 30-37)

    2 bulan lalu

    Sian Parsameanta, STT-HKBP di PematangsiantarPdt Dr Robinson ButarbutarDi tingkion di sandok portibion, di tongatonga ni angka jolma na marTuhan dohot na so marTuhan, na manomba Debata nang  angk

  • Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita

    2 tahun lalu

    Oleh: Pdt Dr. Robinson ButarbutarA. Dihasiholi Debata asa marlas ni roha jolma i.Songon angka na porsea ni Debata Sitompa, Sipalua, Siparmudumudu ngolunta sian bortian ni dainang sahat tu sadarion, ta

  • Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21

    tahun lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar.HP/WA 0812-62472015Di Minggu Advent Paopathon on,sadari nari andorang tapatupa borngin parningotan hatutubu ni Siaplua i (24

  • Jamita Minggu Evangelium 16 Juni 2019, TRINITATIS, HASITOLUSADAON NI DEBATA: Haporseaon na Manghorhon Paluahon (1 Musa 22:1-19)

    12 bulan lalu

    Oleh: Pdt Dr Robinson Butarbutar, Ketua Rapat Pandita HKBPHamu angka Dongan sahaporseaon,Di Minggu tanggal 26 Juni 2019 na salpu, di Minggu Rogate, sude do hita ruas ni Huria Kristen Batak Protestan m

  • Jamita Evangelium Minggu Dung Natal, 29 Desember 2019: Marningot Angka Pambahenan ni Debata" (Psalmen 77: 6-16)

    5 bulan lalu

    Oleh: Pdt Dr Robinson Butarbutar Sian Parsameanta,  STT HKBP HP 10812-62472015 Hamu angka Dongan sahaporseaon, Di pesta Natal parjolo di tanggal 25 Desember i tabege do barita nauli taringot

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb