• Home
  • Agama
  • Jamita Evangelium, Minggu XVIII Dung Trinitatis, 11 Oktober 2020: “Naposo na manghobasi” (Markus 10: 35-45)
KSP Makmur Mandiri
Jumat, 09 Oktober 2020 12:12:00

Jamita Evangelium, Minggu XVIII Dung Trinitatis, 11 Oktober 2020: “Naposo na manghobasi” (Markus 10: 35-45)

BAGIKAN:
Ist
Pdt Dr Robinson Butarbutar
Pdt Dr. Robinson Butarbutar sian Parsameanta

Pinutushon manggoari topik ni jamitanta di minggu on ndang songon na di Almanakta i – na marojahan tu Terjemahan Bibel Bahasa Batakta, i ma ‘Naposo na gabe pangoloi,’  alai “Naposo na manghobasi,”   na marojahan tu hata ni Tuhanta Jesus di ayat 45. Disi, di hata Gorik, ia hata na dipangke Jesus i ma diakonothenai (=dihobasi) dohot diakonesai (=manghobasi). Duansa hata i marojahan tu kata dasar diakoneo (=marhobas). Ndang ‘mangoloi’. Hata ‘manghobasi” on i ma alo ni dua hata na digoari Jesus di ayat 42 dipangke ‘angka panggomgomi bangso’ (Gorik: hoi dokountes archein), i ma kata-kurie-ousin (=manga-raja-i) dohot ‘angka na sangap’ (Gorik: megaloi) i ma kata-eksousia-zousin (=mamaksa mardongan huaso). 

Hamu angka Dongan sahaporseaon, angka naposo ni Debata di tongatonga ni huriaNa nang naposo ni Debata di duru ni huria i, i ma di tongatonga ni ulaonta na marragam i di portibion (Negara, Usaha, Masyarakat).  Di partingkianta nuaeng tongon marusaha do angka bangso di portibion, ndang marimbar bangsonta Indonesia niuluhon ni Presiden Joko Widodo, manaluhon Pandemi (Boddil) Covid 19, napola manusai ngolu hahipason (kesehatan) dohot siala ni i ekonominta. Nunga 35,33 juta halak naung terinfeksi, jala 1,04 juta naung monding di tgl 6 Oktober. Panghorhonna tu ngolu ekonomi mansai balga. Pertumbuhan ekonomi nunga minus, jala resesi ekonomi nunga dipanghilalahon halak. Bahat situtu na agoan karejona. Di pidatona tu PBB di ari 23 September i dijouhon ibana do asa rap mangula dohot rap masiurupan angka bangso di portibion mangadopi pandemion. Ndang di tingkina be holan mamingkirhon kepentingan ni bangso sandiri. Alai ingkon bekerjasama do. Ingkon ganup bangso do dihobasi angka bangso tarlumobi napogos molo jumpang vaksin alo ni Covid 19 on.

Di tongatonga ni partingkian na songon i, dipanghulingi Tuhanta Jesus hita angka siseanNa asa patuduhon  na naposo ni Debata na manghobasi do hita di ngolunta, ndang holan di minggu on, alai di ariari na ro on. Ingkon suan, marurat, martumbur, magodang jala togu di bagasan roha, pingkiran nang ateatenta, jala marparbue na ia hita angka sisean ni Jesus di sandok portibion - ndang marimbar hita angka siseanNa na marsaor di Huria Kristen Batak Protestan na naposoNa na manghobasi do hita. Mamungka dung tabege jamita on, ingkon mangundukhon jala mangulahon ajar ni Tuhanta Jesus ma hita di parsaoranta sama hita angka siseanNa, nang di parsaoranta dohot angka donganta jolma di ngolunta siganup ari, i ma: NaposoNa na manghobasi do hita. Ndang naposoNa na manga-raja-i dohot na mamaksa marhite huaso na adong di hita. 

Ingkon gabe sintasinta ni ngolu ma i di hita: Umbahen tubu pe ahu tu portibion, umbahen dijou Jesus Kristus ahu gabe siseanNa, umbahen dipalua Ibana ahu sian dosa dohot sian hamatean na manongtong I, umbahen dipasupasu Ibana pe ahu dohot nasaripengki dohot pinomparhi, asa gabe naposoNa, ulaulaNa, tanganNa na manghobasi do ahu di ngolu nang ulaonku siganup ari. I do jala i ma dalan ni ganup ruas ni HKBP gabe pasupasu tu portibion tu joloan on.

I do tonaNa parjolo sahali tu sampulu dua siseanNa uju mangula Ibana di Palestina di taon 30 abad parjolo, uju laho nangkok Tuhanta Jesus tu Jerusalem. TonaNa i ditangihon, ditariashon, dijamitahon dohot diulakhon angka siseanNa i patolhashon di jamita nang pangajarionnasida dung manaek Ibana tu banua ginjang. Laos i do na digurithon parbarita nauli Markus sian kota Roma di taon 69/70 tu ganup na manjaha evangeliumNa mamungka sian i. I do na dibaritahon angka naporsea dung i di sandok portibion. I do na sanga mansai leleng dihalupahon angk naporsea mamungka abad pa-4-hon di huria ni Kristus sahat tu abad pa-16-hon. I do na imbaru diondolhon Reformator Martin Luther di abad pa-16-hon jala sai diulahon angka sipaimbaru huria mamaritahonsa dung abad pa-16-hon sahat tu tingki on, ndang holan sama siseanNa di tongatonga ni huriaNa, alai dohot do di portibion inganan ni halak Kristen manindangi tu holongNa marhite angka ulaonta.

Tona i dipasahat Jesus tu angka siseanNa dung ditulak Ibana pangidoan ni dua siseanNa si Jakobus dohot si Johannes asa dipahundul Ibana nasida di bagasan hamuliaonNa di siamun dohot di hambirangna (ayat 36-40). Tona i dipasahat Ibana dung diajari Ibana nasida asa molo adong na naeng sangap (Gorik: megas) di parsaorannasida sama nasida ingkon gabe diakonos do ibana tu nasida (ayat 43). Jala molo adong na manghasiholi gabe parjolo di tongatonganasida ingkon gabe doulos (jaha: naposo) do ibana di tongatonga  nasida (ayat 44), ndang baliksa songon angka panggomgomi dohot na sangap (hoi dokountos archein dohot megaloi) di portibi kekaisaran Rom i uju i nang di angka harajaon dung i sahat tu tingki on, atik pe naung mardongan demokrasi, i ma: manga-raja-i (Gorik: kata-kurie-ousin) dohot mamaksa (Gorik: kata-eksousia-zousin). Taparaeteatehon hata raja/kurie dohot sangap/huaso/ eksousia i na ditulak Jesus masa di parsaoran ni angka siseanNa marhite na mangondolhon ingkon baliksa do sipatupaonnasida, i ma diakonos dohot doulos, na ulaonna mangihuthon keteladanan ni Jesus, i ma na pinatorangna dung i (ayat 45). Umbahen na ro pe Jesus tu portibion ndang asa dihobasi, alai laho manghobasi do, pola sahat tu na mangalehon/mamelehon dirina bahen tobus (Gorik: lutron) ni bahat halak (Gorik: polloi). 

Taboto do songon dia Tuhanta Jesus manghobasi uju mangula tolu  taon sahat tu na manobus jolma di hau pinorsilang i. Ndang holan manghobasi angka jolma di Galilea Tuhanta Jesus, alai dohot do di Judea nang di duruna; ndang holan na mangoloi ontangan ni angka halak Farise tu jabunasida Jesus, alai dohot do jala tarlumobi do manopot, pamalumohon dohot mangondihon angka na dimarginalkan, atik pe adong do na mangurupi ibana angka inanta ni keluarga na mardohar. Ndang holan paimahon angka sihobasanna i, Ibana, alai borhat do Ibana manopot nasida; ndang holan tu angka kota Ibana borhat, alai borhat do Ibana tu angka huta, tu angka inganan ni angka sihobasanNa i marhite pangajarion, mamaritahon haroro ni harajaon ni Debata, pabali angka  tondi na hodar, pamalum angka na marsahit; ndang holan Ibana sandiri na patupasa, alai ditongos Ibana do angka siseanNa, ndang holan uju marlatik nasida, alai dung borhat Ibana tu banua ginjang pe dung ditongos nasida marbarita nauli dohot marmahani.   Ndang holan manghobasi angka sihobasanNa ibana marhite angka ulaonNa na paluahon, pamalumohon, papistarhon, mangondihon angka boruboru, manghobasi angka na marhatauon na asing (Jaha: diable) alai dohot do Ibana mamelehon, menyerahkan diriNya bahen tobus, Lutron, ni torop halak, pollon.

Asa, apala di partingkian pandemic Covid 19 on na mangonai hahipason dohot ekonomintai, apala nuaeng ma ingkon tapasungkunhon tu rohanta ganup: Songon dia, intap ni songon dia do panghobasionta songon angka naposoNa di huria i nang di duru ni huria i nasailaon, tarlumobi 10 bulan dung ro Covid 19 on tu tongatonganta, tarlumobi molo dilehon Tuhanta tu hita panguluhonon di tongatonga ni sama hita di huriaNa dohot sama dongan jolma di duru ni huria i, mamungka sian bagasta be sahat tu ulaonta na marragam i? Tarimangrimangi ma. Molo humurang do, muba jala padenggan ma, ai tusi do hita dijou Tuhanta i, i do tujuanta di Ibana umbahen dijou hita tu Ibana, songon Ibana naung patupahonsa uju mangoloi panjouon ni AmaNa: Naposo na manghobasi, gariada sahat tu na mangalehon dirina bahen tobus ni bahat halak, ndang baliksa naposo na manga-raja-i dohot na mamaksa dohot huaso.  Asa uli pamerengon ni portibion tu hita, i ma taula. Unang baliksa. Amen.
  BeritaTerkait
  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    3 tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium, 28 Oktober 2018 (90 tahun Sumpah Pemuda) Minggu XXII Dung Trinitatis "Huria Mangulahon Ulaon Parasinirohaon" (Jesaya 58: 4-12)

    2 tahun lalu

    Sian Parsameanta: Pdt Dr Robinson ButarbutarUlaon parasinirohaon solhot do i tu hajolmaon. Molo taida angka donganta jolma mian manang mangolu di bagasan sada kondisi ni ngolu na tung maol situtu, mad

  • Khotbah Minggu XVIII Setelah Trinitatis, 11 Oktober 2020: Hamba yang Melayani (Markus 10:35-45)

    3 minggu lalu

    Oleh Pdt. Dr. Robinson Butarbutar (Ketua Rapat Pendeta HKBP) Saudara-saudara dalam nama Yesus Kristus...       Sedikit berbeda dari tema Minggu di almanak HKBP, yaitu 'Kepemim

  • Jamita Evangelium Minggu XIII Dung Trinitatis Hesekiel 33, 7-9 Dipabangkit Gabe Siparorot

    3 tahun lalu

    Oleh: Pdt Dr. Robinson Butarbutar, STT HKBP Pematangsiantar1. Sian tingki tu tingki, di sandok inganan, ngolu nang ulaoon ni jolma i, di bagasan huria ni Kristus na ummetmet dohot huria hadomuan, mang

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    3 tahun lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb