leh Pdt. Dr. Robinson Butarbutar, Ketua Rapat Pendeta HKBP
Hamu angka Dongan Sahaporseaon hinaholongan di sandok Indonesia,
Ingkon mangula do jolma i. Apostel Paulus manonahon, 'na so ra mangula, unang ma ibana mangan' (2 Tes 3:10, pat 1 Tes 4:11). Alai, angka dongan, mansai jotjot do hita mangula salojalojana, pola ndang adong tingkinta be mangulon, marsaor, martangiang, marminggu, marrekreasi, manghalashon ngoluon, gabe loja situtu ngolunta, mura marsahit pamatang, panghilalaan nang rohanta, jumempek umurta. Lupa hita mangoloi patik ni Debata, asa tabuat tingki mangulon jala marlas ni roha sian ari tu ari, minggu tu minggu, bulan tu bulan dohot sian sada taon tu taon na mangihut. Ala ni i, asa hipas angka pangula, dipatupa negara do angka uhum na mangondihon jolma i sian halojaon na sumalin. Isarana, parkantor nang pangula ni pabrik manang industri na marragam i intap ni ualu jom ma mangula sadari, di tongatonga ni i adong tingki mangulon, mangula lima ari saminggu, jala, asing ni libur nasional, cuti ala ni marpamatang na denggan dohot tubutubuan, ala marsahit manang ala marsitaonon, ingkon adong tingkinta di bagasan sataon mangulon sian ulaonta, isara dua tu opat minggu.
Margaji do pangula i uju libur. Songon i ma nian nang na mangula di ulaon na asing. I do hataridaan ni na pinangido ni Debata di 3 Musa 25: 1-13 i, asa ganup minggu adong sadari ari paradianan, ganup pitu taon adong sataon bolon mangulon, jala di taon pa-50-hon maradi jolma i sian ulaonna laho marlas ni roha, marolopolop mardongan angka uninguningan. Pola do digoari ari mangulon i ari na badia, i ma ari na ingkon sipasidingon, marasing sian angka ari na asing na digohi ulaon.
Alai, hamu angka dongan, saleleng on, ala ndang manang hurang unduk hita tu patik mangulon dohot marlas ni roha i, gabe lupa hita na so holan hita hape na ingkon mangulon. Ingkon dohot do tong angka na tinompa rap mangulon dohot hita. Isara horbo dohot lombu di angka partani. Gari masin ingkon mangulon, unang hatop sega. Inganan ni ulaonta i pe ingkon do mangulon, isara onan di partigatiga, tano di partani, ambar, aek godang, tao, nang laut di angka pardengke. Angka na asing na ringkot di ngolunta jolma pe ringkot mangulon. Isara angka binatang ni parpahanpahan/peternakan, angka pidong/unggas, angka bunga nang udara. Baliksa na tabahen jotjotan. Torus tapaksa mangula angka na tinompa i. Isara tano. Tapangke do angka napu sian bahan kimia asa torus marparbue natasuan di tano i. Najolo dua hali sataon panen, nuaeng gabe tolu, molo boi opat hali, manongtong. Di ujungna gabe ndang napu be tano i. Jolma na manganhon parbue ni tano i pe gabe manganhon rasun sian angka napu kimia i.
Aek ni ambar, aek bolon, tao nang laut tasegai do marhite na mangambolongkon, dohot mangusehon sampah nang rasun sian dapurta dohot pudi ni jabunta nang sian pabrikta tu sunge, tao nang lautta. Talehon do tong tu angka dengke sipanganon na marrasun. Gabe sega aek, ndang boi be inumonta, marrasun nang dengke i masuk tu pamatangta. Di peternakan pe, talehon angka na mambahen tibu jala ndang marnaso angka i berproduksi, gabe ndang apala hipas be tapangan. Ro ma marragam sahit sian na tapangan i. Di perhutanan pe, tabahen do reboisasi sarombang tu haranganta i, ndang hot marragam tabahen angka hau i. Mohopan ma hita. Marmatean angka na tinompa na asing i, dohot nang orang utan.
Ala ni i, songon dalanta mangoloi patik sabat i, dijouhon Debata do tu hita ganup sadarion asa mangaradoti angka na tinompa i sude, asa marhahipason hita nang nasida. Diparbisuhi Debata ma hita sude patupasa: Angka ilmuan, dewan perwakilan rakyat, pamarenta, pengusaha, ekonom, polisi, jaksa dohot hakim, aktifis nang rakyat, sude ma tahe, mangaradoti na tinompa di darat, di aek godang, tao, laut, harangan, udara. Ai umbahen na dibahen Debata pe patik sabat i, asa sude do na tinompaNa i hipas. Sude ma hita halak Kristen di Indonesia patupa na tarbahen hita mangaradoti na tinompa i di ingananta be. Tuhanta ma donganta Amen.