• Home
  • Agama
  • Jamita Evangelium, 24 Nopember 2019 Ujung Taon Parhuriaon/Minggu Parningotan di Angka na Monding: "Debata Nasangap Manguhumi Saluhut Bangso" (Habakuk 3: 1-6)
KSP Makmur Mandiri
Sabtu, 23 November 2019 14:39:00

Jamita Evangelium, 24 Nopember 2019 Ujung Taon Parhuriaon/Minggu Parningotan di Angka na Monding: "Debata Nasangap Manguhumi Saluhut Bangso" (Habakuk 3: 1-6)

BAGIKAN:
Ist
Pdt Dr Robinson Butarbutar
Oleh: Pdt Dr Robinson Butarbutar, STT HKBP

Hamu angka Dongan Ruas ni Huriani Kristus hinaholongan,
Digoari do minggunta sadarion minggu Ujuang Taon Parhuriaon. Sataon bolon ma  hita na marhuria i naung mardalan dohot  mangula rap dohot Tuhanta i. Marbisuk do huria i di ulaon ujung taon mamereng tu pudi,  marnida, mangarimangrimangi dohot marsiajar sian  pardalanan ni ngolu haporseaonta marsadasada dohot marsasahuria di bagasan sataon bolon parhuriaon i. Laos hombar tusi dipatupa huria ma di Minggu Ujung Taon i Parningotan di angka naung monding, ndang laho mangarungkari sidangolonta ganup, tarlumobi mangarungkari sidangolon ni  angka sisolhot ni donganta naung monding i. Alai laho mangondolhon do  na ala manghaporseai dohot ala monding di bagasan Jesus Kristus Sipalua i do nasida, togu do tahaporseai na mangolu ro di saleleng ni lelengna do nasida, jala hita angka na tinadingkonnasida tu bagasan pangaramotion ni Tuhanta Jesus Sipalua i, ndang jadi hita mangolu di bagasan habot dohot lungun ni roha na manongtong, ndang jadi hita mangolu di bagasan ganggu manang biar ni roha. Baliksa, asa boi hita mamujimuji Debata ala satia do Ibana mangaramoti hita nuaeng nang sogot pe, ai di bagasan tangan ni Debata na marmulia i do sandok hasiangan on nang angka bangso di portibion. Jala, ndang hona uhumNa hita, baliksa dapotan tua dohot haluaon do angka houm nang bangso na marhatopothon Debata  Sitolusada i do haluaonnasida. Songon ruas ni parsaoran ni Huria Kristen Batak Protestan na marserak di sandok Indonesia nang di duruna ingkon pujipujionta do Debata sadarion siala ulaon haluaon di bagasan Jesus Kristus naung pinatupaNa i di tongatonganta sahat tu ujung taon on dohot di angka tingki na naeng ro pe tahe. Manongtong do asi ni rohaNa i tu hita. Manongtong do Ibana mangula di tongatonganta. Tapuji ma goarNa.
Laho mangurupi hita angka ruas ni Huria Kristen Batak Protestan manghalashon hatuaonta i, dienet do hatani Debata na gabe jamita Evangelium di Minggu Ujung Taon Parhuriaon on sian sabagian isi ni tangiang marlagu andung ni sahalak panurirang na mangula di tongatonga ni bangso Israel najolo, naung marnida haporsuhon ni ngolu binolus ni bangsoNa sian angka bangso humaliangnasida, jala ala ni na manghirim asa patupaon ni Debata tu nasida asi ni rohaNa marhite na patuduhon hagogoonNa marhita na  manguhum angka bangso na pasiaksiakhon ngolu ni bangsoNa. 
 
Boasa ma ingkon sian tangiang mardongan andung-andung i dienet gabe jamita tu hita?  Ala di bagasan tangiang mardongan andungandung i tolhas sada panindangion haporseaon na mansai bagas sian panurirang i, na ringkot pasunghunhononta tu dirinta angka ruas ni huria i di tingkion, manang naung sahat hinabagas ni haporseaonta di Debatanta i di tingki on songon hinabagas ni haporsreaon ni panurirang Habakuk i, di tingki tatatap tu pudi tu sataon bolon parhuriaon i, di na taingot angka sisolhotta naung manadingkon hita, di na tapanghilalahon angka hagaleonta, manang di na taida manang di na so taida dope/be hagogoon ni Debata mangula di ngolunta marsadasada.
Sasintongna sian hinajorbut ni ngolu ni bangsona Israel pinatupa ni bangso na asing naung pinanghilalahon dohot nirimangrimangan ni panurirang Habakuk i, sian pamilangmilaon hajolmaon ndang tarbahen ibana nian patolhashon tangiang na tarsurat di bindu 3: 1-19 i, na mangondolhon pos ni rohana tu Jahowa. Alai baliksa do na dipatolhas Ibana. Di ujungi ibana do tangiang mardongan andung i dohot hata panindangion haporseaon na mangihut on: "Nunga borhat Ho mambahen hatuaon ni bangsoM, mambahen hatuaon ni na miniahanMu. Dirosahi ho do ulu sian jabu ni parjahat, dipatedek ho do ojahan sahat to di rungkung. Sela (3: 13). Jala dipaujung ibana na tangiangna i dohot hata on: "Jahowa, Tuhan i do hagogoonku, jala dibahen Ibana do pathu tudoshon ursa tini, jala toguonna do ahu dumege angka dolokdolokku" (3: 19). Jahowa do hagogoonna mandalani sidalanonna jala mandungdung angka sidungdungonna. Diarahon do di bagian paduahon ni tangiangna i simalolong haporseaonna tu hagooon ni Debata sihaposanna mandalani ngolu on.

Jala, di bagian pamuhaan ni tangiang mardongan andung i (ayat 1-6) dipatolhas ibana ma na mangihut on, na ringkot tong tarimangrimangi songon angka siihuthon Debata Sitolusada i di partingkianta nuaeng:
Parjolo, di ayat 2 marojahan tu naung binegena di barita taringot tu Debata na patubu biar (Jaha: Rasa hormat, rasa kagum), dipangidohon ibana ma tu Debata asa mangula Debata mangulahi pangolu (Heber: hayyehu, Jaha: Pamasahon, patupahon muse) jala pabotohon (Heber: thudio, sian kata dasar yada) ulaonNa (Heber: faalekha). Laos, asa boi tangkas tarida ojahan ni pangidoanna asa patupa i Debata, dipangido ma asa  marningot (Heber: tizkor) Debata asi ni rohaNa nang di na di bagasan rimas Ibana.  Mansai bagas do i pos ni roha ni na porsea si songon i di Debata, i ma: Ala marningot asi ni rohaNa, tarbahen Debata do nang uju tarrimas patupa muse jala pabotohon ulaonNa na balga, na di tongatonga ni bangso Israel mansai tangkas, i ma ulaon paluahon. Dipangido ibana ma i asa pamasaon ni Debata di parsitongaan ni angka taon, ndang holan di bonana dohot di ujungna. 
Di hita angka na marnida tu pudi tu taon parhuriaonta, ra olo do hita tungki, ndang tarbahen hita pajumpang bohi dohot Debata di partondionta, ala taboto dua na mangihut on: (i) Di bagasan sataon parhuriaon naung tabolus i, hira pagaleho do parhuriaonta. Ndang apala tardok na ringgas jala marsitutu parhuriaonta, mangulahon ulaonta songon angka sitindangi di asi ni roha ni Debata. (ii) Padokdokhu taida tantangan na ingkon adopanta di ngolunta di ari na naeng ro. 

Alai ndang na songon i na naeng parsiajaronta sian haporsreaon ni panurirang Habakuk. Ndang. Ingkon hot ma hita hiras roha ro tu joloNa mangidohon asa, manang beha pe hagaleaonta di sada taon parhuriaon naung salpu i, jala manang beha pe taida balga ni siadopanta di ari na naeng ro siala ni hagaleonta i, diulahi Debata Jahowa i patupahon jala pabotohon tu ngolunta ulaonNa nabalga i di tongatonga ni ngolunta, jala asa diingot Ibana asi ni rohaNa tu hita molo tung pe manang uju tarrimas Ibana mida hagaleonta. 

Paduahon,  di ayat 3-6, manghaporseai  Debata na mangula, na tongon ro, na dinamis do Debata, eloah, na Badia i, qedosy. Patuduhoni didok ibana songon on: "Na ro sian” (Heber: Yabo) ndang holan sian daratan, Teman, alai dohot do pegunungan, dolok Elaparan. Gariada tahe, ndang holan di daratan, dohot pegunungan mangula Debata, alai dohot do di angka langit (Heber: syamayim), mangula Ibana patuduhon hamuliaonna na manghuphupi (Heber: kise) jala siala ni i gok pujipujionNa angka tano on. Di sandok  hasiangan on. Sandok kosmos on, mangula Debata dinamis.  Haporseaon na mansai bagas do i. Di surat Kolosse didok Jesus Kristus do manompa saluhutna na di banua ginang, na di tano on, na tarida dohot na so tarida, angka habangsa, harajaon (Kol 1: 16). Siala ni i do di ayat 4 lam dipabagas haporseaonna taringot tu Debata, pamerengon (SondangNa) dohot hagooonNa (sian tanganNa). Ndang tartaluhon angka sahit ianggo Ibana ("Di jolona mardalan begu siherut, jala mangihut tu ibana do begu na rahat". Begu siherut dohot begu na rahat (Jaha Indonesia: sakit sampar dan demam) na dihabiari hajolmaon di partingkian na robi sahat tu tingki ni panurirang Habakuk dohot sahat tu partingkian modern pe tahe).  Ala ni hagogoonNa i, ndang tarbahen ni angka bangso na so mangongku Ibana, marigat angka dolok, marongrong angka dolokdolok sian angka tingki na robi sahat tu tingki na ro (ayat 6) jongjong di jolona. Sudena i na boi gabe tantangan tu angka na porsea i (angka bangso, dolo, angka dolokdolok) tunduk tu Debata. Angka tantangan pinamasa ni angka i boi di angka na porseai gabe kesempatan na denggan rap dohot Debata na ro i, na mangula i.

Mansai ringkot do di hita angka ruas ni huria ni Kristus tongtong nang di ujung taon parhuriaon on dohot di na marningot angka donganta na parjolo monding sian hita haporseaon songon pinatuduhon ni panurirang Habakuk naung marnida parir ni ngolu ni bangsoNa mangadopi angka tantangan na dokdok pinaro ni angka bangso na asing di humaliangnasida. Di partingkianta nuaeng pe, songon halak Kristen di Indonesia on, tangkas do taboto na bahat do na borat na taadopi songon sada bangso na marsintasinta di taon 2045 on, i ma 100 taon dung malua hita sian penjajahan Bolanda dohot Japang, i ma 26 taonnari, gabe bangso na maju. Adong angka tantangan sian bagasan dirinta, isara narkoba na manegai sundut naumposo, alai dohot ma tahe hagaleon di Sumber Daya Manusianta, songon i nang angka na so lomo roha di Pancasila songon ojahan ni negaranta, naeng gantionnasida dohot ojahan na so mangargahon pluraitas ni bangsonta na ingkon boi rap hundul, rap mangula, rap manaon, rap masiargaan, nang  angka sangkapsangkap ni angka bangso na balga di tingki on na naeng marharajon di bidang ekonomi dohot politik di sandok portibion. Tamba ni i, molo taida tu ngolunta sandiri, ngolu ni ruas nihurianta, na bahat dope masuk tu si 40 juta angka na pogos di tongatonga ni bangsonta, bahat dope angka keluarga ni ruas ni hurianta na ingkon mangadopi angka hamaolon ni ngolu asa boi dapotan ulaon, asa boi patupa ulaonna sandiri. Tamba ni i bahat dope angka parungkilon ni ruas ni hurianta di parngoluan siganup ari, na so hagoaran dison.

Di partingkian si songon i, mansai ringkot hita pabagashon haporseaonta nang uju marungkil, nang uju didonganan ni ende manang marlagu andung, asa maniop haporseaon ni si Habakuk i: Mangidohon tu Debata asa mangulahi pangoluhon dohot pabotohon hagogoonNa tu hita marsasasahalak, marsasaripe dohot marsahuria nang marsabangso marojahan tu parningotanNa di asi ni rohaNa tu hita nang uju muruk manang tarrimas Ibana. Tarbahen hita do i molo tahaporseai na tongtong do mangula Debata, tongon ro do Ibana, mangondihon dohot mamasumasu ngolunta, ai marhagogoon situtu do Ibana di angka na manghaporseai Ibana. Ndang mara parooonNa tu angka na manghaporseai dohot mangoloi Ibana. Tu angka na mansoadahon dohot mangalo Ibana do ro Ibana manguhumi.

Denggan ma tapasungkunhon dirinta be di ujung ni taon parhuriaon on: Songon dia do haporseaonku tu Debata Sitolusada i? Nunga sahat tu, hot do songon, manang nunga dao tumoru sian haporseaon ni panurirang Habakuk na tuk dope ro martangiang tu Debata mangidohon asa mangulahi patupaonNa ulaon hagogoonNa i di ngolu ni hurianta nang di ngolunta marsadasasa dohot marsasaripe, molo tung pe tahilala hira so tama hita manangiangkon i ala uju tabahen rujiruji taringot tu diri nang ulaonta di taon parhuriaon naung salpu i ala ni bahat ni hagaleonta? Ndang adong hita na so marhahurangan. Alai boi do marimbar hinabagas ni haporseaonta ala ndang sude hita sahat tu haporseaon ni si Habakuk i uju manghilala bahat ni hahuranganta di joloNa. Dipatau Tuhanta ma hita marhaposeaon songon haporseaon ni si Habakuk i di na manadingkon taon parhuriaon na buruk i mamasuhi taon parhuriaon naimbaru mamungka minggu na ro. Amen.
  BeritaTerkait
  • Jamita Evangelium, 26 Nopember 2017 Minggu Parningotan ni Angka Namonding, Turpuk: Mateus 25: 31-46 "Hangoluhon ma ngolu na manontong i."

    2 tahun lalu

    Oleh: Pdt Dr Robinson Butarbutar, STT HKBPSian mamungka mangula Jesus di Palestina sahat tu na tubu jala maherbang huriaNa di abad parjolo, sahat tu tingki on, nunga tung bagas diboto, dihaporseai, di

  • Jamita Evangelium, 25 Nopember 2018, Minggu Ujung Taon Parhuriaon, Daniel 7: 9-14: Harajaon ni Debata Na Manongtong

    tahun lalu

    Oleh: Pdt Dr Robinson ButarbutarDi bagasan lobi dua taon parpudion sahat do tu ganup hita barita masa na mangihut on: Tongon marusaha do angka bangso na balga jala na gogo manggulut huaso na tumimbo d

  • Jamita Evangelium 11 Nopember 2018, Minggu XXXIV Dung Trinitatis : Mika 6: 6-8 Ulahon ma Uhum dohot Holong ni Roha di Habasaon

    tahun lalu

    Oleh: Pdt Dr. Robinson Butarbutar, Parsameanta, STT-HKBPDung dipanghulingi Debata Jahowa hita marhite hatana di minggu na salpu, uju i dipangido tu hita asa mangarataratai silehonlehonNa mardonganhon

  • Jamita Evangelium 20 Januari 2019, Minggu II Dung Epiphanias: Hagogoon ni Debata na pangoluhon (Markus 1: 21-28)

    11 bulan lalu

    Oleh: Pdt. Dr. Robinson Butarbutar, sian Parsameanta, STT-HKBP. WA/HP: 0812-62472015Di taon 69/70 dung Kristus, di na manurathon Evangeliumna si Markus, i ma sahalak donganta siihuthon Jesus sian gene

  • Jamita Evangelium, 27 Januari 2019 Minggu III Dung Epiphanias "Unduk ma tu Debata Sitompa Saluhut" (Jesaya 45: 18-25)

    11 bulan lalu

    Oleh: Pdt. Dr. Robinson Butarbutar, Parsameanta, HP/WA: 0812-62472015.Sada ulaon na dokdok do maminsang pardosa na so olo muba. Alai dumokdok do patupa ulaon pasahathon uhum na ingkon masa tu marsasah

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb