• Home
  • Agama
  • Jamita Evangelium, 15 September 2019, Minggu XIII Dung Trinitatis "Mangolu di Bagasan Serep ni Roha" (Lukas 14: 7-11)
KSP Makmur Mandiri
Minggu, 15 September 2019 00:08:00

Jamita Evangelium, 15 September 2019, Minggu XIII Dung Trinitatis "Mangolu di Bagasan Serep ni Roha" (Lukas 14: 7-11)

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar, sian Parsameanta, STT-HKBP

Di tongatonga ni parsaoran hajolmaon sian narobi sahat tu nuaeng on, sai dipodahon angka natuatua dohot pangajari do hinaringkot ni serep ni roha, asa tubu parsaoran nauli sama jolma i. Laos dipodahon do tong asa pasidingon ni jolma i na maralo tu serep ni roha i, i ma ginjang ni roha, ai sega do parsaoran nauli binahen ni ginjang ni roha.  Nang di tongatonga ni parsaoran ni bangso ni Debata, Israel, songon na nalnal di buku habisuhon dipodahon do asa didungdung bangso i serep ni roha, jala dipasiding ginjang ni roha. Laho mangondolhon i, tangkas ma didok na dialo Debata do ginjang ni roha. "Ibana mamarengkelengkelihon halak pangelesi, alai dilehon do asi ni roha anggo tu halak na unduk marroha"(Poda 3: 34).

Songon i do nang di tongatonga ni parsaoran Hakristenon, Israel naimbaru, tibu do dipodahon tu angka siihuthon Jesus asa di parsaorannasida/di parsaoranta sai di/tapatujolo serep ni roha, jala tapapudi, gariada taalo ginjang ni roha, i ma roha, pingkiran, nang pambahenan na marnida dirinta tumimbo sian na patut, jala naasing tumoru sian hita. I do umbahen na diingot, digurithon jala diajarhon angka naporsea i hata ni Jesus Kristus Tuhanta i taringot tusi, jala angka uluan ni huria na parjolo i sahat tu angka uluan ni huria di pardalan ni Hakristenon, nang angka sastrawan di tongatonga ni Hakristenon sian tingki tu tingki sai manghalaputi manurathon pangantusion dohot poda taringot tusi.

I do na binahen ni donganta sahaporseaon, parbarita nauli, Lukas, di Evangeliumna Lukas 14: 7-11 na gabe jamita di tongatonganta di bagasan Minggu XIII  Dung Trinitatis sadarion, na patoranghon hat ani Jesus Guru dohot Tuhanta na bisuk i tu angka tamue ni sahalak Farise di bagas ni Farise i, dung diida Ibana sai mambuat inganan na sumangap/di jolo, angka tamuena na marsangap di Parugamoon Jahudi uju i. Uju i dipatolhas Jesus poda na mangalo ginjang ni roha jala na mangajarhon hinaringkot ni serep ni roha na diboto halak Farise nian nunga gabe poda di bangso Israel/Jahudi sian narobi, alai  ndang diula angka na marsangap i.  Digurithon parbarita nauli Lukas dia nidok ni Jesus tu nasida uju i, asa nang angka halak Kristen di tingki panuratan ni evangelium Lukas i (i ma di taon 80 dung Kristus) umbotosa, padao dirinasida sian ginjang ni roha, jala pajonok dirinasida tu serep ni roha. 


Tung tangkas do digurithon si Lukas hat ani Jesus tu nasida: "Asa na patimbohon dirina sipaoruon do; jala na paoru dirina sipatimboon do" (Lukas 14: 11). I do umbahen na nang apostel Paulus manggurithon tu angka halak Kristen di Rom, i ma angka na mian di Ibukota Kekaisaran Romawi na tarbarita i taringot tu songon dia do nasida naung tardidi tu bagasan goar ni Tuhanta Jesus mangolu songon angka na tinompa naimbaru, na ingkon manadingkon parange na robi, manghangoluhon parange naimbaru di parsaoran nasida di angka huria i. Tu nasida na mangolu di sada budaya hierarkhis, i ma hasomalan mamereng dongon saurdot tu kelas sosialna, asa unang songon i be angka tuan disi marnida dirinasida nang angka ruas naasing na so tuan, angka hatoban. Songon on ma digurithon ibana tu nasida taringot tu parange naimbaru di parsaoran sama Kristen: "Unang ma torbang rajumi hamu dirimu lobi sian na patut."

Songon i do tong na ginurithon ni panurat ni surat Jakobus, na marnida adong hasomalan di huria sijaha surat i na pasangaphon na mora alai patutoru napogos di tongatonga ni parpunguannasida. On ma disurathon ibana tu nasida, unang songon i be nasida di parsaoran, marojahan tu jala borhat sian hata ni Tuhan Jesus Kristus: "Dialo Debata do angka na ginjang roha, alai dilehon do asi ni roha tu angka na serep marroha" (Jak 4: 6). Mansai tangkas tona ni hata i dia siadopan ni na ginjang marroha, i ma Debata alona, asa dipadao nasida dirinasida sian haginjangon ni roha. Alai ditariashon angka nauli sidaion ni angka na serep parroha di ngolu on, i ma: "Dilehon asi ni roha" tu nasida. Di hata Gorik didok asi ni roha i charin (χάριν). Di Padan Naimbaru, charin i mansai bidang do na hinangkamna, ndang holan haluaon na pinalumehon ni Debata di bagasan Jesus Kristus, i ma asi ni roha di partondion. Alai dohot do asi ni roha di na ringkot di ngoluon, dohot do angka sinadongan nab oi mambahen naporsea mangurupi na asing, angka napogos (Ida 2 Korintus 9: 8-9). Asa, gabe barita nauli do manghuling tu angka ruas namora na so manghaginjanghon na adong di ibana, i ma gabe ojahan do serep ni rohanasida di ulaon ni Debata palumehon asi ni roha tu nasida.


I do tong na diulakhon apostel Petrus na hea uju rap dohot Jesus patimbohu mamereng pangihuthononna di Jesus. Didok ibana tu angka huria na manaon sian angka na di humaliang nasida songon on: "Alai saluhutna ma hamu manolukhon haserepon sama hamu, ai dialo Debata do angka na hinjang roha, alai dilehon do asiasi tu angka na serep marroha." Nadikona tu angka ruas ni huria na marungkil mangadopi angka na di humaliangnasida na sai marusaha mambahen maol ngolunasida ala siihuthon Kristus nasida, i ma asa samanasida ingkon serep rohanasida, asa marhite sian i boi nasida masitongkulon dohot masiurupan ala sada ma parsaorannasida.

Dung i, di na sanga adong soara di tongatonga ni halak Kristen di portibion, tarlumobi di Eropa na mandok ndang apala denggan serep ni roha i, ai gabe dihorhon i do hamamago ni pos ni roha di hatauon ni diri mangadopi angka tantangan ni ngolu, ro ma sahalak pande bisuk, sastrawan, panurat, parbarita, teolog nang filsuf ni halak Kristen Inggris, huhut pangajari di universitas natarbarita, Oxford dohot Cambridge, di abad pa19-20-hon (29 November 1898 - 22 November 1963) di sada bukuna mangalo pandohan na so denggan taringot tu serep ni roha i. Mangalo i didok ibana songon on taringot tu aha do serep ni roha i: "Humility is not thinking less of yourself. It is thinking of yourself less" (Batak: Serep ni roha i ma ndang  humurang mamingkirhon dirim. Alai mamingkirhon dirim ummotik). 

Di tongatonga ni bangsonta Indonesia mamungka taon 2014 i dipatuduhon Presidenta Joko Widodo do sada sitiruon di haserepon ni roha. Sahalak na marjabatan na  tumimbo situtu di tongatonga ni bangsonta na patuduhon serep ni roha di angka langkalangka na ulaonna na mansai denggan membangun Indonesia. Pemimpin na serep do ibana. Maradophon angka na so sapingkiran dohot ibana pe serep do ibana. Dihaposi ibana, haserepon ni roha do na ingkon hangoluhononna laho manguluon sada bangso na mansai marragam on. Diparangehon ibana  tolu falsafah ni halak Jawa, na so apala marimbar tu nidok ni hata ni Debata.

Naparjolo i ma, "Lamun Siro Sekti Ojo Mateni," meskipun kamu sakti meskipun kamu kuat jangan suka menjatuhkan (Molo tung pe sakti jala nagogo ho, unang halomohon mandabuhon/pamatehon.

Napaduahon, lamun siro banter ojo ndhisiki, meskipun kamu cepat jangan suka mendahului. (Molo tung pe hatop ho, unang halomohon pajolojolohon).

Napatoluhon, "Lamun siro pinter ojo minteri", meskipun kamu pintar jangan sok pintar" (Molo tung pe pistar ho, unang pamalomalohon).  Di hita halak Batak pe adong do angka umpama na manjamothon hita unang madabu tu ginjang ni roha, alai asa serep. Isara: "Jolo nidilat bibir, asa nidok hata," "Na teal so hinallung, na teleng so hinarapean." Dna.

Ala ni i, songon halak Kristen siihuthon poda ni Tuhanta Jesus di partingkian nuaeng, hat ani Tuhanta Jesus di Lukas 14: 11 i, na dipahembang di surat Rom, surat Jakobus dohot surat Petrus, jala dipabagas CS Lewis gabe barita na dua rumangna. Naparjolo i ma mandok uhum tu halak na ginjang marroha. I ma, Debata alona di ngoluna. Alai napaduahon, mandok barita nauli tu angka na serep marroha: Dipatimbo Debata do na patutoru dirina. Dipalumehon Debata do asi ni roha, i ma na manghamham ndang holan haluaon di bagasan Jesus Kristus, alai dohot do angka pasupasu na marlobilobi tu angka na serep marroha. Tapillit ma dia. Unang ma tapillit naparjolo i, alai tapillit ma napaduahon i.

Boasa ulaning gabe on na mamanghulingi hita halak Kristen Batak di partingkian nuaeng?

(i) Suraon do ala di parsaoranta di tongatonga ni huria i, parsaoran sama hita, nunga lam tandi angka na manghaginjangkon dirina ala ni na adong di ibana dohot ala ni angka na binahenna tu tongatonga ni huria i? Molo i do, muba ma hita, unang gabe Debata alonta. Hansit do na gabe alo ni Debata pargogo na so hatudosan i.

(ii)Suraon do ala di parsaoranta sama donganta sabangso di Indonesia on, ndang tangkas situtu dope taparangehon pangauhononta di ajar ni Tuhanta Jesus on, i ma na dialo Debata do na patimbohon dirina, jala siala ni i di angka ingananta be di pangarantoan gabe adong, bahat, jala lam bahat na so mampardonganhon hita, gabe maol dapotan ngolungolu na dumenggan ngolunta di angka rumang ni ulaonta na marragam i? Molo i do, denggan ma muba hita.

(iii)Suraon do ala nunga lam so taharinghothon be na marhangoluan na marserep ni roha i, panghorhonna gabe lam otik taida pasupasu na tajalo sian Debata di pargulmiton ni ngolunta i? Ndang holan na mora, uluan na ingkon manangihon on, alai dohot do angka na so apala mardohar di ngoluna, gariada tahe dohot do angka na pogos pinanghulingan ni hata i. So tong ala na siginjang roha do hita, ndang olo marsiahar, ndang olo mangargahon na binoto ni donganna, umbahen na so sai ungkap dalandalan ni ngolu na denggan taida jala taparsaulihon di ngolunta saleleng on? Molo i do, denggan ma muba hita.

(iv)Suraon do manghuling hata ni Tuhanta Jesus taringot tu haradeon ni Debata na mangalumehon asi ni rohaNa tu hita laho lam patoguhon hita ruas ni huria Kristen Batak, ala saleleng on nunga diida Debata hita naserep atik pe mamora hita. Bahat do angka ruasta na mansai denggan ngoluna, alai tongtong serep. Ala ni i sai lam mardohar do ibana. Lam tuk ibana mangadopi angka tantangan.

Ndang muraura ibana muruk jala ndang madabu ibana tu kondisi stress. Ndang mura ibana manguhumuhumi donganna. Tu angka ruas na songon i, Tuhanta Jesus mandok, uduti ma.
Dipargogoi Tuhanta ma hita manangihon hataNa na mandok asa muba hita molo tapanghilalahon siginjang roha do hita maradophon angka donganta dohot maradophon Debata. Dipargogoi Ibana ma hita manguduti ngolu na digohi, dionjar jala dipatogu serep ni roha, ai disi do tadai denggan basa, asi ni roha ni Debata na singkop sasingkopsingkopna. Tatangiangkon ma asa lam martamba torop ni angka ruas ni hurianta na serep marroha, di sundut on dohot di sundut na naeng ro, ai sundut na songon i do na diharingkothon bangsonta mangarade gabe bangso nomor 5 ummaju di portibion di taon 2030, marhite na rade marsiajar, mangalatik dirina, unang manghilala hita nama naummalo, najumago gabe ndang olo hita marsiajar, songon na pinatuduhon ni Presidenta, Presiden Jokowi. Tatangiangkon ma asa lam moro torop ni ruas nang parhaladonta siginjang roha, asa unang susa marpsaoranta sama hita, jala asa unang gabe Debata alonta.
Amen

  BeritaTerkait
  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    2 tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium, 8 September 2019, Minggu XII Dung Trinitatis "Naposo ni Debata do Panggomgomi Namarsahala" (Poda 8: 12-21)

    3 bulan lalu

    Sian Parsameanta, STT-HKBP Pematangsiantar, Pdt Dr Robinson Butarbutar (0812-62472015) Songon angka naporsea di haadongon ni hadirion ni Debata di hasiangan on, dohot di ulaonNa na marimpola di tonga

  • Jamita Evangelium Minggu XIII Dung Trinitatis Hesekiel 33, 7-9 Dipabangkit Gabe Siparorot

    2 tahun lalu

    Oleh: Pdt Dr. Robinson Butarbutar, STT HKBP Pematangsiantar1. Sian tingki tu tingki, di sandok inganan, ngolu nang ulaoon ni jolma i, di bagasan huria ni Kristus na ummetmet dohot huria hadomuan, mang

  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

    2 tahun lalu

    Oleh: Pdt Dr Robinson Butarbutar, Dosen STT HKBP1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    2 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb