• Home
  • Agama
  • Jamita Evangelium, 13 Oktober 2019, Minggu, XVII Dung Trinitatis: Mangolu di Dalan ni Jahowa (Psalmen 25: 8-15)
KSP Makmur Mandiri
Sabtu, 12 Oktober 2019 16:13:00

Jamita Evangelium, 13 Oktober 2019, Minggu, XVII Dung Trinitatis: Mangolu di Dalan ni Jahowa (Psalmen 25: 8-15)

BAGIKAN:
Ist
Pdt Dr Robinson Butarbutar salaman dengan Gubernur Sumut
Oleh: Pdt Dr. Robinson Butarbutar
Parsameanta, STT-HKBP Pematangsiantar

Sada siingotonta songon halak Kristen di  Negara Republik Indonesia i ma na mangihut on: "Sahat tu nuaeng sada bangso na marugamo do hita." Alai tong do taboto na mangihut on: "Atik pe targoar bangso na marugamo do hita, ringgas mamujimuji goar ni Debata di parmingguon dohot di partangianganta, mansai hatop tamba torop ni angka bagas panombaan tu Debata alai ndang apala targoar sada bangso na marsitutu mangulahon uhum dohot lomo ni roha ni Debata dope hita. Atik pe nunga dibahen tu angka uhum di negaranta angka uhum dohot lomo ni roha ni Debata i taringot tu beha hita marparange maradophon donganta jolma dohot angka donganta na tinompa ni Debata na asing, alai umbahatan dope hita ndang marhangoluan na tigor, na mardamedame dohot donganta jolma. Alai bahat dope na so tigor  marparange maradophon donganta jolma. Ndang ringgas dope hita patupa holong tu angka donganta. Ndang apala tahalaputi dope patupa angka na denggan tu angka donganta jolma. 

Gabe targoar do hita bangso na marugamo di ritus-ritus ni partangiangan manang panombaon, alai ndang angka parugamo na manghangoluhon na tahatindangkon. Ndang angka parugamo na mangulahon angka na uli na tapandok tu donganta jolma. I do umbahen na pola ruar pandohan ni Prof Dr. Musdah Mulia na mandok hira marisuang do hita targoar bangso marugamo. Pola adong Departemen Agama na marbudget mansai arga, pola marTrilliun. Alai apala di Departemen Agama on do na bahat masa korupsi. Ala ni i do pola didok sahalak pemimpin ni propinsi di tongatonga ni bangsonta naung mandalani Eropah, Australia, Jepang di tingki parpudion na so apala songon hita jotjot martangiang, marminggu, bersembahyang, alai ngolunasida maju, torop ni narapidana ganup ari lam otik, isara di Bolanda dohot di negara-negara Skandinavia, gabe ditutup bahat angka penjara, ngolunasida maju, jala mardohar, panghilalaan parbangsoon nasida mansai denggan. Semangat pengorbanan nasida mansai timbo. Tondi masiurupannasida mansai denggan. 

Ala ni i, denggan do hita songon bagian ni bangso Indonesia tong manungkunhon tu dirinta, boasa boi masa na songon i. Ndang apala denggan jala ndang denggan molo tasalahon parugamo na asing na mambahen songon i dope bangsonta. Parsidohot do hita disi.  Tarlumobi ala marsangkap hita mandungdung sintasinta ni bangsonta naeng gabe sada bangso na nomor 5 manang nomor 6 hamajuon ekonomina di taon 2030, i ma sampulu sada taonnari di jolonta. Boi do hita songon halak Kristen marhite parugamoonta rap dohot angka donganta sabangso mandungdung sintasinta i? Boi do parugamo na mangolu di bagasan uhum dohot lomo ni roha ni Tuhan i gabe mangolu di bagasan ngolu na gok dame, tigor, mardohar? 

Molo alusta tusi 'ndang', ba gabe bangso na mansai sekuler ma hita muse. Mardohar, maju, alai ndang manomba Debata. Alai molo boi tapatuduhon jala taida na 'boi do', ba idaonta ma na bangso parugamo na marhangoluan na denggan do hita, bangso parugamo na marhangoluon na mardohar, na tigor, jala na gok hadameon, alai tong marsomba tu Debata, ndang tu debata ganaganaan, songon na taida di angka negara-negara Skandinavia, na parugamo, alai maju, marhangoluan na denggan, atik pe ndang songon jago ni Sumber Daya Alamta na adong di nasida. Sumber Daya Manusia-nasida nunga boi patuduhon na bangso na manghangoluhon uhum ni Debata di hajolmaon do nasida, di ngolu nang ulaon nasida siganup ari. Adong do tong na jahat. Alai gumodangan na so mangulahon na jahat.

Apala alus na positif i do na hinatindangon dohot pinaandar ni parPsalmen di buku Psalmen i. Denggan do ngolu ni angka na tangi di, mangguruhon, mangulahon dohot mardalan di dalan ni Jahowa. Tarurak ma, jala mangolu di bagasan ngolu na parir do ngolu ni angka na so tinggil siparreonna jala na so olo mamikirmingkirhon dohot na so mardalan di angka dalan ni Jahowa. Molo tung adong pe angka na so mardalan di angka dalan ni Jahowa alai taida hira na mardohar ngoluna, alai ianggo di pangantusion dohot panindangion na parPsalmen satongkin do i. Ndang leleng i. Ndang martahan i. Ndang marsundutsundut i. Di jangka panjang ndang adong masa depan ni angka jolma nang bangso na so mangolu di bagasan patik, uhum nang dalan ni Jahowa. Alai angka na mangulahonsa, marhangoluan na denggan di jangka panjang.

I do na dihatindangkon parPsalmen di Bindu 34: 8-15 i.  Dipatupa Debata do paandarhon, patorangkon, manonahon, marnonohon dohot mangajarhon angka dalanNa tu sude hita, tu angka partigor dohot tu angka pardosa, asa taboto dalanNa. Jala, dipatupa Debata do na denggan tu angka na mangulahon uhumNa, tu angka na mangolu di bagasan dalanNa. Alani dialo Ibana do jala maol do adopan ni angka jolma pardosa ngolu on molo ndang mangolu di bagasan dalan ni Jahowa Ibana. Molo naeng denggan ngolu ni sada halak, sada keluarga dohot sada bangso tahe, ingkon dao gumodang do torop ni halak na mangolu di bagasan dalan ni Jahowa. Ingkon lam otik do angka na mangolu di duru ni dalan ni Jahowa. Ingkon diuhum negara i do angka na mangolu di duru ni uhum ni negara i na gabe hataridaan ni lomo ni roha ni manang dalan ni Debata i. Molo dipasombusombu jala diondihon jala diloas negara i do angka na jahat gabe denggan ngolunasida, alai angka na burju ndang denggan ngoluna, sega ma bangso i.  Molo dipromosihon negara do angka na ingkon didemosi, sega ma negara i. Alai molo dipaingot, dipinsang, jala diuhum angka na jahat, dipatupa na denggan tu angka na unduk jala mangolu di bagasan uhum, idaon ni bangso dohot negara i do ngolu na denggan.  Jala i do sinoarahon ni ayat 12-13 i. 
Adong onom nauli pamasaon ni Debata tu angka na mardalan di angka dalan ni Jahowa: 

Naparjolo, sorang di bagasan hasonangan do tondi ni jolma na manghabiari Jahowa dohot mardalan di bagasan dalanna (ayat 13). Lapatanna sonang tondina. Ndang adong sihabiaranna.

Napaduahon,  teanon ni pinomparna do tano on sogot. Lapatanna, ndang holan di ngolu ni angka na mardalan di dalan ni Jahowa i sandiri nuaeng daion ni na mangulahon lomoNa i, alai pinomparnasida pe teaonnasida tano on. Ndang holan tu sada generasi nuaeng patupaonNa na denggan, alai dohot do tu sundut na naeng ro (ayat 13). Molo ndang tapatupa dalan ni Debata taringot tu hinaringkot ni manjagai angka lingkungan hidup, ba ndang adong be tading annon di angka sundut na naeng ro. Baliksa, jea do teaonnasida. Alai molo taoloi dalan ni Debata na mandok ingkon jagaonta do portibion, ba adong ma teanon ni sundut na mangihut. Ndang sitean sampah plastik angka sundut na mangihut. Sitea tano na uli jala na denggan do.

Napatoluhon, hasudungon ni Jahowa angka na mangolu di bagasan dalanNa (ayat 14). Martua do angka na gabe hasudungan ni Debata Pargogo Nasohatudosan i. Daion ni i ma angka na uli di goluna. Tahasiholi ma gabe bangso Indonesia na gabe hasudungon ni Debata. Tahasiholi ma gabe keluarga dohot pribadi nang huria hasudungon ni  Debata. Dalanna: Mangolu di bagasan dalanNa, dalan ni Kristus.

Napaopathon, dipabotohon tu hita parpadanan/padanNa dohot hita  (Heber: Berith, ida ayat 14). Gabe diida Debata hita ruas, keluarga, masyarakat na marpadan dohot Debata, jala jagaonNa ma hita songon bangsoNa. Alai molo baliksa taula, gabe ndang bangsoNa be hita.

Napalimahon, mangadopi angka ancaman, jorgong, jerat sian angka na so manghalomohon nasida, molo manatap tu Jahowa angka paluaon ni Jahowa do nasida: "EnetonNa pathu/patta sian jorgong" (ayat 15). PatupaonNa do i di ragam ni ngolu, sian marsasahalak, marsasapunguan nang di tong ani bangsonta, tarlumobi di jaman digital on dohot di jaman porang Cyber dohot drone, songon i nang di era robotisasi on, na dikenalihon angka na pistar di jala sian sada inganan.

Paonomhon, nauli tong, taida na mangihot on:   Molo mardosa angka hasudungan ni rohaNa i, tung balga pe i, marpamuati do rohaNa mida nasida/hita. I do alana umbahen didok Reformer Martin Luther songon on: "Ala ia halak Kristen i halak na badia dohot pardosa do di tingki na dos, dijouhon do tu hita asa ganup ari manopoti dosana tu Debata. Rade do Ibana manalpuhon dosanta. 
Onomsa ma pasupasu daion ni angka na mardalan di bagasan dalan ni Debata.

Nueang pe, ingkon pasungkunhononta do songon angka naung pinatigor ni Debata hita marhite haporseaonta di ulaon ni Kristus di hau pinorsilang i, jala songon angka na mangolu di bagasan panogunoguon ni Tondi Porbadia i hita marhite parangenta na denggan songon parbue ni naung pinatigor ni Debata hita, mansai ringkot do hita songon halak Kristen Batak di tongatonga ni bangsonta Indonesia manghaposi na hinaposan ni parPsalmen i, jala di na marsintasinta bangsonta asa di taon 2030 gabe bangso na maju hita, mansai ringkot do hita patuduhon di ngolunta na angka na mangolu di bagasan dalan ni Jahowa do hita. Angka dalan ni Jahowa i nunga dipatupa i marhite angka uhum/undang-undang di tongatonga ni bangsonta na dibahen asa boi hita padao angka hajahaton di ngolu nang ulaonta be, manang di dia pe hita mangula. Sai unang ma adong, manang sai lam moru ma sian tongatonga ni ruasta na gabe masuk hurungan ala mangulahon na so dalan ni Tuhan i. Sai lam martambatamba ma torop ni ruasta di sude umur na mangulahon mangolu di bagasan dalan ni Jahowa, asa boi hita marhangoluan na lam dumenggan sian ari tu ari. Mansai ringkot do i di lima taon na naeng ro di negaranta niuluhon ni Presiden dohot Wakil Presidenta Jokowi-Maruf Amin, na dung patupa angka pembangunan infrastruktur jala mangudutisa ditaontaon na ro, patupaonta ma Pembangunan SDM na lam tau mangula di partingkian/zaman na lam kompetitif on.  Boi tardungdung hita i molo mangolu di bagasan dalan ni Debata hita. 

Didongani Tuhanta ma hita mangoloi hataNa tu hita: Mangolu ma hita di bagasan angka dalan ni Debata, ala nunga ditobus Ibana hita, jala asa boi pangkeonNa hita mamasumasu ngolunta nang boi hita gabe pasupasu tu bangsonta Indonesia di ari, minggu, bukan dohot taon-taon na ro on.  Mansai rongkot i, asa boi hita rap dohot angka donganta parugamo na asing di tongatonga ni Negara Indonesia na manggoari dirina parugamo mandungdung sintasinta ni bangsonta gabe bangso na Adil dan Makmur.  Boi do i? Boi, mangihuthon hataNa sadarion, asa daion ni sundut na mangihut portibion. Amen
  BeritaTerkait
  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    2 tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium, 30 Juni 2019, Minggu II Dung Trinitatis "Martua Halak Na Pinintoran ni Debata" Psalmen 32: 1-11

    5 bulan lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar, 0812-62472015Udut ni hatani Debata di minggu na salpu na manosoi hita asa manghangoluhon ngolu na badia asa saut hita masuk

  • Minggu XVI Dung Trinitatis, 6 Oktober 2019, Evangelium: Ulaon 20: 21-31, MARHOBAS DI ADOPAN NI JAHOWA

    2 bulan lalu

    Oleh: Pdt Dr. Robinson ButarbutarDi pardalanan ni ngolu dohot ulaon ni Debata di portibion sai dipangke Ibana do angka jolma na tinompaNa i mangula rap dohot Ibana pasauthon angka sangkapNa mansai uli

  • Jamita Evangelium, 10 Nopember 2019, Minggu XXI Dung Trinitatis "Manjangkon Dohot Mangulahon Poda" (Poda 19: 20-29)

    4 minggu lalu

    Oleh: Pdt Dr. Robinson ButarbutarSian Parsameanta, STT-HKBP di PematangsiantarDi tongatonga ni Hakristenon sian bonana sahat tu nuaeng, mansai ringkot do ulaon pamaritaan Barita Nauli. Barita nauli na

  • Jamita Evangelium, 14 Oktober 2018 Minggu XX Dung Trinitatis: Pir ma Tondim jala Marsihohot (Josua 1:-6-9)

    tahun lalu

    Oleh: Pdt Dr Robinson Butarbutar, Na tongon di Sipoholon dope dung mandohoti Sinode Godang HKBP 8-12 Oktober 2018, HP/WA: 0812-62472015Dipangke Debata Pargogo Nasohatudosan i do hita angka jolma, angk

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb