• Home
  • Agama
  • Jamita Evangelium, 15 Desember 2019, Minggu Advent III: Haroro ni Jesus dohot Ujung ni Portibion (Mateus 24: 3-8)
KSP Makmur Mandiri
Minggu, 15 Desember 2019 05:46:00

Jamita Evangelium, 15 Desember 2019, Minggu Advent III: Haroro ni Jesus dohot Ujung ni Portibion (Mateus 24: 3-8)

BAGIKAN:
Ist
Pdt Dr Robinson Butarbutar
Oleh: Pdt. Dr Robinson Butarbutar, sian Parsameanta STT-HKBP Pematangsiantar (0812-62472015)

Mangihuthon panindangion haporseaon ni halak Kristen Batak, marmula jala marhaujungan do nasa na adong di hasiangan on, ndang holan ngolu ni jolma i alai ngolu ni sude do. Debata manjadihon mula ni hasiangan (Indonesia: jagad raya, Gorik: kosmos) on dohot na adong di bagasanna. Mardalan tu sada tingki ujung do hasiangan on. Ndang hot. Ndang marhaliang. Laos tahaporseai do na atik pe songon i pardalanan ni hasiangan on, na so hot alai marujung, dung marujung hasiangan on dohot nasa na di bagasanna di sada tingki di jolonta na so taboto sadiharina, marhagogoon do tong Ibana manompa na imbaru muse. Andorang so sahat tu panompaan na imbaru i pe, marhagogoon do tong Debata panompa i marhite TondiNa paimbaruhon hasiangan na lam matua on, na mangihuthon angka pande bisuk naung marumur marjuta taon on.   Disi ma Debata palumehon hangoluan na manongtong i tu ganup na porsea tu Jesus Kristus Tuhanta i. Na so porsea manjalo uhum sian Ibana. 

Haporseaonta na songon i marojahan do i tu haporseaon ni Tuhanta Jesus Kristus na mangajarhonsa di tongatonga ni bangsoNa bangso Jahudi di abad parjolo. Pangajarion ni Tuhanta Jesus Kristus i, na marojahan tu haporseaon ni bangso ni Debata andorang so haroroNa na parjolo i, diingot, diulakkon pasahathon dohot dipaingotingot angka siseanNa na sampulu dua i dohot angka siseanna na asing dope, isara apostel Paulus, na tong manghaporseai dohot, mangajarhon na dos, dohot manurathonsa tu angka huria na pinjongjongna dohot na so pinajongjongna pe tahe di abad parjolo. Angka siihuthon Jesus na asing pe dohot do manurathon na dos di angka surat na di Padan Naimbaru i.  Marningot na niajarhonNa i do umbahen disurathon panurat ni Evangelium naopat i na dos. Si Markus mamonaisa di taon 69/70, si Lukas mangulakhonsa di taon 80, si Mateus di taon 85, jala si Johannes di taon 90-an. 

Siala ni i do di pardalanan ni huria na pinajongjong dohot na niuluhonNa di portibion mamungka sian abad parjolo sahat tu nuaeng nang tu tingki na naeng ro (ndang taboto olat ni andigan) sai dirataratai angka na porsea i do haporseaon ni Jesus taringot tu haroro ni Jesus Kristus napaduahalihon dohot taringot tu ujung ni portibion. Di minggu-minggu Adven ma i tapatupa, unang lalap hita holan manghirim di ngolu nang hasiangan na laho salpu on.  Songon i ma sintong jala ringkot ni haporseaon i umbahen na diajarhon Jesus do tu angka siseanNa aha na naeng masa andorang so ro dope ujung ni hasiangan on. 

Dipalumba Ibana i di sada panghataionNa dohot angka sisean i di kota Jerusalem dung dipaias Ibana bagas joro ni Debata naung gabe bagas inganan i panamun binahen ni angka parhuaso disi, jala dung dipinsang Ibana angka panamun i marhite angka hata na koras (Mat 21-23). Panghataion ni Jesus dohot angka siseanNa i jumpang hita di bindu 24: 1 - 25: 46. Di panghataionNa dohot angka siseanNa i mansai tangkas do diondolhon Jesus na ia ari haroro ni ari parpudi i marhahonaan manang marhadomuan do tu ari haroroNa paduahalihon (Gorik: Parousia). Di haroroNa i mangangguhi do angka bangso marnida haroroNa i (Mat 24: 29-30).  Siala ni i dihatahon Ibana ma dia sitagamon ni angka sisean paima ro ari haroroNa paduahalihon, songon dia ma angka sisean managamsa, aha diarop Jesus sian angka sisean molo masa sitagamon i (24: 1-35), jala songon dia ma hita angka siseanna marparange manomunomu haroroNa padua halihon i (25: 26-25:46).  Sada sian angka i ma na dapot hita di ayat 3-8, na marisihon lumbalumba dohot singotsingot taringot tu dia na naeng masa jala beha mangadopisa. 

Sasintongna taringot tu halelengse ni kota Jerusalem tarlumobi taringot bagas joro na uli na disinon do na dihatahon Jesus tu angka siseanNa (ayat 1-3), i ma na so martahan be i leleng, beha pe ulina diida angka sisean i bagas joro naung pinajongjong ni si Nehemia di abad paonomhomdung mulak sian habuangan, na torus dipatureture, jala na dipauli Raja Herodes di abad parjolo andorang so Kristus. Alai migor na umbidang jala na dumao sian i do sinungkun ni angka siseanNa i tu Jesus, i ma taringot tu tingki hamamasa ni halelengse ni bagas joro i naung malengse di taon 70 (Mat 24: 1-2), dohot do taringot tu tingki ni haroro (Gorik: Parousia) ni Jesus napaduahalihon di bagasan huaso dohot hagogoon, jala dohot do taringot tu tingki ajal ni hasiangan (Gorik: sunteleias tou aionos) on (Mat 24: 4). Tolunsa disungkunhon nasida, tontu ala ndang holan anak ni si Josef tungkang hau i ia Jesus i dipamerengon nasida, alai anak ni Debata na marmulia i do, i ma na umboto saluhut. 
Di alus ni Jesus di ayat 4 sahat tu 8 adong do dua sipaingot na dilehon Jesus tu hita angka siseanna taringot tu haroro ni Kristus dohot haroro ni ajal ni hasiangan on. 

Naparjolo, i ma di ayat 4: Jaga ma hamu (Gorik: Blepete). Sipaingot na parjolo on domu tu haroro ni Kristus i do.  

Napaduahon, i ma di ayat 6: Manat ma hamu (Gorik: Horate). Jaga unang dililuhon. Sipaingot napaduahon on domu tu ajal ni hasiangan on. Tatangkasi sadasada, ai tarsurat do na ganup sipaingot mardonganhon sialana (Gorik: gar; Batak: ai) do.

Parjolo, dipaingot Tuhanta Jesus asa jaga hita mamungka abad parjolo sahat tu nuaeng nang sahat tu tingki haroro ni Jesus Kristus Tuhanta i napaduahalihon. Ringkot jamot hita ala lan (Gorik: polla) do sogot na manoluk goar ni Kristus, na mandok dirina Kristus i laho paliluhon (ayat 5, Gorik: planese, sian hata karejo: planao). Godang na mandok dirina do Kristus i. Sinangkapna i ma laho paliluhon.  

Paduahon, dipaingot Jesus asa manat manang jamot hita, asa mamareso di bagasan hajamoton (ayat 6-7). Dia sipajamoton? I ma angka barita na hatop begeon na naeng masa ma hamamasa (Gorik: mellesete) parmusuon, konflik sahat tu porang (Gorik: polemous) jala bahat barita manang soara taringot tu hamusuon (Gorik: akoas polemon).  Molo masa angka i unang migor didok rohanta na i ma ujung ni hasiangan on. Ndang i dope ujungna (Gorik: oupo estin ho telos). Ndang i dope ajal ni hasiangan on i (sunteleias tou aionos). 
Taboto tangkas marporang do bangso Jahudi maradophon kekaisaran Romawi di taon 66-70, na ginoaranna Porang Jahudi.  

Sahat tu na dung mas porang Jahudi i. Jala dilumbahon Jesus do tong (ayat 7) tolu na mamambahen jolma mansura na ro ma ujung i, i ma: (i) paraloan ni sada bangso tu bangso na asing,  (ii)  angka haleon (Gorik: limoi) dohot  (iii) angka lalo (Gorik: seismoi) di bahat inganan, marluatluat (Gorik: kata topous).  Didok Jesus na ia angka i parmulaan ni pambebeonna (Gorik: arche odinon) i dope i. Sian tingki dung didok Jesus i sahat tu nuaeng nunga bahat masa porang di portibion, di bahatan inganan, na parpudi ma i di abad paduapuluhon, pola dua hali porang portibi, jala dung i sahat tu abad pa-21-hon nuaeng sai masa dope angka i (parmusuon, haleon dohot lalo). Alai ndang i dope ujung ni hasiangan on.

Singotsingot/parent ani Jesus Kristus do na jinouhon ni Mateus 24: 3-8 on di Minggu Advent IIIhon on, di na tapaimaima haroro ni Jesus napaduahalihon (parousia) dohot ajal ni hasiangan on (sun teleias tou aionos) hita, unang dililuhon dohot lilu sandiri manang laos paliluhon halak hita.  

Boasa hita ruas ni Huria ni Kristus i ingkon mamparangehon hajagaon dohot hamanaton i nuaeng on?  
Parjolo, ala apala di partingkianta nuaeng on do mansai hatop sar barita manang aha pe, na so apala haru sintong. Mansai hatop do barita sahat tu telefon genggamta i na di era revolusi industri na paopathon nuaeng tuk manjalo mansai hatop barita manang aha pe i, na sintong dohot na so marojahan pe hasintonganna. Olo do barita masa di dua taon na salpu dipaimbaru jala ditongos tu telefon genggamta i hira na mandok na masa ma porang, masa ma haleon, masa do lalo, laho mambibiari manang mangototoi hita. Molo di tingki na salpu ndang migor sahat i tu simalolongta molo so tatonton Televisi, alai nuaeng on humatop na sahat barita na rade di gadgetta i sian na sanga dipaboa di Televisi manang radio pe tahe.  Duansa hata jaga (Gorik: blepete) dohot manat (Gorik: horate) i sangaja do dipaingothon Jesus asa angka siseanNa i sahat tu nuaeng mangolu di bagasan na so boi liluhonon ni halak. 

Ndang holan taringot tu barita masa na domu tu ngolunta sinuaeng na dipangke angka jolma nuaeng laho paliluhon donganna jolma, alai dohot do taringot tu na naeng masa sogot, i ma taringot tu haroro ni Kristus dohot taringot tu haroro ni ajal ni hasiangan on.  Jaga hita molo adong na mandok na ibana do, na niajarhonna do ia Kristus i dohot haroroNa paduahalihon, manang nunga manghatai ibana dohot Kristus di parnidaan (visi) jinalona na mandok ro ma Kristus di ari on manang ari an, di taon on dohot di taon an, na ro ma Kristus jala ro ma ajal ni hasiangan on. 

Siala ni sipaingot dohot parenta ni Jesus Kristus on asa jaga jala manat angka siseanna umbahen na dung do diajarhon reformator Martin Luther taringot tu songon dia ma hita halak Kristen Protestan mangalusi angka halak na mandok ro ma marsogot Kristus i paduahalihon songon on: "Molo tung ro pe Kristus marsogot, suanonku do bona ni apel." Molo jaga jala jamot hita maradophon angka sipangalilu dohot sipararat barita taringot tu haroroNa paduahalihon dohot taringot tu ajal ni hasiangan on, ba ingkon songon i ma hita jaga jala manat mandalani ngolunta dohot mangulahon ulaonta na marragam i. Hajagaon dohot hajamoton manomunomu haroroNa i do na mangurupi hita marhangoluan na jamot jala jaga tu ngolunta di portibion, unang muraura ro sahit, mara, alai sai tongtong di hita hangoluan na singkop, nuaeng nang sogot pinalumehon ni Jesus Kristus Parmahanta na denggan i tu hita (Joh 10: 10).

Paduahon, ringkot do tapatogu hajagaon dohot hajamotonta di partingkian nuaeng, di jabu, di gareja, di ulaon, nang di pardalananta, unang marmara ngolunta nang angka donganta siala ni hahurangjagaon dohot hahurang jamotonta. Ai nang pe timbo parbinotoan teknologis ni jolma i nab oi manjagahon dohot manjamothon ngolunta di angka inganan nang ulaon na marragam i, ringkot do hajagaon dohot hajamoton ni dirinta. Unang ma gabe jumago masin manjagahon hita sian hita manajagahon dirinta. Boi do gabe godang na marlas ni roha dohot na tarpasupasu ala jaga jala jamot hita di angka mara, isara angka ulaula ni teroris. Alai boi do gabe marmare ngolu ni bahat halak ala so jaga jala jamot hita. Denggan rimangrimangonta on: Ndang holan angka polisi dohot sordadu manang angka parkarejo pabrik na marragam i na ingkon ringkot tongtong jaga jala jamot. Alai dohot do sude angka na maniop ulaon na mardomu tu hadumaon ni ganup, ndang holan hadumaon ni donganta jolma, alai dohot do hadumaon ni angka na tinompa ni Debata na asing. Ala na so jaga jala jamot do angka uluan di humaliang ni Tao Toba umbahen gabe sega aek ni tao i jala na mangaolu disi, sega nang angka suansuanan di humaliangsa.  

Hubege gabe sahalak na digoari The Person of the year 2019 do sahalak nomorbaju 16 taon margoar Gretta Thunberg, warga negara Swedia, dibahen Majalah Time, ala ni usahana manosoi angka sundut nuaeng on manjagahon portibion sian panegaion na manongtong.  Ibana ma naumposo naung dung manjalo penghargaan i. Sai tubu ma angka ruas ni hurianta na gabe dipuji jolma di luat, negara nang portibion ala ulaon manjagahon dohot manjamothon dongannta jolma nang angka na tinompa na asing.
Amen. 
  BeritaTerkait
  • Jamita Evangelium 20 Januari 2019, Minggu II Dung Epiphanias: Hagogoon ni Debata na pangoluhon (Markus 1: 21-28)

    2 tahun lalu

    Oleh: Pdt. Dr. Robinson Butarbutar, sian Parsameanta, STT-HKBP. WA/HP: 0812-62472015Di taon 69/70 dung Kristus, di na manurathon Evangeliumna si Markus, i ma sahalak donganta siihuthon Jesus sian gene

  • Jamita Evangelium, 26 Nopember 2017 Minggu Parningotan ni Angka Namonding, Turpuk: Mateus 25: 31-46 "Hangoluhon ma ngolu na manontong i."

    3 tahun lalu

    Oleh: Pdt Dr Robinson Butarbutar, STT HKBPSian mamungka mangula Jesus di Palestina sahat tu na tubu jala maherbang huriaNa di abad parjolo, sahat tu tingki on, nunga tung bagas diboto, dihaporseai, di

  • Jamita Evangelium, Advent I 2 Desember 2018, 4 Musa 24: 15-17: Managam Haroro ni Sipalua

    2 tahun lalu

    Oleh: Pdt Dr. Robinson Butarbutar, di Parsameanta, STT-HKBP Pematangsiantar, HP-WA; 0812-62472015. Sada na mansai uli situtu na jumpang hita di angka tona ni Debata di Bibelta i, i ma na mangihut on:

  • Jamita Evangelium, 9 Desember 2018, Minggu Advent II, 1 Petrus 2: 11-12 : Manomunomu Tuhan i Marhite Parange na Denggan

    2 tahun lalu

    Oleh: Dr. Robinson Butarbutar, sian Parsameanta, STT-HKBP Pematangsiantar, 0812-62472015.Nunga sada fakta na ingkon adopan ni angka bangso di portibion nuaeng na siala ni marragam sibonsiri na mansai

  • Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21

    2 tahun lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar.HP/WA 0812-62472015Di Minggu Advent Paopathon on,sadari nari andorang tapatupa borngin parningotan hatutubu ni Siaplua i (24

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb