• Home
  • Agama
  • Jamita Evangelium 19 April 2020, Minggu Quasimodogeniti
KSP Makmur Mandiri
Kamis, 16 April 2020 17:48:00

Jamita Evangelium 19 April 2020, Minggu Quasimodogeniti

BAGIKAN:
ist
Pdt Dr Robinson Butarbutar
Pinatolhas ni Pdt Dr Robinson Butarbutar, Ketua Rapot Pandita HKBP

"Mauas do tondingku tu Debata" (Psalmen 42: 1-6)

Hamu angka dongan sahaporseaon di sandok Indonesia,

Dua pangalaho mangadopi parungkilon. Nasada, lungun, tungki, margudompong, lonong. Mate di arsak ni roha. Nasadanari, tangis, tungki alai hehe dung i, marpos ni roha tu Debata.  Di bonana mangolu di bagasan hapogoson na sumalin. Sai tungki. Gok iluilu. Alai dung mananda Debata Sitolusada i, muba do hita halak Kristen Batak, gabe bangso na mananda lungunna, alai na togu marhaporseaon di hatuaonta sian Debata na manghaholongi hita. Ala ni i, molo bungkas hita sian huta hagodanganta be tu huta na asing mangalului ngolungolu dohot mandundung sintasintanta, dua na mangihut on ma didok natoras Kristenta be tu hita ganup. Na parjolo, "Tanda lungunmu da." Napaduahon: "Pir tondim. Unang mabiar. Pos roham di Debata." Na patupahonsa marhasil. Na so patupahonsa susa ngoluna.
 
Lungun situtu roha ni parPsalmen, pola digombarhon songon hursa na malungun di angka guluan,jala sian manogot sahat tu borngin sai tariluilu ala - sian sihadaoan di luat sileban di Jordan, Hermon dohot Misar  - ndang tarbahen ibana patupa songon naung somal dipatupa bangsona di Judea, i ma pajumpang dohot Debata di bagas joroNa di Jerusalem. Lungun rohana, ala ndang diida ibana Debata manurdukkon tanganNa palua ibana sian parmaraan. Dihilala ditadingkon Debata ibana pola direhei musuna ibana.

Nda tongon lungun, muraura, jala hatophatop lungun rohanta nuaeng binahen ni Covid 19 i? Lungun rohanta, tibu nian boi muse hita pajumpang dohot Debata di bagas joroNa songon nasailaon, atik pe marminggu di jabu hita jala diurupi online sian gareja.  Lungun tong rohanta siala ndang boi be tapatupa marragam parjumpangan dohot donganta, sisolhot nang dongan saulaon songon na somal.  Lumobi sian i dope tahe, lungun rohanta ndang boi maningkir donganta na monding songon nasailaon. Jala holan hita keluarga najumonok nama na boi paborhat sisolhotta tu udean. Di udean pe ingkon marjarak na dao do jala marmasker, molo Covid 19 do siala ni parmonding ni keluarganta i.  Gariada tahe pola adong natuatuanta na ditulak dipatuat di hutanta sandiri. Lungun rohanta ala taida hira ndang mangula Debata paluahon hita. Ai lam tamba do ganup ari sinonggopan ni si Covid 19-on, jala lam tamba na monding, atik pe nunga marusaha hita.

Naboi do lam lungun rohanta di ariari na ro on molo ndang unduk hita tu na niaturhon ni pamarentanta mangadopi Covid 19 on. Unang lam lungun rohanta, tangiangta sai unduk ma donganta sabangso na marugamo Silom di hita on di bulan Ramadhan on tu pangidoan ni Majelis Ulama Indonesia di tgl 15 April 2020 i tu nasida, i ma: i) Paholang diri sian sihatoropan, (ii) Di jabu ma patupa panombaan tu Debata (iii) Diuba ma hasomalan manomba Debata, (iv) unang pola mudik jo.

Napaduahon, pos ni roha, marpos ni roha na togu di hatuaon sian Debata (Heber: yisyuot), dung lungun rohanta. Tadok ma tu tondinta, "Boasa sai tungki ho, ale tondingku, jala boasa sai rusak ho di bagasan ahu? Haposi ma Debata, sai na pujionku dope Ibana, hatuaon ni bohingku jala Debatangku."  Ingkon adong do giot ni roha di hita sude mandok tu tondinta unang hot mian di bagasan lungun ni roha. Unang taloas Covid 19 torus mambahen lungun rohanta. Ingkon tapasohot do i. Ingkon barani hita mandok tu dirinta songon bangso Indonesia: "Unang lungun rohanta torus, alai hehe jala hiras ma rohanta pasohothon harararat ni Covid 19 i." Ndang holan i tahe, ingkon tadok tu tondinta tongtong mamuji Debata jala marpos ni roha na so padaon ni Debata sian hita hatuaonta (Heber: yesyuot). Di tingkina marhite hasatiaonta mangoloi pinangido ni pamarenta dohot marhite angka dalanNa na asing na so tardodo hita paluaonNa do bangsonta sian Bencana Nasional Covid 19 on. Amen. 

  BeritaTerkait
  • Jamita Evangelium, Minggu Quasimodogeniti 8 April 2018: Parmahani Ma Birubiru ni Debata

    2 tahun lalu

    Oleh: Pdt Robinson Butarbutar, Sian Parsamenta, STT-HKBP.Dung hehe Jesus sian hamatean, andorang so manaek Ibana tu banua ginjang, andorang so ditonai Ibana angka siseanna laho tu sandok portibion mam

  • Jamita Evangelium, Minggu Misericordias Domini 15 April 2018: "Mangolu di bagasan Asi ni roha ni Debata"(Mika 7: 14-20)

    2 tahun lalu

    Oleh: Pdt. Dr. Robinson Butarbutar, sian Parsameanta, STT-HKBP Pematangsiantar.1.Dung songon i tangkas jala bagas di ari Minggu na salpu di panghulingi hata ni Tuhan Jesus Kristus ganup siseanNa mamun

  • Jamita Evangelium, Minggu Jubilate, 22 April 2018: Marlas ni Roha di Bagasan Tuhan i (1 Tessalonik 2: 13-20)

    2 tahun lalu

    Oleh: Pdt Dr. Robinson Butarbutar, Sian Parsameanta, STT-HKBPJubilate = Marolopolop tu Debata Sandok Tanoon1.Molo tajaha surat 1 Tessalonika on sian bona sahat tu ujung, tangkas situtu do digurithon&n

  • Jamita Evangelium 28 April 2019, Minggu Quasigodogeniti Manongtong Mangihuthon Jesus (Johannes 21: 15-19)

    tahun lalu

    Sian Parsameanta di PematangsiantarSTT-HKBP.Pdt Dr. Robinson Butarbutar Hp/WA: 0812-62472015Marasing sian isi ni bagian pangujungi ni Evangelium Markus (disurathon taon 69/70), Lukas (disurathon taon

  • Jamita Evangelium Minggu Dung Natal, 29 Desember 2019: Marningot Angka Pambahenan ni Debata" (Psalmen 77: 6-16)

    6 bulan lalu

    Oleh: Pdt Dr Robinson Butarbutar Sian Parsameanta,  STT HKBP HP 10812-62472015 Hamu angka Dongan sahaporseaon, Di pesta Natal parjolo di tanggal 25 Desember i tabege do barita nauli taringot

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb