• Home
  • Agama
  • Jahowa do Panghirimonku" (Roma 8: 18-25)
KSP Makmur Mandiri
Sabtu, 14 Maret 2020 20:22:00

Jamita Evangelium, 15 Maret 2020, Minggu Okuli, "Sai tong do mangaranapi matangku dompak Jahowa"

Jahowa do Panghirimonku" (Roma 8: 18-25)

BAGIKAN:
Ist
Pdt Dr Robinson Butarbutar
Sian Parsameanta, STT-HKBP Pematangsiantar
Pdt Dr Robinson Butarbutar

Dung tubu hita tu portibion, mangolu jala mangula do hita mandungdung angka sidungdungonta di ngolu on, angka sintasinta be.  Laho mandungdung angka sintasintanta i sipata sai taadopi do angka tantangan ni ngolu na so tarbahen hita sian gogonta sandiri mangatasisa. Sipata adong angka donganta jolma di portibion na mangadopi tantangan na tung dokdok situtu. Adong do i na ro sian dirinta sandiri. Adong do i na ro sian duru ni dirinta. Adong ala ni angka bencana alam, adong ala ni napinatupa ni halak, marsangajo manang ndang, , adong ala ni sahit, adong ala ni hagaleon ni dongantan na adong di humaliangta.  Marragam tahe sibonsirina. Uju masa angka na so taradopi  jotjot do hita mangalului angka pangurupion sian donganta jolma. Sipata rade do pangurupion i. Sipata ndang. 

Mamaungka uju pesepese dope hita, sahat tu na dung matua situtu hita. Songon dia do angka na porsea di Debata mangadopi angka tantangan na so taratasisa i? Tu Debata do nasida/hita mangalualu. Tu Debata do matanta, tarlumobi mata ni partondionta mangalualu, mangaranap. Haposan do Ibana. I do na dihatindangkon angka na porsea na jolo sahat tu tingki on nang di tingki na naeng ro.  Nunga bahat situtu angka na porsea i naung manghilalahon i: Mangaranapi matana  dompak Jahowa, mangido dohot paimahon pangurupionNa, ala haposan do Ibana. Bahat do angka buku Biografi na digurithon angka na porsea i manghatindangkon i di ngolunasida. 

Ala ni i do didok sahalak teolog ni Huria Katolik Roma na tarbarita, Hans Kueng, naung pensiun nuaeng di sada bukuna, Was ich glaube (2009, Indonesia: Aha/Dia na huhaporseai) songon on (Huhatahon sandiri): "Uju sahat hita tu sada partingkian, situasi dohot kondisi ni ngolunta, na di bagasanna tahilala na so tarbahen hita be manang aha, tahilala nunga talu hita, nunga hira manuk na peohon hita, nunga suda be gogonta mangadopi tantangan ni ngolu i, maheu tahilala, ndang adong be panghirimon, apala disi ma hita mangharingkothon Debata, apala disi do hita manghilala na adong do Ibana manangihon angka na mangaranapi dompak Debata. Gabe imbaru do haporseaonta. Gabe boi jala barani hita hehe. Gabe adong panghirimonta, na mamargogoihon hita imbaru mamungka ngolunta muse."  Ala ni i do parPsalmen patolhashon isi ni haporseaonna mandok: "Sai tong do mangarapi matangku dompak Jahowa" (Psalmen 25: 15a). 

Di na taadopi nuaeng  epidemi Virus Covid 19 na marmula di China, alai nuaeng nunga gabe pandemi di bahat negara di portibion, pola dijouhon uluan ni Badan Kesehatan PBB asa ganup negara patupa pernyataan Keadaan Darurat, sa nasa gogo dipatupa asa unang rarat virus on alai marujung ngolu, ingkon ganup do hita mangaranap dompak Jahowa, asa disurdukkon tanganna mangurupi hita di na tapatupa angka na ringkot laho pasohothon penyebaran virus on. Ganup ma angka ruas ni HKBP mangaranap dompak Jahowa asa disurdukhon tanganNa na gogo I mangurupi hita jolma pasohothonsa, molo tung pe ingkon marhite dalanNa sandiri, na so tardodo pingkiranta. 

Alai, panatapion ni matanta dompak Jahowa tapatupa ndang holan uju mangadopi tantangan na taadopi uju mangolu hita songon jolma. Alai panatapion na songon i mansai ringkot do tong tapatupa nang uju naeng marujung ngolunta di portibion. Unang mabiar hita disi. Alai asa hot mangaranap matanta dompak Jahowa, ai haposan do Ibana di hataNa, na diparade Ibana do hamuliaonta.  I do na ginurithon ni apostel Paulus tu huria Rom bindu 8: 18-25 i, i ma  na patolhashon na manghut on:  "Dung mate pe pamatangta di portibion ndang disi ujung ni ngolunta on.  Alai nang dung mate hita tapaima do hapapatar ni ari hamuliaon (Gorik: doxa) ni angka anak ni Debata di tingki na binuhul ni Debata.  Mamungka sian na digurithon apostel i Roma 8: 18-25 i di taon 57 abad parjolo, ndang marnaro dope ari hamuliaonta songon angka anak ni Debata naung tinobus ni Jesus Kristus i. Atik pe ndang masa dope i, ingkon benget do hita na mangolu dohot hita naung monding paimaimahon i. I do ingkon haposanta di Minggu Okuli nuaeng on.

Boasa ma ndang apala hata ni Debata na manjouhon tu hita asa mangaranapi dompak Jahowa uju mangadopi hamaolon ni ngolunta nuaeng gabe jamita di minggu Okuli sadarion dienet gabe jamita, alai apala hataNa na manjouhon tu hita asa tong mangaranapi dompak Jahowa, tu ari hapapatar ni hamuliaonta songon angka anak ni Debata di tingki na naeng ro i ma na sian Roma 8: 18-25? 

Suraon do ala ndang togu be panghirimonta di ari hamuliaonta i di tingki na naeng ro? Nunga holan manghirim di angka na boi patupaon ni Debata uju mangolu hita, ndang be sahat tu manghirim di sipatupaonNa di hita angka anak ni Debata di tingki na naeng ro. Molo i do, tontu ringkot do hataNa i  gomos tatiop di tingki on.  Di na paimahon i, ingkon benget (Gorik: hupomones) do hita. Molo benget hita disi, tarbahen hita ma nang benget manghirim (ayat 25).

Tarimangrimangi ma hatani Tuhanta i, tahaporseai  ma na haposan do Debata di sangkapNa.(*)
  BeritaTerkait
  • Jamita Evangelium, Minggu Misericordias Domini 15 April 2018: "Mangolu di bagasan Asi ni roha ni Debata"(Mika 7: 14-20)

    2 tahun lalu

    Oleh: Pdt. Dr. Robinson Butarbutar, sian Parsameanta, STT-HKBP Pematangsiantar.1.Dung songon i tangkas jala bagas di ari Minggu na salpu di panghulingi hata ni Tuhan Jesus Kristus ganup siseanNa mamun

  • Jamita Evangelium Minggu Pentakosta I, 20 Mei 2018 "Nunga Dilehon Debata Tondi Porbadia tu Nasa Bangso" (Ulaon Apostel 10: 44-48)

    2 tahun lalu

    Oleh: Pdt. Dr. Robinson Butarbutar, Parsameanta, STT-HKBP, PematangsiantarPatujoloSomal do di parmingguon parningotan di hasasaor ni Tondi Porbadia di angka huria di portibion nasailaon dienet ba

  • Jamita Evangelium, 28 Oktober 2018 (90 tahun Sumpah Pemuda) Minggu XXII Dung Trinitatis "Huria Mangulahon Ulaon Parasinirohaon" (Jesaya 58: 4-12)

    2 tahun lalu

    Sian Parsameanta: Pdt Dr Robinson ButarbutarUlaon parasinirohaon solhot do i tu hajolmaon. Molo taida angka donganta jolma mian manang mangolu di bagasan sada kondisi ni ngolu na tung maol situtu, mad

  • Jamita Evangelium 11 Nopember 2018, Minggu XXXIV Dung Trinitatis : Mika 6: 6-8 Ulahon ma Uhum dohot Holong ni Roha di Habasaon

    2 tahun lalu

    Oleh: Pdt Dr. Robinson Butarbutar, Parsameanta, STT-HKBPDung dipanghulingi Debata Jahowa hita marhite hatana di minggu na salpu, uju i dipangido tu hita asa mangarataratai silehonlehonNa mardonganhon

  • Mangolu di bagasan Asi ni Roha ni Debata (Psalmen 25: 1-7)

    tahun lalu

    Sian Pdt Dr. Robinson ButarbutarDi taon 2009 dipillit Sinode ni Parsaoran ni Angka Huria Protestan (Lutheran, Reform, dohot Unitarian)  di Jerman (EKD, German: Evangelische Kirche in Deutschland)

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb