• Home
  • Agama
  • Dihaholongi Debata do angka Na Ias Roha (Poda 22: 8-12)
KSP Makmur Mandiri
Sabtu, 26 Oktober 2019 19:05:00

Dihaholongi Debata do angka Na Ias Roha (Poda 22: 8-12)

BAGIKAN:
ist
Pdt Dr. Robinson Butarbutar

Oleh: Pdt Dr Robinson Butarbutar


Hamu angka dongan, sanga do sahat tu ujung ni abad paduapuluhon sahat tu bona ni abad paduapulusadahon sai digoari do masyarakat Modern dohot Postmodern i Masyarakat Ilmu Pengetahuan, Knowledge Society,  i ma na mandok Parbinotoan, pingkiran, utok-utok, ratio do na rumingkot. Nasa na so masuk tu pingkiran, utokutok, ndang sai ihuthonon. Nasa na so masuk akal, situlahon do. Dohot do hita halak Kristen Batak sai manosohon i. Ingkon pistar do hita.   

Alai taboto do angka dongan na mangihut on di sejarah ni hajolmaon di abad 19-hon dohot abad pa-20-hon jala sahat do i tu abad pa-20-hon: "Ala sai holan pingkiranna dipangasahon jolma i, na bahatan arsak ni roha masa dipatupa jolma i, isara porang portibi na parjolo dohot napaduahon, porang na marragam di Afrika, jala di Timur Tengah parpudion, laos adong nuaeng porang dagang, perang Cyber, jala porang-porang na metmet di Rumah Tangga, termasuk di Rumah Tangga ni halak Kristen, ala sai mangasahon pingkiran sandiri, manghilala pingkiranna sandiri na sintong, na dumenggan, na ingkon oloan, na ingkon patupaon.  Ala ni kepentingan sendiri, gabe masa angka porang na metmet di bagasan keluarga dohot masyarakat nang negara pe tahe, mambahen boi tubu angka konflik sahat tu porang. I do umbahen na di dunia pendidikan sai dilului do ise na impistar, Kecerdasan Intelektual. Nang angka na tinompa ni Debata na asing dohot do tasegai, manghorhon lam mohop portibi on.

Dung diida angka angka panghorhon na so denggan na songon i, nunga tibu dipatujolo di bona ni abad pa-21-hon on na ginoaranna kecerdasaran emosional (panghilalaan,Emotional Equent),kecerdasan relasional (Parsaoran), kecerdasan moral (hadaulaton).   Alai na ginoaran parpudi on, hamaloon intelektual, emosional, relational, dohot moral ndang apala denggan diparade bahat bangso, bahat masyarakat dohot bahat huria. I do umbahen di tongatonga ni angka dakdanak, remaja, naposobulung, natuatua, politisi, dohot kaum professional sai tubu do angka konflik na marragam i, na mambahen bahat angka kerugian, bahat korban, dna.

Jala parpudion di pasingkop ma i dohot hinaringkot ni Pemingkirion na mansai jamot, Vernuenftigkeit di hata Jerman, i ma pamingkirion na padomuhon intelektual, emosional, relational dohot moral. Asa molo mangalangka sasahalak ndang adong be na roa pinatupa tu dongan jolma, alai na denggan situtu. Ndang tasegai dirinta. Ndang tabahen hansit ni roha ni donganta. Ndang sai taulahon angka hasalaan, dosa.

Di minggu  XIX dung Trinitatis dipillit do siala ni i sada tema Jamita na marojahan tu pangajarion ni hata ni Debata di buku Habisuhon i ma sian Buku Poda Raja Salomo bindu 22, tarlumobi ayat 11, "Dihaholongi Debata do angka na ias roha dohot na marpanghuling na basar," God loves the pure in heart and the one with gracious speech. Songon i do holong ni roha ni Debata di nasida, ai gabe dongan ni angka raja do nasida, dongan ni angka na manguluhon, angka na mamarenta. Ndang holan di negara dipamasa Debata tu ngolu ni angka na ias roha dohot parhata na basar, alai dohot tu di angka ulaon na marragam inon, di perusahaan dohot di angka na asing. Alai angka nan manaburhon hageduhon, na patupa parbadabadaan, partongkaran dohot parsalisian pamasaon ni Debata do tu nasida hamagoan (Poda 22: 8-12, tarlumobi ayat 8, 10, 12).

Ndang apala angka pargeduk i, hata-hata, parbadabadaan, parsalisian i na ingkon mamanghulingi hita dohot na naeng rimangrimangonta di minggunta sadarion dipilit gabe jamita di hita, alai na denggan i do, i ma: "Dihaholongi Debata do angka na manghaholongi roha na pita, angka na ias marroha, ai gabe mardonganhon angka raja do nasida."

Molo di ayat 4 didok upa ni roha haserepon dohot biar mida Jahowa do hamoraon, hamuliaon dohot hangoluan, alai di ayat 11 sijaloon ni angka na manghaholongi roha na pita, na ias, jala marpanghuling na basar i ma gabe mardonganhon raja i.

Duansa do ringkot tapamanat: "Manghaholongi roha na ias" dohot "Marpanghuling na basar" do na mardonganhon raja. 

Mansai ringkot do on tapamanat, angka dongan, jala taloas mamanghulingi hita. Nabaruon holan hapistaran do dipatujolo hita halak Batak, jala panghataionta andorang so manghuling hata ni Debata tu tongatonganta i ma "Siborupuas Siboru Bangkara, molo dung puas soada mara." Dung Kristen hita, ndang holan i be, alai ingkon tambahononhon do tusi, "Ingkon marpanghuling na basar do hita" (Poda 22: 11) ingkon  "Na siniraan ma hatanta": "Sai tong ma lambok hatamuna, songon na siniraan, asa botoonmuna alus na patutu tu ganup jolma" (Kolosse 4: 6). Molo tung pe puas hatanta, unang ma na so lambok.

Mansai ringkot i taparsiajari, taauhon dohot tapamanat, tarlumobi di partingkian on. 

Parjolo, parange Kristenta denggan do tarida di caranta marpahean. Alai na ingkon tambahononta tusi i ma ingkon rohanta do sipaiasonta sian angka hajahaton, sian angka na maralo tu lomo ni roha ni Debata. Dison, ingkon dohononta do na so tarbahen hita sian gogonta sandiri marroha na ias, marroha na pita, alai ingkon tapangido do gogo ni Tuhanta i paiashon rohanta. Ianggo Parpsalmen diboto do i. I do umbahen na dipangido parPsalmen 51, naung mananda hahuranganna dohot dosana, mangidohon di tangiangna tu Debata songon on: "Sai tompa ma roha na ias di bagasan ahu, ale Debata" (Pslamen 51: 12a). On do hata ni Debata na mamanghulingi ahu uju Manghatindangkon haporseaon di HKBP Bahjambi  taon 1977 pinasahat ni Pdt US Nainggolan rap dohot Biv M br Hutapea. Sahat tu nuaeng sai i do tangiangku, asa dao angka na jahat di bagasan rohangku. Tangiangta do dipangke Debata paiashon rohanta sian angka hajahaton. I ma marhite na mangido tu Tuhanta Jesus asa rohanta i dipaias ibana sian pingkiran na jahat, parmainanon, panangkoon, dohot pamunuon (Markus 7: 21) "Ai sian roha do hehe angka pingkiran na jahat, pamunuon, pangalangkupon, harorangon, panangkoon, hata gapgap dohot panginsahion" (Mat 15: 19). Ala marhite pandidionta dohot marhite ulaon ni Tondi i nunga dipaimbaru Debata hita, ringkot do ganup ari tapangido di tangiangta asa dipaias rohanta sian angka i.

Paduahon, ingkon marpanghuling na basar do hita. Mansai ringkot do on di partingkianta nuaeng, tarlumobi tapadao ma sian pamanganta, pingkiranta, dohot jarijarinta di Medsos angka ujaran kebencian sian dirinta. Mangihuthon angka penasehat ni angka perusahaan na balga nuaeng, uju mengalului angka pekerja dohot pemimpin ni angka perusahaan na martahan jala na sukses, na metmet nang na balga, ndang holan angka na pistar dilului nasida, alai dohot do angka na ias marroha, ndang holan angka na pistar, alai ingkon do angka na basar panghulingna. Angka na malo pasadasadahon, nang angka na mambahen parbolatbolaton. 

Uju mahasiswa teologi di STT-HKBP Pematangsiantar, dipodai Dosenhu di Bidang Praktika, Pdt T.O.B Simaremare MTh (Natoras ni Pdt Julius Simaremare, MTh) do ahu uju mangula songon aktifis mahasiswa na manulak ketidakadilan di kampus dohot hata na mangihut on: "Molo tung pe sintong siperjuanghononmu, pillit ma hata na lambok di panghataionmu." Sian i lam huhangoluhon do marpanghuling na lambok tu angka donganku mahasiswa di STT-HKBP. Jala, di na marsiajar S2 ahu di Inggris, huparsiajari ma tatakrama Inggris na somal mamangke hata na lambok atik pe pir dinokna. 

Dia do dibahasbasahon Debata tu parroha na ias, na manghaholongi roha na ias, dohot na marpanghuling na basar? I ma gabe dongan ni  raja. Songon i do dipatupa Ester uju laho paluahon bangsona sian mara bolon, di na dijonohi ibana raja i. Lambok do hatana. 

Dihaposi raja, uluan, pemimpin do angka parroha na ias dohot na marpanghuling na basar. Angka na gok hajahaton rohana, dohot angka na marpanghuling na so basar, ndang dihaposi raja. Baliksa hurungan, hamagoan do jambar nasida. Uju zaman Orde Baru ndang apala songon I dope ajar tu hita diondolhon masyarakat. Alai nuaeng di zaman reformasi nunga muba. Angka na manghagigihon hajahaton ndang dilehon ulaon na denggan uluanta Presiden Jokowi. 

Sada contoh na denggan na boi dohonon di jamita on, i ma Almarhum Pdt W. Simanjuntak, mantan Praeses ni HKBP. Parroha na ias dohot parpanghuling na basar do ibana, ndang marlaok. Tarbarita do i di hita HKBP na mananda ibana di ulaonna songon pandita. Tu ibana dohot inang i dibasabasahon do pasupasu na sumurung tu angka pinomparna. Sada sian nasida, ianakkonna siampudan, i ma Dr. Barita L.H. Simanjuntak, SH MH, CFrA, parroha na ias, parpanghuling na basar, dihaholongi angka mahasiswa Kristen, gabe  manguluhon Gerakan Mahasiswa Kristen Indonesia ibana di taon 1998-2000. Dung i dihaposi Presiden Joko Widodo ma ibana gabe anggota Komisi Kejaksaan Republik Indonesia (2014-2019) mewakili masyarakat di bonana, alai dung i dipahusor Presiden gabe mewakili Pamarenta, atik pe so Jaksa latar belakangna,  jala i pe dihaposi Presiden ibana muse marhite surat haputusan Presiden gabe Ketua ni Komisi Kejaksaan Republik Indonesia. Paima pelantikan di Istana nama ibana. Huboto na pistar do ibana, alai dohot do na sai padaohon rohana sian hajahaton jala na sai lambok hatana. 

I ma sada sian bahat contoh na denggan taringot tuson dilehon Debata tu angka ruas ni hurianta na ias roha, i ma naung diunsat Debata sian rohana angka hajahaton, i ma angka "pingkiran na jahat, pamunuon, pangalangkupon, harorangon, panangkoon, hata gapgap dohot panginsahion", jala angka parpanghuling na basar, angka na siniraan hatana. Ingkon ingotonta do i lima taon na mangihut on, uju dohot hita ruas ni HKBP sude membangun bangsonta gabe bangso na maju menuju 2045 marhite Pembangunan Sumber Daya Manusia, gabe negara maju asa boi pendapatan perkapita perbulan ni rakyatta Rp 27 juta per bulan, asa unang holan na pistar napatujolo, alai dohot ma angka na ias roha dohot angka parpanghuling na basar, asa boi dipangke Debata hita parsidohot membangun bangsonta gabe bangso na maju marhite na dohot hita bekerja keras, cepat, kreatif, produktif, berhasil dohot sederhana. Ingkon sian bagasta talatik angka sundut naumposo, ingkon muba angka sundut na tumua. Dipasupasu Debata ma angka ulaonta i parade sundut na mangihut asa sai marusaha rap dohot gogo ni Tondi Tuhanta padaohon sian rohana angka hajahaton, alai manghaholongi roha na ias, jala parpanghuling na basar. Amen.

  BeritaTerkait
  • Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21

    2 tahun lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar.HP/WA 0812-62472015Di Minggu Advent Paopathon on,sadari nari andorang tapatupa borngin parningotan hatutubu ni Siaplua i (24

  • Daompung Parpoda Na Tur " Haserepon "

    4 tahun lalu

    Di musim mudik nantoari sada, husiluhon do mandapothon sada tokoh. Natua-tua, naung marumur 84 taon.  Belakangan on dung dijalo nasida ulos matua nunga bakkol be  laho tu Jakarta/ Bandung

  • Pamingkirion tu Parsiranggutan di Ekklesiologi HKBP di Rapot Pandita HKBP Oktober 2017

    3 tahun lalu

    I. Pamuhai Di Sinode Godang HKBP September 2016 na salpu, ruas ni sinode do ahu songon Plt. Direktur Sikkola Pandita. Disi tangkas do soara ni bahat parsinode asa diamandemen sistem pamil

  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

    3 tahun lalu

    Oleh: Pdt Dr Robinson Butarbutar, Dosen STT HKBP1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-

  • Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita

    2 tahun lalu

    Oleh: Pdt Dr. Robinson ButarbutarA. Dihasiholi Debata asa marlas ni roha jolma i.Songon angka na porsea ni Debata Sitompa, Sipalua, Siparmudumudu ngolunta sian bortian ni dainang sahat tu sadarion, ta

  •   komentar Pembaca
    Copyright © 2020 Pelita Batak Online. All Rights Reserved. Design by. heriweb