Jumat, 12 April 2019 20:50:00

Minggu Palmarum 14 April 2019 Dungo Managam Haroro ni Tuhan I (Mateus 25: 1-13)

Pdt Dr Robinson Butarbutar
Oleh: Pdt Dr. Robinson Butarbutar
Parsameanta, STT-HKBP Pematangsiantar. HP/WA:  0812-62472015

Somal do na ia na gabe jamita tu hita angka na porsea di Jesus Kristus di Minggu Palmarum, i ma saminggu andorang so parningotan di ari Hamamate dohot HaheheonNa, dienet sian barita taringot tu hananangkok ni Jesus tu Jerusalem laho manaon disi dung jolo dipaias Ibana bagas joro, diadopi Ibana angka Sintua ni Malim nang halak Farise, diajari Ibana angka siseanNa taringot tu hinaringkot ni na jaga mangadopi partingkian na naeng ro, tangiangna di Getsemane dohot bona ni panaononNa, i ma na ditangkup Ibana (Mateus 21-24).  Saurdot tusi, na gabe jamita di Minggunta Minggu Palmarum sadarion,  i ma tolu ari andorang so ro be ganup warga negara Republik Indonesia ro tu Tempat Pemungutan Suara laho mamillit ise na gabe Presiden dohot Wakil Presiden, ise na gabe Wakil-wakil rakyatta di tingkat Pusat (DPR) dohot di tingkat I dohot II (DPRD), songon i tu Dewan Perwakilan Daerah, dienet sian pangajarion ni Jesus Kristus tu angka siseanNa uju di dolok Jetun. 

Tingki i marsangajo do Jesus mangajari nasida asa unang lalap di na paimaimahon angka na naeng masa di tingki na naeng ro, i ma ari halelengse ni Jerusalem, ari uhum sogot, dohot ari haroroNa Anak ni Jolma i paduahalihon di tingki na naeng ro na so boi suraon nang botoon sadiharina (Mateus 24: 36, 42, 25: 13, 31 patudos 10: 15, 23, 11:22, 24, 12: 36, 16: 28). Impola ni pangajarionNa i ma asa satia (24: 45-51) dohot jaga (24: 4, 25, 25: 13) jala asa kreatif mamangke silehonlehon sian Ibana.  Sian sada pangajarionNa asa jaga i do na dienet gabe jamita di tongatonganta di minggunta minggu Palmarum sadarion. 

Laho mangondolhon hinaringkot ni na jaga i (Hata Gorik: gregoreite, sian kata kerja gregoreo lapatanna  tongtong dungo jala mangarade) dipangke Tuhanta Jesus na malo marumpama i ma sada umpama taringot tu dua pangaradeion, na sada na pangaradeion na masuk tu horong haotoon (Gorik: morai), na sadanari na masuk tu horong habisuhon, na pantas marroha (Gorik: phronimoi); na sada pinatuduhon ni lima boruboru na paimaimahon haroro ni pangoli marhite na mamboan parpalitoanna alai na so mantat miakna, na sadanari lima boruboru na tong paimahon pangoli na dos, alai diboan nasida do tong inganan ni miak di ingananna asa boi martahan sahat tu na ro pangoli i.  Na oto mangarade dohot paimaimahon i ma na so tuk miakna pangkeon tu partingkian na so tarsura. Na pantas marroha i ma na parade miakna tu partingkian na so boi suraon sadiharina. 

Na oto i di ujungna ndang dohot marpesta. Ndang diloas masuk. Garida didok ndang ditanda. Na bisuk dohot.  Dipatuduhon Jesus duansa. Tontu diarop Ibana do angka siseanNa i maniru lima boruboru na bisuk i. Diarop Jesus asa dipillit angka siseanNa i na jaga manongontong i, sian najolo di abad parjolo sahat tu tingki on. Mansai hansit do molo targoar siseanNa iba, hape di ujungNa ndang parsidohot marpesta di ari haroroNa na paduahalihon i.

Boasa ma ulaning di Minggu Palmarum di bagasan taon on, ditopot Tuhanta Jesus hita marhite hataNa i asa manjamothon dirinta unang gabe angke sisean na so jaga, alai asa gabe angka siseanNa na tongtong jaga (Parenta na mamangke tingki nuaeng, gregoreite= manongtong ma hamu jaga, dungo)? 

i.Ala haroro ni Tuhan i di tingki na ro i boi do tibu ro tu ngolunta sandiri tibu marhite hamamatenta na so taboto sadiharina, atik pe sahali do muse haroroNa parpudi tu sude na adong di hasiangan on, suraon do dipanghulingi Jesus hita nuaeng ala nunga moru hadungoonta manomunomu haroro ni ari ni Tuhan i di hita?

ii.Suraon do ala nunga adong di tongatonganta na so jaga be, na so manjagahon ngoluna maradophon angka mara na marrongoman ro tu tongatonga ni ngolunta di abad pa-21-hon on, gabe adong na madabu, na so manjagahon habadiaonna songon angka naung pinorbadiaon ni Tuhanta Jesus Kristus?

iii.Suraon do ala nunga dong di tongatonganta na so jaga be, na so manongtong mangaloas diriNa panghulingon ni Tuhanta i marhite na sai jojor pasolhot dirina tu Debatanta Sitolusada i marhite partangiangan dohot manjaha hataNa?

iv.Suraon do ala nunga adong di tongatonganta na so manghirim be di haluaon na manongtong i di ari sogot, gabe madabu ibana tu manghaposi na adong di portibion, na laho salpu i?

v.Suraon do ala na lam bahat sian tongatonganta na so martahan be maniop Tuhanta Jesus Kristus i songon Sipalua i nang patik holong niajarhonNa tu hita? Nunga hamaloon ni portibion dihaposi ibana?

vi.Suraon do adong sian tongatonganta angka parhalado na naung gumale mangulahon ulaon haparhaladoonNa ala ni marragam angka parungkilon niadopanna, gariada tahe baliksa gabe ndang hiras be rohana mangulahon ulaon tohonanna na marragam i, manang gabe songon na pinatupa ni sahalak pangajari Padan Naimbaru di Amerika na margoar Bart D. Ehrmann na naung manandingkon haporseaonNa di Debata Sitolusada i?

vii.Suraon do ala ndang tahangoluhon hinaringkot ni na jaga i di ngolu siganup ari, gariada gabe halak na so jaga be siihuthon Jesus i, na mampanghorhon di na gabe bahat na manaon ala ndang jaga ibana uju di pardalanan, uju mangula di ulaonna siganup ari di manang di dia pe i? Ndang jada angka pemimpin, angka guru, angka pekerja di pabrik, angka partani na meproduksi sipanganon gabe dipangan panuhor angka rassun na mamboan sahit, dna.

viii.Songon Warga Negara Republik Indonesia, suraon do dipanghulingi Jesus Kristus Tuhanta na umboto saluhut i hita nuaeng, asa jaga nang di na mangarade parsidohot di Pemilihan Umum tanggal 17 April 2019 on, unang laos so ro mamillit tu Tempat Pengumutan Suara ala marsahit manang lalap, unang taloas dirinta ditaluhon angka politisi na tarunjun mamangke gogo ni hepeng laho mangelek hita asa mamillit nasida - na tangkas maralo tu uhum -, jala unang taloas angka na tarujun manangkapi mambahen na maralo tu uhum di Pemilu na ro on?  Nunga bahat angka na manjouhon asa ganup nian rakyat na marhak parsidohot mamillit asa rot u TPS. Alai sai adong dope na manangkapi dohot manoarahon asa unang pola parsidohot tu Pemilihan Umum on (Golput), hape na boi do siala ni i gabe tarpillit angka na so tahalomohon manguluhon bangsonta on.  Suraon do na ro ma mara tu bangsonta molo ndang sude rakyat na marhak mamillit ro tu TPS?

ix.Suraon do siala lam martamba torop ni angka natuatua na so adong be tingkina manjagahon sinondukna, donganna saripe, dohot angka ianakkonna, nang ruas ni keluarga besarna sian angka mara mangago ngolunta di partingkian on? Suraon do siala nunga lam torop ruas ni hurianta sian sundut na umposo na naung dipangan jaman on, gabe holan manghirim di  portibion nama dirimangrimangi  dohot dihasiholi, ndang be taringot tu ngolu sogot?

Dipargogoi  Tuhanta ma hita padimundimun tondi hajagaon ni angka na porsea i di na tadalani ngolunta on sahat tu haroroNa napaduahalihon, alai dohot nang andorang so i asa sai tongtong jaga hita ala ndang sai taboto ari ni haroroNa paduahalihon, jala ala ndang taboto dia na naeng masa di ngolunta di portibion  sogot. Tajagahon ma haporseaonta i di Debata Sitolusada i. Tajagahon ma nang ngolunta songon angka naung pinorbadiaonNa i. Tajagahon songon dia hita mangolu songon angka siihuthon Jesus, unang taloas manang aha pe manait hita sian Ibana. Amen