KSP Makmur Mandiri
Selasa, 03 Januari 2017 06:34:00

Selamat Taon Baru Mi-Re-Mi-Re-Do

Oleh : Sampe L. Purba
BAGIKAN:
Ist
Sampe L Purba
Uju metmet bajar hami, sian natolu pesta rakyat (Ulang tahun Kemerdekaan, Ari Pesta Natal, Taon Baru), holan di Taon Baru do molo pajumpa marsijalangan huhut mandok "Selamat Taon Baru". Ndang masa marsijalangan manang marsitabian "Selamat Ari Pesta, manang Selamat Ulang Taon". Apa lagi cipika-cipiki. Tokka do on. [Dung pe belakangan on, sebagai bagian ni Politik Identitas, gabe hira dihaporluhon, jala diharapkan akka dongan na marugamo naasing manabi iba, songon tanda ni hadengganon napasitariparan parsaoran nasabangso.]
 
Selain binda ari pesta, tong do masa binda Taon Baru. Jala lebih rame/ragat do taon baru dibanding Ari Pesta. Alana marsogot sahat tu manang na piga ari - marroan ma keluarga - anak/ parumaen, boru/ hela, pahompu, marpungu tu jabu ni Ompung. Suang songoni akka na marsisolhot nang marale-ale. Tarmasuk mai akka sikkola na disuru natua-tuana mandapothon guruna martaon baru tu huta-huta.
 
Dung salpu Ari Pesta menjelang tahun baru, kesibukan manang kemeriahan umum ima na pature/ mambahen kue. Molo keluarga na sederhana do, sekedar asa las roha ni gellengna, dipature inantai ma panukkup manang kue na berbahan baku tepung tapioka/ ubi kayu. Otik do miak goreng laho mambahen panukkup. Boi ma dipala-palai hepeng na so sadiai tu si. 
 
Alai molo antar umpala do sijamaon ni tangan/ ekonomi na, dipature do Kambang Loyang, Kacang Goreng dohot lampet ketan nang dodol/ alame. Angka parjabu tangga simin tarup seng/ genteng, na marbara timbo, jala adong boruna naung magodang/ tang do na mampu paradehon komplit sisongoni.
Ala terbatas do nampuna tuangan kambang loyang, biasana marsiurupan do akka anak boru/ na marbaju laho pature kue on bergiliran sian jabu tu jabu. 
 
Laos olo ma antong akka doli-doli ro songon na mangurupi huhut markeccet/ margait nonang martandang arian. Molo mambahen dodol, sar barita pur alu-alu do on di kalangan naposo selingkungan kapala desa. Ai pinjamonna ma balanga dangdang inventaris ni paradatan jala haraonna akka naposo mangurupi manggaor adonan dodol i. Gabe tamba do status sosial ni itoan i, apa lagi muse molo songon na tar uli likkan bohina, testes parsitabolananna jala sikkola di kota.
 
Diparhatua jala diapian akka dongan sahuta do molo adong pangaranto anakkon ni sada natua-tua, jala boi mulak tu huta martaon baru. Molo di taon 70 an, tujuan pangarantoan i ma sekitar Pekan baru, Kalimantan. Ai membutuhkan tenaga kerja do antong di daerah i, di masa masa awal kegiatan perminyakan/ perkebunan, laho membabat hutan. Medan dohot tano Dairi/ Karo Kotacane pe nunga termasuk pangarantoan. 
 
Adong do tong na tu Lampung manang tu Jakarta. Alai ndang pigaon. Lam dao pangarantoanna, lam dianggap lebih hebat doon. Jadi lebih tinggi do gengsi ni Pangaranto na ro sian Kalimantan dibanding na sian Pekanbaru. Nang pe sama-sama membabat hutan ulaon nasida.
 
Di akka naposo doli doli partandang, agak bersaing do merek ni Sigaret. Akka na tinggal di huta, Union, Sehat, kansas jala paling tinggi Djoharmanik. Alai molo anak rantau, sigaretna Commodore, Ardath, Bentoel manang Menara Kudus. Sigaret menunjukkan status dompet. Jala hira adong do konvensi tak tertulis, molo ro tu lapo sasahali manggarar kopi ni akka natua-tua na nidapotna, jala dipaliat sigaretnaon.
 
Pangaranto Medan/ Lampung/ Palembang/ Jakarta umumna karejo di sektor ekonomi informal. Mulai sian agen repas terminal bus, tempel ban - oli bekas - bengkel motor, sahat tu na pemilik kios kelontongan di sekitar Sambu, Simpang Limun, Cililitan, Pulo Gadung.
Biasana molo mulak martaon baru diboan halakon do Dodol Garut, dohot roti Kong Ghuan. Tamba ni mikki-mikki tu dakdanak. Jarang do mamboan roti Monde. Dung salpu taon baru, dipamerkan do kaleng kosong Kong Ghuan on di ginjang ni lamari paboa na adong gellengna Pangaranto di kota. Hira pas mai gengsina tu na memamerkan Keramik China manang Swarosvky di zaman nuaeng.
 
Pangaranto sian Dairi Tano Karo, umumna keluarga muda do. Markobun kopi dohot cengkeh do disi. Ala lebih subur. Manombang marsiapapaga na lomak. 
Molo ro nasida martaon baru, tung ribur do. Di hadang do Tape Recorder manghuling gogo mardeper mulai sian harbangan. Akka endena ima koleksi ni Parisma 71, Teluk bayur ni Ernie Johan, Bina Ria ni Titiek Sandhora, lagu Opera manang acapela Mannen koor Ama Dua. Nunga hebat on antong. 
 
Ai biasana holan di onan do binege sahali saminggu maroang oang akka ende sambil mainondur siNapitupulu partiga-tiga ubat vitamin suplemen, Datu Manongon sijaha garis tangan, manang Datu Manik pardampol miak siburuk. 
Adong do nian radio transistor ni amanta Kampung/ Kepala Desa, alai jotjotan manjomur batere kering merek EveReady do sian na dipasang.
Dung pe di taon delapan puluhan perantau agak bervariasi. Termasuk mai pegawai, profesional, wiraswasta. Sikkola dohot Mahasiswa pe nunga bahat.
 
Tu gareja do tgl 31 borngin i sude. Jadi gok jala sipata ndang hasiatan bangku. Sai tandi do pahean ni anak pangaranto. Lebih bergaya, jala ujung ni sipatu kulitnai runcing jala melengkung otik. Adong muse arlojina.
Tradisi do di hitaan, jam 12 borngin dipalu giring-giring. Mansai tinggil doi marsialus-alusan. Adong dope giring giring i na asli didatangkan sian Jerman ninna. Kualitasna antong ok punya, nyaring berdenting, ai bosina kualitas metalurgi kelas dunia. Dikkan dolok dolok do umumna gareja, jadi tung marsilongin do soara ni giring giringi.
 
Mar acara do di ganup ruma tangga tonga borngini. Pasahathon hamauliateon tu Jahowa dipangiringonNa manipat na sataon bolon on, huhut manghirim dipasu pasu nang panogu noguonNa mandalani taon na imbaru. Bergiliran do mandok hata mulai sian dakdanak sahat tu natua-tua. Diakhiri mai marsipasesaan dosa songon parsalpu ni taon na buruk i, mangeahi taon na imbaruon. Marsijalangan ma jala ditutup dohot tangiang "Ale Amanami".
 
Dung salpui, ruar ma akka dakdanak, marrombongan martolu opat halak, markaliling sian jabu tu jabu di bagasan huta, marende " Selamat Taon Baru Mi-Re-Mi-Re-Do…. Dang di au kue.. alai hepeng do ". Las do roha ni natua tua nang akka dakdanak i antong. Ai selain dapotan kue, dilean do hepeng sipalas roha nasida. Antara saringgit sahat tu lima rupia.
 
Ihut ma muse di pudian nasida ro akka kelas Remaja - Naposo bulung. Ianggo on keliling antar huta ma. Dihunti do lampu gas/ stroom king. Marende di alaman do, nang pe diapoi momos asa nangkok tu bagas. Pada umumna berakhir ma na keliling on, si manogot. Nangkok ma tu jabu ni partangga timboi. Ai biasana tar adong do tes susu, seven up dohot kamput otik palaho angin malami dipatupa inanta parjabui. Strategi khas anak remaja muda. Praktis do rapar modom saborngin i, hape manogot ikkon tu gareja. Tuani do adong jagal bindai menambah stamina.
 
Dung mulak sian gareja, marsiebatan/ bersilaturahmi ma akka naposo nang natua tua. Sai adong do minuman beralkohol pinomat brandy, anggur Vigour manang kamput di ganup jabu. Ndang piga na menyiapkan bir. Alai ipe dihalashon doi. Gari ada tahe adong do sipata naposo manang natua-tua na hurang mangarajai pamanganna. Magodanghu na minumi,gabe olo mitong/ mabuk/ tenggen.
 
Di hari kedua, tong dope suasana taon baru. Umumna, laho ma hami tu huta ni Tulang. Sipata holan akka gellengna do disuru natua tuai. Mardomu mai ala ro do akka namboru annon tu huta. Diborhati do hami otik otik be kue, gula manang Susu kaleng tjap Nona boanon tu jabu ni Tulang on. Butongan do mangan di jabu ni Tulang. Adong jagal hoda, marsampur laksa. Diangkupi Tulang on do hami manghata hatai. Disungkuni akka prestasi nang sita-sita. Mulak siani, dilean Tulang on dope hepeng tu iba.
 
Adong do tong rombongan parmusik akka naposo na meramaikan keliling sian huta tu huta. Sederhana do orkes musik i. Dua gitarna (umumna putus tali onom ni na sada), biola, seruling, hesek, tam-tam dohot harmonika. Dua lagu do dimainkan. Alai molo dipangido salagu nari marpikkir do natua tua. Tar unghapal ma dijalangkon tu perwakilan napasahathon hata Selamat taon barui.
 
Godang do nilai na boi putik putihon sian tradisi tahunan na martaon barui. Pangoloion, disiplin, toleransi, komunalisme dohot kemandirian. Zaman nunga berubah. Setiap masa adong romantikana. Adong tantanganna. Anggiat ma nian, nilai substansi tradisii hot boi diwarisi akka generasi na umposo. Terutama mai tu angka naung tinggal di berbagai luat parserahan.Selamat Taon Baru. Jakarta, 1 Januari 2017.(Sampe L Purba, tulisan merupakan opini penulis).
  BeritaTerkait
  • Walikota Tanjungpinang Hadiri Pesta Bona Taon Marga Sibarani

    2 tahun lalu

    Tanjungpinang(Pelita Batak): Walikota Tanjungpinang H. Lis Darmansyah, SH, menghadiri Pesta Bona Taon Marga Sibarani Batak, di Gereja HKBP Kampung Baru, Sabtu 22 April 2017.   Walikota

  • PB AMCI Gelar Rakernas I Tahun 2017

    2 tahun lalu

    Medan (Pelita Batak) :Rapat Kerja Nasional (Rakernas) I 2017 yang pertama PB (Pengurus Besar) Aliansi Media Cyber Indonesia yang diselenggarakan di Kafe RF Coffe Jalan Sei Batang Hari Medan yang dihad

  • Spontanitas Bunga dan Lillin Penuh Makna Untuk Ahok

    2 tahun lalu

    Berawal  dengan karangan bunga yang penuh dengan cinta dan kasih, kemudian muncul gerakan seribu lilin untuk Ahok sebagai ungkapan yang penuh dengan cinta dan kasih atas apa yang dialami oleh

  • Bishop GKPI Resmikan Koordinasi Wilayah VII untuk Dukung Perayaan Natal Nasional di Doloksanggul

    3 tahun lalu

    Doloksanggul(Pelita Batak): Bishop GKPI (Gereja Kristen Protestan Indonesia) Pdt Oloan Pasaribu MTh meresmikan wilayah VII yang meliputi Humbang Hasundutan - Tobasa – Samosir, dan sekaligus m

  • Twitter sebagai Tempat Pertama Masyarakat Indonesia Berbagi Informasi dan Keseruan

    3 tahun lalu

    Jakarta(Pelita Batak): Tahun 2016 menjadi tahun di mana berbagai momen kebudayaan, olahraga, hiburan, politik, hingga gerakan kemanusiaan menjadi #RameDiTwitter. Dengan sifatnya yang live dan conve

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb