KSP Makmur Mandiri
Rabu, 07 Agustus 2019 19:23:00

Santabi Sangapmu

BAGIKAN:
Ist
Sampe Purba
Oleh: Sampe Purba

Adong do Amangborukku marga Sinambela. Mangihuthon pandok ni akka natua tua, adong dope hubungan kekeluargaan nasida dohot keluarga Sisingamangaraja. Boi do ra tutu on, nang pe so haru takkas huboto tarombo nasida. Alai na pasti, mangihuthon sada bukku jinaha, ditikki disosak parangan Bulanda Raja Sisingamangaraja XII sian Bakkara, di na laho mangungsi/ mengundurkan diri nasida tu huta Lintong Samosir huta ni Tulangna Keluarga Ompu Babiat Situmorang, huhut mangatur strategi peperangan, dohot do saring saring ni amana ima Singamangaraja XI diboan rombongan ni Raja i. Jolo dititiphon do saring saring i di huta ni dongan tubuna marga Sinambela di huta Janji Doloksanggul. 

Di desa Janji kecamatan Doloksanggul do halak Amangboru on tinggal. Nang pe naung karisten nasida, alai godang dope akka tradisi ni ugamo asli ni Batak i dipraktekhon nasida. Na apala takkas huingot i ma molo laho mangengge boni laho gabe same nasida. Sepanjang hari i, ndang meret mula ulaon nasida. Sai hira ari napinorbadiaan do arii. Marniet di bagasna be do nasida, marpahean na toman, marroha haunduhon dohot marpakkataion na pantun. Adong muse do na marpuasa, manguras, maranggir. 

Na jolo, somal do keluarga ni Amang boru on molo martaon baru mamboan jagal hoda tu jabu ni Ompung. Malo do amangboru on mangalompa jagal hoda. Adong do tehnik tertentu huroha, asa boi labe jagal hodai, ndang marbau alai tabo. Rendang alai marhua. Balga tanggo tanggona, songon i nang kantang kantangna. Sorbukna pe pakket. Di si do gandina di si do gandona. Di si do daina di si nang tabona, sirsir do sira na, rata nang asomna. Asa di bibir ma daina, di tolonan ma tabona. Pamurnas ma tu daging, saudara tu bohi, sipalomak imbulu, si paneang holi holi, si pasindak panaili, pasuang hosa loja. Rap ma antong hami mangan di si, dohot natua tuai. 

Sopan jala pantun do Amang boru on makkatai. Sugari tu ahu, nang pe dakdanak na marumur 5 taon dope nunga sai dijou Tulang. 

Nang per marsitaringot umum, godang do hata pantang na so jadi dohonon, manang molo ikkon dohonon nasida ikkon jumolo marsantabi, terutama molo makkatai. Ai akka horong Simatua, Tunggane dohot Inang baona ma antong akka natua tuai. 

Molo manaringoti anakna, tu natua tuai, tar songonon ma didok, "ia beremu si Jujur on, Tunggane, partobok tobok do". Ndang didok, ia Si Jujur nami on dst...Pantang bolon do secara umum mandok songoni di huta nami. Ndang masa i. Ndang maradat. Menyebut goarni seseorang, sai tu partuturan i do ikkon ditempatkan tu lawan bicara. Misalna, edamuna, borumuna, laemuna, beremuna, paramaanmu dan seterusna. Ndang masa dohonon mengenai isteri ... ia omak ni si Jujur... dst. 

Pantang do taringotan hal buang air besar, buang air kecil, manang bahkan "MODOM" di tikki marsitaringot tu akka hula-hula. Molo tarpaksa ikkon dohonon, diawali ma dohot hata ... "Santabi Sangapmu". Misalna, "Santabi sangapmuna Tunggane, na ro i lalo (gempa) nantoari pas do di tikki ibotomuna papodomhon berem si Jujur".

Songon i ma tongam ni hula-hula i, dohot pilihan kata/ diksi sipakkeon pe ikkon marmanat. Ai dihaporseai na tama do hormat tu sahala ni natua tua tarlumobi ma hula hula. Pasahat ma sangap tu na patut manjalosa, pasahat ma sohe tu na talup mamparsaulihonsa. Marsahala do hata.  "Manumpak ma tondimu, manuai sahalamu". Tu Inang bao pe sedapat mungkin ndang pola porlu manghatai, jala ndang masa erget manang rosu makkatai tu sumbang ni tuturna. 

Nunga marujung Amangboru i sekitar lobi sampulu taon na salpu. Alai sai huingot do hapantunon ni Amangboru on. Mangolu dope ianggo namboru i. Nasida nama natumua na mangolu ianggo tubu ni daompung. Tinodohonna ma Natua tuai. 

Nunga berbeda be zaman nuaeng. Atas nama mempermudah komunikasi, nunga godang WA group anggotana na saompu Suami Isteri. Tontu adong do akka sumbang ni partuturan di si, amang bao, haha doli dohot na asing. Alai olo do sipata erget, rosu jala songon na torbang pakkataion dohot akka gambar kiriman di WA i.

Na humebat dope, sipata, di zaman milenial nuaeng on, olo do rap manonton bioskop baik janjian manang daong, akka na marsubang ni tutur. Hape cerita ni pilim i rupanii akka pilim dewasa na sipata pogos marpahean jala jompok jompok marhosa do. Jangankan manonton pilim, manang rap margoyang maumere di ulaon pesta, sugari maridi bersama dengan pakaian minim pe nunga somal akka na marsumbang ni tutur. 

Ba ise boi siorai i. Misalna tinggal di sada kompleks dua keluarga muda na marlae, mariboto marinang bao. Hape rap mamboan jala mandongani dakdanak nasida di kolam renang. Rap marpahean renang, "Amang bao, abing hamu jolo Si Julet on da, ai naeng mambuat dot na ahu satokkin". Ninna, huhut dipasahat borunai, asa dijaga satokkin. 

Pola risau hita di si ?. Ai zaman nunga berubah. Ai akka postingan ni inangbaona pe di tepi pantai nunga sipata dikomentari par amangbaoon, binereng di medsos on. 
Na humebat dope, rap paimahon ma hita, judul ni situriak pe nunga adong na jaluk ianggo tu ukuran na jolo. Alai ndang pola boha i, ianggo nuaeng, untuk strategi marketing, eye catching dan lain lain. Diboto hamu do,  judul ni Cerita bersambung i, ima "Amang Bao Parsinuan" .

Santabi Sangapmu na dah 

Jakarta, Agustus 2019
  BeritaTerkait
  • Bahasa Batak Terancam Punah, GP3 Hadir di Toba Samosir Melestarikannya

    10 bulan lalu

    Tobasa (Pelita Batak): Santabi godang ma loloan nanihormatan, tangan do botohon, ujung nai ma jari jari, molo adong sidohonon jumolo iba marsantabi artinya dengan segala kerendahan hati panitia penye

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb