• Home
  • Opini
  • Pamingkirion tu Parsiranggutan di Ekklesiologi HKBP di Rapot Pandita HKBP Oktober 2017
KSP Makmur Mandiri
Selasa, 18 April 2017 09:38:00

Ekklesiologi Na songon dia do di HKBP Nuaeng on?

Pamingkirion tu Parsiranggutan di Ekklesiologi HKBP di Rapot Pandita HKBP Oktober 2017

Ginurithon ni Pdt Dr. Robinson Butarbutar
BAGIKAN:
Ist
Pdt Dr Robinson Butarbutar,
I. Pamuhai
Di Sinode Godang HKBP September 2016 na salpu, ruas ni sinode do ahu songon Plt. Direktur Sikkola Pandita. Disi tangkas do soara ni bahat parsinode asa diamandemen sistem pamilliton Uluan ni HKBP na adong di Aturan Paraturan 2002 Dung Amandemen Paduahon, naung dipangke mulai Januari 2016. Pingkiran i marbonsir siala ndang boi dope Aturan i mangatasi angka na so dihalomohon parsinode, andorang so sinode dohot uju di sinode, jala ndang boi dope dirohahon sinuaeng i tingki pelaksanaan ni pamilliton i. Ahu sandiri do manghatai di pleno sinode 'merumuskan' usulan haputusan na jinalo ni Ketua Persidangan jala na ditolopi parsinode, na mandok songon on: "Di Sinode Kerja 2018 dipangke ma tingki mangamendemen sistem pemilihan ni Uluan di HKBP. Laho paradehon i, diparade Komisi Teologi ma pingkiran taringot tu ekklesiologi ni HKBP sihataan dohot sitotophonon ni Rapot Pandita HKBP di taon 2017. Marojahan tu rumusan ekklesiologi ni HKBP tinotophon ni Rapot Pandita i ma diusulhon Komisi Aturan usul amandemen sistem pemilihan i tu sinode kerja 2018."
 
Songon parsidohotonniba tu proses perumusan ekklesiologi ni HKBP di rapot pandita HKBP lumambatna di bulan Oktober 2017, ginurithon angka pingkiran na mangihut on bahen pertimbangan di angka dongan na mangula di Komisi Teologi HKBP paradehon angka sihataon di rapot pandita distrik di taon on andorang so diparade nasida bahan komprehensif na ro sian rapot pandita distrik tu rapot pandita hatopan. Binahen ungkap pingkiranniba on tumibu asa boi angka dongan ruas dohot partohonan ni HKBP na so pandita laho mamingkirhon ekklesiologi ni HKBP sipangkeon laho mangaturhon boha jala songon dia ma HKBP mamillit angka uluanna na komprehensif, i ma na mamereng manang mampararate-atehon faktor-faktor sejarah, sosiologis, dohot anthropologis ni HKBP di sada ombas, alai di ombas na asing na unduk tu hata ni Debata tarlumobi na tarsurat di Padan na Imbaru, ai disi do dapot hita pangajarion ni Jesus Kristus dohot angka apostel na parjolo i taringot tu angka siihuthon Ibana 'mangatur parsaoran nasida' di tonga-tonga ni 'tondi parsaoran' na mangolu di tonga-tonga ni halak Jahudi nang di tonga-tonga ni kekaisaran Romawi uju i, i ma na mamangke sistim patron-klien na mansai hierarkhis dohot piramidal, asa marhite i nang HKBP dohot patupahon na pinatolhas ni Dr. Martin Luther taringot tu hinaringkot ni huria i unduk tu hata ni Debata sambing, sola scriptura,  tarlumobi di bulan Oktober 2017 on, i ma tingki 500 taon dung reformasi pinatupa ni Martin Luther di tonga-tonga ni huria Roma Katolik di abad pa-16-hon.
 
II. Ekklesiologi ni angka siihuthon Jesus di abad parjolo dung Kristus sahat tu jaman reformasi
 
1. Di huria na parjolo i, dung nangkok Jesus Kristus tu banua ginjang sahat tu ujung ni abad parjolo, tarlumobi di huria na parjolo situtu sahat tu 20 taon dung hananangkok ni Jesus Kristus tu banua ginjang, kharismatis do, ndang berstruktur hierarkhis angka huria-huria di kota-kota na di kekaisaran Romawi, ndang songon sistem patron-klien di sandok kekaisaran (i ma Kaisar do patron na tumimbo, di toruna ma klien-na, klien-na i gabe patron do tong tu klien na di toruna, songon i ma sahat tu na di toru situtu, angka hatoban), sistem tuan-hatoban, jala ndang songon sistim sanhedrin ni uluan bagas joro ni Debata na di Jerusalem i. Lapatanna, ndang diihuthon angka siihuthon Jesus i sistem dohot budaya na hierarkhis na masa di kekaisaran Romawi nang di ugamo ha-Jahudion uju i. Tung tangkas situtu do i, ndang ala na metmet dope torop ni punguan ni naporsea i uju i, alai ala na diingot nasida do pangajarion ni Jesus uju mangula dope Ibana di Palestina na so jadi masa di tonga-tonga ni angka siseanNa adong panghilalaan na tumimbo na sada sian na asing di tonga-tonga nasida. 
 
2. Adong do nian soko guru manang 'sitolu uluan sian angka apostel' na di Jerusalem, i ma apostel Petrus, Jakobus, Johannes (dung i Jakobus, Petrus dohot Johannes) alai ndang diida angka na porsea i, jala ndang diida na tolu i na marimbar hadirion nasida na tolu sian angka na porsea i. Ndang songon na di bagas joro i, adong malim na bolon, malim, Lewi dohot udutna, adong Sanhendrin. Songon na tangkas ni sinode na parjolo i di Jerusalem (Ulaon Apostel 15), ndang adong disi uluan, ndang adong na manghilala ibana na tumimbo, alai rap mambuat haputusan do nasida taringot tu songon dia ma na porsea i uju i, i ma na ro sian tonga-tonga ni Jahudi nang na so Jahudi, marhabadiaon di ngoluna, ingkon songon na niulahon ni halak Jahudi Kristen do manang ndang, tarlumobi ala di tonga-tonga ni halak Jahudi do tubu parjolo ha-Kristenon i, alai na hembang sahat tu na so Jahudi. Songon i do ngolu ni na porsea i uju jongjong dope bagas joro na di Jerusalem nang dung dipalengse Jenderal Titus bagas joro i: Ndang adong be malim, ai sasada Kristus do malim naung pasaehon dosa ni na porsea i sahali sambing.
 
3. Ndang adong hierarkhi, ai diingot nasida do togu hata ni Jesus na mambahen 'hadosan' manang kesetaraan di tonga-tonga ni angka sisean, jala na so jadi nasida bersikap mardingkan manang diskriminatif tu sama nasida songon na di portibi on. Ndang dioloi Jesus pangidoan ni siseanNa si Jakobus dohot Johannes asa duansa hundul di siamun nang di hambirang ni Jesus dung sahat Ibana tu harajaonNa i (Markus 10:37-42). Manghobasi do prinsipna, songon Kristus na ro tu portibi on laho manghobasi. Ndang songon angka pamarenta na di portibion (Markus 10: 42-45). Diorai do siseanNa mamereng diri nasida songon rabbi maradophon na asing, rap sisean do nasida (Mateus 23:8) ai di ha-Jahudion uju i, satirket do tumoru rabbi sian Debata di simalolong ni angka siseanna.
 
4. Apostel Paulus pe bahat do manurathon tu huria-huria i taringot tu hinaringkot ni na masiargaan, rap pasangaphon, saling menghargai. Tu angka naung tardidi tu bagasan Kristus (Roma 6:3-4), tu angka na mangolu ndang be gabe hatoban ni dosa (Roma 6:12-14), ndang be niuluhon ni patik (Roma 7) alai niuluhon ni Tondi Porbadia (Roma 8:6-11), dipangido do angka ruas ni huria di ate-ate ni Kekaisaran, i ma kota Roma, asa ndang mangolu sarombang dohot portibi on angka na porsea, na marsaor dohot marragam bangso disi, na mangolu saurdot to tondi ni kekaisaran Romawi, alai asa gabe imbaru dung muba pingkiran nasida (jaha 'muba': metamorphousthe, Roma 12:2). Sada sian rumang ni hamubaon ni pingkiran i, i ma songon dia nasida marnida angka dongan sahaporseaon, ndang mangarajumi diri nasida torbang lobi sian na patut (Roma 8:3), ganup marguru tu sileonlehon, sadaging, torop ruas (Roma 12:3-8, 1 Kor 12:4-11, 12-26). Adong do nian angka uluan lokal sinosoan ni si Paulus laho manorushon ulaon misi dohot parsaoran nang holong di kota i, i ma angka natuatua, angka na manjabui parpunguan nasida songon ekklesia, angka patron disi, alai ndang songon hubungan patron-klien na di kekaisaran Romawi, hierakhis, pyramidal hadirion nasida, hot do songon dongan angka na badia, saudara sesama orang kudus. Ala ni i do umbahen na dipinsang ibana ruas ni huria di Korint na mambahen marbolat-bolat nang uju mangan (1 Kor 11:18-22).
 
Dipatangkas ibana do i tu si Philemon marhite suratna na jinaha ni punguan, ekklesia ni naporsea i, asa diida ibana si Onesimus hatoban naung manadingkon ibana alai gabe porsea dibahen apostel Paulus di bagasan pamerengon na imbaru, i ma ndang be songon hatoban (Gorik: doulos), alai songon dongan hinaholongan (Gorik: adelphon agapeton, Indonesia: Saudara kekasih) ndang holan di bagasan pardagingon (Gorik: en sarki) alai dohot do di bagasan Tuhan i (Pilemon 16).   
 
5. Jonok tu ujung ni abad parjolo pe, hamalimon na raja do na diondolhon. Ai gari uju so malengse bagas joro na di Jerusalem di taon 70 nunga ndang adong be malim di nasida, ba lam ma dung i, dung malengse angka sistem hamalimon na di bagas joro i, ai holan sasada Kristus do malim bolon na mamelehon diriNa sahali ro di salelengna (Ida surat Heber). Di tonga-tonga ni ha-Jahudion pe dung malengse bagas joro jala digantihon ugamo Jahudi na marojahan tu pangajarion ni angka rabbi, i ma na ginoaran ni angka pande bisuk, Judaisme Rabbinis, ndang adong be malim di sinagoge.
 
6. Molo adong pe apostel, panurirang, guru, sibahen halongangan, sipamalum sahit, pangurupi, administrator, parhata sileban (par-glossolalia), diakonos (1 Kor 12:27-28, Ul 6:1-7) ndang hierarkhis i. "Angka dongan na badia do, angka ruas pamatang ni Kristus na sada i."
 
7. Dung mulai mamungka abad paduahon, ala marroan angka poda na lipe, na so saurdot tu angka pangajarion ni angka apostel, mulai ma diharingkothon adong angka simatamatai, episkopos. I pe ndang hierarkhis hubungan nasida dohot na nimatamataan nasida. Ndang songon simatamatai ni Romawi. Tu angka huria na di parserahan (Pontus, Galatia, Kappadosia, Asia dohot Bitinia) didok panurat ni 1 Petrus do tu angka sintua disi songon dongan nasida, 'rap dongan' sintua (Gorik: synpresbuteros, adong 'hadosan nasida' (1 Pet 5:1), sai diingot ibana do ajaran ni Jesus di na marmahani nasida (5:1-3). Ndang ala na otik torop nasida uju i, alai ala na diingot nasida do ajar ni Jesus, asa masihaholongan sama nasida marhite na so mamereng angka ruas i tumoru sian nasida, alai dos songon ruas pamatang ni Kristus.
 
8. Di abad paduahon sahat tu paopathon songon i do tondina, adong episkopos, muse gabe bishop holan laho mengawasi, manghobasi do, marmahani, ndang manguluhon mangihuthon ruhut ni portibi Romawi, secara duniawi.
 
9. Dung gabe ugamo na diongku kekaisaran jala dung i gabe ugamo negara punguan nasida, gabe diihuthon ma nanget-nanget sistem kekaisaran, sistem ni angka ugamo Romawi, jala mulak ma muse nanget-nanget songon na di padan na robi i dohot andorang so halelengse ni bagas joro na di Jerusalem andorang so taon 70, adong malim bolon, paus, kardinal, bishop, malim, adong na di toruna, jala mansai hierarkhis. Ruas ndang marhak. Holan angka malim ma (Jaha: kaum klerikal ) ma na berperan. Di sakramen ulaon na badia pe ndang dohot ruas parjambar di anggur, holan malim ma. Mardalan ma na songon i sahat tu abad pasampulu onomhon, partingkian reformasi.
 
10. I do na direformasi Martin Luther parjolo, dung i dohot angka sipaimbaru huria na asing, i ma na gabe malim muse jolma i, hape holan Kristus do malim na sasada i. Gantina, mulak ma si Martin Luther tu Bibel i, dienet ma muse sian 1 Petrus 2:9 i, i ma angka malim na raja sude jala ganup na porsea i ala ni Kristus, ndang adong be paus, ndang adong be malim. Angka pangula ni huria pe, termasuk pandita, ndang songon malim ni Huria Katolik Roma be, atik pe dipasahat huria tu nasida ulaon tohonan na so diula ruas na asing. Andorang so dipasahat i tu nasida jolo marsiajar nasida asa gabe pandita. Dung dipasahat tu nasida tohonan publik na khusus i (sakramen dohot mamaritahon hata i nang marmahani) marhite huria i, mangula do nasida atas goar ni/di inganan ni  (HKBP: singkat ni, partonaan ni) Kristus. Holan di na mangulahon ulaon publik na khusus i do nasida songon i. Alai ndang marlapatan i tumoru hamalimon na raja ni na porsea na asing sian tohonan nasida.  Ndang marasing hamalimon nasida, ndang marimbar 'nilai'-na sian hamalimon ni ganup na porsea, songon na di huria Katolik Roma, fungsina do marimbar. Ulaon na dipasahat huria i tu nasida do na marasing, i ma mamaritahon hata i, manghobasi sakramen, marmahani. Alai ndang hierarkhis parsaoran nasida dohot angka ruas na asing. Tu nasida dipasahat ulaon panjouon. Ndang diida tumimbo panjouon (vocatio) di gareja sian panjouon di ulaon di duru ni gareja. Sude do sitindangi ni Kristus. Sude manghobasi. Manghobasi do tondi ni ulaon ni huria nang di duru ni huria, mangihuthon ajar ni Jesus na di Markus 10:42-45 i. Parsagian ni ulaon panghobasion do impolana, ndang parasingasingan ni hadirion (jaha: status) parasingasingon ni ulaon do.
 
11. Ala ni i di huria-huria reformasi na mangihuthon ajar ni si Luther na parjolo i, parsidohot do ruas, sintua, nang angka parhalado gok tingki di pardalanan ni huria: rap manghobasi, alai marasing-asing ulaon na dipasahat huria i tu nasida, i pe ingkon mangihuthon tondi 'hadosan ni' angka na porsea i, angka malim na raja.
Ekklesiologi na diharingkothon i ma na 'marnida tolunsa dos,' setara, alai marasing be ulaon na dipasahat huria i tu nasida', di tonga-tonga ni huria nang di portibi on.
 
III. Marsiajar sian Padan na Imbaru dohot huria reformasi tu parsirangguton ni ekklesiologi ni HKBP 2017
 
12. Tudos do songon na di butir 10-11 i tu jaman na lam mamparsidohothon sude, na flat, na dos di partingkianta nuaeng. Molo tung adong pe uluan na pinillit ni rapot dohot na tinurgashon ni uluan naung dipillit, ingkon na boi koreksion do nasida, ala sejajar, alai tutu holan tu nasida do dilehon ulaon manguluhon i; uluan na manjalo masukan sian na asing, parhalado na gok tingki manang parhalado na so gok tingki, songon i nang ruas; rap mamutushon, ndang na manghilala holan na piningkiranna na sintong, na ingkon saut, na ingkon masa; ndang Kristus nasida, na sinuru ni Kristus do nasida mangulahon ulaon na niula ni Kristus; ndang eks cathedra haputusan nasida, na so boi sala, songon naung pinutushon ni huria Roma Katolik lohot di diri ni Paus.
 
13. Di na manontuhon 'ajaran, panindangion haporseaon, liturgi dohot RPP', ruas do uluan i di rapot ni angka pandita. Di rapot ni angka pandita pe, ingkon dohot do 'pertimbanghonon' ni komisi teologi ni HKBP nang angka pandita di angka rapot-rapot nasida 'pingkiran, masukan, perspektif, sisi pandang, parungkilon, panggulmiton' ni angka parhalado na asing songon i nang pamingkirion ni ruas na marhangoluan na marragam, termasuk sian houm masyarakat ter- (terpinggir, tertinggal, dna), dohot nang angka houm na asing hatauonna, difable, na mangolu dohot HIV-AIDS, na mangolu di tonga-tonga ni marragam masyarakat, termasuk di tonga-tonga ni parugamo Silom dohot parugamo na asing, nang na Ateis, dna.
 
14. I do na niajarhon ni parbarita na uli na mamboan tolu tradisi tu ngolu ni HKBP sian hatutubuna, i ma tradisi Lutheran, Presbyterian, Unitarian. Pajumpang ma i dohot budaya Batak na mandok sude do anak dohot boru ni raja, sude do marjambar hata.
 
15. Ala ni i do, ia ekklesiologi ni HKBP taringot tu pandita dohot angka donganna, sintua dohot ruas, mulai sian jaman misi sahat tu SG 2014, i ma ekklesiologi na patuduhon parsidohotan, partisipasi ni pandita dohot angka donganna partohonan na gok tingki, songon i nang Sintua dohot ruas. Sipata tumorop pandita, sipata tumorop sintua, sipata dohot ruas, sipata ndang apala torop ruas na dohot, asing ni di rapot huria, isara uju adong Parhalado Pusat di HKBP.
 
16. Di tonga-tonga ni pandita dohot angka donganna partohonan na so pandita pe hata na dipangke "dongan ni pandita" do, ndang atasanna. Songon i do nang pandita dohot sintua, 'dongan ni pandita' do nasida. Pasahathon pasupasu pe boi do sintua. Holan i, imbarna sian pandita, dohot do ibana dipasupasu. Pandidion na hinipu pe boi do sintua patupahonsa molo berhalangan pandita, atik pe holan tu pandita do dipasahat huria i patupahon ulaon sakramen. 
 
17. Songon i do nang angka pandita, 'dongan satohonan' do nasida. Jabatan uluan huria, pandita resort, praeses, ephorus periodik do i, ndang lohot di nasida. Di AP-nta 2002 dung Amandemen Paduahon (2016-2026) nuaeng nunga diatur na berperan do sude: Pandita, Guru, Diakones, Bibelvrow dohot Sintua songon Ruas di rapot-rapot mambuat haputusan. Alai partoropna marasing-asing dope. Toropan Pandita sahat tu Sintua dope. Ndang apala mamingkirhon parsidohotan aktif ni angka pangula dongan ni pandita i, i ma guru huria, diakones, dohot bibelvrow, songon i nang ruas i di tirket sinode, songon i di na mambuat haputusan di tirket huria (rapot ni partohonan) nang di pusat, nda holan di posisi angka komisi teologi, pengembangan SDM dohot na asing, i ma na mangalehon saran tu uluan. Di na mambuat haputusan jotjot do 'partorop ni sibahen haputusan' manontuhon. Ndang reformatoris dope na songon i, ndang marnida partohonan na gok tingki asing sian pandita songon 'dongan ni pandita' dope na songon i. Mambahen hierarki na boi mambahen menek roha ni na asing, manang mambahen tumimbo panghilalaan ni sada marnida na asing. Ndang mangondolhon hinados ni na porsea i dope na songon i.
 
18. Ala ni i, molo tung pe ringkot hataraturon asa tangkas ise mangulahon aha jala songon dia di perencanaan, pelaksanaan dohot pertanggung jawabanna, dohot udut ni ulaon, ingkon tondi ni na diajarhon Jesus tu angka siseanNa jala pinatuduhon ni angka huria padan na imbaru i do na ingkon mampartondii, i ma hinados ni, kesetaraan, saudara, dongan, sesama orang percaya, malim na raja, rap sitindangi ni Kristus di parsaoran nang ulaon holong. Molo tung adong pe parjumpangan dohot budaya Batak na tradisional dohot na modern, na denggan na disi ni ma dijangkon, unang ma na maralo tu pangajarion ni Jesus i, unang ma gabe sialo pangajarionNa ekklesiologinta.
 
IV. Panimpuli
 
19. Beha ma rumang ni parsaoran, ekklesiologi na mangondolhon sada do pamatang ni Kristus i, marragam ruasna nang ulaon nasida? Beha ma rumang ni ekklesiologi na maniop togu 'hadosan', kesamarataan boi tarida di ngolu nang struktur ulaon ni HKBP mansai ringkot parsiranguthonononta, tarlumobi di jaman digital elektronis, na boi menghubungkan jolma so ingkon pajumpang bohi secara fisik. 
 
20. Molo boi ekklesiologi na songon i tarumushon ummura ma dungdungonta visi ni HKBP tu 50 taon na ro, "Gabe pasupasu tu portibi on" ai nunga tapatuduhon tu portibi on ia HKBP unduk tu ajar ni Kristus di na mangatur dirina, mangatur parsoranna, i ma sude parsidohot, dos do nasida, ndang hierarkhis parsaoran nasida sama nasida. Dipabangkit sian tonga-tonga ni ruas do angka partohonan laho patauhon ruas ni pamatang ni Kristus di ulaon panghobasion, i ma 'pauliulihon pamatang ni Kristus i asa lam magodang mangihuthon hagogok ni Kristus', unang baliksa gabe dipalindaklindak ragam poda dohot pangaliluhonon ni sipaotooto' (Ep 4:11-16). Ingkon lam tangkas ekklesiologi ni HKBP na lam manuju tu hagogok ni Kristus do huria i, ndang baliksa, marhadirion dohot mangatur dirina maralo tu na hinalomohon ni Kristus i. Ekklesiologi na tangkas mandok ulaon ni partohonan patauhon ruas magodang asa tau manindangi mansai ringkot situtu mandungdung visi ni HKBP. (Pematangsiantar, 18 April 2017, Pdt Dr Robinson Butarbutar, Dosen Padan Naimbaru STT HKBP, Ketua Pusat Studi Biblika STT-HKBP, Ketua Lembaga Penjamin Mutu STT-HKBP, 0812-62472015; Email: [email protected])

 

  BeritaTerkait
  • Menyambut Seminar Ekklesiologi HKBP - Komisi Teologi HKBP Menuju Sebuah Gereja Pendeta?

    tahun lalu

    Tulisan ini ditujukan kepada Komisi Teologi HKBP yang sedang menggelar Seminar Ekklesiologi HKBP di tiga kota sesuai dengan informasi Ephorus HKBP Pdt.Dr.Darwin Lmbantobing pada  kata sambutan

  • Sumbangsih Pemikiran untuk Diskusi Tentang Ekklesiologi HKBP

    tahun lalu

    1. Longang jala mansai longang situtu roha, boasa gabe adong laho PATIMBOHON SETINGGI LANGIT TOHONAN HAPANDITAON. SEDANG TOHONAN PANDITA ndang adong ditaringoti di PB, nanggo apala 1 pe, sian mulai

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    11 bulan lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Pdt Dr JR Hutauruk Luncurkan Buku di Ulang Tahunnya ke 81 di HKBP Ampera Medan

    10 bulan lalu

    Laporan Pdt Dr Robinson ButarbutarMedan(Pelita Batak): "Ula jala surathon: Barita Jujur Taon Pandita Batak (1891-1959)" = Kerjakan dan tuliskan: Berita Tahunan Pendeta Batak, demikian judul buku yg pa

  • Ephorus HKBP Pdt Dr Darwin Lumbantobing Bina Pelayan HKBP Se-Ressort Kramat Jati

    tahun lalu

      Laporan: Pdt Alter Pernando Siahaan    Ephorus Pdt Dr Darwin Lumbantobing : "Tindakan dan praktek mengikutsertakan anak dalam proses pendidikan adalah suatu u

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet