• Home
  • Opini
  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum
Minggu, 05 November 2017 14:51:00

Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

BAGIKAN:
Ist
Pdt Dr Robinson Butarbutar
Oleh: Pdt Dr Robinson Butarbutar, Ketua Rapat Pendeta HKBP

Mansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria tarlumobi saminggu dung dipestahon angka huria protestan di sandok portibion, nang di tongatonganta, 500 taon reformasi pinatupa ni Dr. Martin Luther di abad pasampuluonomhon di tonga-tonga ni Huria ni Kristus di tingkina, na gurasana taida, tahilala dohot tahatidangkaon sahat tu tingki on. Boasa? Atik pe angka halak Kristen na reformis do ganup partohonan dohot ruas ni HKBP alai sotung adong manang bahat dope hita na so reformis di ngolunta nang ulaonta. Bahat situtu do sipaimbaruon ni angka na porsea i di ngolu ni masyarakat dohot di tonga-tonga ni huria ni Kristus i di tingkinta nuaeng. Dohot do hita  dipangke Debata laho paimbaruhon portibion, manjouhon tu donganta jolma asa olo pasombu Debata paturehon ngolunta, ngoluna, ngolu nasida.

Molo tasulingkiti bagas sian simalolong partondion, ampit do topik ni minggu sadarion na pinapillithon ni uluan ni hurianta gabe jamita di tonga-tonganta mangondolhon isi panurirangion ni Mika 3: 5-12 on, i ma: Pasombu Jahowa Paturehon Ngolum. Boasa? 

Na tinuju ni hata 'ngolum' ndang holan ngolunta marsasahoum, marsasabangso, ndang holan ngolu ni hajolmaon marsada-sada, ndang holan ngolu ni nasa hasiangan on dohot angka na di bagasanna, alai dohot do ngolu ni huriaNa na hinaholonganNa i, na pinajongjongNa i, dipatureture Debata sian parjadina sahat tu tingki on. Sian parjongjong ni huria ni Kristus di portibion, sai dipasirisasari Debata do ngolu ni huria i di sandok partingkian dohot di sandok inganan na marragam i.  Disarihon Debata do ngolu ni huriaNa, HKBP marsasapunguan di angka huria, resort dohot distrik, alai dohot do ruas ni huria marsadasada,   
Na hinangkam ni hata paturehon, tung bagas do, i ma padengganhon na so denggan, paaturhon na so atur, pasintongkon na sala, paimbaruhon naung buruk.

Hata pasombu-hon Debata i mansai ringkot do ondolhononta di partondion tarlumobi di partingkianta nuaeng naung sahat tu sada ngolu partondion na naung mangasahon dirinta sandiri mangadopi tantangan ni ngolunta. Tasura dohot tapingkir naung tarbahen hita jolma patureturehon dirinta. Tasura naung tarbahen hita sandiri patureturehon ngolu parhuriaonta. Ndang taloas manang tapasombu Debata paturehon ngolunta, ngolu ni huria i, ngolu ni bangsonta, ngolu ni portibion.

Patureturehon ngolu ni bangsoNa na hinaholonganNa na naung madabu tu bagasan dosa na pinatupa ni Debata Jahowa ni Israel di partingkian ni si panurirang Mika do ia sangkap ni Debata andorang so tarbuang nasida di na dijou ibana panurirang Mika pasahathon hataNa tu nasida. Ai nunga sahat parngoluan ni bangso i tu sada partingkian na maralo tu lomo ni roha ni Debata. Dia ma i? I ma nunga dipatupa nasida hajahaton maradophon rakyat na pogos tarlumobi na mangolu di angka huta, holan laho membangun, pamorahon angka parhuaso na di pusat-pusat perkotaan, tarlumobi di Jerusalem.  Jala na jumorbut i ma, angka tokoh partondion ni bangso i na diarop Debata pajongjong hatigoran nunga di tonga-tonga ni bangso i nunga gabe dohot sarombang dohot angka uluan politis. Angka partohonan partondion ni bangso i, na ingkon patuduhon tiruan di jolo ni angka raja, pengusaha, partani, pardengke, dna di pangulahonon ni lomo ni roha ni Debata, nunga meret sian ulaon nasida.  

Adong tolu tokoh partondion di parugamoon dohot di pengadilan ni bangso i na diida Debata  manimbil sian ulaon nasida, i ma parjolo angka uluan di pengadilan na manguhum parjahat dohot mangondihon/ patigorhon na bonar; paduahon angka malim di bagas joro na manghobasi pangajarion taringot tu lomo ni roha ni Debata, panombaon dohot pamelean tu Debata dohot pasahat tangiang pangondianon tu jolo ni Debata, dohot na patoluhon angka panurirang na manoarahon soara ni Debata na paingothon, maminsang dohot manjouhon hamubaon. Tolunsa partohonan i nunga sarombong dohot angka raja nang pengusaha na naung mamoro angka na metmet laho membangun kota. 

Molo dipasombu Debata nasida songon i humatop ma maup bangso i. Ingkon patureonNa do i. Ingkon tongosonNa do panurirang Mika. Apala tohonan partondion dohot moral na tolu i do na dikritisi panurirang Mika di ayat 5-8 dohot di ayat 9-12, laho maminsang nasida, i ma pabotohon na marbiasbias di uhum dohot papeol nasa hatigoran (ayat 9), na paulihon kota Jerusalem marhite mudar ni na pogos, marhite hageduhon, asa muba. Gariada migor dipabotohon panurirang i do panghorhon ni hasalaan ni angka partohonan na tolu i, i ma uhum na pasti tu kota Jerusalem na dibangun dohot mudar i (ayat 12), i ma Sion/Jerusalem/Dolok Ojahan ni bagas joro ni Debata i: Gabe hauma tur, timbunan batu, gabe tombak. Tolunsa partohonan i (panurirang, malim dohot panguhum) mangasahon goar ni Debata:

Naparjolo, maminsang panurirang. Dia ma na pinatupa ni panurirang naung dibondut tondi ni jaman i? I ma: Mangaliluhon bangsoNa  marhite na maningtinghon dame ala nunga dilehon sipanganon sihilhilon nasida (ayat 5). Dijalo nasida perak sian angka raja dohot namora asa ndang be maminsang na sala nasida, alai baliksa mandok di bagasan Jahowa ndang pola adong panghorhon ni pemerasan maradophon napogos i di masa depan ni bangso i: "Nda Jahowa do di tongatonganta? Ndang tagamon ro hamagoan tu hita" (ayat 11).

Panghonghonna ndang tarbahen angka panurirang i be marnida pangungkapon sian Debata di borngin nang arianna i. Lapatanna nunga agoan panjouon hapanurirangon be nasida. Ndang tarbahen nasida be manurirangi denggan, ai so manghatai be Debata dohot nasida, ndang tarbahen nasida be manghatahon hata panurirangon (ayat 6-7), marasing sian panurirang Mika na digohi hagogon (Heber: koakh), Tondi (Heber: ruakh),  panguhumion (Heber: misyfat), dohot hatogaon (Heber: gebura) ni Jahowa (ayat 8). Ndang panurirangion na tutu be panurirangion nasida. Nunga disegai nasida tohonan panurirangion i.

Napaduahon, maminsang angka malim, na mangajari bangso i taringot tu lomo ni roha ni Debata marhite na manjalo perak (ayat 11).

Napatoluhon, maminsang angka uluan, na manjalo sisip (Heber: syekad) di na mandabu uhum, na so jadi patupaon ni panguhum (ayat 11).

Taboto do na di sejarah ni bangso i ndang dipasombu nasida Debata patureturehon nasida. Baliksa dialo do. Ndang muba nasida. Panghorhonna tarbuang do nasida.
Siala ni i, mansai ringkot do di minggunta sadarion bahenon ni angka partogi ni huria ni Kristus di portibion, ndang marimbar di tongatonga ni  HKBP-partohonan di tonga-tonga ni huria nang di duru ni huria, asa pasombuhon dirina paturetureon ni Debata marhite na mangihut on:

Angka partogi di tonga-tonga ni huria i, sian partohonan gok tingki, na manghamham ulaon ni Kristus dohot sude angka dongan nasida partohonan na asing, sahat tu angka parhalado partohonan na so gok tingki na asing, nang parhalado na so partohonan, ingkon do manimbang-nimbangi di ari on dohot di ari-ari na ro manang na hot dope nasida mangulahon tohonan nasida, manang nunga gabe songon partohonan panurirang nang malim ni bangso Israel di partingkian ni si Mika nasida nuaeng on: Mangulahon tohonanna mangasahon goar ni Debata, alai impolana nunga mangaliluhon ruas ni huria i, nunga berorientasi  tu hepeng, materi? Molo na paduahon i do, ingkon muba be do hita. Molo ndang muba hita, mampanghorhon na so denggan do  i tu hurianta secara menyeluruh.

Angka ruas ni hurianta na mangula di duru ni huria, i ma angka naposo ni Debata disi, tarlumobi angka sialo hajahaton dohot sipajongjong hatigoran (angka sibahen uhum, i ma DPR/DPRD, angka sipajongjong uhum, i ma angka polisi na marragam ulaonna i sahat tu polisi kehutanan, dohot angka jaksa nang hakim sian tirket na tumoru sahat tu na tumimbo): Beha do nasida mangula saleleng on manghobasi rakyat Indonesia? 

Bebas do sian sisip, korupsi? Molo i do, tapuji ma Debata.
Manjalo sisip do papeol uhum di tonga-tonga ni bangsonta? Suraon do na parsidohot do angka hita na mangula disi mambahen sahit ni bangsonta Indonesia na so tarpamalum hita, i ma korupsi i? Molo on do, ingkon manolsoli ma, jala muba, unang sanga Debata sandiri ro manguhum hamu, atik pe malua dope hamu sian uhum.
Marhite na muba do tapaloas Debata patureturehon ngolunta, asa unang gabe marjea masyarakat, negara nang huria i. (*)
  BeritaTerkait
  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    7 bulan lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    7 bulan lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    7 bulan lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"

    5 bulan lalu

    Oleh: Pdt Dr. Robinson Butarbutar, Parsameanta, STT-HKBP1.Panghataion ni Jesus dohot siseanna sandiri dung sidung mangula di bagas joro na di Jerusalem i do turpukta on (24: 1, 3), i maudut ni panurir

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    8 bulan lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet