• Home
  • Opini
  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."
Sabtu, 07 Oktober 2017 19:00:00

Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar, Dosen STT-HKBP, 081262472015.


1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbuehon parbue na denggan, gabe diuhum Debata, i ma panurirang Jesaya (5: 1-7), panurirang Hosea (10: 1-2), panurirang Jeremia  (2: 21) dohot panurirang Hesekiel (15: 1-5, 17: 1-21). Sada nari na manaringoti bangso i songon hau anggur ni Debata, i ma parPsalmen na manggukkon di tangiangna, mangido asa diasii Debata bangso i di angka pangalaosion nasida na songon hau anggur ni Debata na so marparbue (Psalmen 88: 8-18). 

2. Alai sian opatsa, angka hata ni Debata marhite panurirang Jesaya i do na apala tung jojor paandarhon na denggan na binahen ni Debata songon tukang anggur i tu hau anggur i, asa boi nian marparbuehon parbue na denggan (ayat 1-4a), alai ala marparbuehon parbue na asom do, ndang na tonggi nasida (ayat 2 dohot 4a) gabe tung muruk situtu do Debata maradophon bangso i (ayat 4b-6). Songon tukang anggur na malo mambuat prakarsa manuan bona ni anggur di sada ingangan na ampit (di punsu ni sada dolok), ringgas patupahon sipatupaon anggiat denggan magodang hau anggur i (dipangkuri, dijomputi angka batu sian i, disuanhon lopok na denga tusi, dipauli tungkup tu tongatongana), jala dihali sada pangilangan di bagasan paimaimahon parbue na denggan, dohot na mamangke nasa gogoNa patureturehon hau anggur i, nunga dipatupa Debata tu bangso i angka ulaonNa gok halongangan sian na robi sahat tu tingki ni raja Usia.  Alai ala so marparbue na tonggi, gabe disangkapi Debata ma mangumpat handang dohot lohaonna parikna asa digagat dohot diluntak binatang, gabe halongangan ala ndang dirantingi manang dipangkuri be, gabe tubuan suga dohot sihupi, laos ndang diparo Debata be udan tusi. 

3. Diarop Ibana nunga ingkon gabe sada bangso na mangolu di bagasan uhum (Heber: misyfat) dohot hatigoran (Heber: tsedaqah) nasida, alai sabalikna do na naung dipamasa dohot dipatupa nasida, i ma: anggukangguk (Heber: tseaqah), i ma angguk-angguk sian angka na manaon ulaon  na maralo tu uhum dohot hatigoran/keadilan  (I do lapatan ni tseaqah na dipangke 21 hali di Padan Narobi (1 Musa 18: 21, 19: 13, 27: 34, 2 Musa 3:7, 9; 11:6; 12:30, 22:23, 1 Sam 4: 114, 9: 16, Neh 5: 1, Job 27: 9, 34: 28, Psalmen 9: 12, Jer 25: 36, 48: 3, 48:3, 5, Jer 49: 21, Sep 1: 10). 

4. PanghorhonNa gabe ndang dijaga Debata be tano nasida sian angka bangso di humaliang nasida. Gabe tarulang ma muse tano Judea dung ditaluhon bangso Babel bangso i di taon 597 dohot 587 andorang so Kristus, i ma 186 taon hurang lobi andorang so panurirangion ni panurirang Jesaya on di partingkian ni raja Usia (783-742). Dipabotohon penilaian ni Debata taringot tu bangso Juda na manjalo na denggan sian Debata alai ndang tonggi parbuena, gariada dipatupa nasida na jat di jolo ni Debata, i ma marhite ulaon na maralo tu uhum dohot hatigoran. 

5. Di Padan Naimbaru, didok Jesus do tu angka siseanna di panghataion parsiranganna sian nasida na Ibana do hau anggur i, nasida angka rantingna. Molo ndang mian nasida di bagasan Ibana marhite na mangulahon patik holong sama nasida, bolongkononna ma nasida. Ndang marparbue nasida (Johannes 15: 1-8).

6. Boasa ma isi ni panurirangion ni Jesaya na mansai posi on, na paandarhon kegagalan ni bangso Juda na so marparbue na tonggi i dohot sangkap ni Debata Zebaot manguhum nasida - i ma Debata na di sejarah ni bangso i marporang manghophop nasida maradophon angka musu nasida - dienet gabe jamita sian langgatan parjamitaon di HKBP di minggu XVII Dung Trinitatis, songon udut ni jamita di minggu na salpu taringot tu hinaringkot ni ndang holan umboto dohot mananda, alai dohot do mangulahon lomo ni roha ni Debata? Boasa i gabe jamita di tonga-tonga ni sandok HKBP di sandok portibion di ganup inganan apala sadarion, sadari dung taingot dohot tahalashon  156 taon hajojongjong ni HKBP di  tanggal 7 Oktober 2017? 

7. Suraon do asa tabuat tingki songon ruas nang parhobas di tonga-tonga ni HKBP manaili tu pudi asa tatimbang-timbangi sian perspektif ni Debata taringot tu na dua on: 

a.Beha do pambahenan ni Debata tu hita halak Kristen Batak saleleng haadongannta songon huria na naung manjunjung baringinna songon i nang songon sahalak Kristen Batak naung tardidi tu bagasan goar ni Debata Sitolu Sada i gabe ruas ni Harajaon ni Debata?

(i)Nunga boi dohononta na naung dipatupa Debata tu ngolunta songon na pinatupaNa tu bangso Juda andorang so partingkian ni panurirang Jesaya, mamungka sian na bungkas nasida sian parhatobanon Misir, masuk tu tano Kanaan dung pardalanan na ganjang, andorang dohot dung diuluhon angka raja nasida? 

(ii)Nunga boi dohononta na nunga godang tutu dibahen Debata tu hita marsasahalak dohot marsahuria di sandok portibion di ngolunta marsada-sada dohot di ulaonta mangulahon ulaon ni huria i marsada-sada?

b.Beha do parbuenta saleleng on: Parbue na tonggi do manang parbue na asom, di tonga-tonga ni golunta, jabunta, humaliangta, ulaonta na marragam i? Molo parbue na tonggi do, angka dia ma i? Taulahon do na denggan songon parbue ni na naung diasii Debata hita? Molo parbue na asom do, angka dia ma i, jala dia sibonsirina? 

(i)Nunga tapatupa ulaon na saurdot tu uhum, misyfat dohot tu hatigoran, tsedaqah di bagasta be, di ulaonta, di parsaoranta, di negaranta on, atik pe siala ni i boi ngolunta gabe mangadopi na maol? 
-Angka dia ma i? 

(ii)Nunga tapajongjong uhum dohot hatigoran maradophon angka donganta jolma nang maradophon angka na tinompa asing sian jolma?

(iii)Manang baliksa do naung sai jotjot taula: Patupahon na so uhum, na maralo tu hatigoran, panghorhonna gabe bahat halak di jabunta, di humaliangta, di ulaonta na marragam i na gabe mangandungi tu jolo ni Debata, ganup ari so mar na so manoarahon tseaqah, anggukangguk tu jolo ni Debata? 

-Mangangguhi do angka ianakkonta di jabu ala ndang tagohi uhum na mandok ingkon sarihononta do denggan sipanganon dohot siinumon songon i ndang parsingkolaan nang hahipason nasida? 

-Mangangguhi do nasida ala taalu uhum ni bangsonta on na mandok na so jadi patupaon angka ulaon kekerasan maradophon angka dakdanak di jabunta, di singkolanta? 

-Mangangguhi do angka boruboru dohot ina di bagasta ala taalo uhum di negaranta na mandok na so jadi patupaon kekerasan hata, fisik, psikologis tu nasida; di pasar partigatigaan, di hauma, di angka usahanta, di pabrikta, di angka inganan na marragam i ala ndang taulahon angka uhum na mangatur hak-hak azasi ni angka partigatiga, partani, buruh, pangula na metmet? 

-Mangangguhi do angka donganta jolma na manuhori dengke, angka sayur, angka sipanganon na marragam i ala tapatupa na so uhum tu nasida marhite na mambahen na targoar rasun tu angka i asa gumodang untung manang asa langku na tatigatigahon i gabe hona sahit na posa nasida, ai so togu dope penegakan ni uhum na melindungi panuhor? 

-Mangangguhi do angka na tinompa na asing i termasuk angka orang utan tu jolo ni Debata ala taalo uhum na mangaramoti nasida? 

-Mangangguhi do angka na pogos di tonga-tonga ni bangsonta ala siala ni korupsi na tauli gabe ndang mardalan pembangunan na pahinsathon ekonomi nasida, marsegaan angka dalan hatop-hatop, marsegaan angka sikkola dasar, SMP nang SMA na martugas papistahon nasida asa boi gabe tenaga kerja na tau, nab oi jongjong di ginjang ni pat nasida sandiri?

(iv)Manang tapasombu do angka ulaon na so uhum, na so tigor, gabe tapasomb bahat jolma di ngolu on na mangandungi tu Debata, mangalualu tu Debata Zebaot, sai talompit tanganta pasombuhon angka na so uhum dohot na so tigor masa di tonga-tonga ni ngolunta, humaliangta, masyarakatta, bangsonta, songon rakyat, songon sibahen uhum, songon sipajongjong uhum? 

(v)Tapasombo do angka ulaon diskriminatif tu angka donganta jolma na so dos dohot hita rumangna dohot rumang ni ngoluna sian rumangta nang rumang ni ngolunta, na ginoaranna nuaeng on dohot hata 'na asing'? Isara angka na mangolu di bagasan HIV/AIDS,  angka na gabe korban ni Narkoba, angka na orientasi seksualitasna marasing sian hita? 

(vi) Tapasombu do margurasa pangantusion na mengkotak-kotakkan jolma i marojahan tu ugamona, pangantusionna di tonga-tonga ni parsaoranta, di pingkiran nang ate-atenta, ndang muba dope pingkiranta songon na pinangido ni hata ni Debata di Rom 12: 2 di na mamereng donganta, gabe ndang taboto be dia na denggan, dia na hinalomohon ni roha ni Debata?

8. Marguru tu pangarimang-rimangion i, tauduti ma na mangihuton:

a. Puji ma Debata molo didok pangarimangrimangionmi denggan do parbue ni ngolum saleleng on, godang do ulaon na denggan dipatupa ho, tung songon dia pe metmetna songon parbue ni haporseaonmu dohot parbuae ni asi ni roha ni Debata naung jinalom.

b. Muba ma hatop, unang paimaima, molo mangihuthon pangarimang-rimangonmu tung so adong do na denggan dipatupa ho, baliksa angka na so uhum dohot na so tigor do diula ho, na mambahen adong manang bahat na mangangguhi tu Debata siala ulaon na so uhum dohot na so tigor niulam tu ngolu nasida, angka angguk-angguk na binotom dohot na so binotom pe tahe, na buni sian pamerengonmu, alai tinggil sahat tu sipareon ni Debata. Ulaon hamubaon ni roha boi do patupaon di tangiang tu Debata. Alai ummuli do molo tadok maaf tu angka donganta naung mangangguhi tu jolo di Debata ala tapatupa na so uhum dohot na so tigor/adil tu nasida. Molo ingkon talehon kompensasi siala ni i, na ingkon do ulahononta.  Molo ndang muba ho, ingot dia na binahen ni Debata tu apala bangsoNa, Juda. Tutu di tingki ni si Jesaya, leleng dung panurirangion i pe, i ma 186 taon dung i asa tarbuang nasida. Alai so tung songon i didok roham na so dia manang dung mate pe ho bahenon ni Debata tu ho uhumna molo ndang muba. Boi do hatop. Boi leleng. Alai pasti masa. 

c. Molo tahilala na naung mandalani uhum na dokdok situtu hita sian Debata ala saleleng on ndang na tonggi parbuenta, angka na jat taula, minim, manang tung so adong na denggan taparbuehon, alai na asom do, denggan do tapasahat di tangiangta tangiang asi ni roha tu Debata, songon na tinangiangkon ni parPsalmen 80: 20, 
"Ale Jahowa, Debata Zebaot, sai pasuang ma hami: pahisar ma bohim, asa malua hami." Tu toru ni silang ni Jesus Kristus ma taboan tondinta. Disi ma tapangido asi ni rohaNa. Amen.(*)
  BeritaTerkait
  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    3 bulan lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    3 bulan lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

    3 bulan lalu

    Oleh: Pdt Dr Robinson Butarbutar, Dosen STT HKBP1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    3 bulan lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    satu bulan lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  •   komentar Pembaca
    Copyright © 2017 Pelita Batak Online