• Home
  • Opini
  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"
KSP Makmur Mandiri
Kamis, 28 September 2017 20:34:00

Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

BAGIKAN:
ist|pelitabatak
Pdt Robinson Butarbutar
Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim bolon. Songon pangajari, diajari nasida do ruas ni punguan nasida mananda dia do lomo ni roha ni Debata di ngolu pargulmiton ni jolma na marragam i.

Songon tiruan nasida, dipatuduhon nasida do marhite ngolu nasida songon dia do pangulahonon ni na niajarhon nasida i mangoloi dohot pasauthon lomo ni roha ni Debata i. Songon uluan nasida, diuluhon nasida do ruas ni punguan i patupahon lomo ni roha ni Debata. Jala songon malim nasida, diuluhon nasida do ulaon panombaon tu Debata di inganan panombaon ni Debata. Dohot hata na jempek, manatap jala tangi tu angka nasida do angka panomba di Debata laho mananda lomo ni roha ni Debata jala songon dia ma mangulahon di ngolu siganup ari.

Alai di pardalanan ni ngolu hajolmaon na manomba Debata, na boi do apala angka nasida i (pangajari, tiruan, uluan, nang angka malim bolon) na so tuk mananda, mangulahon, dohot gabe tiruan di pangulahonon ni lomo ni roha ni Debata.

Di partingkian na songon i, di na naung so tangkas be panandaan di lomo ni roha ni Debata dohot pangulahononna di tonga-tonga ni sada bangso di sada partingkian siala ni na so tau be angka pangajari, tiruan, uluan, nang malim sintong mangulahon ulaon nasida, ditongos Debata do panurirang laho maminsang nasida, asa muba, asa sintong diulahon nasida ulaon nasida, asa mangolu nasida nang angka na niuluhon nasida. Ditongos panurirang laho pasintongkon manang paimbaruhon pangantusion na sala, huhut tahe mangalehon pangantusion na sasintongna, pangantusion taringot tu lomo ni roha ni Debata na dipaimbaru.

I do na masa di sada partingkian di tonga-tonga ni bangsa Jahudi di Judea di tingki ni ngolu nang ulaon ni Jesus di bona ni dekade paduahon abad parjolo najolo. Apala angka malim bolon dohot angka natuatua ni bangso i, na mian di Jerusalem i do na naung patuduhon dalan na so sintong di panombaon tu Debata.

Sada sian na so sintong na pinatupa nasida, i ma mambahen bagas joro ni Debata gabe sumber ekonomi pamorahon diri nasida jala patogu huaso nasida, mamoro natorop tarlumobi na metmet, na pogos, angka partani panewa tano, angka na so marhuaso. Mangihuthon penelitian ni angka pande bisuk, nunga adong bisnisna balga situtu di pelean tu Debata pinatupa dohot nirajaan ni angka malim nang natuatua i di bagas joro ni Debata na di Jerusalem i, na mambahen nasida mamora jala marhuaso.

Pola do adong sada terowongan ni mudar di toru na huta Jerusalem i dalan habaoran ni mudar ni angka binatang na ganup ari diseat sipasahaton songon pelean tu bagas joro. Adong kerjasama bisnis ni angka malim bolon i dohot angka tongke ni partiga-tiga, na maniganigahon angka na ringkot siboanon ni angka na ro tu bagas joro i laho pasahathon angka marragam pelean, sian pelean hamauliateon sahat tu pelean hasesaan ni dosa. Pola do sian pamele pidong amporik, i ma angka napogos na holan i na boi pelehononna, naung ro sian inganan na dao situtu ingkon buaton nasida untung.

Pola do partiga-tiga i martiga-tiga ndang holan di alaman ni bagas joro i, alai gabe sahat do nasida tu bagasan bagas joro i, tu inganan panombaon tu Debata i, tarlumobi ala molo dung pe dituhori panomba angka na ginadis nasida asa boi panomba i ro tu bagas joro i laho pasahathon pelean nasida. Hak mandok dia na boi pelehonon jala dia na so boi mangihuthon ruhut-ruhut habadiaon angka binatang sipelehonon nunga ditiop nasida. Na boi do na binoan ni natorop sian sihadaon didok ndang manggohi ruhut habadiaon. Ingkon na tinigatigahon nasida disi ma na ingkon tuhoron ni na pogos . Diboto Jesus do hasomalan sisongon i, ai inongna na mamboan ibana tu bagas joro i uju metmet laho pabadiahon  ibana tuk holan mamelehon dua anduhur manang anak ni darapati (Ida Lukas 2:2).

Siala ni i do umbahen na ro Jesus, i ma sahalak panurirang sian Nasaret di Galilea (Mateus 21: 11) tu Jerusalem maminsang nasida, marhite na manunggalingkon angka meja partigatigaan di bagas joro i, ai nunga diuba nasida bagas partangiangan gabe bagas pandobo (sarang penyamun) songon na tarsurat di Mateus 21: 12-13. Nian dung do dipinsang sada panurirang na asing, i ma si Johannes Pandidi angka Parise dohot Saduse na solhot tu bisnis pelean di bagas joro i, na tontu sahat tu sipareon ni malim bolon di Jerusalem, na mandok: "Hamu anak ni ulok! Ise do na mangajari hamu pasidingkon rimas na ro sogot? (Mat 3: 7).

Alai ndang muba nasida.Di bagas joro di Jerusalem i dipatuduhon Jesus do dia do lomo ni roha ni Debata sipatupaon tu angka na metmet, angka napogos, angka na mapitung di humaliang ni bagas joro i, angka na lumpuon,songon na pinatupana di angka huta na adong di propinsi Galilea, i ma: Pamalum nasida sian angka sahit nasida, angka na di struktur sosial nasida uju i na paling tumoru situtu, ai siala ni sahit nasida gabe marpogos situtu nasida (Mateus 21: 14). Mangulahon i do lomo ni roha ni Debata. Ndang baliksa, mamoro angka na pogos naung ro sian angka luat na dao tu bagas joro ni Debata laho pasahathon pelean pamujion tu Ibana.  Ndang pasombuhon angka na marsahit i soadong na pamalumhon ala soadong pangkeonna marubat.

Ro Jesus sian Nazaret tu bagas joro di Jerusalem songon panurirang na maminsang angka malim nang angka natua-tua i naung pilit mananda dohot mangulahon lomo ni roha ni Debata. Diboto nasida do lomo ni roha ni Debata, alai baliksa do na pinatupa nasida, i ma mangulahon na so hinalomohon ni Debata.

Sangkap paminsangion i asa muba do nasida. Alai ndang hamubaon ni roha na pinatupa ni angka malim i. Baliksa do na pinatupa nasida, i ma: Naparjolo, marsogo ni roha marnida pambahenan halongangan pinatupa ni Jesus pamalum angka na mapitung dohot na lumpuon i, nang umbege joujou ni angka dakdanak di Jesus: "Hosanna di Anak ni Raja Daud" (Mat 21: 15).

Napaduahon, di na ro muse Jesus tu bagas joro i manogotna i, diparsoalhon nasida haroroan ni huaso ni Jesus manunggalingkon angka meja ni partiga-tiga di bagas joro i so tinolopan ni angka malim nang sintua i, dohot pamalumhon angka na mapitung dohot lumpuon i.

Siala ni i do umbahen na, parjolo,ndang dilehon Jesus alus tu nasida marhite na manungkun nasida sada sungkun-sungkun na so taralusi nasida, i ma sian dia haroroan ni huaso ni panurirang Johannes Pandidi (21: 23-27).

Baliksa diuduti Jesus do, paduahon,  maminsang nasida mansai koras marhite sada panghataion na marujung di pangantusion na mandok: "Diboto angka malim bolon dohot natuatua i do nian lomo ni roha ni Debata, alai ndang diulahon; "olo" nina nasida do tu panjouon ni Debata patupahon lomo ni rohaNa, alai sasintongna ndang diulahon. "Songon dakdanak na paduahon do nasida, na mangoloi turgas pinasahat ni amana tu ibana, alai ndang mangulahon naung niundukkonna, atik pe diboto nasida do ia na denggan i ma na pinatupa ni dakdanak na parjolo sinungkun ni amana i, i ma mandok ndang olo, alai dungi manolsoli jala muba, gabe laho mangulahon pinangido ni amana i.

Diboto angka malim bolon nang sintua i do na ingkon songon dakdanak na disungkun parjolo i ma nian alus nasida tu pinsang-pinsang ni Jesus. Alai ndang muba nasida. Siala ni i, di simalolong ni Jesus jumahat do nasida sian angka sijalo beo dohot angka boruboru na manggadis dirina (Pornai) na di bonana ndang mangoloi joujou ni Debata patupahon lomo ni rohaNa, alai ala dung dipinsang gabe muba.

Nasida  i ma angka na di simalolong ni angka malim dohot angka malim ni bangso i angka parjahat. Sijalo beo digoari parjahat ala nasida do dipangke parhuaso Romawi laho papunguhon jala mamaksahon pajak sian natorop/rakyat. Di ulaon ni Jesus tarida do hamumuba ni sijalo beo Zakeus (Lukas 19: 1-10). Di na martangiang, sijalo beo i ndang barani manaili dompak ginjang (Lukas 18: 9-14).

Jala pornai i ma angka na mangulahon angka na hinagigihon ni bangso ni Debata, i ma angka haramunon di seksualitas. Nasida do na mandok ndang tu turgas dohot panjouon ni Debata  di bonana, alai di ujungna manolsoli dohot muba.

Diuduti Jesus do maminsang nasida di ayat 24-36, jala halak Farise dohot angka siboto surat diiuhumi Jesus di jolo ni angka natorop dohot siseanna sahat tu bindu 21: 33-46, umpama taringot tu na mora na manuan anggur, khususna ayat 43 marhite na mandok tu nasida: "Buaton harajaon ni Debata sian hamu jala lehonon ma tu bangso na olo mamboan parbuena (21:43).

Dung i di jolo ni natorop dht siseanna diparjeai Jesus ma angka siboto surat dht Parise di bindu 23, jala disurirangkon Jesus ma halelengse ni Jerusalem di bindu 24. Laos ala ni i do umbahen na dipaingotJesus  angka siseanna sandiri di bindu 25 asa mangulahon na denggan tu sada na ummetmet i. Jambar ni na mangulahonsa, i ma "bongot tu halasan ni roha ni tuanmu" (hata asli, bongot ma tu harajaon naung pinarade di hamu sian haoojak ni portibion, 25:34), jala tu na so mangulahonsa masuk tu na bernit salelengna (Mat 25: 45-46).

Di Jesus, dumenggan do partondion ni na naung sanga ndang mangoloi panjouon ni Debata mananda dohot mangulahon lomo ni rohaNa alai muba dung dipinsang panurirang ni Debata, i ma Jesus, sian partondion na unduk tu panjouon ni Debata laho mananda dohot mangulahon lomo ni rohaNa, alai di na dipinsang uju madabu ndang olo muba. Di simalolong ni Jesus dumenggan do haradeon muba sian dosa, sian hasalaan, sian hahurangan sian na mangantusi alai ndang diulahon lomoNa.  Di evangelium sinurat ni Mateus tung tangkas situtu do dipaandar hata, pangaantusion, pangajarion, dohot pangulahonon ni Jesus na mandok hinaringkot ni na mangulahon lomo ni roha ni Debata, i ma angka ajar ni Jesus (Mat 7: 21, 21-26; 25: 23, 45-46, 28:20).

Laos i do nang hata ni panurirang Jesus tu hita angka na manggoari dirinta angka ruas nang uluan di tonga-tonga ni huria ni Kristus di tingki on. Ndang apala tarbahen hita nuaeng on hibul mansoadahon dohot mangalo angka tuduhan manang kritik tu angka na manggoari diriNa angka siihuthon Jesus dohot angka na mangoku na naung marguru sian Jesus dohot na paboaboahon 'hita' do angka na umboto lomo ni  rohaNa dohot na rade mangulahon lomo ni rohaNa, alai di ngolunta siganup ari di inganan na marragam i ndang tangkas situtu na songon i hita.

Baliksa na boi masa, i ma apala na so hinalomohonNa i do na tapatupa. I do umbahen na di portibion tarbortik jala sar do barita na mandok na masa do di tonga-tonga ni huria kekerasan maradophon angka dakdanak di jabu nang di parsingkolaan, masa do korupsi di tonga-tonga ni angka na porsea di Jesus Kristus, diulahon angka na porsea i do angka tindak ketidakadilanmaradophon na metmet, na so mardihadiha, angka korban ni sahit-sahit sosial, angka korban korban HIV/AIDS, dohot maradophon angka na so saurdot dohot hita di ngolu seksualitas,jala ra adong do tong di tonga-tonga ni na porsea i mangulahon perdagangan manusia, na manghalomohon porang, na patupahon diskriminasi, na manegai portibion, na manghalomohon ngolu na mansai konsumeris, na manghatahon angka hata na so suman maradophon donganna di media sosial.

Di na dipinsang nasida asa muba, ndang olo muba. Jesus mandok tu hita, dumenggan do partondion ni angka na asing na so songon hita parange ni ngoluna saleleng on, alai di na dijou Jesus nasida asa muba, muba do nasida.

Molo umbagas hita marnida tu bagasan huria i, tar dos songon na masa di tonga-tonga ni bagas joro na di Jerusalem i, gabe sian tonga-tonga ni parhalado ni huria do adong na mangulaon na so hinalomohon ni roha ni Jesus uju i di Jerusalem, i ma mambahen panombaon tu Debata gabe dalan laho pamora diri.

I do umbahen na tarbortik jala sar do barita tu hita na di manang piga huria adong angka pandita nang uluan ni huria na pamoramora diri, gabe tartangkup nasida, isara di Korea Selatan. Di tonga-tonga ni uluan partimbo ni huria Katolik Roma pe masa do na songon i. I do umbahen na dipatupa Paus Francis nuaeng angka reformasi di tonga-tonga ni huria Katolik Roma, ndang marimba di parhepengon.

Di taon on, ndang gok sabulan nari, i ma 31 Oktober 2017, pestahononta do pesta 500 taon reformasi pinatupa ni Pdt Dr Martin Luther. Suraon do hata ni Jesus tu angka malim bolon nang angka natuatua ni bangso Jahudi di bona di dekade patoluhon abad parjolo i laos i do na marsaringar tu angka uluan ni huria i, sian na metmet di jabu sahat tu punguan parsaoran di huria marsadasada dohot huria hatopan: Tasoarahon humubaon ni roha tu angka ruas ni huria nang tu portibion, alai hita sandiri ndang rade muba?Ulaon ni Jesus manghobasi dohot pamalumhon na mapitung dohot na lumpuon do, alai sotung alo ni i niula ni angka pangula ni huria i, na tupa nunga madabu tu na mambahen ulaonna di huria jala ulaon ni huria i gabe berbisnis?

Laos soara na dos do sahat nang tu ruas ni huria na gabe naposo ni Debata di angka ulaon nasida na marragam i, tarlumobi angka na manguluhon, sian na ummetmet sahat tu na tumimbo, sian buruh sahat tu penguasa, sian pegawai negeri sahat tu pemimpin negara, sian sibahen uhum sahat tu simatamatai, sipadalan dohot sipajongjong uhum, sude tahe. Bersumpah jabatan do nasida, alai sai dialo sumpah nasida i di na mangulahon ulaonna. Sotung tadok dumenggan hita sian angka na so sahorong dohot hita, hape nasida rade muba uju dipinsang Debata, ia hita marulak loni hata ni Debata maninsang hita asa muba, hape ndang muba hita.

Taingot ma hata ni Jesus: "Ndada saluhut halak na mandok  Ahu Tuhanna bongot sogot tu harajaon banua ginjang i, holan angka na mangulahon lomo ni roha ni Damang na di banua ginjang i do" (Mateus 7: 21). Laos taingot ma nang hata ni Debata sinurathon ni panurat ni surat Heber i tu angka ruas ni huria jonokkon ni ujung ni abad na parjolo na tongon tarunjun manadingkon ngolu na hot marhaporseaon di Jesus Kristus, na ingkon naung matobang nian di haporseaon nang parange alai sai danak dope, na siala ni i dipinsang panurat i mansai koras: "Sadarion di na binegemuna soaraNa, unang ma papir hamu rohamuna, songon nasida na tangkang i di ari pangunjunan di halongonan i.

Ai disi diunjuni angka amamuna Ahu jala dipaujiuji, atik pe diida nasida angka ulaonHi opat pulu taon lelengna. Dibahen i muruhk do ahu mida na sasundut i jala hudok: 'Tongtong do lilu nasida, ai ndang ditanda nasida angka dalanku, polamaruari Ahu di rimasHi, na so tupa bongotannasida paradiananHi.'" (Heber 3: 7-11). So tung gabe so masuk hita tu harajaonNa i di ujugngna siala ndang rade hita muba. Martin Luther mangajarhon hinaringkot ni angka na porsea i, "Ganup ari muba", ala di tingki na dos na badia dohot pardosa do hita. Molo muba hita dung dipinsang hata ni Kristus hita sadarion, taingot ma tong hata ni Debata di Heber 12:11 i, "Nasa paminsangon tutu anggo dihamamasana ndada las ni roha i hilalaon, tung arsak do, alai dung salpu i, diparbuehon do hatigoran na mardame di angka naung gabe somal marhite sian i."

Muba ma hita sian parange na so olo muba ala tadok ala ni haporseaon dohot asi ni roha di haluaon i. Muba ma hita, ai i do hataridaan dohot parbue ni haporseaon ni angka naung dapotan asi ni roha ni Kristus i. Tapaso ma mamoro na pogos asa mamora hita. Tapungka ma pahinsathon napogos sian hapogoson nasida, pamalum na marsahit, patupahon na denggan tu angka na so mardiha-diha. Olo ma hita muba, unang dibuat sian hita harajaon i jala dilehon i tu na asing (Mat 21: 43). Boto jala ula ma lomo ni roha ni Debata. Unang baliksa. Molo sanga baliksa diula ho, muba ma, asa malua tondim jala martua ngolum. Amen.

Pdt Dr. Robinson Butarbutar
Dosen STT-HKBP


  BeritaTerkait
  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    11 bulan lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"

    9 bulan lalu

    Oleh: Pdt Dr. Robinson Butarbutar, Parsameanta, STT-HKBP1.Panghataion ni Jesus dohot siseanna sandiri dung sidung mangula di bagas joro na di Jerusalem i do turpukta on (24: 1, 3), i maudut ni panurir

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    12 bulan lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium Minggu XIII Dung Trinitatis Hesekiel 33, 7-9 Dipabangkit Gabe Siparorot

    11 bulan lalu

    Oleh: Pdt Dr. Robinson Butarbutar, STT HKBP Pematangsiantar1. Sian tingki tu tingki, di sandok inganan, ngolu nang ulaoon ni jolma i, di bagasan huria ni Kristus na ummetmet dohot huria hadomuan, mang

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    11 bulan lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet