• Home
  • Opini
  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"
KSP Makmur Mandiri
Jumat, 15 September 2017 08:07:00

Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

BAGIKAN:
Ist
Pdt Dr Robinson Butarbutar
Oleh: Pdt Dr Robinson Butarbutar, Dosen STT HKBP

1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-tiga disi, isara si Prisca dohot Aquila. Ndang apala taboto tangkas andigan. Alai songon na disurathon sejarawan Romawi Tacitus na manurat sejarah ni kekaisaran Romawi, 7 taon andorang so disurathon apostel Paulus suratna on sian Korintus tu angka na porsea di Roma di taon 56, diparuar Kaisar Claudius do sude halak Jahudi sian kota Roma ala masa hagaoron sama nasida siala ni sada goar, i ma Krestos. Ala ni i di tingki panuratan ni surat on ia haruason ni huria-huria di Rom i tumoropan do marharoroan sian angka naporsea sian na so Jahudi.

Somalna, tarsude do halak Jahudi di Kekaisaran Romawi patupahon hasomalan nasida di sipanganon nang pangargahonon di ari-ari mangihuthon ruhut-ruhut parugamoon. Somalna, angka ruas na so Jahudi ndang apala marimbar sipanganon dohot lapatan ni ari-ari mangihuthon ruhut-ruhut parugamoon. Hasomalan i do dipaihut-ihut halak Kristen na ro sian tonga-tonga ni Jahudi. Sipanganon nasida i ma na so dais tu angka na diida nasida ramun. Digoari do sipanganon nasida i kosher. Ndang adong digadis i di onan na somal, alai di onan ni halak Jahudi sandiri do.


2. Alai 7 taon dung diusir si Claudius halak Jahudi dung marroan muse halak Jahudi tusi, ra ndang adong dope onan ni halak Jahudi di kota Roma. Ndang adong dope ijin di nasida laho maronan sandiri. Siala ni i ndang dipangan nasida be angka jagal na digadis disi, mabiar ala naung dipelehon angka i tu angka debata sileban. Ala ni i, holan sayur ma dipangan nasida, unang ramun nasida. Diihuthon halak Kristen Jahudi na di Roma i ma na songon i. Hape di halak Kristen na so Jahudi ndang apala songon i. Di nasida boi do sude panganon, songon na pinatupa ni na gogo marhaporseaon di kota Korintus, na mandok ndang adong debata sileban, da holan Debata na sasada i, jala ndang adong hahonaan ni sipanganon tu haporseaon. Ndang surut anggo so dipangan, ndang ummangat molo dipangan (1 Kor 8: 4-8). Siala ni i diida na porsea sian na so Jahudi ma na sigale haporseaon halak Jahudi i. Sabalikna, na porsea sian Jahudi marnida ndang badia na porsea na so sian Jahudi ala dipangan nasida sipanganon na so badia. Dos tusi ma nang di angka ari-ari.

3. Beha do bahenon ni huria na marruashon ruas na marragam harorona i marsaor di sada huria? Boi do nasada manghilala na hasomalan nasida do na dumenggan, ndang hasomalan ni na asing? Sabalikna, boi do dohonon ni na porsea sian Jahudi na so ture ngolu ni dongan nasida na porsea sian Jahudi siala dipangan nasida angka sipanganon na so dipangan Jahudi, jala siala ni na mardosdos do ari-ari di nasida, ndang songon halak Jahudi.

4. Ingkon urupon ni apostel Paulus do nasida mangaramoti parsaoran nasida marhite Roma 14: 1-12 on asa boi nasida masihaholongan. Nian nunga dipaandar apostel Paulus di bindu 12:3b asa masiargaan nasida. Hataridaan ni na masiargaan i ma na lam dipatangkas di bindu 14-15: Beha ma asa unang ala ni sipanganon dohot ari-ari gabe ndang sada huria i di kota Roma? Boi do rap marsaor nasida atik pe marasing be hasomalan nasida di sipanganon dohot di ari-ari?

5. Domu tusi do umbahen na dipangido apostel Paulus nasida ruas na marharoroan sian dua houm dohot ugamo i asa unang marhu roha jala manguhum-uhumi donganna di parmanganon dohot di pamariateateon di ari-ari ugamo. Baliksa ingkon marpanganju na gale marhaporseaon ma tondi nasida. Ndang jadi na sada mandok tu na asing na dumenggan do haporseaonna siala dipangan on manang ndang dipangan i, dohot siala ndang diargahon manang diargahon ari na sada lumobi sian ari-ari na asing. 

Boi do hu roha mida dongan na so sapingkiran dohot sahasomalan dohot iba? Boi do uhumon dongan na so dos pamerengonna di sipanganon nang ari-ari dohot pamerengonniba?

6. Poda na pinasahat ni apostel Paulus marrumangkon parenta: Unang ho roham, unang uhum-uhum i donganmu na so dos pamerengonna di sipanganon nang ari-ari di tonga-tonga ni huria i. Laho patoguhon ora-ora i dipaandar apostel i ma angka alasan-alasan teologis dohot logis. Dia ma angka i?

Naparjolo, ai naung dijangkon Debata do ibana/nasida (ayat 3). Bagas do na hinangkam ni on: Ai ndang ala ni habadiaonta jala jogi ni parangenta umbahen na dijangkon Debata hita. Asi ni rohaNa do manjangkon hita. Siala ni i na so jadi hu roha maradophon dongan ruas, dongan jolma ala asing parmanganna. Ise ma hita umbahen na tarbahen hita mar hu
roha tu donganta?

Napaduahon, marojahan tu pingkiran na gomos do dipillit dongan na asing panghangoluhonon ni haporseaonna di ariari ni ngolu on i (ayat 5). Lapatanna ingkon argaan do independensi ni pingkiran ni dongan na asing i. Ndang jadi patutoruon ibana disi.

Napatoluhon, di bagasan na mamuji Debata do motivasi ni sasahalak mamparbadia i manang ndang sadasada ari, manganhon manang so manganhon sipanganon i (ayat 6).

Paopathon, ia ngolu manang mate ni ngolunta on di Tuhan i do. I do umbahen na mate Kristus jala Tuhan ni na mangolu dht na mate do ibana (ayat 7-9). Lapatanna, ndang be mian di bagasan angka sungkun-sungkun taringot tu sipanganon dohot ari-ari i be ia na ingkon manggohi pingkiran ni na porsea i, alai mamelehon diri tu Jesus nama (patudos Roma 12:1). Unang be dipasirang angka na marhadomuan tu sipanganon, ari-ari manang na asing i be nian ngolu parsaoran ni angka na porsea i, ai sai torus do adong parasing-asingan ni pamingkirion ni na porsea i.

Palimahon, ganup do ingkon mangalusi Debata di adopan ni habangsaNa sogot taringot tu dirina be (ayat 10-12).

7. Sian bona ni Hakristenon di abad parjolo sahat tu nuaeng, sai marroan sian angka latar belakang na marragam do ia ruas ni pamatang ni Kristus i. Jala ndang holan di pangantusion haporseaon, alai dohot do di rumang ni parange nabadia di ngolu siganup ari marragam ni ngolu hakristenon i, na marhonaan tu sipanganon, ari-ari, pamingkirion dohot angka na asing. Bahat situtu sibonsiri ni na marasing-asing hasomalan ni ngolu siganup ari ni halak Kristen. Siala ni i do sai dilului angka huria na di portibion do angka dalan 'saling mangantusi' dohot saling masiargaan angka na mambahen marragam isi ni haporseaon dohot rumang ni parange ni halak Kristen di portibion sian tingki tu tingki.

Tarlumobi di tingki nuaeng on di na lam mengglobal dohot lam menginternet ngolunta, lam marasing-asing do pamingkirion ni halak Kristen di etika, manang ruhut-ruhut ni ngolu, manang parange marhahonaan tu angka na imbaru masa di portibion, ai angka poda parange na tumua naeng gantihonon ni poda parange na imbaru. Ndang holan di na marhadomuan tu sipanganon dohot siinumon, manang seksualitas marasing angka pangajarion parange ni angka huria, alai dohot do tong taringot tu na asing, isara hukuman mati, neo-kapitalisme, pamangkeon kondom mencegah HIV dohot AIDS, euthanasia, aborsi dna. Ala ni i tandi na marasing angka poda parange ni huria i di portibion, atik pe sada do huria i niuluhon ni Tondi ni Debata.

8. Beha asa ganup ruas mangantusi poda parange ni donganta sahaporseaon di portibion, boasa gabe songon i poda ni sada huria boasa ndang songon i poda ni asing, beha asa masiantusan jala masiargaan angka huria i maradophon sama nasida, unang mar hu roha, unang manguhum-uhumi i do na sinangkapan ni Komisi Iman dohot Tata Gereja ni Punguan ni Angka Huria Protestan di Portibion (Dewan Gereja Sedunia) marhite na paruarhon sada dokumen studi na marjudul, Moral Discerment in the Church (= Batak: Panimbangnimbangion di poda parange di huria). Diparuar i di taon 2013, siparsiajaron ni angka huria, asa boi denggan parsaoran ni angka huria di portibion, unang masiuhum-uhumon.

9. Nang di tonga-tonga ni huria marsada-sada di portibion, sai boi do marasing-asing poda taringot tu na marragam i, so marimbar taringot tu partangiangan. Taringot tu sipanganon pe songon i do.

10. Ala ni i, ampit do oraora tu marhu ni roha dohot manguhum-uhumi ginurithon ni Apostel Paulus i tu partingkian ni huria na so sada poda parangena di angka parange ni jolma na imbaru di tingki on. Mansai ringkot hita mangantusi boasa asing poda ni sada huria sian huria na asing, manang hurianta, jala mangargaisa. Angka alasan teologis na di ginjang i ma na ringkot auhononta laho mangantusi dohot mangargahon nasida be.

11. Di tonga-tonga ni hurianta HKBP pe na boi do adong parasing-asingon ni latar belakangta be, na mambahen ndang haru dos situtu pangulahononta di poda parangenta be. Nasida na mangolu di daerah tradisional boi marasing otik rumang pangulahonna di poda parange ni HKBP tu dongan sahuria na asing na mangolu di huria na mangolu jala mangula di daerah transisi dohot daerah kota politan dohot kota metro politan, laos mansai marasing di ngolu ni angka ruas na mangolu di negara-negara na sekularis dohot na marsaor dohot angka parugamo na asing. Ndang sai dos rumangna. Laos songon i ma nang masa di angka keluarga na marragam i. Gariada adong donganta sahuria na so haru togu manghangoluhon poda parangenta. Adong na gale. Adong na tung gale situtu. Jala adong na tarunjun jala na madabu.

12. Di hamamasa na songon i do dipangido asa masianjuaon hita maradophon angka dongan na gale, i ma na so dos pangulahonon haporseaonna di ngolu siganup ari dohot hita marhahonaan tu sipanganon, ari-ari dohot na asing. Molo di minggu na salpu dipangido Debata marhite Hesekiel 33: 7-9, asa tapaingot donganta na mardosa, asa muba, unang mate di dosana, jala unang ditunggu Debata sian hita dosana, di minggu sadarion dipangido hata ni Debata sian hita pasohon hasomalan mar hu roha maradophon donganta manang manguhum-uhumi nasida na taetong marhaporseaon na gale, na tarida di pandapot nasida taringot tu manang aha pe tahe na so saurdot tu pandapotta sandiri.

13. Mansai ringkot do on auhononta di partingkian face book, na patuduhon sai marragam be do pandapot ni halak Kristen, nang na sahuria, nang di tonga-tonga ni ruas manang di tonga-tonga ni partohonan taringot tu angka pamingkirion na imbaru siala ni partingkian na hatop mura-uba. Molo ndang rade ruas ni huria i manganju angka donganna sahaporseaon na so haru dos pangantusionna dohot pangantusionta tung hatop situtu do huria i masiharatan jala puntar.

14. Di tonga-tonga ni parsaoran ni jolma di partingkian nuaeng na mansai mura marbolat-bolat, mansai ringkot do ruas ni HKBP gabe pasupasu disi marhite na mamonai di bagasan dirina roha na sai rade manganjo hagaleon ni donganna. Tabonai ma i di bagasta be, di sektor-sektor ni hurianta, di huria, di resort, di distrik nang di sinode. Maol do tarbahen hita gabe pasupasu tu humaliangta molo ndang mangolu hipas roha marpanganju i di hita be. Molo mura-ura do puntar parsaripeon ni ruas ni hurianta siala ni na so tubu roha na rade manganju hagaleon ni donganna saripe, susa ma ngolu ni ruasta.

Molo ndang tubu roha na marpanganju di angka ruasta na marusaha keluarga, mura ma masursur angka usaha nasida mangadopi persaingan bisnis di tingki on. Molo ndang tubu hipas roha marpanganju na gale di parsaoran ni angka partohonan, ndang adong na boi patupaonta mangulahon ulaon ni huria i. Disesa Debata ma angka pangalahonta saleleng on na sai mar hu roha maradophon angka donganta na gale haporseaonna, dipargogoi Debata ma hita mamungka dohot manorushon roha na mangargahon angka donganta tung beha pe asing ni pamingkirionna mandalanhon haporseaonna i tu Debata na mangolu i na marhadomuon tu sipanganon, ari-ari nang angka na asing.(*)

  BeritaTerkait
  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    2 tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    2 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    2 tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    2 tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    2 tahun lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb