• Home
  • Opini
  • Jamita Evangelium Minggu XIII Dung Trinitatis Hesekiel 33, 7-9 Dipabangkit Gabe Siparorot
KSP Makmur Mandiri
Sabtu, 09 September 2017 16:22:00

Jamita Evangelium Minggu XIII Dung Trinitatis Hesekiel 33, 7-9 Dipabangkit Gabe Siparorot

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar, STT HKBP Pematangsiantar

1. Sian tingki tu tingki, di sandok inganan, ngolu nang ulaoon ni jolma i, di bagasan huria ni Kristus na ummetmet dohot huria hadomuan, mangula do Debata parasi roha i manjou angka parjahat asa muba, asa mangolu nasida (Hesekiel 33:11, 3: 17-21). 

2. Laho pasauthon i dijou, dipabangkit, jala disuru, dipatau, dipargogoi jala diramoti Debata do angka naposoNa mamincang angka parjahat i asa muba. Ndang boi angka naposoNa i
marsidalian, ai sian nasida do tungguon ni Debata mudar ni parjahat na mate so ada sipasingot 
sian naposo ni Debata. I do tona ni Debata tu Hesekiel, sada panurirang hamubaon ni roha di 
tonga-tonga ni bangso ni Debata di tingki habuangan. 

3. Pangantusion si songon i do na tiniop ni Jesus di pangajarionNa tu angka siseanNa taringot tu dia 
ma sipatupaon ni angka siihuthon Kristus molo adong sian tonga-tonga nasida na mardosa. 

Gariada diajari Jesus do nasida dalan na dumenggan laho patupahon I, I ma di bagasan hajamoton. Tarida do i di Evangelium Mateus 18: 15-18. Disi didok songon on: "Alai molo 
mardosa donganmi, topot jala ajari ibana, holan hamu padua. Molo ditangihon ho, dapot ho do ibana gabe donganmu muse. Alai anggo so ditangihon ho, arahon ma donganmu sada manang dua, asa hinatindangkon ni dua manang tolu halak nasa hata. Alai molo so ditangihon nang nasida, paboa ma tu na sahuria i. Molo so ditangihon nang huria i, etong ma ibana songon parbegu manang sijalo beo."





4. Parjahat na dihatai di Hesekiel 33: 1-20 i ma ndang holan (a) angka parjahat situtu, na ngoluna gok hajahaton (33: 14-16, 19) dohot (b) partigor na mangulahon na jat alai manghilala na boi do 
hatigoranna i mangondingi ibana (ayat 12, 13-18), songon i nang (c) na manghaporseai na (i) tuk 
do hatigoran ni jolma na tigor mangondihon ibana sian sada dosa na pinatupana (ii) ndang 
sintong sesaon ni Debata dosa ni pardosa na muba ( ida ayat 17 dohot 20). Domu tu si do 
umbahen na nang di angka huria ni Kristus na di padan na imbaru, sai dipaingot angka apostel nang angka tokoh nu punguan i do asa unang mangolu sarombang dohot portibion angka naporsea i, jala unang adong na manghilala na boi do angka naung pinalua ni Jesus i bebas boti mangolu so saurdot tu lomo ni roha ni Tuhan i. Dipinsang apostel Paulus angka ruas ni huria na di kota Korintus di abad parjolo ala dipasombu nasida, gariada dihaginjangkon nasida do na 
adong sian tonga-tonga nasida na naung tardidi tu bagasan goar ni Kristus, alai mangolu jumahat 
sian na di duru ni huria i. Isarana, adong sahalak sian tonga-tonga nasida na marmainan dohot boruboru/saripe ni amongna. Dipinsang si Paulus do punguan i tarlumobi na patupahonsa. 
Hansit do dihilala na pininsangna i, gabe marsak, gariada adong manghasogohon si Paulus. Alai 
di ujungna dung manang sadia leleng, manolsoli do ibana, jala muba. Ndang diloas apostel I dipadao punguan i torus ibana. Ingkon jangkonon nasida do ibana, so mardongaan biar dohot 
lomos ni roha (ida: 1 Kor 5: 1-13, 2 Kor 6: 15). I do ojahan ni ruhut paminsangion dohot 
parmahanion di tonga-tonga ni huria ni Kristus di portibion, so marimbar di tonga-tonga ni Huria Kristen Batak Protestan.

5. Nuaeng, tama do sungkunhononta, boasa barita taringot tu sangkap ni Debata manjou angka parjahat asa muba, asa mangolu, jala soara na koras tu angka naposona asa olo so marsidalian pasahathon joujou hamubaon tu angka parjahat na di duru dohot na di bagasan huria na gabe 
jamita di tonga-tonganta nuaeng? Di tonga-tonga ni huria, angka parhalado do dongan ni  pandita mamata-mata i parange ni ruas ni huria ni HKBP. Beha do pangulahonon ni angka 
parhalado di ulaon on? Diulahon nasida do I, jala dipasahat nasida do hata pinsang-pinsang tu ruas i? Tuk do holan parhalado i patupahon ulaon i so mardongan pangurupion ni angka ruas ni huria di bagas nasida be? Ai angka bagas i do huria na metmet. Beha do ulaon ni angka natoras maradophon donganna saripe nang maradophon angka ianakkonna? Beha do angka na marhaha maranggi dohot na mariboto? Dipatupa nasida do i? 

6. Beha do angka ruas ni huria di ngolu nang ulaon nasida di tonga-tonga ni masyarakat, pamarenta, perusahaan, dna? Diulahon nasida do ulaon nasida songon malim na raja disi? Sian 
taon 1970-an sahat tu saonnari, marjongjongan do angka na ginoaranna "Pamatataion", 
manang di hata Inggris didok "Watch": Human Rghts Watch, Domestic Violence Against Woman 
and Children Watch, Government Watch, Immigrant Protection Watch, Pembantu Watch, Election Watch (Panwaslu), Consumer Protection Watch, dohot Pastor/Priest Watch, laho 
mamata matai angka parange hajahaton di angka i. Godang do ruas ni huria ni Kristus rap dohot 
na asing na mangula disi, asa unang diuduti, alai molo sai diuduti, asa diboan nasida tu uhum/pengadilan.

7. Di taon on dipestahon angka huria protestan di portibion do 500 taon reformasi. Sada sian pangantusion di tonga-tonga ni huria di tingki ni si Martin Luther na direformasi ibana ala so saurdot tu pangajarion ni Bibel i, i ma pangantusion na mandok "marimbar" do arga ni tohonan 
di tonga-tonga ni huria i sian na di portibion. Gantina didok ibana na ganup na porsea di dohot 
na marsaor sapamatang dohot Kristus marhite pandidion na badia i do naposo ni Debata. I do umbahen na diajarhon Martin Luther dohot angka huria protestan di portibion taringot tu malim 
na raja do ganup na porsea i. Di tonga-tonga ni huria adong ma partohonan laho mangulahon ulaon di tonga-tonga ni huria i. diula nasida ma maminsang angka ruas ni huria na mangolu di 
bagasan dosa, asa muba, unang mate nasida, unang sian angka partohonan I ditunggu Debata mudar nasida. Di portibion, sude naporsea i malim manang naposo ni Debata do. Siala ni i, 
manghuling do hata ni Debata di Hesekiel 33:7-9 i tong joujou tu ganup ruas ni huria ni HKBP asa 
mangulahon tohonanna maminsang angka pardosa di ngolu nang ulaon nasida siganup ari asa pasohon hajahatonna, unang diuhum Debata nasida, jala unang diuhum uhum ni negara nasida. 

8. Ndang joujou na menet berengonta i, didok Debata na sian hita do tungguon ni Debata mudar ni donganta jolma na mate di bagasan dosana ala so ada sipangingot sian hita. Nunga ro tingkina asa songon ruas ni HKBP na marsinta-sinta gabe pasupasu tu portibion hita, mangulahon ulaonta 
mamata-matai hajahaton, paingothon na patupahonsa. Ndang ingkon sai ingkon pabotohononta tu portibion hajahataon ni angka donganta jolma, molo boi dope tapaingot nasida hormat, jala rahasia. Alai molo ndang ditangihon, nunga tingkina asa tapasahat tu natorop, isara tu KPK 
dohot tu Kepolisian nang Kejaksaan di sude tirket, asa boi moru angka jolma na patupa hajahaton, jala marhite i asa lam gok dame, hadumaon dohot hatigoran ngolu ni bangsonta di 
sude tirket. Molo lam godang ruas ni hurianta patupahon songon i, boi ma goaronta hita, mamangke hata Batakta na uli i, gabe "Siparorot" donganta jolma, ai mansai arga do ulaon ni 
Siparorot di ngolu ni sasahalak uju pese-pese sahat tu dakdanak. Ala tingki dakdanaka dope partingkian ni bangsonta membangun karakter bangsa asa gabe bangso na lam mangolu di hatigoran, dao sian hajahaton, mangolu di bagasan holong ni roha, mansai uli do molo ganup 
ruas ni HKBP manghobasi angka donganna jolma di huria nang di duru ni huria manjamothon angko donganna humaliangsa, anggiat adong na maminsang angka na mangolu di bagasan ulaon dosa, jala marhite i asa adong hamubaon dohot hangoluan.(**)

  BeritaTerkait
  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

    12 bulan lalu

    Oleh: Pdt Dr Robinson Butarbutar, Dosen STT HKBP1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    12 bulan lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Asa Sada Nasida Saluhutna"

    4 minggu lalu

    "Oleh: Pdt Dr. Robinson Butarbutar, KRP HKBPMarsiajar sian isi ni Johannes 17, mansai tarapul do roha di na mangolu, mangula dohot mandungdung sintasinta songon i nang patupahon na denggan molo binoto

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    12 bulan lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb