• Home
  • Opini
  • Jamita Evangelium Minggu Pentakosta I, 20 Mei 2018 "Nunga Dilehon Debata Tondi Porbadia tu Nasa Bangso" (Ulaon Apostel 10: 44-48)
KSP Makmur Mandiri
Sabtu, 19 Mei 2018 08:49:00

Jamita Evangelium Minggu Pentakosta I, 20 Mei 2018 "Nunga Dilehon Debata Tondi Porbadia tu Nasa Bangso" (Ulaon Apostel 10: 44-48)

BAGIKAN:
Ist
Pdt Dr Robinson Butarbutar
Oleh: Pdt. Dr. Robinson Butarbutar, Parsameanta, STT-HKBP, Pematangsiantar

Patujolo
Somal do di parmingguon parningotan di hasasaor ni Tondi Porbadia di angka huria di portibion nasailaon dienet barita nauli sian turpuk na tarsurat di Ulaon 2: 1-5 na paandarhon ari dohot hamamasa ni hasosonggop ni Tondi Porbadia tu angka sisean ni Jesus na sampulu dua i (12 minus Judas Iskariot tamba si Matias, i da Ulaon 1: 26). 

Andorang so ari i nunga dipodai Jesus angka siseanNa i (11 minus Judas Iskariot, asa paimahon Tondi Porbadia di Jerusalem  (Ulaon 1: 4). Di na dipangido Jesus nasida paimahonsa nunga dilumbahon Ibana hian  na molo dijangkon nasida Tondi i gabe sitindangiNa ma nasida di Jerusalem, di sandok Judea, di Samaria dohot tu ujung ni portibion (1:8). 

Di ari haroro ni Tondi Porbadia i di Jerusalem, masa tolu na  imbaru situtu dohot na palongang roha, i ma: Parjolo, diida nasida ma dila ni api na songgop tu nasida be. Paduahon, digohi Tondi Porbadia jala marhata sileban ma nasida. Patoluhon, diantusi torop halak na so Jahudi ma angka sisean na marhata sileban i di hata nasida be, atik pe halak Galilea do angka sisean i. 

Dung i, songon naung pinodahon ni Jesus, migor manindangi ma apostel Petrus tu halak Judea  dohot tu na mian di Jerusalem. Dibaritahon ibana ma di panindangionna i na naung digohi Debata panurirangion ni panurirang Joel na mandok na usehonon ni Debata ma tu nasa daging (Gorik: pasan sarka) Tondi porbadia, jala angka anak dohot boru nasida manurirangi ma, angka dolidolinasida maralatan ma, jala angka natuatua nasida marnipi ma, dohot tu angka naposona baoa nang boruboru usehononNa ma tondiNa laho manurirangi (Ul 2: 17-18).  

Atik pe dibaritahon si Petrus na nang tu ganup na mardaging songgop ma muse Tondi Porbadia i, diondolhon do disi na hasosonggop ni Tondi i masa tu angka siseanna, angka halak Jahudi na sian Galilea. Tu angka bangso na asing,ndang dope, muse pe.

Alai di parningotan ari hasasor ni Tondi Porbadia sadarion tu tongatonga ni bahat huria di portibion na gabe barita nauli i ma apala hasasaor ni Tondi Porbadia na masa tu halak na so sian tongatonga ni angka siseanna na sampulu dua i (ayat 45) do. Hasasaor ni Tondi Porbadia i masa tu na so sian tongatonga ni marsunat. Laos nang parbue ni Tondi i, i ma marhata sileban, diusehon (Gorik: ekkechutai, sian kata kerja dasar pasif: ekchunnomai) do tu na so sisean dohot na so marsunat i, i ma tu bangso na asing, bangso na so Jahudi na so marsunat dope silehonlehon ni Tondi Porbadia.

Hatorangan: Bangso na asing (Gorik: ethne. Somal do di Bibel hata Batak diterjemahon hata on dohot sipelebegu holan laho mangondolhon na so porsea tu Debata Jahowa dope nasida, na manomba Debata ganaganaan. Alai dison, terjemahan na umampit bangso na so Jahudi ma, bangso na so marsunat dope, ai si Kornelius i sahalak na marhabiaran mida Debata ni Jahudi do (Gorik: phoboumenos ton theon.) Siala ni i do dipangke si Lukas panurat ni Ulaon Apostel  I do sada hata na ampit manggoari angka na porsea na tongon rap dohot apostel Petrus uju hamamasa i, ndang halak Jahudi (Gorik: hoi Ioudaioi ) alai 'na porsea na sian tongatonga ni na marsunat': Gorik: ek peritomes. Di Bibel hata Batak diterjemahon hata on dohot  halak Jahudi.) Angka na porsea na sian angka na marsunat longang marnida na diusehon silehon-lehon ni Tondi tu na so marsunat, bangso na so Jahudi, ethne (ayat 45).

Diusehon silehon-lehon ni Tondi  i (Gorik: he dorea tou hagiou pneumatos) si  tu Kornelius, sahalak na so Jahudi, ethne, na so marsunat dope, halak Italia, dohot tu donganna sabagas, angka sisolhotna, dohot angka alealena di jabuna di Kaesaria, dao sian Jerusalem. (Ndang taboto manang sude halak Italia). Masa i uju ditangihon nasida barita na uli pinasahat ni apostel Petrus taringot  tu ngolu, ulaon, panaonon, hamamate dohot haheheon ni Jesus Kristus halak Nasaret i (Ulaon 10: 24, 44, 46). Jala di na marhata sileban i nasida dibege angka na porsea sian na marsunat i do na dipapujipuji na so marsunat on, sian tongatonga ni ethne i Debata (ayat 46).

Masa tolunsa, i ma (i) hasosonggop ni Tondi i, (ii) use silehonlehon ni Tondi (marhata sileban) tu na so marsunat, jala (iii) pamujion tu Debata sian nasida  atik pe ndang angka halak na naung marsunat nasida, ndang halak Jahudi nasida, ndang angka sisean sian tongatonga ni na marsunat nasida.  Siala ni i ndang adong be sipangambati tu ulaon patupahon pandidion tu nasida tu bagasan goar ni Jesus Kristus (Ulaon 10: 47-48). 

Masa i atik pe so tardidi dope nasida. Dos do on tu pengalaman ni si Saulus na dididi dung diampehon si Ananaias tanganna tu ibana asa digohi Tondi ibana (Ul 9: 17-18). Pengalaman ni sahalak Etiopia tar marasing, i ma digohi Tondi i dung tardidi (Ul 8: 39). Pengalaman ni halak Samaria pe unik: Atik pe naung tardidi alai ndang digohi Tondi Porbadia. Sialana i ma ndang diampehon dope tangan ni apostel Petrus dohot Johannes tu nasida (Ul 8: 14-17). 
 
Asa, adong pengalaman na imbaru masa tu si Kornelius dohot tu sude pangisi ni bagasna nang angka naung niontangna manangihon jamita ni apostel Petrus. Adong pengalaman partondion na imbaru na so mangihuthon na somal masa. Adong paradigma na imbaru. Adong barita na mansai uli situtu dipamasa Debata tu angka bangso na so marsunat, i ma: Dipasaut Debata sangkapNa na naung sinurirangkonna marhite panurirang Joel, i ma: HASASAOR NI TONDI PORBADIA dohot HAUUSE NI SILEHONLEHON NI TONDI tu nasa daging, panta sarka, ndang holan tu bangso na marsunat, i ma bangso Jahudi, alai tu angka bangso na so marsunat dope, tu halak Italia, tu angka halak Romawi, ndang di Jerusalem, alai di Kesarea.  Songgop Tondi i, use silehonlehon ni Tondi i tu na so marsunat, marhata sileban.

Catatan: Di angka huria na parjolo i, ndang holan marhata sileban ianggo tanda ni na naung digohi Tondi Porbadia, alai bahat nari (Ida: 1 Korintus 12: 4-12; Roma 12: 6-8, Ef 4:7, 11-16). Alai tutu, di bona ni hasasaor ni Tondi i, marhata sileban na diantusi na tumangihonsa di hata nasida, i do sada silehonlehon ni Tondi na parjolo masa (Ul  2:4). Ra ala ni i do umbahen na sanga adong sian tongatonga ni angka na porsea di kota Korintus na mamereng silehonlehon marhata sileban tumimbo sian silehonlehon na asing. Alai dipatingkos apostel Paulus do i marhite suratna tu nasida: Dos be do arga ni silehonlehon ni Tondi i. Gariada tahe, laho manjagahon unang gaor parsaoran ni na porsea na martangiang, ba diajari ibana nasida asa molo adong na marhata sileban alai ndang adong na menerjemahonsa, ba unang ma dipatupa i di tongatonga ni parsaoran. Tuk ma di bilutna sandiri di bagasna. 

Nuaeng on ndang sude huria di portibion na manangihon po dani apostel Paulus i. Jala ndang sude huria na mangalehon kesempatan tu na marsilehonlehon marhata sileban patupahonsa di tongatonga ni parsaoran partangiangan ni na porsea. Masiargaan be ma.
I do na masa i. I do binaritahon ni dokter jala evangelis Lukas tu na manjaha  barita i. Jala i do na ingkon baritahonon ni ganup na porsea di portibion nuaeng, songon panghuling ni tema ni jamitanta: "Nunga Dilehon DebataTondi Porbadia tu Nasa Bangso."

I do na manongtong masa sian dekade paopathon abad parjolo di Kesarea sahat tu tingki on, ndang holan tu angka bangso na mian di bagasan huaso kekaisaran Romawi, alai dohot do tu angka bangso na di duru ni i; ndang holan tu angka bangso na adong di benua Eropa mamungka sian abad na parjolo, alai dohot do tu angka bangso na adong di angka benua na asing; ndang holan tu angka bangso di angka negara na ideologina mangongku na adong Debata, alai dohot do tu angka bangso na so mangongku na adong Debata; ndang holan tu angka bangso na naung manomba sada rumang ni panombaon tu Debata na so dos tu panombaon tu Debata na pinatupa ni nasida na marugamo  na maherbang di dohot siang angka pinompar ni si Abraham (Judaime, Hakristenon, Silom) alai dohot do tu angka bangso na marpanombaon tu Debata na sinomba ni na marugamo na tolu i, alai dohot do na marasing sian i, na bahat ruasna dohot na tung otik situtu ruasna, na robi dohot na imbaru; ndang holan tu tongatonga ni angka bangso mamparhatobanhon bangso na asing, alai dohot do tu tongatonga ni angka bangso na pinarhatoban ni angka bangso na asing; ndang holan tu tongatonga ni angka bangso na naung maju secara demokratis, filosofis, parbinotoan teknologi na marragam i,  ekonomis, sosial nang budaya, alai dohot do tu angka bangso na mangolu dope di angka negara na  dohot totalitarian,na marsiajar jala martumbur secara demokratis, na demokratis secara fungsional dope menuju tu na esensial, na so pola sude dope rakyatna umboto angka ilmpu pengetahuan modern, angka bangso na pogos, dst. Nunga dilehon Debata TondiNa tu angka bangso, so ingkon marnida songon dia latar belakangna be. Jempek hata: Tu nasa daging, tu nasa bangso, ethne, tu nasa jolma, panta sarka.  Dohot do nang tu halak Batak na marragam i. 

Barita na uli on, barita na gabe saor, na disonggopi, na dimiani  Tondi ni Debata na sun Badia i nasa daging na mian di bagasan  dosa i, nasa bangso songon dia pe latar belakangna, mansai uli do di tongatonga ni partingkian ni jolma sian tingki tu tingki, dohot nang di tingkinta nuaeng, sian inganan tu inganan, dohot do di ingananta nuaeng di portibio  na sada on, na tong dope jala na jotjot dope didalanhon, dipengaruhi dohot diuluhon angka pribadi, punguan dohot bangso na marnida bohi, na holan mamingkirhon kepentinganna sandiri, dirina sandiri, na sai mamereng na asing tumoru sian dirina, keluargana, kelompokna, punguanna, dohot bangsona. 

Asi ni roha ni Debata na olo songgop tu bangso na so marsunat, na so songon halak Jahudi ruhutruhut parugamoon, ruhutruhut habadiaonna, ruhutruhut parmanganonna dohot parsaoranna, i do sipapujipujionta di minggu parningotan di hasosonggop ni Tondi i. Jala domu tusi do ingkon tulahon ni angka na naung diparsaori Tondi ni Debata i do pangantusion, pamingkirion, pamerengon na mambahen mardingkandingkan jolma i, angka bangso i idaon, na segregasionalis.  Nang di tongatonga ni huria ni Kristus i pe, na so jadi adong jala loason pangantusion, pamingkirion, pamerengon na mardingkan maradophon angka na porsea i, ruas nang pangula ni huria. 

Siala ni i, ganup na marpesta marningot hasasaor ni Tondi Porbadia ingkon: 
Muba ma ibana molo marasing pamerengonna tu donganna jolma, donganna sabangso, donganna sahuria saleleng on, na marnida nasida tumoru sian dirina songon inganan parsaoran ni Tondi Porbadia i; 

Lam magodang jala matoras ma di pangantusion taringot tu hasasaor ni Tondi Porbadia i; 
Tapuji ma Debata ala nunga diusehon Ibana TondiNa nang silehonlehon ni Tondi na marragam tu hita, tu hita ganup angka ruas pamatang ni Kristus, gabe tarjou hita Ibana dohot hata: Amang! Abba! (Roma 8: 15); 
Tahangoluhon ma ngolu na diparsaori, digohi dohot diuluhon Tondi naung marsaor nang mian di tongatonga ni dagingta on, unang be taoloi muse mangaloas pamatangta on diuluhon tondi parhatobanon tu manang aha pe. Tahangoluhon ma ngolunta na ginohan ni Tondi ni Debata i manghobasi donganta jolma sadenggandengganna.(*)
  BeritaTerkait
  • Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita

    5 bulan lalu

    Oleh: Pdt Dr. Robinson ButarbutarA. Dihasiholi Debata asa marlas ni roha jolma i.Songon angka na porsea ni Debata Sitompa, Sipalua, Siparmudumudu ngolunta sian bortian ni dainang sahat tu sadarion, ta

  • Jamita Evangelium, Minggu Jubilate, 22 April 2018: Marlas ni Roha di Bagasan Tuhan i (1 Tessalonik 2: 13-20)

    4 bulan lalu

    Oleh: Pdt Dr. Robinson Butarbutar, Sian Parsameanta, STT-HKBPJubilate = Marolopolop tu Debata Sandok Tanoon1.Molo tajaha surat 1 Tessalonika on sian bona sahat tu ujung, tangkas situtu do digurithon&n

  • Jamita Minggu V dung Trinitatis, 1 Juli 2018 Evangelium: Markus 16: 14-20 "Mamaritahon Barita Nauli tu nasa Natinompa"

    2 bulan lalu

    Ndang mansohot turgas mamaritahon barita na uliSian di bonana i sahat tu nuaeng, sian abad parjolo dung hehe Jesus Kristus sian hamatean sahat tu na naung hundul Ibana di siamun ni Debata Ama i di ban

  • Minggu IX Dung Trinitatis, 29 Juli 2018: Evangelium, Mateus 16: 24-28 "Gabe Sisean Namarsihohot Mangihuthon Jesus"

    3 minggu lalu

    Oleh: Pdt Dr. Robinson Butarbutar, Parsameanta, STT-HKBP1.Sian tingki tu tingki, mamungka di tingki mangula di Palestina dope Tuhanta Jesus Kristus nidonganan ni angka siseanna na sampulu dua i s

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    12 bulan lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet