• Home
  • Opini
  • Jamita Evangelium Minggu IV Adven 24 Desember 2017, Lukas 1: 26-38: Debata Ro Mamboan Asi ni Roha"
KSP Makmur Mandiri
Minggu, 24 Desember 2017 08:46:00

Jamita Evangelium Minggu IV Adven 24 Desember 2017, Lukas 1: 26-38: Debata Ro Mamboan Asi ni Roha"

BAGIKAN:
Ist
Pdt Dr Robinson Butarbutar
Oleh: Pdt. Dr. Robinson Butarbutar, Sian parsameanta, STT-HKBP Pematangsiantar

Di minggu Adven paopathon sadarion, marhite barita nauli sinurathon ni parbarita nauli jala teolog Lukas di bindu 1 ayat 26-38, dipatolhas tu hita ruas ni huria na mangolu di era informasi digital, taringot tu songon dia Debata pamasahon sangkapNa na mansai balga tu hajolmaon, i ma mamboan asi ni rohaNa tu hajolmaon. Sangkap na balga i, nunga leleng dipabotohan Ibana marhite angka panurirangna sian tongatonga ni bangsoNa bangso Israel andorang so dipamasa Ibana sangkapNa i, jala sangkapNa nabalga i nunga masa, tongon masa, jala manontong masa di ariari na ro on di tongatonga ni hajolmaon mamungka di abad na parjolo sahat tu nuaeng, jala tu tingki na naeng ro, I ma marhite AnakNa sandiri (Heber 1: 1-2). SangkapNa i dipamasa Ibana parjolo marhite hatutubu ni Jesus. 

Dung i marhite ulaon ni Jesus i di Palestina jala dung i marhite Tondi Porbadia.  Na pinatolhas ni Lukas 1: 26-38 on, i ma sada hamamasa andorang so tubu Jesus, i ma  sada panghataion ni surusuruan na sinuruNa dohot si Maria parNasaret na so tumanda (Jaha: Na so marhasohotan dohot) sada baoa  dope, na naeng pangkeon ni hagogoon ni Debata pasauthon sangkapNa, i ma mamboan asi ni rohaNa i. 

Hamamasa ni sangkap ni Debata i patuduhon adong dua na berperan, i ma Debata na marhagogoon dohot Maria na mamereng dirina songon naposo ni Debata na olo pangkeon ni Debata pasauthon sangkapNa. Molo ndang manangkapi dohot mangula Debata marhite hagogoonNa ndang adong ro asi ni rohaNa. Alai molo ndang rade jala olo si Maria pangkeonNa pasauthon sangkapNa i tong do ndang saut  sangkapNa i. Ndang mamaksa Debata tu si Maria, alai dipatorang Ibana ma parmasa ni sangkapNa i marhite si Maria dohot sada panghataion na unduk tu ruhutruhut ni panghataion na denggan (manabi, mandok unang mabiar, mangalusi sungkun-sungkun hajolmaon, patorangkon, paposhon roha ni si Maria manghaporseai hagogoon ni Debata).

Dia ma na pinatorang ni Debata marhite surusuruanNa i, jala songon dia ma angka alus ni si Maria tu hatorangan pinatolhas ni Debata i?

Parjolo, patorang isi ni sangkapna tu si Maria jala songon dia ma bahenonna patupahon i:
Dapotan asi ni roha ni Debata do si Maria, ai pangkeonNa ma Ibana patupahon sada sangkap na balga na sian Debata (ayat 30).

Gabegabean ma ibana ndang marhite jumolo mananda sada baoa, alai dung songgopan ni Tondi Porbadia dohot linggomon ni hagogoon ni Na Sun Timbul i, jala tubuhononna ma sada dakdanak, goar silehononna tu dakdanak i Jesus (Heber: YESHUA). Asa, atik pe ndang tubu sian sada baoa na so manopot ibana, ndang anak na ramun ibana, alai anak na badia do ia Jesus i, ai Anak ni Debata do ibana (ay 31, 36).

Lehonon ni Debata ma tu dakdanak situbuhononna i habangsa ni si Daud laho mangarajai pomparanna , jala marharajaon saleleng ni lelengNa (ay 32-33). Atik pe didok tu si Maria na tu pomparan ni si Daud do harajaan ni Jesus i saut, alai taida di pardalanan ni tingki dohot do tong harajaanNa i tu angka pomparan ni angka bangso na asing di portibion. 

Saleleng ni lelengna do harajaan ni Jesus i. Tangi ma hita dison.
Molo tung pe ndang tarbahen pingkiran ni jolma mangantusi na naeng masa i, alai tarbahen Debata do dia na mangihuthon pingkiran ni jolma ndang tarbahen masa (ay 37). Ai tar suman jala domu tusi do umbahen na nunga dipatupa Debata tong tu si Elisabeth sisolhot ni si Maria halongangan bolon, i ma atik pe digoari na hol do ia si Elisabeth, alai uju manghatai surusuruan i tu si Maria, nunga 6 bulan naung denggan pamatang ni si Elisabeth (ayat 37).

Paduahon, atik pe dibonana i tarsonggot jala mabiar si Maria, jala di parsitongaan disoarahon ibana sungkunsungkun dalanna mangalusi isi ni hata ni surusuruan i binegena i, alai di ujungna dijangkon ibana do sangkap ni Debata mamangke ibana pasauthon sangkapNa mamboan asi ni roha tu jala marhite si Maria tu tongatonga ni hajolmaon, i ma manubuhon Jesus, Yeshua (ayat 29, 34, 38): "Naposo ni Tuhan i do ahu. Sai saut ma tu ahu songon na nidokmi" (Ay 38).

Asa sian Lukas 1: 26-38 i, songon jamita di minggu Adven IV on, tung tangkas do marsaringar sangkap haroro ni asi ni roha ni Debata tu hajolmaon. Dipabotohon Ibana do sangkapNa i marhite surusuruan, jala patupaonNa ma i marhite tondiNa dohot hagogoonNa na so tardungdung pingkiran ni jolma. Alai hasasaut ni sangkapNa i masa ala olo si Maria manjangkon asi ni roha ni Debata tu ibana, i ma pangkeonNa ibana manubuhon Jesus.

Ala ni i, denggan do rimangrimangonta na mangihut on:

Manang piga jom andorang so tapestahon pesta parningotan ni hatutubu ni Jesus annon bodari, ringkot situtu do tapabagas barita na uli taringot tu Debata na mamboan asi ni roha tu ngolunta marsadasada, tu ngolu ni huriaNa, tu ngolu ni bangsonta. Gari asi ni roha na balga situtu marhite haroro, hatutubu nang ulaon ni Jesus, na so tardungdung ni pingkiran ni jolma dipatupa Ibana, ba lam ma asi ni roha ni Debata na taharingkothon di ngolunta siganup ari na boi tupa bahenonnta marhite angka dalandalan ni ngolu na tarbahen ni jolma patupahonsa niurupon ni Debata. Debata na ro mamboan asi ni rohaNa, ndang mamboan uhum, ringkot do baritahon jala auhononta sadarion.

Na boi do idaonta dua dalan pinangke ni Debata laho pabotohon dohot pasauthon sangkapNa tu dirinta:
Surusuruan ni Debata na pabotohon sangkap ni Debata tu jolma marhite dalan na mansai denggan, i ma mian di bagasan ruhutruhut ni panghataion na denggan (i ma padaohon biar) mangalusi sungkunsungkun ni sibege barita, dohot paposhon roha ni naumbegesa marhite haporseaon na togu di hagogoon ni Debata. Mansai kreatif jala teologis do surusuruan ni Debata i. Molo dipangke Debata hita songon surusuruanNa, ringkot hita marsiajar sian si Gabariel on.

Tiruan binahen ni si Maria, i ma ndang manjangkon boti, alai mamangke kebebasanna manungkunhon sungkunsungkunna, jala dung tangkas mangantusisa ba manjangkonsa, mangaloas dirina pangkeon ni Debata pasauthon sangkapNa marhite dirina, rade mandok: "Naposo ni Tuhan i do ahu. Sai saut ma tu ahu songon na nidokMi."

Na boi bahat do angka ulaon ni Debata na gok asi ni roha tu hajolmaon na tongon mardangol dohot tu portibion na tongon mangae sian angka tangan ni jolma na manegai, alai boi do sundat i ala lam moru, ndang lam martamba, angka anak ni jolma i, di tongatonga ni huria i nang di masyarakat, na so rade pangkeon ni Debata patupahon asi ni rohaNa, ala hira so tardungdung hita/nasida i didok rohana, hira na so tarbahensa, hira mission impossible, ala ndang porsea Ibana di hagogon ni Debata na patupaonNa marhite ngoluna. Alai molo lam godang songon si Maria, ra tumibu do moru angka parsoalan ni ngolu ni hajolmaon di jabu, di masyarakat nang di portibion. 

Tutu ndang tasomba si Maria, songon na binahen ni angka donganta sian horong hakristenon na asing pangantusionna sian hita, alai keteladanan ni si Maria i, mansai ringkot do rimangrimangonta. 
Pdt Dr. Martin Luther mangajarhon tu angka siihuthon gerakan reformasi binahen ni Tondi ni Debata marhite dirina songon on: Ia angka naung dipatigor Debata tu diriNa marhite Jesus Kristus nunga bebas nasida, alai di tingki na dos naposo ni Debata do nasida patupahon angka na denggan tu hajolmaon sadenggandenggana, alai dipatupa nasida i ndang asa tigor jala tumigor nasida di jolo ni Debata. Taingot ma I songon ruas ni HKBP di minggu Adven paopathon on: Suraon do leleng situtu bangsonta Indonesia hupatop maju ala bahat sian tongatonganta na ro rade pangkeon ni Debata songon naposoNa mamboan asi ni rohaNa tu bangsonta?

Ringkot situtu tangkas antusanta tona ni Debata tu hita laho mamangke hita gabe ulaulaNa na taida songon asi ni rohaNa tu ngolunta. Alai di ujungna ingkon sahat ma nian hita tu alus na positif! Unang torus mangarimangrimangi. Unang holan na marpingkirpingkir, mardiskusi. Ingkon sahat do tu mangoloi dohot mangulahon sadenggandengganna.

Jesus na naeng tubu i: Tutu na tinubuhon ni si Maria do Ibana, alai Jesus, Anak ni Natumimbul i do Ibana, na badia. Dung tarimangrimangi na parjolo dohot napaduahon di ginjang i, ingkon sahat do hita tu pangarimangrimangion partondionta mardomu tu  hadirion ni Jesus on.  Di diri ni Jesus do sangkap asi ni roha ni Debata i nunga masa, tongon masa, naeng masa. Ia Jesus i, dakdanak na tubu sian dalan ni Debata na so tardungdung pingkiran ni jolma i do. Ulaon ni Jesus pe songon i do.

PangjarionNa pe ndang dos tu na niajarhon ni angka pangajari haporseaon nang ruhutruhut ni ngolu ni angka donganna satorbang nang angka pangajarion ni angka na bisuk nuaeng. NapinatupaNa paluahon hita sian hamatean, sian dosa dohot sian parange na robi be marasing do sian na naung jala na naeng patupaon ni jolma. Ala ni i, ringkot do talehon rohanta tu bayi ajaib on, Jesus na tubu sian sangkap asi ni roha ni Debata, dohot marhite hagogon ni ni Tumimbul i. Lam tamba ma haporseaonta tu hatimbulon ni Debata patupahon asi ni rohaNa tu dohot marhite hita di ulaonta siganup ari, songon naung pinatupana marhite Jesus Kristus Sipaluanta i.(*)

  BeritaTerkait
  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    10 bulan lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    11 bulan lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"

    9 bulan lalu

    Oleh: Pdt Dr. Robinson Butarbutar, Parsameanta, STT-HKBP1.Panghataion ni Jesus dohot siseanna sandiri dung sidung mangula di bagas joro na di Jerusalem i do turpukta on (24: 1, 3), i maudut ni panurir

  • Jamita Borngin Parningotan ni Hatutubu ni Jesus Kristus 24 Desember 2017, Pukul 19.30 "Jangkon ma hapataron ni hahomion ni Debata."

    7 bulan lalu

    Oleh: Pdt Dr Robinson Butarbutar, STT HKBP Pematangsiantar1. Ndang tarbahen sude naporsea ra marpungu dohot angka donganna na porsea di bagasan borngin on tanggal 24 Desember 2017, laho mamuji Debata

  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

    10 bulan lalu

    Oleh: Pdt Dr Robinson Butarbutar, Dosen STT HKBP1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet