• Home
  • Opini
  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari
KSP Makmur Mandiri
Minggu, 03 September 2017 11:05:00

Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar, STT-HKBP, 0812-62472015

I. Pamuhai
1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na magodang na ro tu Hakristenon sian Hasipelebeguon, migor sai diparsiajari do ngolu na imbaru ni angka naung tardidi i. Ala ni i do umbahen na dung lam mardalan Hakristenon Batak sahat tu tingkion, sai ditonahon do tu angka natoras na mamboan dakdanakna tu pandidion na badia i, asa sai ditogutogu nasida angka ianakkonna manghangoluhon ngolu Hakristenon. Di liturgi pandidion i disungkun pandita do pangoloion natoras mamodai ianakkonnasida asa umboto hata ni Debata dohot marsuru nasida tu gareja dohot parguruan ni Huria Protestan asa 'gabe ruas na mangolu di Tuhan Jesus Kristus nasida.' Laos diuduti huria i ma dung pandidion pangajarion angka dalan laho mamastihon marhangoluan ngolu na marparbuehon haporseaon. Tu angka parguru manghatindangkon haporseaon (Kelas Sidi) sai diajarhon do i patik na sampulu i jala impola ni patik i, i ma manghaholongi Debata dohot dongan jolma dos. Di na manghitandangkon haporseaon i nasida disungkun do manang na olo nasida manghangoluhon haporseaon na sintong i songon na tarsurat ni padan na robi dohot padan na imbaru.

2. Laho patangkashon songon dia ngolu siganup ari ni angka naung tardidi tu bagasan goar ni Debata Sitolusada i di bona ni Hakristenon di rura Silindung, dipatuduhon Pandita L.I. Nommensen ma i marhite na patupahon parhutaon na Kristen, i ma Huta Dame. Disi ma diajar-ajari ibana songon dia ma halak Kristen Batak na ro sian Hasipelebuon manghangoluhon haporseaon nasida di ngolu siganup ari: Songon dia manamburnamburi haporseaon marhite na manjaha hata ni Debata di jabu siganup ari, nunut martangiang tu ibana, songon dia mangula songon partani, parpinahan, partiga-tiga, songon i nang songon parhobas di pemerintahan; songon dia mangadopi parsalisihan, songon dia pasohon parhatobanon, songon dia mambahen na denggan tu angka na pogos, tu angka na marsahit, songon dia papistarhon parbinotoan, i ma marhite parsiajaran taringot tu portibion marhite na marsiajar manurat, manjaha, maretong, parpingkir dna. Sian Huta Dame ma maherbang ngolu Hakristenon tu angka huta na asing, asa tung tandi songon dia ma ngolu ni Hakristenaon di tonga-tonga ni ngolu nang adat Batak di rura Silindung dohot angka luat na asing di residen Tapanuli. Songon i ma di bonana. Dung maherbang Hakristenon di Tapanuli Raya, jala sian i muse tu angka propinsi na asing sian partingkian penjajahan sahat tu kemerdekaan, laos tu tingki porang revolusi, orde lama, orde baru nang reformasi mulai 1998, sai marusaha do halak Kristen Batak patuduhon di ngolu nasida hataridaan ni haporseaon nasida tu asi ni roha ni Debata na manghaholongi nasida.

Ala sai mubauba do jaman, sai tongtong do diparsiajari halak Kristen Batak songon dia ma nasida manghangoluhon haporseaon nasida di partingkian na mubauba i, mangadopi angka partondion ni partingkian na tupa ndang sai saurdot tu ngolu Hakristenon
marojahan tu panindangion haporseaonta na marojahan tu hata ni Debata, i ma na di Bibel Nabadia i.

3. Songon i do nang na pinatupa ni Apostel Paulus di suratna na tinongosna di taon 56 tu angka na porsea di Jesus Kristus na mian di kota Roma, ibukota ni Kekaisaran Romawi, tu angka na porsea sian tonga-tonga ni halak Jahudi dohot na so Jahudi, na mangolu rap dohot hira-hira sajuta pangisi ni kota Roma na marroan sian huta dohot bangso na asing songon hatoban, angka na bebas, angka warga negara Romawi, angka nasangap jala na gogo sian tonga-tonga ni penguasa politik, militer dohot penguasa. Ngolu ni pangisi ni Roma mardalan mangihuthon angka nilai-nilai ni budaya Romawi dohot nilai-nilai ni kekaisaran Romawi na hierarhis, martirket-tirket, i ma Tuan Hatoban, kelompok-kelompok suku, bangso, ugamo, jala porang do manaluson musu dohot patupahon hadameon dohot hademahon. Uju i di taon 56, ala di taon 49 dung do diusir Kaisar halak Jahudi (dohot do halak Kristen Jahudi disi) sian kota Roma siala ni na masa hagaoran di tonga-tonga nasida na marsoal taringot tu Krestos, ndang apala godang torop ni halak Kristen di Roma uju i. Hira-hira 200 halak. Ummotik do torop ni halak Kristen Jahudi martimbangkon halak Kristen na so Jahudi. Disurathon apostel i suratna i tu nasida asa tung dasip pangantusion nasida taringot tu isi ni haporseaon di Hakristenon, jala asa diurupi nasida ibana mamaritahon barita nauli tu Eropah, i ma tu Spanyol.

4. Andorang so sahat ibana tu na patolhashon songon dia halak Kristen di Roma mangolu disi, i ma mamungka di bindu 12 sahat tu bindu 15, songon dia nasida mangolu maradophon dongan sahaporseaon, songon i nang maradophon angka na so sahaporseaon, na tupa ndang manghalomohon nasida, gariada mamusui nasida, jolo dipatorang ibana do impola ni haporseaon ni halak Kristen, na marasing sian haporseaon ni parugamo Jahudi nang parugamo na asing. Impolana i ma: "Holan marhite haporseaon tu ulaon ni Jesus marhite mudarna di silang i do boi tigor jolma pardosa di jolo ni Debata. Haporseaon i pe sian asi ni roha ni Debata do dipalumehon Tondi Porbadia ni Debata tu angka na manangihon barita na uli taringot tu panghophopon Jesus marhite mudarna i (3: 26-28, patudos 10: 14-17). Di bagasan ngolu ni naporsea, dipatuduhon ma i marhite pandidion nabadia i (6: 3-4), na marlapatan rap mate dohot Jesus dohot hehe tu ngolu na imbaru do na tardidi i. Naung tardidi i ingkon mate do tu, jala ndang be rajaan ni dosa i (6:9-14). 

Beha nama nasida mangolu? Parjolo, ndang be mangasahon patik, songon na pinatupa ni halak Jahudi, alai mangasahon panogunoguon ni Tondi Porbadia (8: 1-17). Paduahon, mamelehon sandok ngolu nasida tu Debata (Roma 12:1). Patoluhon, marngolu imbaru dung dipauba pingkiran nasida. Ai marhite na paubahon pingkiran nasida ma tau nasida manimbangi dia lomo ni roha ni Debata, i ma angka na uli, na hinalashonNa, angka na
sun denggan (12: 2)."

5. Songon dia mamelehon ngolu tu Debata marhite paubahon pingkiran ni ngolu naung dipaimbaru i di ngolu siganup ari maradophon dongan sahaporseaon dohot dongan jolma saluhutna, i ma na dipatorang di bindu 12: 3-15:21. Di bindu 12: 9-21 i, dua horong dongan jolma i do na sai dipaandar: Dongan sahaporseaon, dohot dongan na so sahaporseaon, dongan jolma saluhut. Molo tapamanat ndang marimbar impola ni ruhut-ruhut parsaoran tu nasada dohot tu na asing. Impolana diondolhon di ayat 9 dohot 21: "Unang ma marpangansi holong ni roha i. Hagigihon ma na jat; Pareak ma na denggan" (9). Gariada tahe di pangujungi diondolhon: "Unang ma talu ho dibahen 3hajahaton, alai taluhon ma hajahaton i marhite na denggan."

Nilai manang prinsip parsaoran tu ganup dipaandar sada-sada. Jala impolana ndang dos be ruhut-ruhut ni parngoluannasida dohot ruhut-ruhut ni ngolu ni Romawi na ginoaran di ginjang i, i ma: Tuan-Hatoban, parmusuon/parporangan na mamangke ruhut pamaloson. Gariada gabe parholong tu sude do ngolu ni na porsea i.

6. Naparjolo, adong opat nilai dohot prinsip parsaoran maradophon dongan sahaporseaon di ngoluon, i ma angka ruas ni pamatang ni Kristus na sada i, ganup dapotan silehonlehon (ida 8: 3-8) 

(a) Masijoloan patupahon holong (Gorik: philadelphia) tu sama dongan sahaporseaon marhite na masijoloon masipasangapan (ayat 10, patudos ayat 16).

(b) Rap masitumpahan tu angka na diharingkothon (Batak: Hasea; Gorik: chreiais) di tonga-tonga ni parsaoran ni angka nabadia (ayat 13).

(c) Marringgas ni roha na so sumurut mangoloi (Gorik: douleuontes) Tuhan i (ayat 11)

(d) Marpartondion na 'marlas ni roha mangkirim, marbenget ni roha di haporsuhon, jugul martangiang (ayat 12).

7. Mansai ringkot do on parataratonta di parsaoran ni ruas nang pangula ni huria ni HKBP.

(a) Ndang be manang hot dope masipaimaan hita pasangaphon dongan songon dalanta manghaholongi nasida, di jabu (ama tu ina, ina tu ama, natoras tu dakdanak, dakdanak tu natoras, na marhaha maranggi), di keluarga besar (dalihan natolu), di ulaonta be songon partani, parpahanpahanan, pardengke, partigatiga, pegawai negeri nang swasta, sipil nang militer/polisi, horong professional, pamarenta nang rakyat)? Manang sabalikna dope hita pasangaphon dongan holan saurdot tu tirket sosial, politis, ekonomis songon tuan-hatoban di Romawi i sambing? Nunga intap ni sadia dao hasomalan masijoloan masipasangapan, asa lam uli parsaoran di tonga-tonga ni HKBP di huria marsada-sada nang hatopan, sian haha tu anggi, anggi tu haha, na mariboto, sian keluarga na sada tu keluarga na asing, sian huria na sada tu huria na asing, sian resort na sada tu resort na asing...?

(b) Ndang be manang hot dope masipasombuon manarihon na ringkot di tonga-tonga ni punguan ni naporsea i hita, manang nunga ganup parsidohot marguru tu silehonlehon ni Debata di ngoluna be? Sotung dipasombu napogos so adong pangurupion na mararti isara ni mangurupi nasida martumbur di haporseaon, boi marhatauon padalanhon ngoluna, boi marmodal na metmet marhite koperasi nang marhite na patauhon nasida mamasuhi dalan tu permodalan ni usaha na metmet dohot na menengah?

(c) Ndang dope manang nunga be sai tapatujulo ringgas mangoloi Tuhan i? So tung na asing dope taoloi, isara ni angka hagiot ni daging ni ngolu na robi i, so tung angka na mandok tu hita ibana/nasida do Debata?

(d) Nunga sahat hita jala hot dope hita marpartondion na 'marlas ni roha manghirim di ngolu siganup ari uju ndang masa dohot uju masa parungkilon na metmet tu na balga situtu, na tartuhuk dohot na tahilala ndang tartuhuk be siala ni boratna? Nunga targoar jala hot hita di jolo ni Tuhan i nang donganta sahaporseaon marbenget ni roha do hita uju taadopi haporsuhon i di ngolunta marsada-sada dohot marsapunguan? Manang nunga jotjot hita mandate ala ni porsukna, pola mansoadahon asi ni roha ni Tuhan i tu hita, ala holan hita do manghilalasa, tung so adong be panurdukon ni tangan apulapul nang pangurupion sian donganta? Nunga sahat hita tu na manggoari dirinta na jugul jala hot jugul martangiang nang di tonga-tonga ni partingkian na mandok ndang ringkot be na martangiang i, ndang ala tahilala ndang tarida di ngolunta ulaon ni Debata na mangalusi tangiangta, alai dohot do ala na naung bahat jala ra di tingki na so leleng be nunga tar sude angka na ringkot di ngolunta songon jolma on targohi hita sian gogo nang hapistaranta? Manang nunga sabalikna, nunga tatadingkon be ngolu na martangiang i, ai didok rohanta, bahat dope siulaon asing ni na martangiang i, ulaon na mangurupi hita dapotan ngolu-ngolu, dohot ulaon marmeam, mangulon marjom-jom, marlibur? Siala ni i ndang be tahangoluhon ngolu partangiangan di bagas nang ulaonta, ndang be parsidohot di partangiangan rap dohot angka dongan di lungguk/sektor, parmingguon, ujungna di sada tingki gabe ndang mian be Tondi nang hata ni Tuhan i di ngolunta, gabe ro ma pitu tondi nahodar na jumahat sian tondi na hodar na parjolo na pinabali ni Jesus Kristus siandirinta.

8. Napaduahon, adong dua nilai dohot prinsip ngolu maradophon angka dongan so sahaporseaon, na so patupahon na jat dohot na patupahonsa tu hita: Patupahon na denggan tong tu nasida:
 Tu dongan jolma di portibion

(a) Marlas ni roha dohot angka na marlas ni roha, tangis dohot angka na tangis (ayat 15). On ma na ginoaranna solidaritas hajolmaon.

(b) Sada rap dongan jolma, serep, ndang manghilala tumimbo manang umbisuk sian nasida (ayat 16). On ma na mansai ringkot di portibi, negara, masyarakat, inganan ulaon na plural, na majemuk. Tu dongan jolma na manusai hita (paburuburu, patupahon na jat) adong tolu:

(a) Hita ndang gabe sumber konflik, alai paujunghon konflik marhite na patupahon dame intap ni tarpatupa hita maradophon halak saluhutna (ayat 18)

(b) Ndang mamurai alai mamasumasu na paburuburu hita (ayat 14)

(c) Ndang mamaloshon na jat alo ni na jat, alaimangharingkothon na denggan di jolo ni saluhut (ayat 17, 21), ndang marlulu dompak nasida, alai mangaloas Debata patupahon rimasna tu nasida (ayat 19). Gariada tahe mangalehon musu mangan uju male, minum uju mauas, songon dalan pagukguk gara tu simajujungna (ayat 20)

9. Ringkot do songon huria ni Kristus na mangolu jala mangula di masarakat global dohot masyarakat nasional Indonesia na majemuk, di partingkianta di dekade paduahon abad paduapulusadahon on, di na lam martubuan ma ketegangan dohot konflik ala ni kompetisi mambuat na ringkot tu diri sandiri (marsasahalak, marsamarga, marsahoum, marsabangso, marsahaporseaon), ndang be laho patupahon kelangsungan ni ganup dohot sude (jolma nang angka na asing na adong di portibion) hita HKBP, na marsangkap gabe pasupasu di portibion, mangulahi pabagashon parbue ni haporseaonta mangasahan asi ni roha ni Debata i di parsaoranta dohot angka donganta jolma. Ingkon sungkunonta do songon dia do hita marsaor saleleng on dohot tu joloan on dohot ganup donganta jolma?

(a) Nunga sahat hita tu solidaritas na standar, na timbo, molo masa marragam parungkilon niadopan ni angka donganta jolma, intap ni gogonta, i ma marhite na manososi pamarentanta nang DPR/DPRDnta asa mangulahon ulaon solidaritas tu warga negaranta di tonga-tonga ni bangsonta nang warga negara na asing di portibion, marhite pangurupion na karikatif (sahali di sada hamamasa), alai lumobi marhite angka kebijakan na berkeadilan sosial, patupahon angka kebijakan na patauhon angka na pogos boi parsidohot berekonomi, songon na binahen ni Presiden Jokowi di Indonesia on di taon 2017 marhite angka programna parsidohothon napogos?

(b) Nunga tuk hita saleleng on, jala lam taeahi ma hot, ndang mamaloshon angka na so denggan dohot na jat sinangkapan dohot pinatupa ni angka na manghasogohon hita ala mangihuthon Kristus di tonga-tongan ni bangsonta dohot secara transnasional, alai
garida mamasumasu nasida, patupahon na denggan tu nasida marhite na manoarahon dohot mangusahahon asa uhum na marharajaon, jala parsidohot mangotapi angka uhum dohot pelaksanaan uhum na saurdot tu ojahan ni negara Indonesia, i ma Pancasila dohot UUD 1945, dohot Negara Kesatuan Republik Indonesia. Molo tapasombo i di ujungna gabe puntar jala ribak ma abit hasadaon Indonesia, susa ma ngolu ni sude, songon hinasusa ni ngolu ni angka donganta jolma di Afganistan dohot di Syria nang Irak.

III. Panimpuli

10. Lam tadalani abad padua pulu sadahon on, lam taida ma hinabahat dohot hinamaol ni tantangan siadopan ni halak Kristen manghangoluhon haporseaonna ganup ari songon na pinatolhas ni apostel Paulus i. I do hita. I do hajolmaonta na imbaru. So pola ingkon manghilala na sumurung hajomaonta sian na asing, tagogoi ma patupahon hata ni Debata sinurathon ni apostel Paulus i maradophon donganta sahaporseaon dohot maradophon donganta saluhut. Debata ma donganta patupahon i sude siala ni asi ni rohaNa tu hita, asa di ujungna lam boi tardungdung hita visi ni HKBP na imbaru, i ma gabe pasupasu tu
portibion.(*)
  BeritaTerkait
  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

    11 bulan lalu

    Oleh: Pdt Dr Robinson Butarbutar, Dosen STT HKBP1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    11 bulan lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    11 bulan lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    10 bulan lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"

    9 bulan lalu

    Oleh: Pdt Dr. Robinson Butarbutar, Parsameanta, STT-HKBP1.Panghataion ni Jesus dohot siseanna sandiri dung sidung mangula di bagas joro na di Jerusalem i do turpukta on (24: 1, 3), i maudut ni panurir

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet