• Home
  • Opini
  • Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"
Kamis, 09 November 2017 08:56:00

Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"

BAGIKAN:
Ist
Pdt Dr. Robinson Butarbutar
Oleh: Pdt Dr. Robinson Butarbutar, Parsameanta, STT-HKBP

1.Panghataion ni Jesus dohot siseanna sandiri dung sidung mangula di bagas joro na di Jerusalem i do turpukta on (24: 1, 3), i maudut ni panurirangion ni Jesus taringot tu na naeng masa sogot jangka pendek (i ma tar37 taon nari), dohot jangka panjang, i ma haroroNa napadua halihon .
  
- Na jangka pendek,  dipaboa Jesus aha na naeng masa tu bagas joro na di Jerusalem i, i ma halelengsena (24:2), aha sibahenon ni angka siseanna molo masa i, i ma mengungsi (4-25, tarlumobi ayat 15-20) asa malua.
- Na jangka panjang,di patorang Jesus tu siseanna i angka na naeng masa andorang  haroroNa napaduahalihon (24: 25-48), i ma haroro ni panurirang pargapgap dohot hamamasa ni tanda-tanda alam dohot kosmis, jala songon dia ma angka siseanna mangadopi i, i ma tongtong dungo (24: 42) jala haposan mangulahon ulaon pinasahat ni indukna di harorona (24: 45-48).

2.  Di bindu 25 on holan tu angka siseanna do panurirangion ni Jesus, sipatupaon nasida mangisi partingkian andorang so haroroNa paduahalihon di jangka Panjang. Dia sipatupaon ni sisean i do silumbahononNa, na mansai ringkot patolhasonNa andorang so dimasuhi Ibana partingkian panaonon di silang i dohot hamamateNa (Mateus 26-27) nang haheheonNa pe tahe (Mateus 28), unang so boti nasida, alai aktif.

3.Andorang so manghatai Ibana dohot siseanNa i, ia ulaon ni Jesus di bagas joro na di Jerusalem i mangulahon ulaon ni panurirangionNa do (21:11), i ma paiashon bagas joro i sian angka panamun (21: 12-22) dohot maminsang angka uluan ni bangso i asa muba. Angka uluan na mangihut on ma na dipinsang ibana: Parjolo, angka sintua ni malim dohot sintua (21:23) na umboto na denggan alai ndang mangulahonsa (21: 23-32); paduahon, angka sintua ni malim dohot Parise (21: 45) na songon pangula ni na mora na mamusa ndang holan angka naposo ni namora i alai dohot do ianakkonna sandiri, na mambahen gabe diunsat sian nasida harajaon i gabe dipasahat tu bangso na asing (21: 33-46), na so olo ro tu pesta ni anak ni raja gabe tu angka na dijumpangi di dalan nama ro tu pesta i (22: 1-14, 15-22); napatoluhon, halak Saduse na so manghaporseai haheheon sogot ala ni holong ni roha nasida di huaso politik (22: 23-33); napaopathon, halak Parise na manirang holong ni roha tu Debata sian holong maradophon na asing di duru ni punguan ni halak Parise (kavurot, 23:34-46); napalimahon, halak Parise dohot siboto surat na mambahen angka patik songon na niantusan nasida alai ndang mangulahonsa (23: 1-39).

Di minggu na salpu, 5 November, minggu XXI dung Trinitatis nunga tabege jamita sian Mika 3: 5-12  na mengkritik angka uluan ni bangso Israel najolo nang uluan ni masyarakat dohot huria  nuaeng na tarunjun mamoro rakyat.  Ai angka i do tong niula ni angka uluan ni bangso Jahudi di partingkian ni Jesus.

4.Asa, boi goaron self-kritik do jamita Mateus 25: 1-13 on tu sisean ni Jesus. Laho pabagashon hinaringkot ni hadungoon nasida dohot parhaposannasida manomunomu haroro ni Jesus napaduahalihon i (24:22, 45-48), unang holan paimahon boti, alai ingkon hobas mangula jala tongtong jaga, asa boi nasida masuk tu harajaon i muse, diajari Jesus ma nasida di bindu 25 on marhite dua umpama, i ma sada taringot tu hinaringkot ni na tongtong dungo rade marmiak na ringkot tu palito di na paimaimahon pangoli  (ayat 1-13), dohot hinaringkot ni naposo na denggan na manjalo arta pinalumehon ni sahalak na naeng marhuta sada, i ma na pagadahonsa, ndang na manabunihonsa  (ayat 14-30). Dung i dipatangkas Jesus ma dalan na pasti lahomasuk tu harajaon banua ginjang i di ari haroro ni Anak ni Jolma i, i ma patupahon na denggan tu sada sian angka angiNa na ummetmet i (ayat 31-46, ida tarlumobi ayat 34, 40, 45) jala marhite i patupahonsa tu Jesus. Na so patupahonsa masuk tu na bernit sisalelengna (ayat 45). Saurdot do on tu ondolan ni evangelium Mateus taringot tu hinaringkot ni mangulahon nasa ajar ni Jesus (7: 21, 26-27, 28:20) songon dalan masuk tu harajaon ni Debata.

5.Sada sian umpama i (ayat 1-13)dipangke Jesus laho patorangkon hinaringkot ni angka siseanNa i manongtong jaga, dungo, aktif (ayat 13, patudos 24: 42), i ma taringot tu hinabisuk nilima boruboru na mamboan miak rap dohot palitonasida laho manomunomu pangoli i, na sigop di parro ni pangoli  i di tonga ni  borngin na bagas. Nasida do gabe bongot tu hasampuran rea (ayat 4, 10) ndang songon na lima nari na so mamboan miak, garida na tarpodom (4- 5), na gabe ingkon laho manuhor miak di parro ni pangoli i (ayat 10), panghorhonna gabe didok pangoli i tu nasida dung ro sian na manuhor miak i na so dung ditanda ibana nasida (ayat 11-12), sada hata na mansai posi laho paingothon angka siseanNa na tumangihon hataNa. 
Di ayat 10 hata Gorik pinangke ni panurat evangelium Mateus i ma pestapajongjong parsaripeon, gamous, ndang apala songon terjemahan ni Bibel Batak, hasampuran rea. Nian masuk tu hangoluan na manongtong manang  masuk tu harajaon ni Debata do sinangkap ni Jesus marhite umpama pesta pangoli  (ayat 1, 10).

6.Asa, molo di tingki manurirangkon halelengse ni bagas joro na di Jerusalem i dung mengkritik angka uluan di bagas joro i, dipangido Jesus do angka siseanna asa mengungsi (Mat 24: 15-18), alai di na mangarade nasida manomunomu haroroNa na paduahalihon,marhite umpama taringot tu dua rumang ni boruboru na manomunomu pangoli i, dipangido Jesus do nasida asa dungo, aktif, ndang passif, songon 5 boruboru na aktif mamboan miak nasida rap dohot palitona, gabe dohot marpesta, ndang songon 5 boruboru na asing na so mamboansa gariada tarpodom, marsigantung tu na asing, gabe ndang diloas masuk, gariada gabe targoar na so tinanda ni pangoli i nasida, atik pe diusahahon nasida mangalap miak i, alai tarlambat, ndang marguna be.

7. Boasa sangkap ni Jesus marhite umpama lima boruboru na dungo dohot na so dungo dipapillithon tu hita angka siseanNa nuaeng on, angka naposoNa di tonga-tonga dohot sian tongatonga ni huria ni Kristus , songon i nang angka naposoNa na mangula di portibion nuaeng? Suraon do ala sai adong dope sian tonga-tonganta na songon silima boruboru na so bisuk i, gabe marpogos hita, gabe sumber masalah hita, ndang sipasidung masalah, gabe ndang tarida na anak harajaon i do hita? Sotung maon ummotik manang lam moru sian tongatonganta na mamillit langka songon silima boruboru na bisuk i, siala ni ragam ni bonsir, isara so rade marsiajar, so rade marguru, manghilala umpistaran sian na asing, manang gabe madabu tu bangko margudompung, bangko marsigantung tu naasing, tu pangurupion ni na asing? 

So tung maon adong sian tonga-tonganta na songon donganta ruas ni huria di kota Tessalonika di abad parjolo i na gabe mansohot mulaulaon, laos gabe boban na dokdok tu angka dongan nasida di na paimaimahon haroro ni Kristus na paduahalihon? 
Sotung maon nunga tarunjun manang lam dao hita sian bangko na denggan, i ma bangko kreatif, reformatif, dohot innovatif mangalului alus tu bahat sungkun-sungkun ni hajolmaon taringot tu songon dia ma asa boi lam denggan ngolu ni jolma i nuaeng, gabe holan na mamingkiri aha na naeng masa dung mate hita, ndang be mamingkiri dia ma jala angka dia ma dalan mangisi ngolu nuaeng di portibion? So tung maon ndang ringgas be angka natoras nang dakdanak mangalului dohot parbinotoan laho mangalean alus tu angka sahit ni hajolmaon, angka sahit sosial dohot na asing, dohot angka masalah ni hajolmaon nang lingkungan hidup di partingkianta nuaeng?

Di partingkian ni Kristus di Palestina mansai bahat do parungkilon ni hajolmaon na hinabosanNa marhite ulaon na mamaritahon harajaon ni Debata, pamaluhom na marsahit, pabalihon tondi na hodar, mangajari lomo ni roha ni Debata. Torus do angka siseanNa mamolus angka abad dohot di angka inganan na marragam sian abad parjolo sahat tu nuaeng na patupahon ulaon na dos atik pe marasing rumangna. 
Di abad pa-21-hon nuaeng, hot dope diadopi hajolmaon tantangan klassik na mangihut on: Anturaparon, sahit, porang, ketidakbahagiaan ni ngolu (na so adong sonang ni roha), dohot hamatean, nang angka sahit sosial (nuaeng di hita HIV dohot AIDS, penyalahgunaan Narkoba, dna). 

Tahalashon do na lam tumimbo parbinotoan ni jolma marhite angka ilmu teknologi (bio technologi laho paadonghon sipanganon, technologi masin, computer, internet, robot laho mangorui hinaloja ni jolma mulaulaon, dohot ilmu managemen dan transformasi konflik laho mangorui dohot pasohothon porang na mamunu jolma, mangorui krisis pengungsi dna, dohot parbinotoan psikologis laho mangurupi jolma mangadopi parungkilon harohaon dohot pamingkirion). 

Di tonga-tonga ni sudena i, dijou Tuhanta do hita asa mangula disi, parsidohot patupa na denggan di ngolu hajolmaon asa boi marsipanganon dohot marsiinumon, moru konflik di bagasta, di humaliangta, nang di portibion, boi lam dapot angka ubat tu sahit, jala terjamin pangubation ni penduduk ndang marimbar angka na pogos, jala lam malum sahit harohaon ni jolma marhite angka parbinotoanta, lam maju pendidikan ni bangsonta, lam aman jala lam sada negaranta, lam mardohar. Ingkon aktif ma hita disi, tarlumobi mangalehon nasa parbinotoan nang gogonta asa angka na ummetmet di tonga-tonganta boi mangolu denggan (Mat 25: 31-46). 

Lam hiras jala margogo, jala tatangiangkon ma angka ruas ni HKBP aktif mangula di angka ulaonnasida be, ndang holan asa boi nasida sandiri mangolu denggan, alai asa lam boi nasida marhite ngolu nang ulaon nasida patupahon na denggan tu angka dongan nasida jolma, marhite angka ulaon na kreatif, inovatif, konsisten, benget, kompeten, diojahi roha na gok holong, asa marhite tangan, pamingkirion, hata nang ulaonta lam ditanda angka na di humaliangta na Jesus Kristus i do Mesias, jala nang hita boi dapoton ni Tuhanta i tongtong dungo, jala jaga, marhite angka ulaonta be na aktif, mangula. Lam martamba ma angka ruasta na patupahon i, na  tarbarita goar nasida dohot na so tarbarita pe tahe. Ai i do dalan na dumenggan mamastihon na angka naung pinalua dohot pinamasuk ni Tuhanta Jesus Kristus do hita tu harajaon ni Ama i. I do dalan dohot tandana na mangolu di bagasan habisuhon dohot haporseaon do hita angka ruas ni HKBP.

8.Dipargogoi Tuhanta ma ganup ruas ni huria ni Kristus na marsaor di HKBP patupahon i sude, pangaradeion jangka panjang na gok bisuk, na mangharingothon stamina jangka Panjang, di panomunomuon di haroro ni Tuhanta asa tangkas situtu na ia ruas ni huria ni HKBP marsangkap do gabe pasupasu tu na humaliangta, di dia pe hita mangolu dohot mangula.(*)
  BeritaTerkait
  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    2 bulan lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    3 bulan lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

    2 bulan lalu

    Oleh: Pdt Dr Robinson Butarbutar, Dosen STT HKBP1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    2 bulan lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium Minggu XIII Dung Trinitatis Hesekiel 33, 7-9 Dipabangkit Gabe Siparorot

    2 bulan lalu

    Oleh: Pdt Dr. Robinson Butarbutar, STT HKBP Pematangsiantar1. Sian tingki tu tingki, di sandok inganan, ngolu nang ulaoon ni jolma i, di bagasan huria ni Kristus na ummetmet dohot huria hadomuan, mang

  •   komentar Pembaca
    Copyright © 2017 Pelita Batak Online