• Home
  • Opini
  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"
KSP Makmur Mandiri
Minggu, 24 September 2017 08:03:00

Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar, STT HKBP

Molo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di angka ulaon na marragam i, tarlumobi di duru ni jabu, tarida ma tangkas songon dia ronsot ni jolma i manggulmit. 

Molo dipatuduhon tu hita pargulmiton ni jolma i hatop di jolo ni simalolongta, olo do mirdong hita mamerengsa. Sian manogot ni ari sahat tu borngin di angka kota-kota na balga i, ronsot do panggulmiton ni jolma i. Di kota  na metmet pe molo taida manogot ni ari i, tung mansai ronsot do jolma i manggulmit. Disi, di tonga-tonga ni panggulmiton ni jolma na mansai ronsot i, mansai bahat do ulaon ni jolma i. 

Mansai bahat do diparungkilhon jolma i, na tarida, na dihatahon, na disurathon, dohot na so dipatolhas jolma i tu manang ise pe. Bahat situtu di roha ni jolma i na pinarungkilhononna. Ndang adong na tuk umboto angka i. Molo tapingkir-pingkiri angka i, angka parungkilon ni jolma i, olo do hita gabe marsak. Jala olo do hita gabe rintik. Alai bahat do jolma di portibion na mamingkir-mingkiri angka i di bagasan roha, di bagasan pingkiranna.  Olo do siala ni i gabe ndang marhiras ni roha ibana mangolu. Panghorhonna gabe dokdok dihilala ibana ngolu on. Gabe naeng tadingkononna ngolu on. 

Andul asing sian pamingkirion na songon i, i ma pamingkirion na mamingkir-mingkiri angka pargulmiton ni ngolu ni jolma i di portibion, na boi mambahen jolma i gabe manghilala di hinadokdok i ngolu on, di bagasan minggunta sadarion, dijouhon tu hita asa mamingkir-mingkiri, parataratahon, paboaboahon, pajojorhon, mamuji-muji, marolop-olop di, pasangaphon, mangendehon di bagasan roha, tondi, nang ngolunta ganup ari ro di saleleng ni lelengna taringot tu hadirion, ulaon, hatimbulon, hamuliaon, denggan basa, hinauli ni asi ni roha, ulaon halongangan na pinatupa dohot jinadihon ni, dohot hinalambat ni tarrimas ni DEBATA Jahowa i.

Ngolu dohot parange ni ngolu na songon i do na tarida di jala pinatupa ni angka na manghaporseai hinaadong dohot ulaon nabalga pinatupa ni Debata di portibion, tarlumobi di ngolunasida songon angka na porsea. I do na pinatuduhon ni sahalak na mananda Debata, na solhot tu Debata, dohot na mangongku ulaon ni Debata di ngoluna, i ma Raja Daud. Ngolu dohot parange ni ngolu na songon i do na tarida di ngolu ni angka na porsea di sandok portibion sian na jolo sahat tu saonnari. Ngolu dohot parange ni ngolu na songon i do na pinatupa ni angka na manomba Debata sitolusada i di pardalanan ni huria ni Kristus sian abad na parjolo sahat tu saonnari: Mamuji-muji, pajojorhon, paboaboahon, parataratahon, mangolophon, mamujimuji, mangendehon hadirion, ulaon,  pambahenan, asi ni roha, hagogoonna, hatitimbu ni goarNa, habalgaon ni ulaon ni Debata di hasiangan on, di ngolu ni hajolmaon saluhutna dohot marsada-sada. 

Ndang holan angka pargulmiton nang parsorion ni hajolmaon na di portibion na so habilangan i dipingkirpingkiri, diparatarata dohot dipaboaboa angka na porsea di hadirion ni Debata laos lonong disi, alai hatimbulon dohot pambahenan ni Debata do, jala diendehon. I do na tarida di buku na badia i, Bibel i. I do na pinatuduhon ni angka parPsalmen: Dipatolhas do angka parsorion ni ngolu ni jolma, alai di tonga-tonga ni i di papapujipuji do angka pambahenan na balga na pinatupa ni Debata di ngolu parsorion ni jolma i. Di ngolu ni bangso ni Debata songon na tarsurat di Bibel i, di ganup partingkian ni ngolu nasida, sai diingot, diparata-rata, dipaboaboa, dipapuji-puji do angka pambahenan ni Debata na balga i, na mambahen sai tong marhiras ni roha nasida di ngolu on, sai tong marpanghirimon ngolu nasida. Di ganup angka sundut nasida, sian sundut tu sundut, sai dipapuji-puji angka pambahenan na gogo na pinatupa ni Debata di ngolu nasida.

Ala ni i do tong nang di angka ende ni huria ni Kristus di portibion, sian bona sahat tu nuaeng, sai dipaboa-boa do di ende nasida taringot tu hadirion ni Debata, tarlumobi  taringot tu asi ni rohaNa, hinalambatna tarrimas, alai dohot do tong taringot tu  pambahenan ni Debata na balga na paluahon jolma i sian angka na mambahen nasida marungkil, mandate, mate. I do na pinatupa ni angka buku  Ende ni sandok huria di portibion. Bahat situtu do disi angka pamujion taringot tu ndang holan hadirion ni Debata, alai dohot do taringot tu pambahenan ni Debata.

Buku Endenta i pe, Buku Ende ni Huria Kristen Batak Protestan, dibonai do i dohot ende na manjouhon hita asa ringgas mamujimuji Debata nang ulaonNa di ngolunta: 

BE 1, ayat 1: "Ringgas ma ho tondingku, mamuji Debatanta i; ai diparmudumudu ho unang halupahon i: Disesa do dosamu, didaoni sahitmi. Diudut do hosamu, diburi tondimi. Huhut diapulapul roham na marsak i; asa tung lam humibul mingot uhumNa i."

Ayat 4: "Tung asi ni rohaNa sambing do na manongtong i; Saleleng ni lelengna di tonga huriaNa i; di surgo habangsaNa hinaliangan ni, sude parhaladoNa na sun badia i, na sai tongtong mamuji pasangap Tuhan i. Ho pe tondingku, puji tongtong goarNa.

BE 10, 1: Hupuji hupasangap Ho, Amang pardenggan basa; ai jadijadianMu do, sude angka na masa; ditompa Ho sasude, dagingku ro di tondi pe, pinuji ma goarMu.

Ayat 4, "Tongtong pasangaponku Ho, saleleng au mangolu. Paratarataonku do barita ni goarMu. Pamatang dohot tondingki ingkon mamuji sangapMi; pinuji ma goarMu.

Ayat 5, "Antong ro ma hamu sude saluhut na porsea. Marolopolop hita be mamuji Debatanta; Na sun denggan do sasude, binaen ni Debatanta i: Pinuji ma goarNa."

BE 13,1: Nda tama endehononhu, goar ni Debatangki? Nda tama halashononhu denggan ni basaNa i? Ai sun holong ni rohaNa mida au pardosa on; diramoti do tongtong, naposoNa saluhutna. Holong ni rohaNa i, nda tung hasuhatan i...

Ayat 5, "Dohot haporseaonku dilopokkon Tuhanhi. Tu bagasan ni rohangku patiurhon dalanki. Asa sahat musengani  au tu hangoluan i, na rade di surgo i di sude na manjalahi. Holong ni rohaNa i, nda tung hasuhatan i."

Ayat 8, "Ganup ari do disesa Debatangku dosangki. Ndang hea gotos rohaNa maniopi rimas i. Nang pe ingkon pinsangonNa au dibahen dosangki. Ndang maposihu disi uhum na nidabuhonNa. Holong ni rohaNa i nda tung hasuhatan i."

BE 15,1: Aut na saribu haliganda, saringar ni soarangki. Naeng nasa gogo bahenonhu, mamuji Debatanta i. Paboa las ni rohangki, hinorhon ni pambaenNa i.

Ayat 3, "Unang ma modom ho tondingku, sai ngot ma ho sae hehe ma. Radot ma ho di ulaonmu, sai puji Tuhan Debata. Sai pangke nasa malomi, mamujimuji Tuhan i.

Ayat 8, "Sai pujionhu do basaMu saleleng na mangolu au. Pasangaponhu do goarMu saleleng na marhosa au. Maradu  tos pe hosangki, naeng pujionhu sangapMi.

Sipujionta do Debata naung manjangkon hita gabe anak dohot boruNa di bagasan Jesus Kristus, taoloi do gabe sada huria na marende, jala bahat do sian tonga-tonga ni ruas ni huria i na gabe parende na denggan di portibion, nang di tonga-tonga ni bangsonta.

Alai di na parade jamitaon, tubu do sungkun-sungkun di partondionku sungkun-sungkun on: Boasa di minggu-minggu XV dung Trinitatis on ingkon panghulingon ni Debata hita sahali nari asa olo hita songon raja Daud mamuji-puji goarNa, hatimbulonNa, hinauli ni jadi-jadianNa, hagogoonNa na sumurung, denggan ni basaNa na mansai uli i?

Suraon do di tondinta, di parsaoranta, di pangakataionta nunga gumodangan tahatahon angka parsorionta sian angka pambahenan ni Debata na uli i?
Suraon do ala nunga sumurut hita na marningot, mamuji-muji hadirion, hatimbulon, habalgaon ni ulaonNa siala ni na naung pagodanghu rohanta mamingkiri na di portibion, laos gabe didondoni i hita, gabe marpogos tondinta, gabe marsahit pamatangta, gabe agoan panghirimon hita, gabe hira na holom taida portibion, hira na so bungka be pingkiranta di ngolu on, gabe sai didondoni arsak hita, gabe ndang be tubu angka roha na tuk mamereng tu jolo, agoan prakarsa, agoan inovasi hita on, gabe madabu hita tu parange na mangaloas mardalan boti tingkinta so marguna? 

Suraon do ala naung dipangan tondi ni zaman on hita, i ma tondi rejim humanisme, na mangondolhon gogo dohot hapistaran ni jolma i laho mangalo angka parungkilon ni jolma i, i ma anturaparon, sahit/epidemi, porang, hamatean dohot na so adong roha na sonang marhite hatitimbo ni teknologi bio, medis, nano, dohot hapistaran artifisial, hapistaran masin na pinatupa ni jolma I, na ummalo sian jolma I sandiri, jolma na mambahen angka i? 

Suraon do ala naung ndang tahaposi be Debata, gabe dirinta ma na tahaposi, songon naung pinatolhas ni sahalak filsuf sejarah ni Israel, Yuval Noah Harari di bukuna na godang dituhor halak taringot tu hamalooon ni jolma i mangadopi sandiri angka parungkilonna, Homo Deus: A Brief history of Tomorrow (London: 2015/2016 = Jolma Debata: Sada Sejarah Najempek taringot tu sogot?

Suraon do ala ndang apala ringgas ruas ni HKBP mamuji Debata di tingkion siala ni na so haru tangkas be di ngoluna pangurupion ni  Debata tu ibana, manaluhon angka tantangan di ngoluNa, i ma na lima i: Hurangan di sipanganon/siinumon dohot ulaon na so haru sukses, mala padokdokhu teanon, sahit na mandondoni ngoluna, angka parsaoran di keluarga nang ulaon na so gok dame alai gok paraloan, hamatean ni ruas ni keluarga, dohot na so adong sonang ni roha di ngoluna? 

Molo di tonga-tonga ni sada sian na tolu i do ngolunta, ringkot do auhononta muse sahali nari haporseaon naung sinuanhon ni Tondi Porbadia i tu hita halak Kristen Batak, i ma haporseaon na mandok: "Mangolu jala mangula do Debata sahat tu nuaeng on, mandongani angka na porsea i di ngoluna, mandungdung angka sinta-sintana, songon i nang mangadopi angka na ingkon siadopanna di ngolu on." Di bagasan haporseaon na songon i do barani parpsalmen mangongku hata on di Psalmen: 
"Donok do Jahowa di sude angka na manjou Ibana, tongon tahe di sude angka na manjou Ibana di bagasan hasintongan. Ibana mambahen lomo ni roha ni angka na manghabiari Ibana, jala dibege do anggukangguk nasida i, jala dipalua nasida" (Psalmen 145: 18-19)

Molo ringgas hita di ari-arinta di minggu on mangongku haporseaon na songon i, tarbahen hita ma mandok tu tondinta hata na gabe topik ni jamitanta di minggu on: "Tung  so tardodo do hatimbulon ni Jahowa" ala di pargulmiton ni ngolunta tahilala, taida tangan ni Debata na gogo i mandongani hita mandalanhon ngolu na pinalumehonna tu hita: Mangalului na ringkot asa boi hita mangolu mardohar, manarihon dirinta, donganta saripe, ianakonta, dohot patupahon na denggan tu donganta jolma na adong di humaliangta, mandungdung sinta-sintata be, mambangun Indonesia Raya on rap dohot angka donganta sabangso, gabe bangso na berdaulat, bermartabat, berbudaya.(*)
  BeritaTerkait
  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    2 tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    2 tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

    2 tahun lalu

    Oleh: Pdt Dr Robinson Butarbutar, Dosen STT HKBP1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    2 tahun lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    2 tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb