• Home
  • Opini
  • Jamita Evangelium, Minggu Quasimodogeniti 8 April 2018: Parmahani Ma Birubiru ni Debata
KSP Makmur Mandiri
Sabtu, 07 April 2018 23:56:00

Jamita Evangelium, Minggu Quasimodogeniti 8 April 2018: Parmahani Ma Birubiru ni Debata

BAGIKAN:
Ist
Pdt Dr Robinson Butarbutar
Oleh: Pdt Robinson Butarbutar, Sian Parsamenta, STT-HKBP.

Dung hehe Jesus sian hamatean, andorang so manaek Ibana tu banua ginjang, andorang so ditonai Ibana angka siseanna laho tu sandok portibion mamaritahon barita na uli tu sandok portibion, disangahon Jesus do pataridahon diriNa tu angka siseanNa laho patoguhon nasida manguduti ulaon naung pinungkaNa rap dohot nasida. Uju mangan nasida di topi tao, dipangke Jesus Kristus ma kesempatan i pasahathon sada tona na mansai arga tu sada sian angka  i di jolo ni angka sisean i marhite sada panghataion na marimpola. 

Isi ni panghataion i gabe ojahan na mansai togu di ganup na mangihuthon Jesus di sandok portibion mamungka sian abad parjolo sahat tu tingki on dohot tu tingki na naeng ro, i ma ojahan ni ulaon parmahanion.  Nian, tona i dipasahat tu apostel Petrus, alai mamungka sian i nunga gabe tona tu sandok siihuthon Jesus. Nian tona i dipasahat tu sada sian angka sisean na naung hea mansoadahon Jesus di na mangadopi tekanan, na pataridahon hatauon ni Jesus paimbaruhon panjouon tu si Petrus, alai tona i nunga gabe tona tu ganup na porsea di sandok portibion, manang di dia pe nasida mangolu dohot mangula. Tona i di bonana dipasahat tu sahalak sisean na di ngolu nang di ulaonna satia padalanhon tona i sampe pola mate tarsilang ibana di silang na humansit sian na tinaon ni Jesus, i ma di silang na balik hapeahanna. Pat na tu ginang, simajujungna tu toru. 

Tona i gabe sada sian angka ulaon marsintuhu ni angka sisean i di portibion, i ma ulaon marmahani. Asa, di sandok portion, ndang holan ulaon mamaritahon barita na uli ulaon ni ganup sisean i, alai dohot do ulaon marmahani. Angka naung manjalo ulaon mamaritahon barita na uli, gabe angka ruas ni pamatang ni Kristus dohot ruas ni harajaon ni Debata ingkon do di parmahani. Gariada tahe, na hinangkam ni ulaon parmahanion i patupaon ni angka siihuthon Ibana ndang holan sian angka sisean tu angka sisean, alai dohot do sian angka sisean tu angka birubiru ni Debata di portibion na adong di duru ni huria i, songon na nidok ni Tema ni jamitanta, "Parmahani ma angka birubiru ni Debata" di portibion. Tona i disoarahon tu angka siseanna nuaeng di tongatonga ni portibion na lam diroro angka tondi na so saurdot be tu lomo ni roha ni Debata, i ma tondi na mambahen parasingan tu angka jolma na marasing haroroanna, latar belakangna. Tona i ndang holan ingkon patupaon ni angka sisean i di tongatonga ni huria i alai dohot do di tongatonga ni portibion, manang i dia nasida mangula. Ala ni i ndang singkop be  dalan manghaholongi Jesus holan mamaritahon barita na uli. Ingkon dohot do disi ulaon parmahanion. 

Marmahani marlapatan manghaholongi Jesus. Marhite ulaon haparmahanion ni angka parmahan pinabangkit ni Jahowa i diparmahani angka parmahani jala dihaholongi Debata Parmahan na denggan roha i ma angka birubiruNa i. 

Sian Johannes 21: 15-19 i na mangihut on ma angka impola ni ulaon parmahanion i:
Marmahani birubiru ni Debata dalan manghaholongi Jesus
Mansai tangkas do diondolhon Jesus tu apostel Petrus dohot tu hita na ia ulaon parmahanion i I do dalan manghaholongi Jesus. Pola tolu hali dipasahat Jesus tona i tu ibana.

Ulaon Parmahanion na komprehensif

Isi ni parmahanion i  ndang pejet, alai na singkop, na komprehensif, jala holistik. Tarida do i sian dua hata na pinangke ni Jesus tu ulaon parmahanion. Di terjemahan hata Batak dohot hata Indonesia ndang apala tangkas i. Batak: Parmahani ma. Indonesia: Gembalakanlah. Tolu hali dipangke hata na dos. Alai di hata Gorik ndang dos hata na pinangke ni Jesus. Di bona dohot di ujung,  manang di tona parjolo dohot di tona na patoluhon hata boske do dipangke, na marlapatan, "lehon mangan."

Dipatupa angka parmahan i do angka ulaon na mamastihon asa boi mangan, jala manganhon angka sipanganon di angka jampalan na lomak.  Di tongatonga, i ma di tona na patoluhon dipangke hata poimone, marlapatan 'parmahani', na marlapatan manjagai angka na pinormahanan i sian angka mara, sian angka babiat panoro.  Asa, ulaon parmahanion i ndang holan mangalehon mangan di pangantusion mameme, alai dohot do patauhon na hea dimeme i asa boi mangalului sipanganonna sandiri, jala mamillit sipanganon sipanganonna sandiri. Alai laos dohot do ulaon parmahanion i ma ulaon manguluhon tu ngolu na denggan dohot manjagai asa unang madadu tu bagasan parmaraan, gariada paluahon sian tongatonga ni parmaraan, paluahon na pinarmahanon i sian tangan dohot baba ni babiat. Dohot do ulaon marmahani I ma ulaon mamboan tu jolo, tu na denggan, tu na hinalomohon ni roha ni Debata, jala manait sian parmaraan.

Sude do siparmahanon i, na metmet nang na balga
Adong dua hata na dipangke Jesus manggoari birubiru i. Naparjolo, arnia mou (birubiruku na metmet, birubiruku naposo, Inggris:  my lamb, angka anak ni birubirungku). Terjemahan hata Batak i laho mangondolhon angka birubiru na ingkon sarihononhon dope, angka na so boi mangalului sipanganonna dope, angka na ingkon jagaon dope. 

Napaduahon, ta probata mou, angka birubiruku (Inggris: My Sheep, my goat). On ma angka na naung magodang, angka na naung boi mangurus dirina. Alai duansa arnia mou dohot ta probate mou i, tong do ingkon parmahanon (Dipangke do tu duansa hata boske dohot poimone).  Ndang holan angka ruas ni huria nang angka birubiru ni Debata na metmet i ingkon lehonon mangan dohot jagaon, alai dohot do nang angka naung magodang, asa unang lintun tong na sida, unang dipangan angka babiat panoro i, ai nang angka birubiru na magodang dohot do tonggi panganon ni angka babiat panoro i. 

Hinaringkot ni ulaon parmahanion di tingki on

Ala godang dope na so dapotan sipanganon
Molo taida  pengalaman haparmahanion pinatupa ni huria di portibion sian tingki na salpu sahat tu tingkion, gumodangan do ulaon parmahanion i dipatupa angka huria tu angka parngoluon partondion, i ma mangalehon mangan angka huria i di sipanganon partondion, asa martumbur, hipas jala magodang haporseaon ni ruas ni huria ni Kristus i di Debata, di gogoNa, di pandonganionNa, di panarihononNa, di pangaramotionNa, dna. Alai mamungka taon 1960-an nunga ingkon dohot sipanganon pardagingon ni ruas ni huria i sarihonon ni angka ulaon parmahanion ni huria i. Siala ni i gabe dohot ma angka parmahan di huria na marragam i, sian ama dohot ina di jabu, angka sintua, angka pangula nagok ulaon patauhon ruas ni huria asa boi jongjong di ginjang ni patna sandiri, asa boi mangalului sipanganonna. Ndang holan di angka inganan na dao sian pusat-pusat ekonomi dohot industri, alai dohot do nang di inganan na so ris kesempatan di halak mangalului na ringkot di ibana, ndang holan siala ni na hurang tau manang hurang skillful manang piga jolma i, alai dohot do ala hurang modalna laho mulaulaon manang marusaha. 

Parpudi on, isarana, ndang holan di negara-negara na pogos na di Afrika isara ni Namibia dilehon pamarenta bantuan tunai tanpa bunga tu na pogos, alai dohot do di negara na mora isara Swiss marhite na ginoaranna bantuan tunai tanpa bunga. I do dalan ni negara i manarihon angka na metmet laho marusaha asa boi dapotan sipanganon na denggan di ngoluna, asa boi ris tubu jala magodang pertumbuhan ekonomi.

Na ringkot di hita i ma, ingkon tuk do ulaon haparmahanion na mangalehon mangan angka birbiru i patauhon nasida dapotan sipanganon dohot mangalului sipanganon na ringkot di ibana. 

(b) Ala godang situtu parmaraan

Di tingkinta nuaeng mansai godang do parmaraan na ro tu angka birubiru ni Debata, ndang holan sian angka bencana-bencana alam dohot konflik nang porang, alai dohot do di dohot sian angka suhisuhi ni ngolu na aman, di jabu nang di duru ni jabu, di inganan ni ngolu nang di inganan ulaonta be, ndang holan ro sian angka na boi taida dohot na taprediksi alai dohot do na so tarida dohot na so taprediksi, ndang holan di na mangalului na ringkot di ngolu na mansai mendasar, isara mangalului na ringkot di sipanganon dohot siinumon nang parabiton, alai dohot do di na mangalului na ringkot di ngolu na dumenggan isara parjabuon, manarihon na ringkot di ngolu ni dakdanak, dohot na ringkot dung suda gogo, mangalului na ringkot mangadopi parsahiton, songon i nang na marusaha, mamungka sian usaha na mansai metmet situtu, sahat tu na marusaha na balga, na umbalga, dohot na mansai balga, ala mansai godang ketidakstabilon di portibion di bidang ekonomi, politik, cuaca, nang sosial dohot budaya. Ndang sai rade, tau, cekatan dohot togu angka ruas ni huria ni Kristus i di portibion manadopi angka probahan na mansai di  duru dohot di bagasan ngolu nasida. Sai adong do na so rade. 

Marasingasing do hatauonna be. Siala ni i do diharingkothon angka parmahan na denggan roha. Nasida na mangadopi angka ketidakstabilan ni kondisi ni ngolu i na ingkon siparmahanon ni angka parmahan di bagasan huria i.

Ise na gabe parmahan i? Jotjot do didok angka huria i na ia parmahan i ima angka partohonan. Alai nunga ingkon meret hita sian pangantusion na songon i sambing molo naeng godang sidungdungonta di ulaon parmahanion i. Ingkon patauon ni huria i do ganup ruas na mangula songon uluan di jabuna dohot di ulaonna asa tau marmahani, unang baliksa gabe angka siula na maralo tu ulaon ni parmahan di ula nasida, isara mamoru dohot manuhai, mambahen na hansit tu angka na pinarmahanna.

Isara di bahat punguan ni na porsea i di Amerika, nunga sai dipatau angka huria i angka na gabe parmahan di sekor-sektor ni punguan ni huria i. Dipatupa angka pandita do, isarana, angka pembinaan tu angka ruas ni huria umboto songon dia do ulaon marmahani i. Beha manangihon parsorion ni dongan, beha patauon ruas na marsori di ngoluna mangadopi i, unang sai tergantung tu angka parmahan, alai laos hutut mangantusi songon dia marmahani diri sandiri nang dongan nang na pinarmahan. Beha asa parmahan I boi menjaga jarak sian na na pinarmahan i, asa unang siala ni na marmahani dongan gabe dohot parmahan i dipangan angka parungkilon ni na pinnormahanna i, so ingkon gabe padao diri sian ulaon marmahani dongan jolma. Sian i gabe sintong ma diulahon ulaon ni naporsea i ulaonna songon malim na raja. Marhite na patauhon ganup gabe tubu ba godang angka parmahan na denggan. Gabe ndang hurangan angka parmahan punguan ni na porsea i.

Siala ni i, marhite hata ni Jesus tu apostel Petrus asa parmahanonna angka anak ni birubiru dohot birubiru ni Debata i dipasungkunhon hataNa i do nuaeng tu ganup hita asa mamereng tu pudi songon dia hita ganup mangulahon ulaonta be songon parmahan, jala dijou hita mamereng tu jolo asa denggan taula ulaon haparmahanionta tu joloan on:
Tutu jala sintong do taulahon ulaonta songon parmahan mangihuthon ruhutruhut haparmahanion i, i ma mangalehon mangan dohot mangaramoti angka birubiru ni Debata pinasahatNa tu hita, asa magodang nasida di haporseaon jala sejahtera nasida di parngoluan siganup ari, parsaripeon jala profesina? Molo tahilala ndang denggan taulahon ulaon haparmahanionta i, isarana balik ni marmahani, gabe mamoro na taparmahani i ulaonta, songon na diula angka parmahan na jahat ni bangson ni Debata di padan na robi dohot di angka negara-negara na otoriter taula, ba ingkon muba hita.

Ala godang do mara na  ro tu angka birubiru ni Debata di portibion di tingkinta nuaeng, ringkot do tapadasip ulaon marmahaninta, marhite angka pelatihan-pelatihan na menyadarkan ulaon haparmahanion ni ganup na porsea,  alai huhut patauhon hita denggan marmahani.(*)
  BeritaTerkait
  • Jamita Evangelium, Minggu Misericordias Domini 15 April 2018: "Mangolu di bagasan Asi ni roha ni Debata"(Mika 7: 14-20)

    2 bulan lalu

    Oleh: Pdt. Dr. Robinson Butarbutar, sian Parsameanta, STT-HKBP Pematangsiantar.1.Dung songon i tangkas jala bagas di ari Minggu na salpu di panghulingi hata ni Tuhan Jesus Kristus ganup siseanNa mamun

  • Jamita Evangelium, Pesta Parjolo Parningotan ni Haheheon ni Tuhan Jesus 1 April 2018: Gabe Sitindangi Haheheon ni Kristus (Ulaon Apostel 10: 39-43)

    3 bulan lalu

    Oleh: Pdt. Dr. Robinson Butarbutar, Sian Parsameanta, STT-HKBP PematangsiantarBarita nauli taringot tu haheheon ni Jesus Kristus sian hamatean nunga marrumangkun barita klassik di portibion mamungka s

  • Jamita Evangelium, Minggu Jubilate, 22 April 2018: Marlas ni Roha di Bagasan Tuhan i (1 Tessalonik 2: 13-20)

    2 bulan lalu

    Oleh: Pdt Dr. Robinson Butarbutar, Sian Parsameanta, STT-HKBPJubilate = Marolopolop tu Debata Sandok Tanoon1.Molo tajaha surat 1 Tessalonika on sian bona sahat tu ujung, tangkas situtu do digurithon&n

  • Jamita Evangelium, Minggu I Dung Trinitatis, 3 Juni 2018 Pangungkapon 16: 1-7, "Hagogoon ni Huaso ni Debata di Portibion"

    3 minggu lalu

    Oleh: Pdt Dr. Robinson ButarbutarDi angka Minggu dung Trinitatis, ia tinuju ni angka hatani Debata na marsaringar disi i ma patoguhon angka sitangihon jamita asa marsihohot manghaporseai Debata. Disos

  • Jamita Evangelium, 26 Nopember 2017 Minggu Parningotan ni Angka Namonding, Turpuk: Mateus 25: 31-46 "Hangoluhon ma ngolu na manontong i."

    7 bulan lalu

    Oleh: Pdt Dr Robinson Butarbutar, STT HKBPSian mamungka mangula Jesus di Palestina sahat tu na tubu jala maherbang huriaNa di abad parjolo, sahat tu tingki on, nunga tung bagas diboto, dihaporseai, di

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet