• Home
  • Opini
  • Jamita Borngin Parningotan ni Hatutubu ni Jesus Kristus 24 Desember 2017, Pukul 19.30 "Jangkon ma hapataron ni hahomion ni Debata."
Minggu, 24 Desember 2017 15:11:00

Jamita Borngin Parningotan ni Hatutubu ni Jesus Kristus 24 Desember 2017, Pukul 19.30 "Jangkon ma hapataron ni hahomion ni Debata."

BAGIKAN:
Ist
Pdt Dr Robinson Butarbutar
Oleh: Pdt Dr Robinson Butarbutar, STT HKBP Pematangsiantar

1. Ndang tarbahen sude naporsea ra marpungu dohot angka donganna na porsea di bagasan borngin on tanggal 24 Desember 2017, laho mamuji Debata di na marningot hatutubu ni Sipalua i Jesus Kristus. Adong do ra na siala ni marragam alasan na uli, isara ingkon mulaulaon manjagai 
dohot mangubati na marsahit, manjaga keamanan di masyarakat dohot negara, dohot na di 
bagasan pardalanan pe tahe. Alai ganup do marusaha, songon hita on, na marpungu di bagasan 
borngin on marningot hatutubu ni Sipalua i di borngin na badia i. Ai sada hamamasa na mansai 
balga do i di ganup naung tardidi tu bagasan goar ni Tuhanta Jesus Kristus. Panghilalaanta be pe 
digohi las ni roha na so tarhatahon do, manang beha pe kondisi ni ngolunta be. Sian sada huta 
na tung dao situtu sian hariburon sahat tu kota-kota besar na gok hariburon dohot hamoraon 
marpungu do na porsea i paadophon tondina tu Ibana na hatutubuNa tapestahon, i ma Jesus 
Kristus Sipalua i. Digohi halalas ni roha godang na sian ginjang i ma rohanta be.

2. Di na talehon rohanta marningot ari hatutubu ni Sipaluanta i, di bagasan borngin on dijouhon tu 
hita asa "Manjangkon Hapataran ni Hahomion ni Debata" na tarida mamungka ari hatutubu ni 
Jesus i sahat tu nuaeng on di ngolunta be. 

3. Laho pabagashon i, dienet jamita sian surat ni apostel Paulus, na di bagasan pamaritaanNa 
dohot di angka suratna ndang apala ringgas manaringoti hadirion pardagingon ni Jesus, ndang 
marimbar taringot tu hatutubu ni Jesus songon na pinatupa ni angka panurat evangelium
Mateus dohot Lukas, ndang ala so diboto ibana barita taringot tu hatutubu ni Jesus i-ai dung 
do pajumpang ibana saleleng 15 ari di Jerusalem dohot apostel Petrus dung gabe sisean ni Jesus 
na tarlambat tubu ibana (Gal 1: 18) -, alai ibana ma sada apostel na bagas mangalapati parbue 
ni ulaon ni Jesus di hajolmaon. Dia ma naung dipatupa Jesus tu angka bangso na adong di 
portibion? Di surat Roma nunga tung andar do disurathon ibana panghorhon ni ulaon ni Jesus 
Kristus i di ngolu ni hajolmaon, di parsaoran ni jolma i dohot Debata nang dohot donganna 
jolma. Dia ma i? 

Angka on ma:
Parjolo, paluahon na porsea di Jesus Kristus sian angka on:
(i) hamatean na manongtong siala ni dosa na so tarbahen ni manang aha ndang marimbar 
ulaon patupahon patik ni Debata;
(ii) Uhum ni Debata tu pardosa; 
(iii) Huaso ni dosa dohot sian
(iv) Dondonan ni tuntutan ni patik ni Debata na so targohan ni manang ise, dohot
paruarhon na porsea di Jesus sian
(v) Hajolmaon na robi tu hangoluan na imbaru tinuturan dohot tinogihon ni Tondi Porbadia, na 
tarida di parsaoranta dohot dongan jolma na dongan sahaporseaon di bagasan dame,masiargaan, masipasangapon (Rom 1-15).

Simo (buni) hian do i sian partingkian na robi sahat tu na tubu Jesus dohot mangula Jesus Kristus di 
Palestina.

Paduahon, papatarhon hahomion ni Debata di bagasan ngolu nang ulaon ni Jesus Kristus i tu angka 
jolma marhite ulaon ni Jesus nang apostel sandiri di ulaon nasida mamaritahon barita nauli (Gorik: 
euanggelion). Hahomion i nunga leleng dibaritahon angka panurirang, buni di tingki na robi, alai 
marhite hadirion ni Jesus dohot pamaritaanNa nang pamaritaan apostel Paulus nunga patar nuaeng
(ayat 25-26)

Patoluhon, mampargogoihon (Gorik: steriksai) dohot hagogoon (Gorik: dunamis) angka bangso na 
naung manangihon ulaon pamaritaan barita na uli pinatupa ni Paulus nang angka na asing sian abad 
tu abad dung hatutubu ni Jesus asa unduk marhaporseaon (Gorik: hupakoe pisteos, ayat 26) di Jesus 
Kristus i dohot di ulaonNa.

(i) Hagogoon ni pamaritaan ni barita nauli naung pinatupa ni apostel Paulus. Nunga 
dipatupa ibana ulaon mamaritahon barita na uli i mamungka sian na dijou jala ditangkup 
Jesus Sipalua i ibana di ganup kota na di kekaisaran Romawi jala uju manurathon 
suratna i sahat tu naporsea na mian di kota Roma dohot na adong di Eropah. Diuduti 
angka parbarita na uli do i sahat tu nuaeng on.

(ii) Hagogoon ni pamaritaan ni barita na uli pinatupa ni Jesus Kristus uju di Palestina dohot 
marhite angka siseanna dung i. Ulaon mamaritahon barita na uli pinatupa ni Jesus do 
tiruan ni angka parbarita na uli binahen ni apostel Paulus dohot angka donganna dohot 
angka na marsiajar sian ibana: Bungka do barita na uli i tu sandok bangso.

4. Siala ni hapapatar hahomion ni Debata na songon na di ginjang i, i ma na diparar Debata ulaon 
pamaritaon barita na uli pinatupa ni Jesus dohot apostel Paulus manogunogu jolma asa olo 
marhaporseaon di Jesus, dijouhon ma tu hita di borngin Natal on asa patupahon na mangihut 
on:

Parjolo, mamujimuji Debata ro di saleleng ni lelengna, ai hamamahaso na mansai balga do na 
pinatupa ni Debata marhite Jesus Kristus sian hatutubuNa.
Di angka na naung marhaporseaon di Jesus Kristus dohot na naung mandai haluaon naung 
pinatupaNa i, asa di bagasan ngolunta, tarlumobi di bagasan borngin on mamujimuji Debata, 
pasangaphon Ibana di ngolunta be. Molo dipatupa halak Kristen Batak i di roha nang tondina di 
bagasan bornngin on, nunga digohi be visi ni Debata na pinasahatna tu angka parmahan na di 
lading Efrata i: "Hasangapon ma di Debata na di ginjang."

Marragam do dalanta mamujimuji Debata di ngolunta on, i ma marhite 
(i) Pamujion di panombaan tu Ibana rap dohot donganta sahaporseaon manang 
marsasahalak, dohot 

(ii) Pamujion marhita angka ulaonta na denggan tu donganta jolma nang na tinompa na 
asing siganup ari.

Beha do halak Kristen Batak, na najolo sahat tu abad pa-19-hon ndang mananda 
hapapatar ni hahomion ni Debata di ngolunta nang di parsaoranta sama h? Sanga do 
buni hapataran ni hahomion ni Debata na di bagasan Jesus Kristus i sian tonga-tonga ni 

angka Ompunta andorang so ro barita na uli i tu Silindung, residen Tapanuli, dohot di 
angka residen na di humaliangsa, dohot di angka huta nang keluarganta be dung ro 
barita na uli tu tongatonga ni ngolu ni keluarganta be, sian sundut parjolo sahat tu 
sundut parpudi andorang so tardidi hita be tu bagasan goar ni Jesus Kristus.
Siala ni i, denggan do sungkunhononta tu dirinta di borngin Natal on:
(i) Beha do tapatuduhon pamujionta marhite ngolu nang ulaonta be saleleng on dung taruli 
hita di hahomion pinatupa ni Debata tu hita i, tarlumobi dung unduk hita tu joujou 
marhaporseaon tu Jesus Kristus Sipalua i? 

Sotung baliksa tapatupa dope kekerasan di jabunta be, maradophon donganta jolma, 
gabe ndang mamuji goarNa, alai baliksa mambahen marsak Tondi ni Debata. Molo i do 
naung tapatuduhon saleleng on, tama do hita marsak, jala muba tu haimbaruon.
(ii) Molo tarimangrimangi nunga di bagasan dalan ngolu nang ulaon na mamujimuji Debata 
hita saleleng on sahat tu borngin natal on, tauduti ma mamujimuji Ibana dohot 
pamujian nang dalan-dalan ni ngolu na mamuji Debata.
Napaduahon, molo ndang dope taruli hita di hahomion ni Debata I, asa mangjangkonsa ni 
marhite na mamungka manghaporseai Jesus Kritus dohot ulaonna songon na pinatorang ni 
apostel Paulus di Roma 1-15 i.

Songon dia ma i?
(i) Manjouhon ganup na ro marpungu asa manungkunhon tu diriNa manang na naung 
porsea do Ibana di Jesus na tubu i songon sipaluaNa.
(ii) Manjouhon tu ganup na mian dope di bagasan dosa, asa mangido tu Jesus di borngin 
natalon asa paluahonna sian dosa.
(iii) Manjouhon tu na tumangihon jamita on, asa mangolu di ngolu na imbaru tinuturon 
dohot niuluhuon ni Tondi Porbadia ni Debata, na tarida di ngolu marsaor dohot 
donganNa jolma na denggan, na gok dame, na dirajai dame ateatena (patudos Kolosse 
3: 15a). 

Lapatanna, boi do bongin natal tgl 24.12 on gabe borngin hamubaon ni roha, paimbaruhon diri, 
dohot borngin mangalusi joujou ni Jesus marhaporseaon tu Ibana.
Dipargogoi Debata ma hita unduk tu joujouNa mamujimuji goarna di angka naung mandai
hapapatar ni hahomion ni Debata i marhite Jesus Kristus di ngoluNa. 
Dipargogoi ma nang na dijaou Debata unduk marhaporseaon tu Jesus Kristus Sipalua i.(*)

  BeritaTerkait
  • Jamita Evangelium Minggu IV Adven 24 Desember 2017, Lukas 1: 26-38: Debata Ro Mamboan Asi ni Roha"

    2 bulan lalu

    Oleh: Pdt. Dr. Robinson Butarbutar, Sian parsameanta, STT-HKBP PematangsiantarDi minggu Adven paopathon sadarion, marhite barita nauli sinurathon ni parbarita nauli jala teolog Lukas di bindu 1 ayat 2

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    5 bulan lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"

    4 bulan lalu

    Oleh: Pdt Dr. Robinson Butarbutar, Parsameanta, STT-HKBP1.Panghataion ni Jesus dohot siseanna sandiri dung sidung mangula di bagas joro na di Jerusalem i do turpukta on (24: 1, 3), i maudut ni panurir

  • Jamita Evangelium, 26 Nopember 2017 Minggu Parningotan ni Angka Namonding, Turpuk: Mateus 25: 31-46 "Hangoluhon ma ngolu na manontong i."

    3 bulan lalu

    Oleh: Pdt Dr Robinson Butarbutar, STT HKBPSian mamungka mangula Jesus di Palestina sahat tu na tubu jala maherbang huriaNa di abad parjolo, sahat tu tingki on, nunga tung bagas diboto, dihaporseai, di

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    6 bulan lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet