• Home
  • Agama
  • Oloi ma Debata jala Pauba Roham (2 Musa 33: 1-6)
KSP Makmur Mandiri
Jumat, 08 Februari 2019 18:24:00

Jamita Evangelium, 10 Pebruari 2019, Minggu V dung Epiphanias

Oloi ma Debata jala Pauba Roham (2 Musa 33: 1-6)

BAGIKAN:
Dok Pribadi
Pdt Dr Robinson Butarbutar dan istri
Oleh: Pdt. Dr. Robinson Butarbutar, Sian Parsameanta di STT-HKBP Pematangsiantar, Hp/WA: 0812-62472015.

Sian partingkian di na robi sahat tu nuaeng nang tu tingki na naeng ro pe tahe, adong do tolu dalan dipangke hajolmaon mangotapi parange hajahaton ni donganna jolma:

Naparjolo, i ma pasombuhon na naung patupa hajahaton i, ala disura na boi jolma i marsiajar sian hasalaanna, dung i muba sandiri.  Molo tung diulakkon, ba ndang manongtong i. Dung i, ingkon argahononhon do hak-hak azasina. Ndang adong oraora dipatupa tu ibana. Ndang adong uhum. Bebas do ibana. Muba do i muse sian dirina sandiri. Alai taida di pengalaman ni hajolmaon, gumodangan do parjahat na dipasombu, madabu tu hasomalan patupa hajahaton.  Jala lam jahat do ulaon hajahatonna i.

Napaduahon, i ma mambuat manang padaohon manang dia pe na boi mambahen jolma i mangadopi mara.  Isarana, nab oi do angka dakdanak di toru ni umur sahat tumara molo muraura boatonna angka na boi paro mara tu ibana. Isara, gustingmanang piso na tajom naboi muraura buaton ni dakdanak.  Ala ni i padaoon do gusting i sian ibana. Manang, di tingkinta parpudi on laho padaohon angka dakdanak madabu tumara kecanduan internet game, ba dibuat ma sian dakdanak i angka game i, isara di jom tertentu, di jabu nang di inganan marsiajar.  Manang songon angka na tuatua pe tahe, asa unang madabu ibana tu pangunjunan korupsi manang ulaon hajahaton na asing, ba ndang dilehon tu ibana maniop hepeng, manang mangalehon huaso na boi dipangke laho korupsi.

Napatoluhon, i ma mangido jolma i asa sian rohana sandiri padao dirina sian manang aha pe i na boi jala terbukti mambahen ibana mura patupa na so suman.  Ndang holan tu angka dakdanak diajarhon dohot dipatupa dalan sisongon i, alai dohot do tu angka remaja nang natuatua, tu angka na so bahat dope mangallang sira, nang tu angka naung bahat sira dipangan ibana di ngoluna, i ma angka na so berpengalaman.  Molo dipatupa i ba tarpasiding ibana do angka na tuk mangambati angka sintasinta ni ngoluna dohot angka na tinuju ni roha.  Sian dirina pasiding diri, dohot sian na manguluhon ibana mangido asa dipasiding ibana angka nab oi mamboan mara i. Napatpudi on do mode pendidikan na dipatupa bahat di portibion.

Dalan na patoluhon i do dipillit Debata laho manjagahon ngolu ni bangsoNa naung pinaluaNa sian Misir jala siboanonNa tu tano naung niuarihonNa tu si Abraham, Ishak dohot Jakob. Dung diida Jahowa nasida patupa debata ganaganaan lombu sian mas binoan jala pinangke nasida sian Misir (i ma antinganting) jala mamaksa si Aron patupahonsa (Ida 2 Musa 32: 2-6), dung ditangiangkon si Musa, diasii Debata Jahowa do nasida marhite dua na mangihut on:

Naparjolo, ndang Debata Jahowa be mardalan rap dohot nasida di pardalanan tu tano Kanaan, alai sahalak surusuruan tinongosNa nama. Molo rap mardalan Debata dohot nasida, hape bangso sijogal rungkung do nasida, ba mura ma lengsehononNa nasida, ai ndang tarbahen Debata na badia i marsaor tu bangso sijogal rungkung i.  I ma dalan ni Debata mangaramoti nasida. Di na dipangido si Musa asa unang ma songon i Debata maradophon nasida, alai ingkon Ibana sandiri ma rap mardalan dohot nasida, dioloi Debata do I (33: 16-17). Alai dioloi Debata patupa i, ala nunga jolo dipatupa bangsoNa i roha na manolsoli pambahenan nasida, i ma marhite na patupa  dua na mangihut on, i ma (i) Pangandungion (Heber: wayiteabelu, Batak: gondok roha, 33:4; Inggris: mourning).

Mangarsakhon dohot manolsoli dosa naung pinatupa nasida; (ii) Angka baoa (Heber: Ish ) mananggalhon angka na pinangkena  (Heber: adeyo; Inggris: ornaments, na marlapatan angka perhiasan, patudos Bibel Hata Indonesia; Batak: angka pahean, ndang apala ampit, ai molo i nidokna gabe ndang marpahean, salangsalang ma nasida; 33:4). Boasa holan angka baoa? Ala na pinangke ni angka boruboru, i ma antinganting pinangke ni angka ina nang borunasida na binoan nasida sian Misir uju ruar nunga dipasahat nasida tu si Aron patupa debata ganaganaan lombu mas, ida2 Musa  32: 2-4).  

Napaduahon, mangido nasida asa unang be angka baoa mamangke angka na pinangke nasida hian (Heber: edeyekha, Inggris: Ornaments, Indonesia: perhiasan).  Jala dipatupa nasida do i (33: 5b-6). Sude angka antinganting ni ina nang boru (32: 2-4), na naung dipangke patupa debata ganaganaan, nang na pinangke ni angka bao ani Israel (33: 5b-6), sudena naung dilehon bangso Misir tu nasida gabe tabantabanan (2 Musa 12: 35-36) nunga ditanggalhon, ai marhite angka i solhot situtu do nasida tu na mangalo Debata Jahowa marhite na mampardebatahon angka i. Sian hadirion nasida ditanggalhon angka i.

Sian duansa i taida na, parjolo, dibagabagahon Debata na marhite surusuruanNa donganNa nasida mardalan tu na tinuju nasida, i ma tano Kanaan, laos dipangido Ibana asa dipadao bangso i, tarlumobi angka baoa na mar-perhiasan dope, asa mananggalhon i. Alai napaduahon, diauhon angka baoa ni bangso i naboi do jala terbukti madabu tu bagasan dosa do nasida ala dipangke nasida angka perhiasan nasida patupa debata ganaganaan sian mas, jala unduk nasida tu pangidoan ni Jahowa asa tanggalhononnasida angka i, angka na boi mamboan nasida tu dosa mangalo Debata i. Siala ni i do gabe dipillit topik ni Jamitanta na mangihut on: "Oloi ma Jahowa jala pauba roham," songon naung pinatupa ni bangso Israel di halongonan i, na naeng masuk tu tano Kanaan i, na dilehon Debata tu nasida ala ni dosa ni angka bangso na disinii.

Boasa ma di minggu dung Epiphanias pa-V-hon on, di tongatonga ni partingkian na lam holong situtu taida roha ni angka jolma di portibion mampardebatahon angka arta marrumangkon hepeng na arga i (di Inggris, sian mas do Poundterling i dibahen) dohot angka perhiasan-perhiasan na mansai arga (mamaungka sian angka berlian sahat tu mas nang perak),  na pinangke ni ndang holan boruboru alai angka baoa, na ro tu angka pasar partigatigaan na marragam tirket i manuhorisa dohot mamangkesa disiidaon ni loloan (sian na metmet na ampit tu na pogos sahat tu na mansai balga na mansai arga situtu) sian marragam negara di portibion, na di bahatan dirajai angka pemegang modal dohot saham na mansai balga, ro hata ni Debata nuaeng tu hita ruas ni HKBP, marhite na mandok tu hita asa jamot di mara na boi ro tu hita sian angka arta i, i ma na mangunjuni hita asa tapardebata angka i, songon pinatupa ni bangso Israel na manuru boruboru nasida mananggalhon angka antinganting nasida jala mambahensa gabe debata ganaganaan?  Suraon do umbahen na nang hita ruas ni HKBP nunga sanga, manang tongon naeng, gariada marlas ni roha di na mampardebatahon angka arta nang perhiasan-perhiasan I di ngoluna, manang beha pe dalanna?

Boasa ma nuaeng dipadompakhon tu hita sada tiruan na denggan pinatupa ni bangso naung sanga mardosa i jala naeng diuhum Debata siala ni dosanasida i, i ma na mangandungi nasida ala ndang be Debata sandiri be mandongani nasida siala sanga jugul rungkung nasida, alai holan surusuruanNa nama na mandongani nasida, unang gabe hasahatan ni rimas ni Debata nasida? Jala dung mangandungi nasida diuduti ma tu pangoloion nasida patupahon pinarentahon ni Debata, i ma mananggalhon angka arta perhiasan i asa boi nasida sahat tu tano Kanaan naung pinarbagabaga ni Debata i? Suraon do siala na mangihut on:

Parjolo,   siala ndang bahat be tiruan di tongatonga ni ruas nang pangula ni huria ni HKBP di ngolu nang parsaoranna na so mampardebatahon angka arta nang  perhiasannasida be alai baliksa nunga ringgas patupa ulaon parasinirohaon di ngolu nang parsaoranna marhite arta naung pinalumehon ni Debata tu ibana? 

Suraon ala ndang bahat be manjagahon dirina sian na mampardebatahon angka na pinangke (perhiasan) i, baliksa gabe mampardebatahon na sinarina  sian dalan na patut, i ma marhite angka usaha-usaha na so maralo tu uhum, dohot sian dalan na so patut pe tahe, i ma marhite patupa angka dalan na maralo tu uhum, hasintongan nang hatigoran di negaranta, isara ni angka ulaon korupsi, dna? 

Gabe siala ni i tandi ma na ndang taoloi manang ndang unduk be hita tu hata ni Tuhanta Jesus na mandok asa unang taparDebata Jahowa dohot di tingki na dos  tapardebata angka arta i na manggontihon Debata Namangolu I (Mateus 6: 24).

Paduahon, suraon do siala nang di tongatonga ni parsaoran ni halak Kristen Batak, naposo bulung nang natuatua, pengawai swasta dohot negara nang angka pengusaha, angka partigatiga nang na asing na so hagoaran be dison, na holan mangalului arta na di banua tongaon jala holan tu diri nang keluargana sandiri nama, ndang be mangalului arta na di banua ginjang i be, marhite na mamangke arta naung pinalumehon ni Debata tu ibana bahen dalan patupa angka na denggan tu dongannana jolma, isara patupa ulaon parasinirohaon tu donganna jolma, ulaon na metmet nang na balga pe i tahe di dia pe ibana mangolu, asa boi dumenggan ngolu ni angka donganna jolma, tarlumobi angka na gok hahurangan?

Suraon do ia apala sundung ni na niluluanna dohot na tinujuna  di portibion i ma mangalului arta sagodanggodangna jala mamangkesa manggohi saluhut hagiot ni rohana na so terbatas i andorang so mate ibana, gabe marhite i tangkas na dipardebata ibana arta nang persiasan i dohot manang dia pe na boi patupaonna marhite angka i, tung maralo pe i tu lomo ni roha ni Debata, ndang be mamangke arta na adong di ibana i laho pasangaphon Jahowa haroroan ni saluhutna i, marhite na patupahon angka ulaon na denggan membangun hutana, kotana nang bangsona, dohot patupahon ulaon parasi ni rohaon tu angka donganna jolma, ndang holan angka na jonok tu ibana, alai dohot do nang tu angka na dao sian ibana, nang angka na so tinandana pe tahe? 

Siala ni i gabe muramura nama ibana tarsonggot jala gale ala ndang tibu suksuk dapot ibana angka na niluluanna i, gabe mura ibana tarunjun mamangke dalan na so patut asa dapotsa ni luluanna i, asa tibu didok rohana dipasangap angka donganna saparmeaman, sasingkola nang saulaon dirina, hape tong do ndang tarbaoan hita sude angka i?

Patoluhon, suraon do sai adong dope di tongatonganta ruas ni Huria Kristen Batak Protestan na ala ni bagas ni holong ni rohana tu angka arta nang perhiasan na arga naung piapungupunguna mamungka sian na poso, gabe sai borat situtu rohana paluahon angka i nang di na naeng tos hosana?

Paopathon, suraon do ala di tongatonga ni angka sijou hamubaon ni roha di angka huria di portibion nunga margurasa tong tondi na ait tu diri marhite na mamangke hata ni Debata tusi, songon na dung masa di Korea Selatan, tardapot korupsi naposo ni Debata, pamoramora keluargana? Songon i ma pargurasa ni holong ni roha di kemewahan i umbahen na ro Komisi Teologi ni Punguan ni Huria Luther Saportibi (LWF) di taon 2013-2018 manoarahon soaraon Salvation not for Sale (Haluaon ndang sitigatigahononhon mura), ala di tingki on bahat angka pangula ni huria di portibion na gabe pamoramora diri sian ulaon manjou jolma tu hamubaon ni roha, lobi jorbut sian na binahen ni huria na dipaimbaru Martin Luther di abad pa-16-hon na manggadis surat Hasesaan ni dosa -na holan ankga na mora na tuk manuhorsa- holan laho pajongjong gareja na mansai balga alai dohot nang asa adong diskon, hauntungan di na manggadissa.

Sitiruonta do pangoloion dohot haunduhon ni bangso Israel di halongangan i, naung sanga mardosa mambahen debata ganaganaan sian arta binoan nasida sian Misir, alai dung marnida muruk ni Debata maradophon angka na patupa songon i gabe olo sian dirina sandiri jala sinosoan ni Debata mananggalhon angka perhiasan nasida na tangkas mangambati nasida satia tu Debata.  Molo dung tabahen rujiruji taringot tu dirinta sandiri, denggan do hita mangalusi sungkun-sungkun on:  Diihoti angka arta nang angka perhiasan na mansai arga i do/dope ahu nuaeng on, gabe ndang hibul be rohangku mangulahon angka ulaon na denggan tu donganku jolma songon pinangido ni Debata tu ahu naung pinaluaNa? Molo i do, ringkot do hita muba di ariari na ro on, asa martua hita mangolu di bagasan pangaramotion ni Debata, nuaeng sahat tu sogot pe tahe. Amen(**)
  BeritaTerkait
  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium, 14 Oktober 2018 Minggu XX Dung Trinitatis: Pir ma Tondim jala Marsihohot (Josua 1:-6-9)

    4 bulan lalu

    Oleh: Pdt Dr Robinson Butarbutar, Na tongon di Sipoholon dope dung mandohoti Sinode Godang HKBP 8-12 Oktober 2018, HP/WA: 0812-62472015Dipangke Debata Pargogo Nasohatudosan i do hita angka jolma, angk

  • Jamita Evangelium, 13 Januari 2019, Minggu I Dung Epiphanias "Debata Manogunogu/Mandongani BangsoNa" (2 Musa 33: 12-17)

    satu bulan lalu

    Oleh: Pdt Dr. Robinson Butarbutar, Parsameanta, STT-HKBP. HP/WA 0812-62472015Sada hata na dipangke rakyat Indonesia manggombarhon panghirimon ni rakyat idaonna patupaon ni angka pamarenta di sude tirk

  • Daompung Parpoda Na Tur " Haserepon "

    2 tahun lalu

    Di musim mudik nantoari sada, husiluhon do mandapothon sada tokoh. Natua-tua, naung marumur 84 taon.  Belakangan on dung dijalo nasida ulos matua nunga bakkol be  laho tu Jakarta/ Bandung

  • Partandang na Bitik

    2 tahun lalu

    Adong do sada boru ni Ama ni Panukkunan, margoar si Lastiar Christina Margareth. Biasa dijou si Lastri. Na burju do Si Lastiar on jala pargaul. Nang pe boru siampudan. Unduk marnatua tua. Uli rupan

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb