• Home
  • Agama
  • Marsomba tu Jahowa di Bagasan Hasatiaon" (Esra 6: 13-18)
KSP Makmur Mandiri
Sabtu, 18 Mei 2019 16:27:00

Jamita Evangelium, Minggu Kantate, 19 Mei 2019"Endehon Hamu Ma di Jahowa Ende Naimbaru"

Marsomba tu Jahowa di Bagasan Hasatiaon" (Esra 6: 13-18)

BAGIKAN:
Ist
Pdt Dr Robinson Butarbutar

Sian Parsameanta, STT-HKB: Pdt Dr. Robinson Butarbutar. HP/WA 1012-62472015.

Pasahat pelean tu Debata i do sada rumang ni panombaan tu Debata. Tapasahat peleanta di bagas joro pangkeonNa parararat harajaon ni Debata di tongatonga ni huria i nang di portibion. Tapasahat do ngolunta songon pelean na mangolu tu Debata marhite na patupa angka ulaon na denggan tu angka donganta jolma nang na asing na tinompa ni Debata marojahan tu holong ala naung parjolo Kristus Jesus manghaholongi dirina marhite na mamelehon dirina.  Beha asa panombaan tu Debata di bagas joro i na hinabosan ni angka parhaladoNa asa mardalan denggan marhite angka peleanta na tapasahat tu Ibana marhite huriaNa di portibion i do sungkunsungkun sialusan ni ganup na porsea i. Dos tusi, beha asa peleanta tu Ibana marhite ngolunta na manghobasi na asing, i do sungkunsungkun na sai tongtong ingkon alusan ni na porsea i. 

Sada rumang panombaan na asing sipatupaon ni na porsea i i ma mangendehon ende pujipujian tu Debata siala ni sude pambahenanNa na so hasuhatan i di ngolunta mamungka sian na di bortian ni dainang i hita.  Huria na ringgas mangendehon pamujionNa tu Debata siala pambahenanNa i do huria na mangolu.
 
Minggunta sadarion digoari Minggu Kantate. Kantate marharoroan sian hata Latin, cantare na marlapatan marende. Sada sian rumang ni Ende na taendehon i ma kantate, i ma sada ende na mamangke marragam rumang ni ende dohot soara di sada ende, laho manogihon hita asa sude ma hita satia mamuji Debata di bagasan dohot marhite endenta i.  Marragam do pambahenan ni  Debata di ngolunta marsasahalak, marsasapunguan, marsasabangso  dohot marsahasiangan on.

Pambahenan ni Debata i boi metmet rumangna, boi balga, jala boi balga situtu. Pambahenan ni Debata i boi mangonjar hita patupa tolu rumang panombaan tu Debata i, i ma pasahat pelean, patupa ulaon panombaan marrumang ulaon na denggan tu donganta jolma, dohot mangendehon pujipujian tu Ibana.

Siala ni i ma dipillit hatani Debata laho mangondolhon i di minggunta minggu Kantate on sian sada buku Sejarah di Bibelta i na patorangkon sada ulaon na pinatupa ni bangsoNa bangso Jehuda manang piga taon dung mulak nasida sian habuangan Babel, i ma sian buku Ester bindu 6, tarlumobi ayat 13-18, na patorangkon sada hamamasa na gok halongangan di  tongatonga ni bangso i. Siala halongangan i dipatupa nasida ma ulaon panombaon tu Debata.  Dia ma pambahenan ni Debata na gok halongangan i?

I ma: Boi dipajongjong bangso Juda naung mulak sian habuangan Babel i sada bagas joro na imbaru di taon 516, i ma 43 taon dung mulak muse nasida sian habuangan Babel di taon 559. Andorang so i,  di taon 587, dilengsehon raja Nebukadnezar do bagas joro parjolo pinajongjong ni raja Salomo di taon 957 i. Asa, 113 taon dung melengse bagas joro pinajongjong ni raja Salomo i jongjong ma muse sada bagas joro na imbaru, pinajongjong ni bangsoNa marhite dalan na gok halongangan. Siala ni i gabe dipatupa bangso i ma ulaong pangompoion tu bagas joro (Esra 6: 13-18 i. Dung diharingkoti bangso i manghudus pembangunan bagas joro na paduahon i dipatupa nasida ma  pangompoion (Heber: chanukkah) tu bagas joro i di bagasan las ni roha godang,  43 taon duk mulak nasida  sian habuangan Babel. Ise na  rap mangompoi i? I ma na mangihut on: Halak Israel, angka malim sian tongatonga nasida, halak Lepi, nang angka na mulak sian habuangan na asing.  Boasa marlas ni roha godang (Heber: Bekhedewa)? Ala dipatupa Debata sada halongangan tu bangso i.  Dia ma halongangan i?
I ma:  Parjolo, ala diparentahon raja Koresy (na mamrenta di taon 559-530) uju diparentahon ibana nasida mulak tu Jerusalem asa dipajongjong ma bagas joro naimbaru di Jerusalem. Na ringkot tusi ingkon diparade kekaisaran Persia (Iran nuaeng). Nda halongangan do i, ai ndang sisomba Debata ni Israel bangso Persia. Debata sileban (Zoroaster) do disomba bangso i.  Ndang holan hepeng na porlu tusi diparade kekaisaran, alai dohot do mangusung mulak angka alat-alat panombaan di bagas joro i, jala biaya na ringkot paradehon angka sipelehononhon disi. Ndang holan hepeng ni kekaisaran, alai sude rakyat dipangido manumpahi.

Paduahon, i ma di na 14 taon dung parenta ni Raja Koresy i, i ma di na mangarajai raja Darius  (522-548)  adong Gubernur na naeng pasohothonsa, i ma gubernur Tetnai na mangarajai Judea, ala ndang tarida parenta ni raja Koresy i,  migor diparentahon raja Darius do asa dilului parenta pinaruar ni raja Koresy i. Dung dapot i di sada dolok na timbo di Akmeta, diparentahon raja Darius  ma imbaru tu  to pangarajai ni angka ingangan di bariba ni aek Euprat, i ma Tetnai dohot Jetar Bosenai, asa diulahon patik i.

Panghorhonna gabe boi ma diharingkoti jala dihudus  bangso i pasidungkon bagas joro i hombar tu  hata ni Debata marhite angka panurirangNhombar a dohot tu parenta ni raja Koresy. Lapatanna mangula Debata marhite Darius I dohot Gubernur Tetnai asa boi dipajongjong bangso naung mulak sian habuangan i (taon 516) bagas joro i, i ma 43 taon dung mulak nasida sian habuangan. Nda halongangan do i? Boasa dipajongjong i? Asa boi nasida satia manomba Debata. 


Di na mangompoi bagas joro i nasida, dipatupa bangso i ma ulaon pasahathon pelean na mansai bahat dohot arga tu Debata, i ma 100 jonggi, 200 birubiru tunggal, 400 anak birubiru, dohot sampulu dua hambing tunggal. Jala dipajongjong nasida ma angka malim dohot halak Lepi laho marhalado di Debata di Jerusalem (ayat 18) mamungka sian ari i.

Pengalaman ni bangso i di tingki na robi satia mamomba Debata marhite na pajongjong jala mangompoi bagas joroNa, mamelehon pelean, huhut pajongjong angka malim dohot halak Levi na mangurupi panombaon tu Debata di bagas joro i do na gabe ojahan ni jamita di hita di minggu Kantate sadarion, na manosoi tu hita asa taendehon ende na imbaru tu Jahowa marhite na satia manomba Ibana.

Natolu na mangihut on boi do rimangrimangonta songon angka sisomba Debata na satia di partingkianta nuaeng:
Naparjolo, mangharingkothon ulaon pajongjong dohot mangompoi bagas joroNa.
Attik pe na boi do tasomba Tuhanta di angka ingangan na marragam i nang di rohanta, di tongatonga ni hurianta sai dipatupa do ulaon pangompoion tu bagas joro ni Debata,  i ma angka garejanta na marserak di sandok portibion, asa boi hita jojor manomba Debata di bagasanNa. Disi taendehon do ende pujipujianta marhite ende na imbaru dohot parendeon na imbaru. Disi tapasahat do angka pangidoanta tu Debata. Disi tatangihon do hataNa. Disi marsaor do hita dohot Debata nang dohot donganta jolma. Disi taendehon do hiras pujupujian tu Ibana. Sian i dipaborhat Debata do hita borhat tu portibion mamelehon dirinta tu Ibana marhite patupa ulaon na denggan tu donganta jolma nang na tinompa na asing. Molo di tingki na robi olo sada raja Darius I na manomba Zoroaster, debata ganaganaan, mangurupi bangso Jahudi pajongjong bagas joro ni Debata asa boi nasida manomba Debata, lam maol do taantusi molo di tongatonga ni angka bangso di portibion, ndang marimba bangsonta Indonesia, adong donganta jolma, parugamo nang ndang, na so mangaloas dipajongjong angka na porsea i bagas joro panombaon tu Debata. Tatangiangkon ma asa ganup rakyat Indonesia lam martondi toleran angka donganta sabangso manang dia pe ugamona laho pajongjong bagas joro panombaonnasida, asa boi tapeop di Indonesia Raya na bhinneka tunggal ika.

Napaduahon, manoarahon dohot mangusahahon kebebasan beribadah.
Mansai ringkot do hita manongtong manoarahon dohot marusaha marhite dalan-dalan na saurdot tu uhum asa lam jongjong kebebasan beribadah di tongatonga ni bangsonta, songon panghorhon ni na lam matoras toleransi beragama di tongatonga ni bangsonta. Molo tahasiholi halak Kristen do asa unang adong na so mangargahon hakta manomba Ibana di bagas joroNa na tapajongjong di ariari na ro on, hita pe ingkon tahangoluhon ma nidok ni Jesus na mangihut on nang taringot tu pangargahononta tu hak patupaon ibadah di angka donganta na so sahaporseaon dohot hita di ingananta nang di bagasan pengaruhta be: "Saluhut na pinangido ni rohamu sibahenon ni halak tu hamu, i ma bahen hamu tu nasida, ai i do pamusastan ni patik ro di hat ani angka panurirang" (Mateus 7: 12).

Patoluhon, ringgas mamuji Debata di bagas joroNa.
Di partingkianta na lam godang  angka na boi manait rohanta sian panombaon na satia tu Debata di ngolunta (marminggu, partangiangan, pasahata pelean marragam tu Debata, songon i nang panombaan marhite ulaon na denggan), isara angka games di computer na boi palalaphon angka na porsea i tarlumobi dakdanak sian partangiangan/parmingguon rap dohot na porsea na asing, nang tondi na holan mamingkirhon diri sandiri, ndang olo patupa na denggan tu dongan jolma, suang songon i nang halosohon mangendehon ende pujipujian tu Debata siala ni angka pambahenanNa na so hasuhatan i. Bahat do elaela na asing nab oi mangelai jolma I marhangoluan na marpanombaan na satia tu Debata. Molo adong do di tongatonganta na songon i denggan ma ma tajangkon hata ni Tuhanta i: Marlas ni roha mamujimuji Ibana dohot mangendehon Ende pujianNa. Marlas ni roha patupa ulaon na denggan tu dongan jolma dohot na asing songon hataridaan ni panombaanta tu Debata.
Paopathon, ringgas marende ende na imbaru.

Ringgas mandok mauliate tu Debata di angka pambahenanNa na sun denggan maradophon hita marhite angka ende na imbaru. Tauduti ma gabe huria na marende.Amen.

  BeritaTerkait
  • Jamita Evangelium, Minggu Rogate, 6 Mei 2018 2 Musa 32: 7-14 "Debata Manghaholongi jala mamasumasu hita"

    tahun lalu

    Oleh: Pdt. Dr. Robinson Butarbutar, Parsameanta, STT-HKBP Pematangsiantar1.Hamu angka dongan, di minggu Rogate on, di sada minggu di na ditogutogu hata ni Debata hita asa lam marpos ni roha di latapan

  • Selamat Taon Baru Mi-Re-Mi-Re-Do

    3 tahun lalu

    Uju metmet bajar hami, sian natolu pesta rakyat (Ulang tahun Kemerdekaan, Ari Pesta Natal, Taon Baru), holan di Taon Baru do molo pajumpa marsijalangan huhut mandok "Selamat Taon Baru". N

  • Daompung Parpoda Na Tur " Haserepon "

    3 tahun lalu

    Di musim mudik nantoari sada, husiluhon do mandapothon sada tokoh. Natua-tua, naung marumur 84 taon.  Belakangan on dung dijalo nasida ulos matua nunga bakkol be  laho tu Jakarta/ Bandung

  • Partandang na Bitik

    2 tahun lalu

    Adong do sada boru ni Ama ni Panukkunan, margoar si Lastiar Christina Margareth. Biasa dijou si Lastri. Na burju do Si Lastiar on jala pargaul. Nang pe boru siampudan. Unduk marnatua tua. Uli rupan

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    2 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb