• Home
  • Agama
  • Mangolu di bagasan Asi ni Roha ni Debata (Psalmen 25: 1-7)
KSP Makmur Mandiri
Jumat, 05 April 2019 16:41:00

Jamita Evangelium, 7 April 2019 Minggu Judika (Luluhon ahu ale Jahowa, Psalmen 43: 1a)

Mangolu di bagasan Asi ni Roha ni Debata (Psalmen 25: 1-7)

BAGIKAN:
Ist
Pdt Dr Robinson Butarbutar dan istri
Sian Pdt Dr. Robinson Butarbutar

Di taon 2009 dipillit Sinode ni Parsaoran ni Angka Huria Protestan (Lutheran, Reform, dohot Unitarian)  di Jerman (EKD, German: Evangelische Kirche in Deutschland) do sahalak Professor Teologi jala tokoh oikumenis, i ma Professor Dr. Margott Kaesemann, gabe Ketua ni Parsaoran i, sahalak naung dung manaon sahit kanker payudara, alai malum dung mandalani pangubation chemo therapi.  Dang leleng dung manguluhon parsaoran i ibana disoarahon ibana ma pingkiranna na so haru mandopang angka porang pinamasa ni angka bangso na balga jala nagogo maradophon bangso na metmet. 

Sada rumang ni i i ma ditulak ibana do kebijakan ni pamarenta Jerman manongos sordadu tu Afganistan. Siala ni i, atik pe bahat do na manghalashon soarana i, bahat do angka pemimpin dohot politisi ni negara Jerman na so manghalomohon soara panurirangionna i.  Bahat do angka tekanan na diadopi ibana siala ni soarana i. Di sada tingki diontang do ibana tu sada partamueon na nidohotan ni bahat angka uluan ni bangso i. Di pardalanan mulak ibana sandiri do manupiri mobilna. Alai didapot polisi ma na so unduk ibana tu paraturan lampu persimpangan dalan. 

Tongon rara lampu i. Alai tong dibolus ibana. Dipaso ma ibana. Dung dipareso polisi mudarna, tangkas ma na naung lobi sian na patut diinum ibana anggur di partamueon i.  Siala ni i, di jolo ni angka wartawan didok ibana ma na so tama be ibana gabe Ketua angka huria protestan di Jerman i. Mengundurkan diri ma ibana songon Ketua, didok ibana songon on: 

"I am aware how dangerous and irresponsible it is to drink and drive. I will accept the legal consequences" (Indonesia: "Saya sadar betapa berbahaya dan tidak bertanggungjawabnya minum dan menyetir. Saya akan menerima konsekuensi-konsekuensi legalnya." 

Batak: "Dapot rohangku do songon dia marmara dohot ndang bertanggung jawab ni na minum dohot manupir i").  Jala, "my heart tells me clearly that I cannot stay in office without losing much of the authority I'd need for the post" (Indonesia: "Hati saya mengatakan kepada saya dengan jelas bahwa saya tidak dapat menjabat tanpa kehilangan otoritas yang saya butuhkan untuk jabatan itu." Batak: Didok rohangku tu ahu mansai tangkas na so tarbahen ahu be maniop jabatan i so agoan huaso na ringkot tu jabatan i ).  

Ndang sadia leleng di na disungkun angka wartawan boasa songon i baranina ibana mundur sian haketuaan ni EKD i, hape ibana do pandita boruboru na parjolo manguluhon parsaoran i sian hajojongjongna 1945, jala songon dia ma ibana mangadopi tekanan partondion dohot panghilalaan,  ila, hatarurahon ni adopanna i siala ni hasalaan manang dosana i, didok ibana ma songon on: "Di ahu, ndang adong na ummuli sian na madabu tu tangan ni asi ni roha ni Debata."

Botul do ibana sahalak pandita ni/di huria Protestan na mangantusi, manghaporseai, manghaposi, mangajarhon, mamaritahon dohot manghangoluhon impola ni ajaran ni huria Protestan di portibion: "Holan ala ni asi ni roha ni Debata do dapot ni naporsea i haluaon i, jala  haporseaon di asi ni roha ni Debata i pe ndang tubu sian diri ni jolma i, alai pinalumehon ni Debata parasiroha i do, ndang ala ni hatauon ni jolma i."

Di na masa niadopan ni pandita Prof Dr. Margott Kaesemann i lima taonnari ma andorang so dipestahon angka huria Protestan di portibion di taon 2015 lima ratus taon reformasi pinatupa ni Pdt Dr. Martin Luther. Ala songon i ma diantusi, dihaporseai, diajarhon, dijamitahon, dohot dihangoluhon pandita Margott Kaesemann ajaran ni Pdt Dr. Martin Luther taringot tu holan asi ni roha ni Debata do boi jumpangta haluaon na sian Debata i sian dosa, huaso ni dosa dohot panghorhonna (ndang adong jolma malua sian dosa i, jala mangihuthon Martin Luther nang halak Kristen i di tingki na dosa na badia jala pardosa do) gabe dipabangkit jala diturgashon Parsaoran ni Huria Protestan di Jerman i ma ibana gabe Duta Reformasi di taon 2012, na turgasna mangajarhon, manghatahon, mamaritahon, manjamitahon, dohot manurathon ajaran reformasi ni Pdt Dr. Martin Luther di sandok Jerman nang dohot di portibion.

Pangantusion, panghaporseaon, pos ni roha, pamaritahonon dohot panghangoluhonon sisongon na pinatuduhon ni pandita Prof Dr Margott Kaesemann marojahan tu ajaran reformasi ni Pdt Dr Martin Luther i do na pinatuduhon ni raja David di Psalmen 25: 1-7 i na gabe jamita tu hita halak Kristen Batak Protestan di minggu Judika (Luluhon ma ahu ale Debata sian angka dosangki) sadarion, 7 April 2019.  Gariada tahe, songon na niongku ni si Martin Luther di panjahaionna di Buku Psalmen, marojahan tu pangantusion, panghaporseaonon, pos ni roha, pamaritahonon dohot panghangoluhonon ni Psalmen ni si Daud rap dohot barita nauli jinamitahon dohot ginurithon ni apostel Paulus, songon i nang di panandaionna sandiri taringot tu hadirionna na so tuk paluahon dirina sian huaso ni dosa i atik pe sahalak biarawan na satia mangalo dosa do umbahen na sahat Martin Luther tu pangajarionna na tarbarita jala na tahangoluhon sangat tu nuaeng di tongatonga ni halaka Kristen Protestan i, i ma sola gratia, holan asi ni roha ni Debata.  

Molo taida opatsa na tarbarita i, Raja David, Apostel Paulus, reformator Martin Luther, dohot Ketua EKD Prof Margott Kaesemann, ganup do nasida ndang tuk mangalo huaso ni dosa i. Alai ganup do tong nasida manghangoluhon asi ni roha ni Debata i. 

Taida ma sadasada. Raja David, sahalak na tung solhot situtu tu Debata, ai didhaposi jala dipillit Debata do ibana gabe raja ala ndang be dihalomohon Ibana raja Saul. Didongani Debata Tsevaot do ibana marporang maradophon angka musuna, jala dipalua Jahowa do ibana sian jorgong ni angka musuna, dipasupasu Debata do niulana, i ma pasadahon bangso ni Debata gabe sada bangso mar-ibukotahon Jerusalem, tarpasupasu do bangsoNa uju ibana mangarajai bangsoNa. Alai songon na taboto tangkas madabu do ibana tu bagasan dosa. Mangihuthon panindangionna, uju poso pe ibana bahat do angka dosana, ndang holan na taboto -isara maradophon sinonduk ni si Bethseba, i ma si Uria na pinamatena di parporangan asa boi ibana mardongansripehon si Bethseba, songon i nang dosa mamunu angka musu ni Israel di parporangan, atik pe boi dohonon porang na tigor do porang niuluhonna i sude, ai ganup mamunu dongan jolma dosa do i - alai dohot do na so taboto dope uju poso ibana, andorang so dipabangkit gabe raja. 

Molo diungkap Debata angka dosana i di jolo ni angka musuna na sai lulululu di hasalaanna - dohot ma i raja Saul i sandiri na mansai sogo rohana mida si David ala gabe raja si David dibahen Debata uju raja dope si Saul. I do umbahen na di Psalmen 25 ayat 2 dohot 3 i dijouhon ibana tu Debata. "Ale Debatangku, marhaposan tu Ho do ahu, tung unang paila ahu, ndang tahe tagamon tarurak sude angka na manghaposi Ho. 
Nang dihaposi sasahalak Debata, ndang marlapatan malua ibana sian dosa. Alai ndang dipaila Debata pardosa na marhaposan tu Ibana, gariada ditobus do, jala dipalua sian panghorhonna. Nian dihasiholi si David do asa dipabotohon, diajarhon, jala ditogutogu Debata ma nian ibana umboto angka dalan ni Debata, bogasNa, jala hasintonganNa na so marlaok dosa i (Psalm 25: 4-5). Alai atik pe songon i ala jolma do si David, diboto ibana do na so ias ibana sian dosa. Siala ni i ma di ayat 7 i dipangido ibana asa unang dipaingotingot Debata dosa ni haposoonna. Ala diboto, diauhon dohot dihatingdangkon si David do dosana i umbahen na diondolhon ibana ma pola tolu hata di ayat 6 dohot 7 i taringot tu hadirian ni Debata, asa ndang tu dirina be mata ni haporseaonna manatap, alai tu diri ni Debata ma, i ma: (i) rahameykha (Indonesia: rahmatMu, Terjemahan ni hata Batak ndang apala akurat, ai diterjemahon dohot denggan basamu na di ayat 7 dipangke di hata Heber: tuvekha, sian hata tv, denggan basa, kebaikanMu; dumenggan do harafiah tadok: bortianMu), dohot (ii) hatsedekha  (Batak: asi ni rohaMu, Indo: kasih setiaMu), jala (iii) tuvekha (Batak: denggan basaMu, Indo: kebaikanMu). Tolunsa didok na sian na robi, le olam.  Tolunsa do siingoton ni Debata dipangido parPsalmen, i ma bortian-asi ni roha-denggan basa-Mu, rahmat-kasih setia-kebaikanMu.

Duansa na parpudi di hata Batak, i ma asi ni rohaMu dohot denggan ni basaMu, nunga jotjot tabege. Alai bortianmu (Indo: rahmat), ndang apala haru tapamanat hinabagas ni tonaNa saleleng on. Ojahan ni dua na mangihut i do bortianMu rahameykha (sian hata dasar rhm (Indo: rahim, Batak: bortian), i ma na manubuhon, manjagai, mangaramoti ngolu (Indonesia: janin). Mansai bagas do hinangkam ni hata rhm on. Molo tajouhon tu Debata asa diingot Ibana (Heber: zekor) bortian ni Ibana, na mandok na ro sian Ibana do hita, bagian ni ngoluNa do hita. Nda tung so diasii dohot dipatupa Debata denggan ni basaNa tu hita angka pardosa on, ai ndang dao hita sian Ibana. I ma hinabagas ni pos ni roha ni Parpsalmen on. Songon Ina na marningot bortianna.

Songon i do hinaporseaon, hinaposan, binaritahon dohot dihangoluhon Apostel Paulus, na atik pe halak Farise na tumimbo sian angka donganna Farise di tingkina parbinotoan dohot pangoluhononna di patik ni si Musa, songon i hirasna rohaNa mangulahonsa pola sampe mamunu angka na mangaleai patik i dohot bagas joroNa, laos ibana do na tumangkas mananda dohot mamarsaulihon asi ni roha ni Debata tu ibana, ai dibahen Debata ibana gabe parbarita nauli di asi ni rohaNa i di bagasan Jesus Kristus. Songon i do tong si Martin Luther, sahalak biarawan na satia hian di kota Erfurt Jerman alai tong manghilala ndang tuk mangalo huaso ni dosa, manghilala sai didondoni huaso ni dosa, so tarpaluasa dirina sian i, gabe mariaia tondiNa marnida na di hatigoran ni Debata i do diida ibana asi ni rohaNa i, gabe dipangke Debata ngoluna paimbaruhon haporseaon ni huria na lipe di tingkina, jala nuaeng nunga diongku huria Katolik Roma niajarhonna i: holan ala asi ni roha ni Debata do malua hita sian dosa dohot hamatean di bagasan Jesus Kristus. Songon i do naung pinatuduhon ni Pdt Prof Dr. Margott Kaesemann na barani mangoku salana, mijur sian hakatuaon ni Parsaoran ni sandok Kuria Protestan ni Jerman, ala diboto ibana hinauli ni na madabu tu bortian ni dohot tangan ni asi ni roha dohot denggan basa ni Debata, jala siala ni i gabe dipangke Parsaoran ni Huria Protestan i ma ibana gabe siboan barita (Duta) ni Reformasi.

Boasa apala ingkon haporseaon na bagas hinangoluhon ni parPsalmen, Paulus, Martin Luther dohot Margott Kaesemann i nuaeng tarimangrimangi di minggu Judika on na mangajarhon tu hita asa tu Debata ma hita mangalualu asa luluhonon, ondihononNa hita, sian angka dosanta dohot mangadopi angka tangtangan na adong di jjolonta di na mandungdong angka sintasintanta gabe pasupasu tu portibion?  

Suraon do naung  tahilala jala tarajumi na ruas ni pamatang ni Kristus na tung badia situtu do hita on, songon i badiana pola gabe sai manguhumuhumi donganta jolma i, pola sahat tu na mandok sipelebegu do donganta on dohot donganta an, gabe ndang taauhon be niajarhon ni Martin Luther na diojahi pamerengon na tajom di pardalanan ni ngolu ni angka na porsea na di Bibel i nang di duru ni Bibel i na mandok na atik pe nunga diparbadiai Debata hita on marhite Jesus Kristus, tong do mura hita madabu tu jala olo mian di bagasan dosa (Latin: simul justus et peccator?

Panghorhon ni i gabe ndang haru dihalungunhon tondinta be ro tu Debata asa diluluhon asi ni rohaNa hita? Gabe siala ni i, ndang talului be tingki paadop bohi dohot Ibana na manghaholongi ngolunta, mangidohon tu Ibana asa dipatupa Ibana na tolu i tu ngolunta sandiri, tu ngolu ni saripenta, masyarakatta, dohot bangsonta, nang portibion pe tahe, asa dipatupa ibana na tolu i tu hita, i ma asa diingot Ibana bortianna sandiri na paadonghon hita, na padimundimun hita, dohot na mangaramoti hita, jala asa diingot Ibana asi ni rohaNa tu hita, jala dipatupa Ibana ma denggan ni basaNa tu hita, unang baliksa gabe rimasNa na ro tu ngolunta, tu angka ianakkonta, pinomparta, keluarga besarta, masyarakatta, dohot bangsonta Indonesia on tahe tarlumobi andorang, uju dohot dung Pemilihan Umum 17 April 2019 on, asa malua bangsonta sian angka na tahabiari i, alai asa diingot Ibana hita on bortianNa i, sada bangso naung sanga leleng dijajah, mamolus dua partingkian Orde Lama dohot Orde Baru na so tuk mamboan maju bangsonta, sada bangso naung ditogutogu Ibana masuk tu masa reformasi, jala dua pulu taon dung reformasi 1998 nuaeng naeng meret (hijrah) ma bangsonta sian bangso na berkembang tu bangso na maju, molo asi rohaNa mida hita; asa diingot Ibana asi ni rohaNa dohot denggan ni basaNa tu hita. Bahat sian tongatonganta ta parsidohot naeng pillition ni rakyat gabe anggota Dewan Perwakilan Rakyat di pusat, propinsi nang kabupaten/kota. Tapangido ma tu Debata asa diingot Ibana asi ni rohaNa tu nasida.

Laos di tingkion do angka anak ni hurianta mangarade diri laho mangadopi angka ujian laho masuk tu perguruan tinggi, jala ala taboto tangkas ndang sude boi dijalo angka universitas negeri, olo do ndang adong manang bahat angka anak ni hurianta na ingkon marsiajar ndang di sikkola/universitas negeri. Di tingki na songon i mansai uli do molo ro hita martangiang tu Debata na tarbahen mangaluluhon hita, asa diingot Ibana hita on angka pinompar ni naung tinobusNa mansai arga di bagasan Kristus Jesus i, asa dipatupa Ibana tu hita asi ni rohaNa dohot denggan ni basaNa tu angka ianakkonta i sude, tarlumobi tu na so tuk masuk tu perguruan tinggi negeri ala ni kompetisi na mansai timbo, asa boi nang nasida marsiajar mangasahon Ibana nang di universitas na so negeri, tarulumobi ma angka anak ni hurianta na marsiajar saleleng on rap dohot di angka inganan na so apala maju pendidikanna.

Mangalului dalan-dalan na denggan do tong angka ruasta HKBP asa adong ulaonna, asa boi patupa ulaon tu donganna jolma marhite angka usaha na marragam I, sian na metmet sahat tu nab alga, di angka bidang na marragam i. Tu nasida tatangiangkon ma tangiangta i tu Debata, asa diingot Ibana asi ni rohaNa i (bortian, asi ni roha nang denggan ni basaNa) tu nasida, asa boi nang nasida marnida na diingot Debata do asi ni rohaNa tu nasida be.

Molo manghilala hita naung diingot Debata asi ni rohaNa tu hita nasailaon, mansai uli do tong molo mangolu hita pangkeonNa gabe ulaulaNa patupa asi ni rohaNa tu angka donganta na mangharingkothonsa di taon parasi ni rohaon ni HKBP di tingki on. Amen.
  BeritaTerkait
  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    2 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium Minggu XII Dung Trinitatis 19 Agustus 2018 1 Musa 17: 15-27 "Uli ni na Sauduran"

    8 bulan lalu

    Oleh: Pdt Dr. Robinson Butarbutar, Parsameanta, STT-HKBP.Dua ari dung sude hita rakyat Indonesia na mansai marragam rap mapestahon Hari Ulang Tahun Kemerdekaan Republik Indonesia na pa-73-hon di tgl 1

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    2 tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Hata i do hangoluan (Poda 4: 18-27)

    2 bulan lalu

    Oleh: Pdt Dr. Robinson Butarbutar Parsameanta di STT-HKBP, HP/WA 0812-62472015Di Minggu Invocavit ditogihon do hita angka ruas ni huria asa lam manghaposi na, molo joujou hita tu Debata, sai alus

  • "Mangolu di bagasan Hatiuron ni Hata ni Debata" (Heber 4: 14-16)

    satu bulan lalu

    Oleh: Pdt Dr. Robinson ButarbutarParsameanta di Pematangsiantar, STT-HKBP. HP/WA: 0812-62472015.Di Minggu Invokavit di minggu na salpu ditogutogu do hita asa hot manang umpos rohanta di Debata na mana

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb