KSP Makmur Mandiri
Minggu, 02 September 2018 08:55:00

Jamita Minggu, 2 September 2018: 1 Raja 17: 7-16

Mangolu di Bagasan Parasinirohaon

BAGIKAN:
Ist
Pdt Dr Robinson Butarbutar
Oleh: Pdt Dr Robinson Butarbutar, STT HKBP

Disarihon Debata do angka naposoNa
Sada sian pangajarion ni reformator Dr. Martin Luther na sai diihuthon angka ruas ni huria protestan di sandok portibion mamungka sian abad pa-16-hon sahat tu nuaeng di na mandungdung sintasinta ni ngolu nang ulaonna di inganan ni ngolu nasida di portibion mandok songon on:
Bahwa setiap orang Kristen  adalah seorang yang bebas terhadap semua dan bukan bawahan dari/tunduk pada siapapun.  Tetapi pada saat yang sama seorang Kristen adalah 'hamba yang melayani bagi setiap orang'  dalam artian di dalam aneka ruang lingkup kehidupan yang berbeda-beda setiap harinya ia bertindak dewasa dan penuh tanggung jawab (Galatia 4).

Sahalak Kristen i ma sahalak na bebas. Alai sahalak Kristen i ma naposo ni Debata manghobasi hajolmaon ala ni holong. Di pangajarion ni Martin Luther i, dos do arga ni ulaon ni naposo ni Debata di tongatonga ni harajaonNa (Jaha: Huria ni Kristus) dohot di harajaon na di portibion  (Jaha: Negara, Swasta). Ndang marimbar arga ni ulaon nasida di portibion.

Di bagasan na mangulahon ulaonna i, disarihon Debata do na ringkot di ngolu ni angka naposoNa i, angka naposoNa di huriaNa songon i nang angka naposoNa di duru ni huria i. Disarihon Debata do ngolu ni angka naposoNa. I do na dihatindangkon hat ani Debata na di Padan Narobi dohot na di Padan Naimbaru. Gari angka pidong na martongatonga langit disarihon Ibana. Ba lam ma hita jolma. Ba lam ma angka naposoNa, nasida angka Dongan Saulaon ni Debata, na mangulahon angka na denggan tu hajolmaon (1 Kor 3:9), ulaon paluahon jolma sian parhatobanon ni dosa, sian angka parhatobanon ni angka na so Debata, na manghaholongi hajolmaon i, asa mardohar ngoluna, sejahtera dohot bahagia. Gariada tahe, asa di bagasan jala marhite ulaon ni Jesus Kristus asa mangolu ro di saleleng ni lelengna. 

Didok Jesus Kristus tahe, manang ise na manadingkon bahat ala ni Kristus dohot ala ni barita na uli, bahat do jaloonNa di portibion dohot hangoluan na so ra suda muse.

Tutu na boi do adopon ni angka naposo ni Debata di harajaonNa dohot di angka ruang lingkup kehidupan na marragam di portibion hamaolon, parungkilon di na patupahon ulaon na denggan rap dohot Debata. Sipata polal ingkon mangadopi  na so adong sipanganon dohot siinumon. Disarihon Debata do nasida disi unang agoan ngolu.
Di ngolu ni angka na porsea di portibion, dihaporseai do panarihonon ni Debata tu nasida.
I do na dihatindangkon panurat ni 1 Raja 17: 7-16 on.   Di na diuhum Debata Marhite naposoNa si Elia, harajaon Israel dohot rajana Raja Ahab najolo na so satia di padan nasida tu Debata asa holan manomba Ibana gabe manomba angka debata ganaganaan nasida, dohot do angka na porsea i manaon di uhum i.

Diuhum Debata bangso i marhite na so parohon udan mansai leleng. Siala ni i gabe masa ma kekeringan, marsik ma angka sunge, aek, angka sumur pe. Ala di inganan na songon i do mangolu dohot mangula naposo ni Tuhan i, ba nang naposo ni Tuhan i dohot do mangadopi ancaman ndang mangan dohot minum. Di kondisi na songon i, dipatuduhon Debata do panarihononNa tu naposoNa si Elia. 

Parjolo, uju ndang marsik dope aek, disuru Debata ibana borhat tu lambung ni sunge Karit, asa boi adong aek siinumonna disi. Sipanganonna manogot dohot botari disarihon Debata marhite pidong sigak (1 
Paduahon, dung marsik aek i di bagasan sataon, disuru Debata ma si Elia borhat tu inganan na asing, i ma di Sarpat jonokkon ni Sion. Disi nunga diparade Debata na ringkot asa boi mangolu si Elia: "Disi ma ho. Ida ma NUNGA HUDOKKON sada parompuan na mabalu disi MARMUDU ho" (1 Raja 17: 9). Tu parompuan na mabalu on ma dipangido si Elia aek di bagasan tabutabu dohot santopik sagusagu di bagasan tanganna, tung sampohol peta ho i (ayat 11-13).

Asa togu roha ni parompuan na mabalu i dihatahon si Elia ma tu ibana hata ni Debata songon on: "Ia itak na dibagasan hudon ndang olo sude, jala miak na di bagasan guriguri ndang jadi marsik, paima jumpang ari haroro ni udan tongoson ni Jahowa tu sisik ni tano on" (ayat 14). Dung dipatupa parompuan i pangidoan ni panurirang Elia i, masa ma hat ani Debata i.

Songon i ma  panarihonon ni Debata di angka naposoNa, sian tingki na robi sahat tu tingki on. Ndang dung agoan dalan Debata manarihon angka naposoNa, di tingki na une dohot di tingki na so une, di tingki adong kesejahteraan dohot di tingki paceklik. Songon i dipatupa Debata manarihon angka naposoNa di harajaonNa nang di harajaon na asing na di portibi on.  Masa i ala parasininnrohaon ni Debata tu angka naposoNa.
I ma ton ani Debata tu hita angka naposoNa di portibion di tingki on, di partingkianta nuaeng, di na lam tubu jala magodang sada pangantusion na imbaru di tongatonga ni hajolmaon nuaeng. Di tingkinta nuaeng, lam jebu do na ginoaran ni sahalak ahli sejarah Israel margoar Harari songon partingkian na dirajai Rejim Humanisme, i ma rejim na mandok holan mangasahon gogo ni jolma na naung mansai pistar i do boi mangolu jolma i. Ndang ringkot be Debata manarihon jolma i. Nunga boi jolma i sandiri na manarihon ngoluna. Maralo tu jala mangalo pangantusion na songon i do na taida di ngolu ni panurirang Elia nang di ngolu ni boruboru Sarpat, i ma mangula do Debata patupahon asi ni rohaNa tu hajolmaon.

Mangolu di Bagasan Parasinirohaon

Molo tapamanat pengalaman ni si Elia dohot parompuan na mabalu na di Sarpat i, adong do sada hahomion partondion na ingkon sirimangrimangonta. Dia ma i? I ma songon on: Masa parasinirohanon ni Debata manarihon panurirang Elia nang parompuan Sarpat i, ala olo parompuan Sarpat i patupahon parasinirohaon tu si Elia na mangharingkothon aek siinumon dohot sipangananon sampohul itak atik pe holan i nama na adong di ibana laho mangolu sadari. Aut sugari ndang olo ibana mansagihon i tu panurirang i, ndang na masa halongangan bolon i, i ma na gabe boi mangan dohot minum nasida ariary, mangadopi kekeringan na masa di sandok negara Israel. 

Malua ma nasida sian hamatean.

Parsiajaran partondion sian i: "Ibana na rade patupa parasinirohaon di ngoluna, dapotan parasinirohaon sian Debata." Ala ni i do tema ni jamitanta di tingki on i ma "Mangolu di bagasan parasi ni rohaon." Beha ma asa ganup na porsea di Jesus Kristus Parasiroha i mangolu di bagasan parasinirohaon. Asion ni Debata do sahalak, sabagas, sada usaha, sada bangso, sada negara na patupa parasinirohaon tu donganna jolma.
 
Molo taida angka negara-negara di portibion, jolo molo tabandingkon sada negara tu negara na asing, na mangihut on ma taida: Manai denggan do ngolu ni sada negara na patupahon nilai parasinirohaon di tongatonga ni bangso i. Mansai denggan do ngolu ni sada negara na mamangke sistim parasinirohaon na denggan, na mamangke sistim kepedulian sosial na denggan. Songon i do negara-negara na di Eropah Barat, isara negara Jerman, Swedia, Norwegia, dohot Denmark: Ala denggan sistim sosial disi, negara berkeadilan sosial, makmur do angka negara-negara i. Dibahen nasida ma sistim perpajakan na denggan. Na dapotan godang di ngolu on mangalehon godang asa adong pangkeon ni negara manarihon na pogos dohot na marsahit, asa boi nasida mangolu, marrubat dohot marsikkola. 

Gabe sude ma rakyat tau membangun negara. Sude tenga kerja boi trampil mangula. Maju ma antong bangso i. Alai di angka negara-negara na so denggan sistim sosialna, sistim na patupahon parasinirohaon, ndang makmur negara i. Gariada hapogoson na berabad-abad do diadopi ngolu ni sada bangso na songon i.  

Siala ni i, gabe huingot ma Film Cinderella na tarbarita i. Di bagasan film I dipatuduhon sahalak dakdanak tinadingkon ni inongna dohot amongna na naung sanga mangalap boru na paduahalihon. Dibahen inongna panoroni I ma maol ngolu ni si Cinderella on, pola diorai mandohoti pesta ginokkon ni raja tu sude rakyat sihatoropan laho manortor, di panortoran i ma dipillit anak ni raja i na naeng gabe parumaen ni raja i. Disi dipatuduhon do kualitas ni si Cinderella na mambahen ton ani inongna tu ibana di ngoluna na mandok songon on: "Have Courage and be kind": Togu ma roham, jala patupa ma na uli tu donganmu jolma. Di na dipatupa ibana na uli tu sada boruboru na matua  jala na roa pardompahanna na mangido aek siinumon tu ibana, gabe masa ma angka halongangan tu si Cinderella. Di ujungna gabe boi ma ibana dohot tu pesta i, jala gabe ibana ma dipillit anak ni raja I gabe donganna saripe.

Siala ni i, ia tona ni Tuhanta tu hita angka ruas ni HKBP di sandok portibion i ma asa mangolu di bagasan parasinirohaon hita, ai marhite i do gabe boi tarpasiding hita hapogoson. Garida gabe mangolu di bagasan hadoharon do sada keluarga, masyarakat nang bangso na patupahon parasinirohaon di tongatonga ni ngoluna. Ndang holan di ngolu hadaulaton ni marsasahalak na hinangkam ni hat ani Tuhanta, alai dohot do sistim di sada masyarakat dohot negara na patupahon keadilan sosial marhite parasinirohaon na denggan.

Pangarimangrimangon

Beha do hita saleleng on di ngolunta? Mangolu di bagasan parasinirohaon do manang ndang dope? Molo ndang dope, beha do ngolum dibahen Debata? Molo nunga, beha do ngolum dibahen Debata?

Beha do bahenonta mangolu di bagasan parasi nirohaon di jabunta, di hurianta, di masyarakatta? Nunga adong sistim di hita na mamastihon masa parasinirohaon I di tongatonganta?
Dipargogoi Debata ma hita patupahon ngolu nagok parasinirohaon.(*)
  BeritaTerkait
  • Eloi - Eloi... Lama Sabachtani

    2 tahun lalu

    Ale Tuhan Jahowa Martua Debata, bona ni hatuaon pangondian nami marsundut sundut, di bagasan bonos dohot lomos namaheu ro do hami tedek mangalu aluhon sorat ni arsaknami tu adopanMu di langgatan ha

  • Partandang na Bitik

    2 tahun lalu

    Adong do sada boru ni Ama ni Panukkunan, margoar si Lastiar Christina Margareth. Biasa dijou si Lastri. Na burju do Si Lastiar on jala pargaul. Nang pe boru siampudan. Unduk marnatua tua. Uli rupan

  • Pamingkirion tu Parsiranggutan di Ekklesiologi HKBP di Rapot Pandita HKBP Oktober 2017

    2 tahun lalu

    I. Pamuhai Di Sinode Godang HKBP September 2016 na salpu, ruas ni sinode do ahu songon Plt. Direktur Sikkola Pandita. Disi tangkas do soara ni bahat parsinode asa diamandemen sistem pamil

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    12 bulan lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb