• Home
  • Agama
  • Mangolu di Bagasan Hasintongan ni Kristus
KSP Makmur Mandiri
Minggu, 09 September 2018 06:38:00

Jamita Evangelium, 9 September 2018: Minggu XV Dung Trinitatis, 2 Korint 11: 7-16

Mangolu di Bagasan Hasintongan ni Kristus

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar, di Parsameanta.

Sian   tingki uju mangula Jesus Kristus di Palestina sahat tu nuaeng, sai adong do na manggoari dirina parbarita na uli na patupahon ulaonna ndang songon pamaritahonon ni Jesus di barita na uli i.  Jamita on manjamothon hita manulak angka na parbarita na uli na songon i. Sai adong do tong angka na manggoari dirina ringgas parsidohot di ulaon ni Kristus, alai ndang apala ringgas rohana manumpahi ulaon ni Kristus i. Jamita on paingothon nasida asa muba. Alai dohot do jamita on patoguhon angka na mangulahon ulaonna songon parbarita na uli dohot songon angka na parsidohot disi songon na pinatupa ni Jesus.

1. Songon dia huroha pamaritahonon ni barita na uli binahen ni Jesus? I ma: Ndang dung digarar manang ise Jesus di na patupahon ulaonNa mamaritahon barita nauli taringot tu harajaon ni Debata, mangajarajari taringot tu hinaringkot ni patupahon holong tu dongan jolma, pamalum na marsahit, pabali tondi na hodar, paluahon angka na digosa-gosa dohot angka na naeng diuhum siala tardapot mardosa. Ndang dung manjalo upa Jesus sian angka na naung taruli pasupasu hamalumon, pasupasu pangajarion, dohot pasupasu haluaon binahenNa. Ndang adong. Alai sai adong do angka na mangalehon sinadonganna sipangkeon ni  Jesus Kristus di ulaon mamaritahon barita na uli i. 

Atik pe dipillit Jesus gabe parbarita na uli pardalandalan, na so adong ingananna na hot, alai sai  adong do na mangalehon na adong di nasida pangkeon ni Jesus. Isara adong na mangalehon dua roti dohot lima dengke, pangkeonna mangalehon bahat halak, 5000 halak. Adong na maraleale dohot Ibana, isara si Marta, Maria dohot si Lazarus, na rade mangalehon sipanganon tu ibana uju mulak ibana sian ulaonna na dokdok. Adong na mangalehon halodena pangkeon ni Jesus managkok tu Jerusalem laho patupahon ulaonna disi paiashon bagas joro na naung gabe bagas pangarampok. Adong do tong na mangalehon kuburanna pangkeon mananom pamatang ni Jesus Kristus. Adong na mangalehon ibana mangan di pardalanan Emmaus dung hehe sian hamatean. Adong na mangalehon sinadonganna pangkeon ni angka sisean ni Jesus manguduti ulaonNa. Diargahon Jesus do na nilehon nasida i. Didok Jesus di Markus 9: 41, "Na painumhon aek santahu tu hamu (angka siseanNa) ala Kristus nampuna hamu, ndang na mago up ani i."
 
2. Songon i do tong na pinatupa ni angka siseanna na rap dohot Jesus uju di ngoluna di Palestina dohot angka siseanna na asing na so rap dohot ibana disi. Apostel Petrus, isarana, di na mamaritahon barita na uli ibana di Jerusalem, adong do angka naung porsea i mangalehon na adong di ibana pangkeon ni punguan ni halak Kristen i, tarlumobi uju metmet situtu dope punguan i. Adong na duadua rohana, isara si Ananias dohot si Safira, na gabe taruhum siala ni  na digabusi nasida Apostel i. 

3. Di duru ni Palestina, adong do apostel Paulus dohot angka donganna na mamaritahon barita na uli tu angka kota na adong di Jerusalem. Anak ni pengusaha tenda do natuatua ni apostel Paulus. Natuatuana do na manarihon na ringkot tu ibana uju marsikkola ibana di tano hatutubuna di huta Tarsus di sada Propinsi Sicilia di Kekaisaran Romawi.

Natuatunana do na manarihon na ringkot di ibana uju marsikkola hapariseon ibana di Jerusalem. Alai ala nunga gabe siihuthon Jesus ibana jala gabe apostel ni Kristus tu angka bangso na so Jahudi  ibana, ba ndang be dilehon natorasna i be na ringkot di ulaonna songon parbarita na uli. Antong songon dia do ibana patupa ulaonna i molo so adong na mangalehon na ringkot di ulaonna mamaritahon barita na uli i? Adong dua na masa di ulaonna mamaritahon barita na uli i. 

Naparjolo, i ma gabe tukang tenda ibana, mangula dohot tanganna, asa sian i ibana boi manarihon na ringkot di ngolu nang ulaonna dohot di ngolu nang ulaon ni donganna parbarita na uli di darat dohot di na ingkon mamangke transportasi laut.  Atik pe songon i, mangula sian keterbatasan ni sinadongan, dipasupasu Debata do ulaonna mamaritahon barita na uli i. Gabe adong ma na porsea di Jesus Kristus. Ndang olo apostel Paulus manusai angka na naung porsea tu Jesus Kristus siala ni barita nauli binaritahonna marhite na manarihon ibana. Dipatihi ibana do i. Konsisten do ibana mangulahon i (2 Kor 11: 9). 

Napaduahon,  dung jongjong punguan ni na porsea di angka kota-kota di kekaisaran Romawi, olo do nasida tong mangalehon na adong di nasida pangkeon ni apostel Paulus. Huria na di Filippi, isarana, mansai ringgas parsidohot mamaritahon barita na uli rap dohot apostel i. Alai ndang boi nasida sude borhat, ba dilehon nasida sada sian nasida na margoar Epaphroditus mandongani apostel Paulus, manarihon na ringkot di ibana dohot rap marbarita na uli dohot ibana. Mansai burju do si Epaphroditus on, pola benget manaon sahit na posa siala ni ulaon i. Alai tong do dilehon nasida sapunguan na ringkot tu ulaon mamaritahon barita na uli apostel i. Alai tutu, ndang dung diida nasida nang diida apostel Paulus na nilehon nasida i songon upa. Alai songon rumang ni partisipasi nasida. 

Molo upa do, ndang olo apostel Paulus manjalosa. Ai songon na nidokna tu halak Kristen di Korintus, sadari dijalo ibana upa nungan mansohot be ulaon mamaritahon barita na uli i.  Ndang ala na na mora angka halak Kristen na di Filipi umbahen na dohot nasida manumpahi ulaon pamaritahonon ni barita na uli i. Halak Kristen na di propinsi Makedonia, i ma halak Kristen na di Thessalonika, na mangolu di bagasan hapogoson na ektrim, angka pekerja keras, dohot do manumpahi ulaon ni apostel Paulus dohot angka donganna sian hapogoson nasida (2 Korintus 11: 8, 10; 2 Kor 8: 1-4). Ala ni i do umbahen na pola didok apostel i na mangarampas ibana sian nasida, ai na sian hapogosonnasida do dilehon panumpahion tu ulaon ni apostel Paulus), sian na tarpatupa nasida.

4. I do pangantusionna jala na dihangoluhon ibana, atik pe adong do tong hata ni Jesus taringot tu ngolu ni angka parbarita na uli songon on: Naeng sian barita i hangoluan nasida (1 Kor 9: 14, Lukas 10:7). Dialo apostel Paulus do na mamangke hat ani Jesus i laho marbarita na uli asa mangolu sian i. Ndang songon profesi ulaon na somal ulaon mamaritahon barita na uli i. 

Boasa songon i dipatupa apostel Paulus? Ala ndang martuhor barita na uli i.  Ndang tartuhor i. Silehonlehon do barita na uli na binaritahonna i tu manang ise pe, parsidohot halak Korintus (2 Korint 11: 7). Silehonlehon di Debata do barita na uli i (Jaha Gorik: Dorean tou theou). Ndang tartuhor ni jolma barita na uli taringot tu holong ni Debata di bagasan Jesus Kristus i. Ndang tartuhor. Silehonlehon do i. 
Sahali nari, na mangihuthon na pinatupa ni Jesus Kristus do angka apostel na di Jerusalem i, songon i nang na pinatupa ni apostel Paulus i. 

5. Alai ndang di sude punguan ni halak Kristen na parjolo i patupahon panumpahion tu ulaon mamaritahon barita na uli songon silehonlehon ni Debata i tubu pangantusion na pinatupa ni huriahuria di Filippi nang di Thesalonik. Di kota Korintus apala baliksa do na masa. Dia huroha na somal disi? Ala sada kota na maju ekonomina, boi masa na pogos hian gabe hatop mamora siala ni posisi kota Korintus songon kota pelabuhan na jonok tu Kaisar Julius na pajongjong kota i, lam mahembang ma pangantusion na songon on di angka na mora ni penduduk disi, ndang marimbar di tongatonga ni punguan ni na porsea di angka jabu ni patron na mora disi.  Dia ma pangantusion i. Songon on: Molo dilehon sahalak patron na mora silehonlehon tu angka flsuf termasuk parbarita na uli taringot tu Jesus jala molo dijalo angka filsuf i silehonlehon i, ba gabe boi ma aturon ni patron na mora i nasida. Gabe di bawah ketiaknya ninna di hata Indonesia. Manang aha nidokna, ba ingkon oloon ni angka filsuf i. Molo ndang dijalo silehonlehonna i, ba gabe musuna ma filsuf i, tung pe donganna hian ibana. Ndang jadi tulahon silehonlehon ni dongan. Ingkon jaloon do. Alai molo dijalo, ba ingkon unduk ma tu na mangalehon i na manjalo i. 

Di na ruar apostel Paulus sian kota i, borhat tu kota Epesus, adong ma angka parbarita nauli na rot u kota Korintus. Nasida ndang apala apostel na mangula di Palestina i. Alai na asing. Ndang apala tung tangkas di hita ise angka nasida i. Alai na pinatupa nasida i ma dijalo nasida do silehonlehon ni angka patron na mora na di Korintus i. Songon angka filsuf na manjalo na dilehon patron namora, na gabe didok dongan ni patron na mora i, ba songon i ma dipatupa nasida, ala didok roha nasida adong do tong hata ni Jesus na mandok mangan sian barita na uli angka na marbarita nauli (Lukas 10:7). Jala di jalo nasida i songon upa ni halojaonnasida marbarita na uli. 

6. Siala ni i, gabe adong ma dua pangalaho taringot tu partisipasi ni na porsea i di huria na parjolo i taringot tu silehonlehon. 

Naparjolo, i ma na pinatupa ni halak Kristen di Filippi dohot di Tessalonika: Berpartisipasi manumpahi ulaon ni parbarita na uli alai ndang songon upa ni ulaon mamaritahon barita na uli. Na tinumpahon nasida i, i ma apostel Paulus isarana, ndang marnida i songon upa, alai silehonlehon partisipasi, songon barita na uli i silehonlehon ni Debata. Songon i do angka donganna na marbarita na uli dohot ibana. Ndang manjalo upa. Ndang laho pamora diri sian i.

Napaduahon, i ma na pinatupa ni halak Kristen di Korintus, na pinatupa ni angka patron na mora. Na sogo rohana molo ndang dijalo na nilehonna. "Hansit mulak mangido humansitan mulak mangalehon." Alai molo dijalo gabe alona ma nang donganna. Angka apostel na manjalo on marnida na nilehon nasida i songon upa. Songon hak. 

7. Nian ndang ingkon sipertentanghononhon nadua i. Alai na mambahen sogo roha ni apostel Paulus i ma na gabe didok na manjalo i dohot didok halak Kristen Korintus ma na so apostel sasintongna apostel Paulus i ala ndang olo ibana manjalo upa sian halojaonna mamaritahon barita na uli i. Apostel kalas dua do apostel Paulus, ninna nasida. Ala ni i ndang barita na uli na binaritahonna i pe ndang marojahan tu pangajarion ni Jesus. Ndang tarjalo ni apostel Paulus pamereingon na songon i. Baliksa nasida do na so apostel. Apostel na pargapgap,  aspostel na manamaknamak do nasida (Gorik: Pseudo-apostoloi) songon sibolis na manamaknamak, na pasumansumanhon (Gorik: meta-schema-tizomenoi).

8. Di pardalanan ni huria na di portibion sian abad parjolo sahat tu nuaeng, pangantusion na parjolo i do, pangantusion ni apostel Paulus, ia pangantusion ni bahatan ulaon ni huria dohot ulaon ni angka pangula ni huria na marragam i.   Partisipasi ni angka ruas ni huria manumpahi dohot manarihon na ringkot di ulaon ni huria i mansai timbo do. Jalan a pinasahat ni angka ruas ni huria ni Kristus tu ulaon ni huria i, na pinangke ni huria i tu ngolu siganup ari ni angka pangula nagok ni huria i songon rumang ni partisipasi ni ruas ni huria i di ulaon mamaritahon barita na uli i. Najinalo di angka parbarita na uli i ndang upa, manang gaji di parbarita na uli i.  Songon i do pangantusion ni HKBP. I do umbahen digoari na jinalo ni angka pangula ni huria i: Balanjo. Ndang upa. Ndang gaji. Ai molo ula, nunga gabe situhoron be barita na uli i.

9. Angka huria na ringgas patupahon partisipasi ni ruas manumpahi ulaon ni huria i ma na ginoaranna huria na manjunjung baringinna na denggan. Alai angka huria na so denggan partisipasi ni ruasna, i ma angka huria na so mandiri. Ndang tarbahen huria na songon i magodang dohot hehe di na patupahon ulaonna.
SIhalashononnta do na ia Huria Kristen Batak Protestan huria na denggan partisipasi ni ruasna jala pangula huria gok tingkina ndang mamereng balanjo na jinalo nasida songon upa nasida.
I do umbaen na ringgas  ruas ni HKBP sian najolo sahat tu nuaeng manumpahi ulaon ni huria. Olo do angka ompunta mangalehon tano nasida gabe inganan hajongjongan ni bagas joro. Olo do angka ruas papunguhon nasa na ringkot laho pajongjong angka na ringkot tu pangajarion sikkola minggu, TK, dohot pasahathon na ringkot di huria i, manang pe marhite toktok ripe, dohot angka pelean na marragam i.

I do umbahen na olo angka keluarga manongos angka anak dohot boru nasida marsikkola asa boi gabe pangula ni huria.

I do umbahen na olo angka ama nang ina gabe Sintua atik pe ndang manjalo upa nasida sian huria i.

10. I do hasintongan ni Kristus i: Basabasa ni Debata do Ibana tu hita asa malua hita, jala ndang tartuhor hita sian Debata. Songon angka na dohot di bagasan ulaon ni Kristus na rade do ganup ruas ni huria manumpahi ulaonna, ndang songon pangantusion ni na mora ni halak Korintus, alai songon pangantusion ni halak Kristen na adong di Filipi nang Tessalonik, na manumpahi na ringkot di ulaon ni Kristus i di tongatonga dohot marhite huriaNa. 

11. Di pardalanan i ngolu dohot panindangion ni huria di angka inganan na marragam i, sai adong do angka na mamangke ulaon mamaritahon barita nauli laho pamoramora dirina marhite na manumannuman (berpura-pura, pretending to be). Ndang parbarita na uli na sasintongna nian ibana, alai manumannuman gabe hira parbarita na uli. Ndang apostel, alai manumannuman songon apostel. Dos do i songon angka panurirang pargapgap di bangso Jahudi na jolo. Adong na manumannuman na sian Debata do ro panurirangionna, alai sasintongna ndang.  

12. Situlahon ni angka huria do molo adong angka pangula ni huria na mamangke hata ni Kristus na mandok "Naeng sian barita nauli hangoluan nasida" gabe dalanna memanipulasi ruas ni huria ni Kristus i asa mangalehon artana tu angpa pangula ni huria i. Situmpahan do angka pangunga ni huria nang na ringkot  di huria i suang songon i ulaon ni huria, songon dalanta parsidohot di ulaon ni Kristus paluahon hajolmaon i. Sitangianghonon do angka ruas ni huria na mansai ringgas parsidohot di ulaon ni Kristus marhite na mangalehon na adong di ibana. Sisosoon ma angka na so haru ringgas situtu dope, gariada losok, parsidohot manumpahi ulaon ni huria i. Ala nunga tung mansai balga silehonlehon ni Debata tu hita, ndang tung so ringgas hita parsidohot manumpahi ulaon ni Kristus. 

Ndatung boi dohononta dirinta songon ruas ni huria na parsidohot di ulaon ni Kristus molo gogonta ndang ndang talehon, pingkiranta ndang talehon, sinadonganta ndang talehon tu ulaon ni Kristus i, molo tapasombu bagas gareja martaontaon ndang jongjong hape adong do na di hita, molo patasombu hurang na ringkot pangkeonta tu pangajarion ni angka dakdanak, remaja, laho patauhon nasida mananda Kristus dohot mangulahon lomo ni roha ni Kristus. Alai tutu ma hita na ringgas parsidohot di ulaon ni Jesus Kristus mamaritahon barita na uli molo ndang mangholit hita pasahathon angka pasupasu nilehon ni Debata di ngolunta pangkeon ni huria i. Ringkot do adong balanjo ni angka pangula ni huria. Alai ndang olo jala ndang jadi pangula ni huria gabe manusai ngolu ni ruas ni huria. Uju mangolu do hita boi tapatupa i. Molo dung monding hita, ndang tarbahen hita be patupa i.(*)
  BeritaTerkait
  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Minggu IX Dung Trinitatis, 29 Juli 2018: Evangelium, Mateus 16: 24-28 "Gabe Sisean Namarsihohot Mangihuthon Jesus"

    5 bulan lalu

    Oleh: Pdt Dr. Robinson Butarbutar, Parsameanta, STT-HKBP1.Sian tingki tu tingki, mamungka di tingki mangula di Palestina dope Tuhanta Jesus Kristus nidonganan ni angka siseanna na sampulu dua i s

  • "Mangulahon Hasintongan dohot Hatiuron"

    3 bulan lalu

    Oleh: Pdt. Dr. Robinson Butarbutar, Sian Parsameanta, STT-HKBP PematangsiantarDi partingkianta nuaeng mansai hatop do masa perubahan, ndang holan di parbinotoan ni jolma taringot tu ilmu-ilmu pengetah

  • Pamingkirion tu Parsiranggutan di Ekklesiologi HKBP di Rapot Pandita HKBP Oktober 2017

    2 tahun lalu

    I. Pamuhai Di Sinode Godang HKBP September 2016 na salpu, ruas ni sinode do ahu songon Plt. Direktur Sikkola Pandita. Disi tangkas do soara ni bahat parsinode asa diamandemen sistem pamil

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb