• Home
  • Agama
  • Jamita Sadarion sian Pdt Dr Robinson Butarbutar, Dosen STT HKBP: Naposo ni Debata
KSP Makmur Mandiri
Minggu, 09 April 2017 06:56:00

Jamita Sadarion sian Pdt Dr Robinson Butarbutar, Dosen STT HKBP: Naposo ni Debata

BAGIKAN:
Ist
Pdt Dr Robinson Butarbutar, Dosen STT HKBP
1. Tu Sipareon ni na umbege jala tu Roha ni na jumaha na parjolo ni panurirangon ni si Jesaya on, i ma nasida naung tarbuang, naung agoan masa depan, naung manghilala naung diuhum jala ditadingkon Debata Jahowa nasida, bawa nang boruboru, angka ma mora pomparan raja, pengusaha hian lumobi angka na pogos, angka naung tinaluhon ni bangso na mardebatahon debata asing sian Debata ni Israel, Debata ni si Abraham, Ishak, Jakob dohot Daud nang angka pinompar nasida, ro do panurirangon taringot tu hadirion ni naposoNa on songon barita na mansai uli situtu. 
 
Ai di ngolu nasida nunga tung bahat diida simalolong nasida angka naposo ni Debata di harajaon Israel, sian raja sahat tu sude angka naposo ni raja i, nang angka naposo ni Debata di bagas joroNa, nang panurirang pe tahe, na so tuk gabe naposo na pamalum roha, pahirashon 'semangat hidup nasida.' Baliksa do na pinatatupa nasida, i ma lam mandondoni bangso ni Debata, mamoro nasida, mambuat angka tano nasida, paro uhum, bura, dna. Ai nuaeng disoarahon Debata tu nasida marhite Jesaya hadirion na imbaru ni naposo ni Debata, na tung andul asing sian hadirion ni naposoNa naung manguluhon nasida nasailaon. 
 
Dipangke Debata panuring Jesaya manoarahon hadirion i, anggiat boi nasida tarapul, marpanghirimon. Ianggo na sai laon, ruar do soara na posi nang sian pamangan ni si Jesaya, soara na tung muruk situtu mida bangsoNa i, soara na manguhumi, soara na paboahon uhum ni Debata na mansai jorbut situtu, soara bura. Alai ianggo nuaeng, tu bangso naung taruhum i, andul asing do hadirion ni naposo ni Debata.
 
2. Dia ma i? I ma:
 
Naparjolo, naposo na naung marguru, marsiajar, dung gabe sisean, na mardila naung marsiajar (Batak 'dila sisean,' Heber 'lesyon lemudim), na siala ni i gabe patauhon ibana umboto mamillit hata na tuk pasabamhon roha ni na loja. Tu angka naung manghilala hinaloja ni na mangolu i siala ni parungkilon na bolon niadopan ni bangso i, naposo naung marsiajar do na diharingkothon, ndang naposo na rosu manghatai, na mambahen lam toruk roha ni na niuluhonna, na nihobasanna. 
 
Paduahon, naposo na tinggil sipareonna manangihon, i ma ndang pinggol na mangajari (na manangihon alai mandok, 'olo, nunga huboto i', 'olo nunga dung hubege i, pandok ma hatami, hutangihon pe'), alai tung sipareon na olo manangihon, marsiajar, pinggol sisean, ndang pinggol guru na manghilala ibana do umboto saluhut.
 
Ndang mura gabe naposo ni Debata, na manghikaka afong huado ni Debata di ibana, gabe na marsipareon na tinggil manangihon. Hagogoon ni Debata do na tuk palumehon i tu naposoNa (ayat 5), asa tarbahensa unduk manangihon, ndang manulak (Batak: manjengkel-jengkel), gabe ndang magodang di parbitoan ni na hinobasanna, gabe sumurut tu pudi. Ai beha ma manangihon bangso ni Debata na puas-pais, naung marungkil situtu, naung agoan sude, na so martano, na so marmasa depan? Tung ingkon Debata do na mangurupisa.
 
Napatoluhon, naposo na so mambaloshon na jat dohot na jat, alai na mangaloas dirina, rungkungna dilinsingi na mangalinsingisa nang hurumna tu na mamastapisa, na rade diurahi dohot diinsahi dohot tijur, alai huhut marpos ni roha na urupon ni Debata do ibana unang tarurak baliksa gabe songon batu ping, togu, so sumurut, so tarhahua, so manghosomi, hot manghobasi, ai Debata do na mamintori ibana maradophon angka na marparkaro dohot ibana (ayat 6-9a).
 
Nda gabe barita na uli do tu roha ni sijaha panurirangon ni si Jesaya on, na patolhashon rumang ni hanaposoon ni Debata tu bangso na manaon, na susa goluna i?
 
2. Dung disurirangkon Jesaya hadirion ni naposo ni Debata na songon i sahat tu haroro ni Jesus na sian Nassaret i, di tonga-tonga ni bangso Jahudi, ndang dung adong naposo ni Debata na manggohi hadirion ni naposo ginurithon ni si Jesaya dung mulak nasida sian habuangan, ndang si Nehemia, ai tung koras do ibana manguluhon, pola mamaksa sirang be ma angka naung mardongan saripehon halak na so Jahudi, ndang si Esra siboto surat i, ai sai diondolhon ibana do na ingkon mangulahon patik na togu bangso naung mulak i hape so tuk nasida, padokdokhu patik i ulahonon, gabe patudo dosa do ibana; ndang angka raja sian dinasti Hasmonean na jongjong sian bangso i sandiri manguluhon nasida marhite porang Makabeus, na gabe mamaksa bangso na asing maugsmohon ugamo Jahudi; ndang angka parhuaso malim di bagas joro di Jerusalem na mambuat pajak nang sian angka na pogos, dohot psjak ni pelean situtungon, amporik; ndang halak Farise, Saduse nang angka rabbi dohot siboto surat nang natuatua na manghilala holan nasida do umboto lomo ni roha ni Debata, pola sai manguhumi nasida tu rakyat na pogos, mandok ala ni dosa nasida do umbahen na marsahit nasida, maol ngolu-ngolu, torus dihuasoi bangso Romawi. 
 
Ndang adong. Alai di ulaon ni Jesus na jempek i, tolu taon diida jala diingot nasida do songon dia Jesus mangadopi angka pardosa, i ma ndang manguhumi, alai rafe manjangkon, mangalului nasida, gariada paluahon sian dosa nang sahit na pinamasa ni hagogoon ni portibion, i ma angka tondi na hodar nang parhuaso ni portibion na mamparhatobanhon nasida, mangajar-ajari nasida dohot hata na lambok, marhite umpama, alai tong na marparkaro dohot angka alo ni na metmet, pardosa, napogos, na susa, angka boruburu na digosagosa i, dohot na marsahit ala ni tondi hagaleon na mangingani ibana saleleng 18 taon, pola tahe di ujungna dioloi ibana sian rohana sandiri diparsilangkon nasida sahat tu na mate songon parjahat, kriminal. Ndang marujung di hamatean ibana, diondihon Debata do ibana, dipabangkit ibana sian hamatean.
 
Ibana do ninna angka siihuthon Ibana dung haheheonNa i naposo ni Debata sinurirangkon ni si Jesaya i. 
Ibana do naposo ni Debata na malo mamillit hata, na tinggil manangihon alualu ni na ro tu ibana. 
Laos songon i do pamerengon haporseaon ni halak Kristen sahat tu tingki on. Ala ni i do gabe sai diihuthon nasida Naposo ni Debata na sadaon. Tangis dohot angguk-angguk nasida sai tu ibana do diusehon, sahat tu nuaeng...
 
3. Di angka na mangihuthon Ibana, naung mananda hanaposoon ni Jesus Kristus i, adong do tong joujou tu nasida olo pangkeon ni Jesus Kristus gabe haroroan ni hadirionNa di tonga-tonga ni ruas ni masyarakat na bahat manaon, na talu di persaingan jaman, na peak, jala sanggayap di bahen angka huaso ni portibion, isara ni porang, hapogoson, parhuaso Narkoba, virus HIV, perdagangan ni jolma, angka buruh na digosagosa pengusaha, angka partani na so boi manggadis parbue ni na ni ulana, angka partigatiga na metmet na ginosagosa ni kapitalis na pajongjong mal, alfa mart dna.
 
4. Domu tusi, di taon 500 taon dung reformasi nuaeng di taon 2017 ringkot do ingotonta na dohot do direformasi Dr Martin Luther pangantusion na so haru singkop di partingkianna taringot tu hanaposoon ni Debata ni halak Kristen, i ma na mandok holan na naposo ni Debata na di huria i do naposo ni Debata, i do haposoon na dumenggan. Na di duru ni huria i humurang do hanaposoon ni Debata. Mereformasi i didok ibana do na dos do di jolo ni Debata hanaposoon ni halak Kristen na duru ni huria dohot na di huria, na mangula di pamarenta, swasta, tentara, usaha, pertanian, perdagangan, seni, teknologi, pabrik, di dalan, nang di (tatamba i ma: di angkasa luar, di laut, di darat) nang di keluarga.
 
5. Nuaeng ingkon rimangrimangonta do hanaposoonta saleleng on di huria nang di masy, pamarenta, usaha dna...
 Na mardila sisean, na tangi di na tauluhon, na tahobasi, na rade manaon, ndang mambalos na jat, na pos roha na diondihon Debata do ibana di na mangulahon i sude, i ma manghobasi angka donganta jolma, gabe pasupasu tu portibion?
 
Margogo ma hita ro tu Jesus Naposo ni Debata na denggan roha i di angka parungkilonta di ngolu on, denggan ma tapatulus hanaposoonta tu angka na tahobasi, di jabu, di ulaonta di huria nang di duru ni huria:
 
1. Malo mamillit hata pasabamhon roha ni na loja mangula di ngolu on.
2. Rade manangihon parsorion 
3. Rade manaon huhut pos roha di pangondihonon ni Debata nuaeng nang sogot  sian angka na manulak hita. (Pdt Dr Robinson Butarbutar, Dosen STT HKBP)
  BeritaTerkait
  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    12 bulan lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium Minggu XIV Dung Trinitatis, 17 September 2017: Roma 14: 1-12 "Masianjuan di Angka Hagaleon"

    12 bulan lalu

    Oleh: Pdt Dr Robinson Butarbutar, Dosen STT HKBP1. Tibu do tubu huria di jabu-jabu na di Rom, Ibu Kota Kekaisaran Romawi, songon parbue ni ulaon misi pinatupa ni ruas ni huria na mangolu jala martiga-

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    12 bulan lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    11 bulan lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  • Jamita Evangelium Minggu IV Adven 24 Desember 2017, Lukas 1: 26-38: Debata Ro Mamboan Asi ni Roha"

    9 bulan lalu

    Oleh: Pdt. Dr. Robinson Butarbutar, Sian parsameanta, STT-HKBP PematangsiantarDi minggu Adven paopathon sadarion, marhite barita nauli sinurathon ni parbarita nauli jala teolog Lukas di bindu 1 ayat 2

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb