• Home
  • Agama
  • Jamita Minggu XXI Dung Trinitatis,21 Oktober 2018: "Hadaulaton na Rimpas" (Rom 12: 1-3)
KSP Makmur Mandiri
Jumat, 19 Oktober 2018 14:52:00

Jamita Minggu XXI Dung Trinitatis,21 Oktober 2018: "Hadaulaton na Rimpas" (Rom 12: 1-3)

BAGIKAN:
Ist
Pdt Dr Robinson Butarbutar
Oleh: Pdt Dr Robinson Butarbutar

Tardok mangolu di partingkian, manang zaman na hatop mubauba do ganup halak Kristen di portibion nuaeng, manang di dia pe nasida maringan dohot mangula ndang marimbar halak Kristen Batak. Partingkian na hatop mubauba i dipahatop fasilitas internet, tarlumobi di angka kota-kota (urban) na dipangke jolma ndang holan berkomunikasi, alai dohot do maronan, meret sian sada inganan tu inganan na asing (transportasi), nang marusaha.  Di Indonesia, isarana, mengihuthon Asosiasi Pengguna Penyelenggara Jasa Internet, lobi sian satonga penduduk mamangke internet, i ma 143 juta halak. Na gumodang mamangkesa i ma angka na marumur 19 tu 34 taon godangna 49, 52 persen. Diihuthon angka na marumur 35-54 taon ma i, godangna 29,55 persen. Ihut ma angka Remaja na marumur 13-18 taon, godangna 16,6 persen. Jala angka na marumur di ginjang ni 54 taon godangna 4,24 persen. Di Pulo Jawa pola 57,7 persen naung mamangkesa. Hita di Sumatera 19,9 persen.   

Di partingkian na hatop mubauba i, ndang holan hamubaon di parngoluon ekonomi na hatop mubauba, alai dohot do hamubaon di ruhut-ruhut parngoluon, parange moral ni jolma i.  Asa, ndang tarsonggot be hita molo adong sada halak na taida di ngolu siganup ari hira na denggan parangena mangihuthon ruhutruhut hadaulaton naung diihuthon halak Kristen saleleng on, alai tompu di na so taida nunga diula nasida angka na so patut mangihuthon angka ruhutruhut parange ni hakristenon. 
Isarana, ala ni na bungbung komunikasi ni sahalak jolma tu halak na asing di portibion, boi do masa angka parmainanon na so dung masa andorang so manggurasa komunikasi internet on. 

Boi do sahalak ama ndang pola sai ingkon martandang be tu sada inganan, alai nunga boi dung berkomunikasi dohot boruboru na asing di duru ni jabuna, tompu patupa angka parmainanon dohot boruboru na asing. Di partingkianta nuaeng, lam margurasa angka hajahaton seksual maradophon dakdanak (phaedopholia) ala ni pornography na rade siisaon ni jolma di fasilitas internet. Angka hajahaton pe mansai marragam dohot timbo dalanna siala ni haradeon ni internet i. 

Isara na masa tu Pemilihan Umum Presiden di Amerika di tingki na salpu, i ma na gabe dihack angka data ni markas calon presiden Hilary Clinton, na mambahen talu ibana, ai dipaburukburuk ibana. Sahat tu saonnari sai disulingkiti Kejaksaan nasida do ise na patupa i. 

Di taon na salpu dohot di bona ni taon on, marsak do hita halak Kristen Batak ala masa di Toba hajahaton INCEST, i ma dipatupa natuatua tu ianakkonna na so patut di bidang seks. On ndang dung masa tu tongatonganta saleleng on.

Di partingkian na songon i, marsaringar tu tongatonganta hata ni Debata na ginurithon ni Apostel Paulus tu huria na di Rom, sada kota na balga di tingkina, ibu kota ni Kekaisaran Romawi, inganan ni bahat jolma na ro sian angka bangso dohot na mangolu mangihuthon ruhutruhut parange na marasing sian ruhutruhut parange ni halak Kristen. Hatani Debata ginurithonna di bindu 12: 1-3 i, i ma sada pangurupion binahenna laho mangajari angka na porsea di kota Rom i, songon dia ma nasida mangolu disi asa unang dapotan hasurahan nasida di jolo ni Debata. 

Na sinuratna di bindu 12: 1-3 I ma udut ni na sinuratna di bindu 5-8 suratna tu huria Rom i, tarlumobi di bindu 8 na mandok:  Ia angka naung tardidi tu bagasan goar ni Debata Sitolusada i, angka naung tinobus ni Jesus Kristus marhite mudarna di hau pinorsilang i, ndang be mandalani ngoluna siganup ari mangasahon patik ni si Musa songon halak Jahudi, alai holan na mangoloi lomo ni roha ni Tondi Porbadia i do. (Ida tarlumobi di bindu 8). Tondi Porbadia ni Debata do na manogunogu na porsea i patupahon lomo ni rohaNa). 
Laho patuduhon songon dia i patupaon ni halak Kristen di ngolu siganup ari, disurathon ibana ma di bindu 12-15 angka dalan marparange na imbaru ni halak Kristen. Di bindu 12: 1-2 ma ojahan ni angka parange i, di bindu 12: 3-15:13 dipatorang ibana ma songon dia halak Kristen marparange na imbaru tu angka sama Kristen, isara:
Unang manghilala tumorbang ibana sian na asing alai marguru tu na pinalulemohon ni Debata tu ganup ma (12: 3-13), alai masihaholongon ma (13: 8-10), alai dohot do
songon dia marparange maradophon na so sahaporseaon, gariada na paburuburu halak Kristen i (12: 14-21), isara ndang mamaloshonsa (12:17), gariada patupa dame tu saluhut halak intap ni na tarbahen ni halak Kristen i do na disosoi apostel i, ai Debata do mamaloshon (12: 19-21). Baliksa mananggali ulaon haholomon, manolukkon ulaon hatiuron do, marparange di arian, ndang be manungguli hisaphisap ni daging (13: 11-14) sipatupaon nasida. 

Laos songon dia marparange maradophon pamarenta na marsahala (13: 1-7) dipatorang. Songon i ma nang,
Songon dia angka halak Kristen Jahudi dohot na so Jahudi marsaor, ndang be marbolat siala ni sipanganon dohot siinumon (14: 1-15: 13). Ganup ma masiargaan di hasomalan parpangananna be.
Asa, na gabe jamita tu hita Halak Kristen Batak di Minggu XXI dung Trinitatis on, i ma ojahan ni parange ni halak Kristen na ingkon hantus di ganup halak Kristen manang songon dia pe partingkian ni ngolu nasida. I ma na di ayat 1-2 i. Jala na di ayat 3 i, i ma sada contoh ni parange ni halak Kristen maradophon sama donganna Kristen. Sadasada ma tatangkasi. 

Ojahan ni parange ni ngolu ni halak Kristen i dipaandar laho mangalusi sungkunsungkun on: Dung tardidi na porsea i tu bagasan Kristus, songon dia ma ibana mangolu ganup ari. Songon halak Jahudi do manang songon halak Romawi dohot Yunani, songon parange ni portibion, parange ni partingkian na masa? Alusna ndang. Ndang mulak be tu Hajahudion. Ndang mulak be tu Hagorikon, manang Haromawion. Ndang mulak be tu hasipelebeguon. Ndang sarombang dohot partingkian. Na pinatorangna dison, sada rumang na asing ni na naung niajarhon Jesus Kristus do taringot tu ise angka siseanna, i ma 'hamu do sira ni portibion' dohot 'hamu do panondang ni portibion' (Mateus 5: 13-16). Na ginurithonna dison rumang na asing ni naung diajarhon apostel Paulus tu halak Kristen na di Korintus I do, i ma, 'bagas joro ni Debata' do hamu (1 Kor 3: 16-17), 'ruas ni Kristus' (1 Kor 6: 15-20), 'bagas ni Tondi Porbadia' (1 Kor 6: 19-20). Dia ma i?

Naparjolo, ingkon dalanhononta do ngolunta on gabe ngolu na beribadah, jala ngolu na beribadah i, ingkon na rimpas do (di hata Gorik didok: na logiken), na denggan tu harohaon na denggan, ndang na pilitpilit. Ngolunta on ingkon gabe ngolu na marhadaulaton na rimpas (Gorik: logiken latreia.). Ibadah hidup kita adalah ibadah yang logis. Patudos: Manang aha na tapangan, tainum, dohot taula, molo mangolu hita, bahen hasangapon ni Debata ma (1 Kor 10: 31). Songon dia ma rumang ni i? On ma: Ingkon pasahatonta do ngolunta na adong di pamatangta on, dagingta i (Gorik: somata)  bahen pelean (Gorik: thusia) na mangolu, na badia, na hinalomohon ni Debata.  Dohot jempek: Ngolunta naung tinobus ni Kristus on ingkon tadalanhon bahen pelean na mangolu, na badia, na hinalomohon ni Debata. 

Siala ni i, di partingkian na tadok di ginjang i, suraon do ngolunta saleleng dung tardidi hita tu bagasan goar ni Debata Sitolusada i nunga tapatuduhon songon pelean na mangolu, na badia, na hinaloohon ni Debata, manang baliksa do? Nunga ngolu na naung marhadaulaton na rimpas ngolunta saleleng on? Denggan do tarimangrimang i sungkunsungkun i.  Molo didok pamerengionta tu dirinta sandiri (introspeksi) diri, hira ndang dope, denggan do hita manolsolisa huhut paimbaruhonsa. 

Napaduahon, di na manungkun i, denggan do tatangihon na di ayat 2 i, i ma oraora dohot sosososo.
Oraora: Ndang jadi hita sarombang dohot portibion. 
Hata sarombang i bagas do lapatanna molo tapareso hata Gorik na pinangke ni apostel Paulus. Dia ma i? I ma suschematizesthe (sian hata su dohot shematizomai), i ma rap sapingkiran, mangolu saurdot tu, dibentuk oleh, ditompa, rap sarombang dohot zaman, partingkian manang pamingkirion dohot pandapot ni zaman on (Gorik: aioni). Ndang jadi hita rap sapamingkirion, dibentuk oleh, mangolu mangihuthon, na nidikte ni partingkianta. Mansai bagas do hinangkam ni suschematizomai i, sarombang dohot partingkian nuaeng on.
Denggan do tasungkunhon dirinta be, suraon do hita rap sapingkiran dohot portibion saleleng mandalanhon ngolu, ulaon dohot parsaoranta saleleng on? So tung songon na nidok ni umpasa Batak i, Eme na masak digagak ursa,  i na masa ba i ma na niula hadaulatonta saleleng on?

Molo songon i dope hita taida saleleng on, denggan do muba hita. Di jaman internet na ginoaran na di ginjang i, so tung sapingkiran dohot saparange hita dohot portibion. Baliksa ingkon:
Sosososo: Patupa hamubaon ni diri (Gorik: metamorphousthe, sian hata metamorphose, perobahan hadirion, songon kepompong na muba gabe kupukupu i, mago do hadirionna na robi, ro ma hadirion na imbaru. 
Hamubaon diri i lam dipatangkas domu tu sarombang dohot partingkian i (susschematizesthe) i, i ma paimbaruhon pingkiran (Gorik: noos). Ala di pingkiran, noos i do disangkapi jolma jala diatur jolma siulaonna, disi do diatur songon dia patupahon na sinangkaapanna, siala ni i do dipangido apostel Paulus i hita asa paimbaruhon pingkiranta. Mansai jago do hatauon ni pingkiranta i. Ndang jadi be pamingkirion na robi pamingkirionta. Ingkon imbaru do pamingkirionta i, cara memandang, cara manangkapi, cara mangulahon sude angka silangkahononta. Cara memandang jolma na adong di humaliangta pe ndang be songon cara memandang ni partingkian i. Ingkon tapaimbaru. 

Molo tapaimbaru pingkiranta i, ndang be ditontuhon pingkiran ni partingkianta i be pingkiranta, alai gabe tarbahen hita do manimbangi (Gorik: dokimazein, Indonesia: Menimbang-nimbang, Inggris: To discern) di ganup tingki dohot inganan dia lomo ni roha ni Debata, i ma angka na denggan/na uli (Gorik: agathon), na hinalashonna (Gorik: euareston) dohot na sun denggan (Gorik: teleion, Indonesia: Na sempurna). 
Boasa holan angka na naung paimbaru pingkiranna do na tuk manimbangnimbangi (Inggris: To discern) dia na uli, na sun denggan na hinalomohon ni Debata? Ala mansai jotjot do ndang apala tangkas di sada partingkian dia lomo ni roha ni Debata. Boi hira na samak, ndang birong manang ndang bontar sada pangalaho. Ndang holan tu angka panguhum hatauon na songon i na mansai ringkot, i ma angka na manguhumi sada pangalaho na jat di pengadilan, alai dohot do di ngolu na somal siganup ari. 

Ala ni i, ingkon sungkunhononta halak Kristen Batak do di partingkianta sinuaeng songon na hugoari na di ginjang i, i ma partingkian parmubaan na mansai hatop, manang na nunga sarombang dohot portibion hita, hot sarombang dohot portibion hita, manang nunga ndang sarombang be hita dohot portibion.

Isarana: Hira sude do jolma di partingkianta nuaeng mandok na so tarsirang hita be ngolunta sian internet on. Nunga sahat tu podoman ni na mardongan saripe be internet i. Hape taboto do na di ngolu parsaripeon mansai ringkot to godang tingki rap. Nueang on nunga tubu sada gerakan di portibion mandok ndang sai oloan be internet i, ai atik pe godang na dapot hita sian i, alai tung mansai bahat do nang mara tu hita disi. Di sada negara di Eropa, isarana, nunga diorai dakdanak mamboan hpna, tablet, tu kelas uju marsiajar.

Isarana: Beha do hita halak Kristen Batak andorang so Krristen mamereng dakdanak, mamereng boruboru? Songon di masyarakat na hierarkhis dope? 
Isarana: Beha do hita halak Kristen Batak mamereng ODHA dohot ADHA? Songon na robi i do, i ma sipasidingon sian sihatoropan, isara sian parsikkolaan? Manang nunga sahat hita mamereng nasida songon korban na ingkon sihaholongon jala hak-hakna sipatoguon?

Isarana: Beha do hita halak Kristen Batak mamereng angka donganta na so sahaporseaon dohot hita? Suraon do dohotdohot hita mamereng donganta jolma marojahan tu sukuna, ugamona? Suraon do diskriminatif hita songon na pinatupa ni halak Kristen di Afrika Selatan, i ma na bontar hulitna, na mamereng halak na birong di toru nasida derajat hajolmaonna?
Parpudi, laho patuduhon contoh konkrit di hinaringkot ni ngolu na marhadaulaton na rimpas, hup yang beribadah, i ma na mamelehon pamatangta tu Debata, marhite na so sarombang dohot portibion, alai baliksa paubahon pamingkirionta, dipaandar apostel Paulus ma sada contoh di ayat 3, i ma: Songon dia do sahalak Kristen marnida donganna Kristen na asing di sada huria manang di dia pe tahe, donganna i adong be do naung pinalumehon ni Debata tu ibana (isara panurirangon, marhobas,haguruon, ulaon asi nir oha, ulaon manguluhon, ulaon marbasabasa, ayat 3-8). Molo mangihuthon partingkian ni halak Gorik, ganup do ulaon ni jolma ditimbangi mangihuthon rohutruhut hierarhi , martirket, Romawi, i ma: Patron-Client, tuan-hatoban. Tung adong pe basabasa asi ni roha dijalo sahalak na porsea na ro sian horong hatoban, ba mangihuthon partingkian di Roma, ba tumoru do ibana dohot asiasina i sian tuan dohot asiasi na jinalo di tuan i.   Ndang boi be songon i pamingkirion ni angka naung paimbaruhon pingkiranna, noos-na. Ingkon: "Unang ma torbang rajumi hamu dirimu lobi sian na patut."

Sanga do mamungka sian abad paopathon sahat tu abad pa-16-hon martirket diida di huria i silehonlehon jinalo ni na porsea i. Tumimbo do arga ni diri nang  panghobasion ni malim di huria Katolik sian diri ni ruas nang ulaon ni ruas ni huria i na mangula di duru ni portibion. Gabe sarombing huria i dohot pamerengion dohot pamingkirion ni kekaisaran Romawi dohot portibion. Tuan i ma ro reformator Martin Luther na paimbaruhon pingkiranna, dung i marojahan tu Roma 12: 3 on nang 1 Petrus 2:9 diajarhon ibana ma di tongatonga ni huria i na sude do malim na raja, alai ganup adong be ulaonna jala diatur ma i denggan. Ajaran ni si Martin Luther i do na dipaihutihut Huria Kristen Batak Protestan sahat tu nuaeng na mandok dos do arga ni hanaposoon ni Debata di  tongatonga ni huria (angka parhalado) dohot hanaposoon ni angka na porsea di duru ni huria i di portibion. Di angka parhalado pe, ndang adong pangantusion hierarkhis: Isarana, ia angka Guru, Bibelvrow, Diakones nang sintua dongan ni pandita do nasida mangulahon ulaon tohonan i. Alai tutu ganup adong be ulaonna. Ndang jadi masirampasan. I do na diatur di Aturan dohot Paraturan ni Huria.

Siala ni i, denggan do sahali nari sungkunhononta dirina, pangula di huria i dohot pangula di portibion, isara di negara dohot di swasta, nang di usaha, marimbar do taida arga di ulaonta di jolo ni Debata, gariada tumorbang, sian angka ulaon ni na asing di huria i nang di portibion?
Molo songon i dope pangantusion dohot parmarparangeihononta, denggan ma hita muba.
Dipasupasu Tuhanta ma hita manangihon, paandarhon nang mangulahon hata ni Debata: Gabe ngolu na marhadaulaton, beribadah, na rimpas ma ngolunta tu joloan on, marhite na sai pasidingkon marparange saudrdot tu bangko sarombang dohot portibion, alai tongtong paubahon dirinta marhite paimbaruhon pingkiranta, asa tarbahen hita manimbangi dia lomo di roha ni Debata di ganup tingki nang inganan. Pematangsiantar, 20 Oktober 2018.(*) 
  BeritaTerkait
  • Jamita Evangelium, 14 Oktober 2018 Minggu XX Dung Trinitatis: Pir ma Tondim jala Marsihohot (Josua 1:-6-9)

    satu bulan lalu

    Oleh: Pdt Dr Robinson Butarbutar, Na tongon di Sipoholon dope dung mandohoti Sinode Godang HKBP 8-12 Oktober 2018, HP/WA: 0812-62472015Dipangke Debata Pargogo Nasohatudosan i do hita angka jolma, angk

  • Jamita Evangelium, 28 Oktober 2018 (90 tahun Sumpah Pemuda) Minggu XXII Dung Trinitatis "Huria Mangulahon Ulaon Parasinirohaon" (Jesaya 58: 4-12)

    4 minggu lalu

    Sian Parsameanta: Pdt Dr Robinson ButarbutarUlaon parasinirohaon solhot do i tu hajolmaon. Molo taida angka donganta jolma mian manang mangolu di bagasan sada kondisi ni ngolu na tung maol situtu, mad

  • Jamita Evangelium, 18 Nopember 2018, Minggu XXV Dung Trinitatis: Taluhon ma Hajahaton Marhite Ulaon na Denggan (Roma 12: 9-21)

    4 hari lalu

    Oleh: Pdt Dr Robinson ButarbutarSada sian pinompar ni Zaman Pencerahan (Inggris: Renaisance; German: Aufklaerung) na umpudi tubu di pangujung ni abad pa-20-hon alai margurasa tong sahat tu nuaeng on,

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb