• Home
  • Agama
  • Jamita Minggu V dung Trinitatis, 1 Juli 2018 Evangelium: Markus 16: 14-20 "Mamaritahon Barita Nauli tu nasa Natinompa"
KSP Makmur Mandiri
Jumat, 29 Juni 2018 16:00:00

Jamita Minggu V dung Trinitatis, 1 Juli 2018 Evangelium: Markus 16: 14-20 "Mamaritahon Barita Nauli tu nasa Natinompa"

Pdt Dr. Robinson Butarbutar
BAGIKAN:
ist|pelitabatak
Pdt Dr. Robinson Butarbutar
Ndang mansohot turgas mamaritahon barita na uli

Sian di bonana i sahat tu nuaeng, sian abad parjolo dung hehe Jesus Kristus sian hamatean sahat tu na naung hundul Ibana di siamun ni Debata Ama i di banua ginjang jala mian rap dohot hita sahat tu nuaeng marhite TondiNa Tondi Porbadia i, ditonai Ibana do hita angka siseanNa asa borhat mamaritahon barita na uli sian sada inganan tu inganan na asing. Ditonai Ibana do hita borhat sian diri ni sada jolma nang punguan tu hadirian ni jolma nang punguan na asing. Ditonai ganup hita siseanna di partingkian transportasi darat, laut, udara na so apala denggan, aman jala hatop situtu dope songon sinuaeng di bahatan portibion on, asa borhat. Ditonai hita sude di partingkian na so haru denggan jala hatop situtu dope jolma i berkomunikasi songon sinuaeng on di na naung rade alat-alat komunikasi na mansai hatop pinamasa ni teknologi informasi internet na mansai hatop, mansai bidang, dohot meluas di bahat jolma di portibion isara na pinarade ni media sosial facebook, asa borhat. Ditonai Ibana hita angka siseanNa di partingkian na so songon i denggan, hatop jala bahat dope masin cetak laho paadongkon buku Padan Naimbaru na patolhashon taringot tu ngolu nang ulaon ni Jesus dohot angka siseanna di abad na parjolo sahat tu nuaeng di tongatonga ni era pencetakan na mansai canggih gabe boi jahaon ni angka houm na marasingasing hatana. Ditonai hita sian na so adong dope radio nang televisi songon I nang film. 

Ditonai Jesus angka siseanNa laho borhat mamaritahon barita na uli tingki ndang haru denggan dope parbinotoan ni jolma laho manjagai hahipasonna dohot pamalumhon parsahitonna sahat tu nuaeng on di na lam timbo parbinotoan ni jolma laho pamalumhon bahatan sahit na tubu di bagasan dohot na ro sian duru tu hajomaon, sahit pamatang nang sahit roha. Ditonai Jesus angka siseanNa asa borhat mamaritahon barita taringot tu Ibana, holongNa dohot lomo ni rohaNa di partingkian na mamereng sahit masa binahen ni holan angka huaso ni sibolis na so boi idaon ni simalolong dohot alat-alat pamaresoon medis sahat tu partingkian na mamereng dohot do angka ideologi na  patutoru arga ni jolma i, isara komunisme, neokapitalisme na so manghaholongi dongan jolma, dohot materialisme nang robotisme na manusai dohot so mangargahon ngolu ni jolma i di portibion na ingkon mangula, ganup. Di sandok partingkian, tu ganup na porsea di Ibana sian ganup houm do dipasahat Jesus Kristus Sipalua i ulaon mamaritahon barita na uli taringot tu Ibana.  Jempek hata: Ulaon mamaritahon barita nauli i do ulaon ni ganup siseanNa di portibion, di tingki na lehet dohot na so lehet pe tahe, maniro ulaon dohot cara ni Jesus Kristus na so mamaksa, alai paposhon roha ni jolma manghaporseai Ibana.

Di minggunta minggu palimahon dung Trinitatis on disunggulhon do tu hita ganup na porsea na marsaor di tongatonga ni punguan na ro sian tonga-tonga ni halak Batak asa manongtong mamaritahon barita na uli taringot tu Jesus Kristus i nang di tingkion, tarlumobi di partingkianta nuaeng di na naung sahat hita tu pangantusion na mandok na ganup do, ndang holan pangula ni huria, na ditonai Jesus asa mamaritahon barita na uli i, songon angka siseanna na borhat dung manaek Jesus tu banua ginjang (ayat 19-20). Sadarion ingkon tatangkasi do dirinta manang na angka sisean na borhat mangoloi Tuhanta i do hita ganup, ganup huria, manang ndang. Tauduti ma molo nunga angka na mangoloi hita. Muba ma molo ndang angka na naung mangaloi tonaNa hita saleleng on.

Laho manjou hita tu turgas i, dipangkulingi Jesus Kristus na naung hundul di siamun ni Debata Ama i do hita asa umboto angka na domu tu ulaon mamaritahon barita na uli songon na mangihut on.

Diparar Jesus do tong mamaritahon barita nauli sian na sanga ganggu jala jogal roha hian (ayat 14)

Na boi do tubu di tonga-tonga ni punguan ni na porsea di Jesus Kristus sada pangantusion na mandok na so haru apala sude tarjou laho mamaritahon barita na uli, siala dihilala nasida diri nasida na so tau tusi, siala godang ni angka hahurangan nasida. "Ah, ndang mungkin dijou Jesus ahu borhat mamaritahon barita na uli, ai ndang apala tang dope haporseaonku." "Ah, ndang mungkin disuru Jesus ahu, ai ndang tuk dope ahu borhat mamaritahon goarNa, dohot holongNa, ai hurang dope na huboto taringot tu aha sibaritahonon jala songon dia. Angka naung mamparsiajarisa ma na mangulahonsa. Hutumpahi pe ulaon nasida." 
Boi do tubu di rohanta na songon i sian tingki pandidionta sahat tu nuaeng on. Alai songon na pinatuduhon ni Markus 16:14 dohot Markus 16: 19-20 i, apala tu tonga-tonga ni angka siseanna sisampulu sada i do dipasahat Jesus tona i, i ma tu angka naung pininsangna siala ganggu (Gorik: apistin = na so porsea di) dohot jogal ni roha (Gorik: sklero-kardian) tu panindangion ni angka siseanna na asing  naung parjolo marnida Jesus naung hehe i, atik pe nunga tolu hali dilumbahon Jesus tu nasida taringot tu haheheonNa andorang so borhat Ibana tu Jerusalem asa manaon, mate jala hehe disi  di ari patoluhon (Markus 8: 31; 9:31; 10:34). 

Sasintongna, ala nunga tolu taon nasida rap dohot Jesus jala nunga marnida huasoNa na bolon i uju mangajari, pamalum na marsahit, dohot pabali tondi na hodar, huhut marnida hamaloonna mamaritahon barita taringot tu harajaon ni Debata, nunga tama nasida nian porsea di panindangion taringot tu haheheon ni Jesus i. Alai ndang. I pe, apala tu nasida na songon i do dipasahat Jesus turgas mamaritahon barita na uli i. Na umporlu i ma rade nasida mangulahon tona ni Jesus i. I do na pinatuduhon ni angka sisean na sampulu sada i di ujung ni panghataionnasida dohot Jesus: "Alai laho do anggo nasida manjamitahon barita na uli tu ganup luat, jala diurupi Tuhan i ma nasida, dipahot jamita nasida marhite tanda angka na mangihut." (Markus 16: 20a). Laho do na sanga ganggu jala jugul roha di panindangion taringot tu haheheon ni Jesus i manjamitahon barita na uli tu sandok luat (Gorik: pantaxou).
 
Di partingkianta nuaeng, nunga tarbahen hita mamaritahon goar ni Jesus tu sandok luat so ingkon borhat pamatangta tusi, i ma marhite media komunikasi internet nang media cetak songon i nang televisi naboi pangkeon ni sude. Tapangke ma media i dohot cara na denggan. Unang baliksa.

Suraon do adong sian tongatonganta nuaeng na manghilala na so dohot Ibana dijou Jesus mamaritahon goar ni Jesus di partingkian nuaeng? Molo adong dope na songon i, ringkot do marsiajar sian angka sisean ni Jesus na sampulu sada i na, dung manang atik pe dipinsang Jesus, tong borhat. Molo angka siseanNa na parjolo i borhat dung dipinsang siala ganggu dohot jogal roha di haheheon ni Jesus, suraon do hita halak Kristen Batak dipinsang Ibana nuaeng ala ndang olo dope hita borhat mamaritahon barita na uli marhite hata nang pambahenanta na gok holong i? Ndang sigolomgolomon ni hita naung porsea dohot pinaluaNa barita taringot tu Jesus i. Ingkon pasahatonta do tong tu na asing barita na uli i.

Ditonai Jesus Kristus asa borhat hita nuaeng mamaritahon barita na uli tu sandok na tinompa (ayat 15)

"Laho ma hamu tu liat portibion". Atik pe nunga ditonai Jesus angka siseanNa na sampulu sada i mamaritahon barita nauli tu liat portibion (Gorik: eis ton kosmon apanta, ida Markus 16: 15, Ulaon Apostel 1:8, Mateus 28: 19), sanga do nasida borhat holan tu halak Israel di tano Judea. Sanga do nasida  holan marningot hata ni Jesus andorang so hehe sian hamatean (Mat 10:10), i ma mamaritahon barita na uli holan tu birubiru ni Israel na mago, sanga do nasida holan paimaimahon angka bangso ro tu Jerusalem asa tu nasida dibaritahon harita na uli ni Jesus disi. Siala ni i, gabe ditangkup Jesus ma apostel Paulus na naung mangalele halak Kristen sian tongatonga ni halak Kristen na marhata Gorik, asa borhat ibana nidonganan ni angka donganna parbarita na uli tu angka bangso na so Jahudi, mamungka di angka kota di bagian Timur sahat tu bagian Barat ni Kekaisaran Romawi, i ma kota Roma (Rom 1: 15) dohot tu Spanyol (Roma 15:24). Sanga do halak Kristen di Jerman ndang borhat tu Afrika dohot Asia, alai di dekade patoluhon abad pa-19-hon borhat do nasida, padohot tu tongatonga ni halak Batak di dekade paonomhon. Sanga do halak Kristen Batak borhat holan tu tongatonga ni halak Batak Mandailing, Toba, Simalungun, nang Pakpak. Alai borhat do muse nasida tu angka sukusuku terasing di Sumatera Bagian Selatan. Dipajongjong halak Kristen Batak do sada badan misina di taon 1899. 

Atik pe nunga songon i sejarah ni Hakristenon Batak, ndang apala hansit ra rohanta molo ro Jesus Kristus maminsang hita halak Kristen Batak nuaeng siala nunga hira naeng mintop (manang nunga mintop?) api mamaritahon goar ni Jesus i sian tongatonganta, manang na dia pe sialana, sian tongatonga ni sundut na umposo nang na tumua, atik pe mamungka Januari 2016 i nunga tatangiangkon visi ni HKBP na imbaru na mandok tahasiholi do hita di taon 2066 gabe pasupasu tu portibion. Di partangiangan ari pensiunna Uluan ni Biro Sending HKBP na naung manguluhonsa 10 taon, ditonahon Pdt Charles Oloan Rahidin Silaban, STh do di HKBP Pematangsiantar di ari 31 Maret 2018 i asa tasarihon marsitutu ulaon mamaritahon barita na uli tu duru ni HKBP on marhite na mandopang manongtong jala hiras angka ulaon pinahembang ni biro on patauhon hita mamaritahon barita na uli, unang adong ruas nang parhalado na manghilala be na ulaon kelas dua do ulaon marbarita na uli tu duru.

Di tingki on, hata 'borhat tu liat portibion' boi do harafiah tajaha, i ma ingkon patupaonta do ulaon mamaritahon barita na uli tu angka na so umbege goar ni Jesus Kristus dohot na so pajumpang dohot Ibana di ngoluna nuaeng on, di inganan na jonok tu hita nang di na dao sian hita, di angka huta na terisolir situtu, manang di kota-kota besar, na jotjot gabe inganan ni bahatan jolma maringan. Alai boi do tong i marlapatan so ingkon meret pamatangta, alai boi marhite komunikasi internet nuaeng. Jala boi do marhite angka ulaonta na denggan di tongatonga na bangsonta patupahon pamaritaon taringot tu goar ni nasa goar i, Jesus Kristus Tuhanta i tu angka donganta di duru ni keluarga nang parsaoranta, nang di tonga-tonga ni parngoluanta siganup ari. Denggan do tangihononta pinsangpinsang ni Jesus i tu hita nuaeng on. 

Ulaonta na denggan na tapatupa di bagasan goar ni Jesus Kristus i boi do tong gabe holan tu donganta jolma. Alai ingkon laos boi do nang tu angka donganta na tinompa ni Debata na asing (Gorik: ktisei) na nuaeng on taboto manang piga nunga mago boti salelengna siala ni kebutuhan nang hamongkuson ni jolma na so sari di angka na tinompa na asing. Sada contoh ulaon na denggan do na pinatupa ni sahalak sintuanta di HKBP Tebet, Jakarta Selatan, i ma St Dr. Jamartin Sihite, anak ni Pdt Dr. Wilmar Sihite na hinan, na rap dohot angka donganna marusaha paulakhon angka orang utan na terdesak siala ni usaha perkebunan, asa boi orang utan i mandopang partubu ni angka suansuanan di hutan. Molo totop orang utan mangolu dohot marpinompari, boi do hananangkok ni mohop ni portibion otaponna ndang lobi sian 2 derjat Celsius. Molo lam godang halak Kristen Batak mamungka sian jabu nasida be dohot marhite na parsidohot aktif manjagai portibion, nunga taoloi tona ni Jesus tu hita asa mamaritahon barita na uli tu sandok na tinompaNa di sandok portibion.  Molo ndang boi songon i, pinomat ndang gabe sisegai portibion hita ruas ni pamatang ni Kristus sian tongatonga ni halak Batak. 

Asa malua na porsea jala tardidi, ndang taruhum na porsea (ayat 16)

Mansai uli do ia motivasi dohot na tinuju ni panonaion ni Jesus Kristus i tu hita, i ma asa dipalua (Gorik: sothesetai) na porsea, jala ndang taruhum nuaeng nang muse (Gorik: kata-kritesetai) na porsea di ari panguhuman i. I do apala impola, na tinuju ni pangoloionta borhat tu liat portibion mamaritahon barita na uli taringot tu Jesus Kristus i (diri, ngolu, ajar, ulaon ni Jesus i) songon na pinatorang ni sandok evangelium Markus i sian bindu sada sahat tu bindu sampulu onom. Unang meret sian na tatuju i parborhatta. Ndang asa parhuasoon (politis, ekonomis, sosial, budaya) ni angka sisean ni Jesus portibion ia na tinuju ni ulaon mamaritahon barita na uli i. Molo adong sanga gabe mangalului huaso ia na tatuju di na mamaritahon barita nauli i, ba tapauba ma dirinta.  

Ihut tu angka na porsea jala na tardidi i do angka tanda halongangan di ngolu nasida (ayat 17-18).

Ndang holan asa malua angka na porsea i di ari panguhuman ia na binagabagahon ni Jesus tu angka siseanna na mamaritahon barita na uli i. Alai dohot do na mangihut on idaonnasida: "Ihut tu ngolu nang ulaon ni na porsea di Jesus Kristus na mangolu dohot mangula di bagasan goarNa do angka tanda halongangan na mangihut on:  
Parjolo, di bagasan goar ni Jesus pabalihon angka tondi na hodar (Gorik: daimonian, ayat 17) sian tongatonga ni halak dohot masyarakat na niingananna. Paduahon, mangkatahon angka hata na imbaru (ayat 17). Patoluhon, boi manaluhon ulok, jala malua sian angka rasun na pamatehon jolma di portibion (ayat 18). Paopathon, tuk pamalumhom na marsahit marhite na mangampehon tangan tu na marsahait (ayat 18). 

Boi do hita mangantusi angka bagabaga pinasahat ni Jesus tu ganup na porsea tu Ibana di portibion di bagasan pangantusion songon na tarsurat i, i ma pabalihon angka tondi na hodar na marragam i di tingkinta nuaeng, marhata na imbaru, manaluhon angka na boi pamatehon jolma, isara angka binantang berbisa ulok nang angka rasun, jala parpudi pamalumhon sahit. Alai laos boi do i taantusi di pangantusion na mansai maju nuaeng, i ma mangalo angka ideologi na patutoru dohot pasiaksiak ngolu ni jolma nuaeng on (so marimbar na mansai borat di Indonesia on, i ma manaluhon penyalahgunaan narkoba), isara ideologi hatop mamora marhite na manggadis Narkoba. Dohot do tahe mangondihon jolma sian angka pihak-pihak di duru ni jolma di portibion na naeng pamatehon jolma i, mangalo angka rasun na mambahen mate jolma (hasesega ni aek, sipanganon, udara, senjata-senjata kimia dohot angka na mangarsuni na aisng). Nang mangantusi gejala sahit na somal dohot mambahen ubat na boi pamalumhon sian i ihut do tu ngolunta. Ndang holan sahit pamatang, alai dohot do angka sahit roha boi pamalumon ni na porsea di Jesus Kristus i, marhite huaso ni Debata nang marhite angka ubat medis. Ihut do di ngolu nang ulaon nasida angka tanda, songon Jesus na mamaritahon barita na uli i digohi tanda halonganan sian bona sahat tu ujung.
  
Mansai ringkot do i botoon, tiopon, haposan, ulahonon dohot patuduhonon ni ganup sisean ni Jesus di tingki on, di partingkian ni hajolmaon na lam maju situtu nuaeng on, i ma na lam mangasahon parbinotoan ni jolma dohot pasidingkon huaso di duru ni dirina, asa lam hiras roha nasida mamaritahon barita na uli ni Jesus Kristus i. Asa, mansai bidang, komprehensif do panghorhon ni molo borhat angka sisean ni Jesus nuaeng on mamaritahon barita na uli. Ndang holan haluaon sian uhum parpudi dapot ni na porsea jala tardidi dipalumehon tu nasida na porsea, alai dohot do hatauon nasida manaluhon angka na pasingkorsingkorhon dohot pamatehon ngolu ni jolma di portibion, dohot do pamalumhon angka sahit, sude marhitehite goar ni Jesus lehonon ni Jesus tu hita.

Panimpuli

Mansai uli do hape motivasi nang na tinuju ni panuruon ni Jesus tu hita angka siseanNa nuaeng, i ma asa unang tauhum na porse, alai asa malua na porsea, gariada asa ihut tu ngolu nang ulaon nasida  angka ulaon na gok halongangan. Molo ndang diida halak Kristen Batak hataridaan ni i di ngolu nasida saleleng on, tama do hita manungkun di bagasan rohanta, suraon do i siala ndang borhat hita mamaritahon barita na uli? Molo ndang diida angka na porsea di Jesus siala ulaonta mamaritahon barita na uli angka tanda halongangan i di ngolu nasida, suraon do i ala nang nasida ndang borhat mamaritahon barita na uli asa malua na porsea?(*)
  BeritaTerkait
  • Minggu IX Dung Trinitatis, 29 Juli 2018: Evangelium, Mateus 16: 24-28 "Gabe Sisean Namarsihohot Mangihuthon Jesus"

    4 bulan lalu

    Oleh: Pdt Dr. Robinson Butarbutar, Parsameanta, STT-HKBP1.Sian tingki tu tingki, mamungka di tingki mangula di Palestina dope Tuhanta Jesus Kristus nidonganan ni angka siseanna na sampulu dua i s

  • Jamita Evangelium, Pesta Parjolo Parningotan ni Haheheon ni Tuhan Jesus 1 April 2018: Gabe Sitindangi Haheheon ni Kristus (Ulaon Apostel 10: 39-43)

    8 bulan lalu

    Oleh: Pdt. Dr. Robinson Butarbutar, Sian Parsameanta, STT-HKBP PematangsiantarBarita nauli taringot tu haheheon ni Jesus Kristus sian hamatean nunga marrumangkun barita klassik di portibion mamungka s

  • Jamita Evangelium, Minggu Jubilate, 22 April 2018: Marlas ni Roha di Bagasan Tuhan i (1 Tessalonik 2: 13-20)

    7 bulan lalu

    Oleh: Pdt Dr. Robinson Butarbutar, Sian Parsameanta, STT-HKBPJubilate = Marolopolop tu Debata Sandok Tanoon1.Molo tajaha surat 1 Tessalonika on sian bona sahat tu ujung, tangkas situtu do digurithon&n

  • Jamita Evangelium Minggu XII Dung Trinitatis 19 Agustus 2018 1 Musa 17: 15-27 "Uli ni na Sauduran"

    3 bulan lalu

    Oleh: Pdt Dr. Robinson Butarbutar, Parsameanta, STT-HKBP.Dua ari dung sude hita rakyat Indonesia na mansai marragam rap mapestahon Hari Ulang Tahun Kemerdekaan Republik Indonesia na pa-73-hon di tgl 1

  • Jamita Evangelium, 4 Nopember 2018 Minggu XXIII Dung Trinitatis 2 Tim 1: 6-14 "Paratarata ma Silehonlehon ni Debata na Sahat tu Ho"

    2 minggu lalu

    Sian Parsameanta, STT-HKBP, Pdt Dr. Robinson ButarbutarDung manjonok marumur dua ribu taon pardalanan ni huria ni pinajongjong ni Jesus Kristus di portibion marhite ulaon ni TondiNa Tondi Porbadia di

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb