• Home
  • Agama
  • Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita
KSP Makmur Mandiri
Minggu, 11 Maret 2018 06:42:00

Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar

A. Dihasiholi Debata asa marlas ni roha jolma i.

Songon angka na porsea ni Debata Sitompa, Sipalua, Siparmudumudu ngolunta sian bortian ni dainang sahat tu sadarion, tama do hita marlas ni  roha ala di bagasan sataon bolon parhuriaon di tonga-tonga ni huria ni Kristus di portibion, adong sada parmingguon di hita na di bagasanna disosoi jala dijouhon Debata tu hita asa marlas ni roha hita, ndang asa tumatangis, ndang asa marsak, jala ndang asa margudompong hita. 
Marhite na sinosoan dohot jinouNa hita marlas ni roha i hita gabe lam tatanda ma hadirion ni Debata na Mangolu dohot na manongtong i, i ma: Ndang Debata na manghasiholi asa digohi arsak, digohi hadangolon ia Ibana, alai Debata na manangkapi, manintasintahon dohot patupahon angka ulaon na mambahen marlas ni roha joma I do ianggo Debata na tatanda i, na tasombo i. 

Ala ni i, molo adong dope di rohamuna gombaran manang pangantusion na Debata na manangkapi, manintasintahon dohot patupahon asa marsak ngolum, nunga tingkinan ingkon padaoonmuna panandaon taringot tu Debata na songon i. Ia Debata na Mangolu ro di saleleng ni lelengna i disintasintahon jala dipatupa Ibana do sian na robi sahat tu tingki on asa marlas ni roha hita jolma on. 

(i)Andorang so ditompa Ibana jolma i, nunga diparade Debata jolo angka  na ringkot di ngolu ni jolma i.

(ii)Andorang so mardosa jala maila jolma i, nunga dipaingot Ibana jolma i asa unang mangalaosi na pinatikkonna, asa marlas ni roha nasida tongtong di bagasan taman Eden i.

(iii)Asa tongtong marhangoluan na tarpasupasu jala gok las ni roha nasida, dilehon Ibana do angka patikna, i ma patik manghaholongi Debata dohot dongan jolma dos.

(iv)Dung sai mardosai jolma i, ditongos Ibana do angka panurirang paingothon nasida unang diula jolma i angka ulaon na mambahen marsak jala so marimpola ngoluna.

(v)Dung ndang marujung di hamubaon ni roha jolma i atik pe sai dipasingot Debata jolma i, gabe tarbuang, disangkapi Debata do asa boanonna jolma i sian habuanganna. I do na pinatolhasNa marhite panurirang Jesaya na di Epistelta i, Jesaya 54: 11-17 i: Disangkapi Debata tu bangso na parir, na pinaburuburu, na so tarapul,  angka sangkap nauli sipatupaonNa tu nasida, i ma: 

(vi)Tu angka jabunasida naung melengse  pajongjongonna ma angka jabu marhite angka batu na tung togu dohot arga situtu (ayat 11-2),

(vii) Angka anak ni bangso i gabe angka na marhasonangan godang (ayat 13); 

(viii)Marhite hatigoranna gabe bangso na hot, na so muraura be taluhonon ni angka bangso na asing na manonggoti nasida dohot angka sinjata bodil nang dila na mangerehei.

(ix)Dung ndang marujung tu hamubaon ni roha ngolu ni jolma na pininsangNa i jala siala ni gabe tarbuang, manaon, diparhatoban dosa i jolma i, ditongos Ibana do Jesus Sipalua i, asa malua sian panghanghungion ni dosa jolma i, asa unang mate ro di saleleng ni lelengNa jolma i, alai asa marlas ni roha ala mangolu manongtong do angka na porsea di haluaon na pinatupa ni Jesus i tu diriNa, unang gabe manongtong tariluilu jolma i.

(x)Jala sadarion di minggunta on, dipabotohon tu hita sada siala ni na marlas ni roha hita, I ma: Ai Debata na mamasumasu dohot manghaholong i hita do Ibana. I do siala ni na taoloi joujou ni Debata tu hita sadarion laho marlas ni roha, i ma Ai Mamasumasu dohot Manghaholongi hita do Debata. 
Di pengalaman ni na porsea i, molo tung pe maminsang Debata marhitehite pinsangpinsang na koras situtu marhite uhum na koras, ianggo sangkapNa na umbagas i ma asa marlas ni roha do hita di ujungna.

B. Dihasiholi Jesus asa di bagasan hita las ni roha(chara)Na, jala gok las ni rohanta  (ayat 11). 

(a) Hita angka siseanNa uju di panghataion parsirangan nasida, uju martinading hata Jesus tu nasida (Joh 14-17), 

(b) Hita angka siihuthon Jesus mamungka sian partingkian ni panurat Johannes di ujung ni abad parjolo sahat tu nuaeng,  jala 

(c) Hita siihuthon Jesus di tingkion di tonga-tonga ni na porsea di portibion na mangadopi marragam parungkilon na mangihut on nuaeng di ngolu on siala ni marragam sibosiri di era revolusi industry napaopathon, isara ni:
-  Parro ni angka sahat na marragam i tu pamatang hajolmaon na so boi malum ala ni soadong pangubation dohot so adong dope ubat na jago, 

-   Parmago ni ulaon ni bahat jolma nuaeng  siala ni na gabe diganti angka masin digital dohot robot nama ulaon i: Di Indonesia 4,8 juta di bidang administrasi perkantoran, 1,6 juta di konstruksi dan ekstraksi, satonga juta di bidang design dohot seni, nang 150 ribu di bidang hiburan dohot media, Info : Yanuar Nugroho, Deputi II Staf  Kepresidenan RI, Kompas 5 Maret 2018, hal 6).

-  Parsaoran na so uli di tonga-tonga ni jolma (di jabu nang di ulaon songon i nang di duru ni jabu), dohot siala ni angka
- Tindak kekerasan niae ni angka jolma (isara ni na bahat gabe korban ni perdagangan illegal angka ubat terlarang, manang boruboru na mangadopi kekerasan sian angka baoa di jabu nang di tempat-tempat publik, di Indonesia on adong 28 juta nasida/Survey BPS ttg Pengalaman hidup perempuan pinangido ni Kementerian Pemberdayaan Perermpuan dan  Perlindungan Anak, i ma 1 sian 3 boruboru marumur 15-64 taon,   dohot perdagangan ni jolma. Kompas, 7 Maret 2018, dohot siala ni porang).

- Na so dapot ni jolma be halalas ni roha  godang sian sude angka na naung didungdung jolma marhite angka teknologi na canggih I (Bio, techno, medico).

Halalas ni roha ni Jesus mian di bagasan hita dohot halalas ni rohanta gabe gok marhite dua sibonsiri dohot sada syarat,  dua AI (sebab), sada MOLO  (jika).

AI (sebab) nunga dihophop Jesus hita marhite hosaNa (ayat 12-13).
AI (sebab) nunga dipillit jala dipadiri Jesus hita laho marparbuehon parbue  na godang dohot na mian (ayat 16-17, patudos 13: 15) asa lehonon ni Ama i nasa na tapangido di bagasan goar ni Jesus.

MOLO (jika) taulahon patik holongNa i tu sama hita ai holan marhite i do hita boi mian rap dohot Jesus hita jala gabe alealenaNa, ndang anak somangna (ayat 8-12, 14, 17; patudos di Joh 13: 34. 14:21, 23-24).
Hamuna angka dongan, marhite dua AI (siala) dohot sada MOLO (jika) i nunga dihamham tolu tradisi hakristenon na mansai togu, na diauhon, dihangoluhon, dihatindangkon angka siihuthon Jesus sian tingki ni Jesus sahat tu tingkion, i ma tradisi ajaran ni Jesus dohot na niihuthon ni angka apostel padan na imbaru i:

Naparjolo, tradisi pasupasu ni Debata na sun denggan dohot holong ni rohaNa tu jolma i marhite panghophopon ni Jesus na sahat tu hita marhite ulaon ni Tondi Porbadia na palumehon tu hita haporseaon di asi ni roha ni Jesus na manghophop hita. Diipasupasu jala dihaholongi Debata hita disi. Sada sibonsiri las ni roha do i.
Napaduahon, i ma tardisi pamillition ni Debata tu hita dohot dipadiri hita laho marparbue, jala marparbue na godang. Dipillit Jesus do hita be tu harajaonNa alai dohot do patupahon lomo ni RohaNa di ngolu on. Sada sibonsiri las ni roha na sumurung  do i.

Napatoluhon, i ma tradisi holong hinangoluhon ni angka naung tinobusna, i ma masihaholongan sama siihuthon Jesus, dohot siihuthon Jesus manghaholongi dongan jolma.  Sada dalan palas roha ni Jesus dohot pagokhon las ni rohanta do i.

Tolunsa mansai  ringkot do rimangrimangonta di bagasan sadarion:
Las MA  rohanta ala nunga angka na hinongkop ni Jesus hita on, angka na tinobusna.
(Alai ndang pola las rohamuna ala naung guru dokmu angka tondi i. On ma tahe halashon hamu: Naung tarsurat goarmuna di banua ginjang (Lukas 10: 20). Parbue ni tondi do las ni roha i (Gal 5:22). Las ni roha i do patauhon hita mangadopi parungkilon (Jakobus 1: 2-3).

Las MA rohanta ala nunga na dipillit Debata hita jala dipadiri hita laho marparbuehon parbue na godang.
Las DO rohanta molo masihaholongan hita, ai marhite i do hita gabe diida Jesus alealeNa.

Panimpuli: 
Mansai ringkot do hita nuaeng manungkunhon nunga songon dia las ni rohanta?
Suraon do ndang disi be las ni rohanta, ala nunga tahalupahon panghophopNa i, gabe nang di ngolunta siganup ari ganggu rohanta jala pola tadok na so diantoi Debata be ngolunta?

Suraon do ndang disi be las ni rohanta, ala ndang taboto dohot ndang taauhon dohot ndang  taulahon pamillition ni Debata tu hita, di na dipadiri Ibana hita asa marparbue di portibion, di tongatonga ni huria, sian bagasan huria nang di portibion di ganup ulaonta be?

Taida be ma sejarah ni parmasukta gabe sitean hangoluan na manongtong i.
Tapareso be ma parbuae ni pamillition ni Debata di hita. So tung disi do hita agoan las ni rohanta i, siala ndang adong parbue na tapatupa?

Suraon do ndang disi be las ni rohanta i ala ndang masihaholongan hita angka siihuthon Jesus, baliksa gabe masihosoman, di jabu nang di duru ni jabu, songon i nang di parsaoranta? Tapareso ma holongta sama hita.

 (Parsamean, STT-HKBP Pematangsiantar)
  BeritaTerkait
  • Jamita Evangelium, Minggu Rogate, 6 Mei 2018 2 Musa 32: 7-14 "Debata Manghaholongi jala mamasumasu hita"

    3 bulan lalu

    Oleh: Pdt. Dr. Robinson Butarbutar, Parsameanta, STT-HKBP Pematangsiantar1.Hamu angka dongan, di minggu Rogate on, di sada minggu di na ditogutogu hata ni Debata hita asa lam marpos ni roha di latapan

  • Jamita Minggu V dung Trinitatis, 1 Juli 2018 Evangelium: Markus 16: 14-20 "Mamaritahon Barita Nauli tu nasa Natinompa"

    3 minggu lalu

    Ndang mansohot turgas mamaritahon barita na uliSian di bonana i sahat tu nuaeng, sian abad parjolo dung hehe Jesus Kristus sian hamatean sahat tu na naung hundul Ibana di siamun ni Debata Ama i di ban

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    11 bulan lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium di Ari Jumat, 30 Maret 2018 Parningotan Ari Hamamate ni Tuhan Jesus, EvangeliumJohannes 19: 28-37 "Panotnoti Jala Haposi Na Tarsilang i"

    4 bulan lalu

    Oleh: Pdt. Dr. Robinson Butarbutar, Parsameanta, STT-HKBP PematangsiantarPatujoloDi taon 2018 on, di tonga-tonga ni Parningotanta di Ari Hamamate ni Tuhan Jesus di hau pinorsilang i hira-hira 2015 tao

  • Jamita Evangelium, Pesta Parjolo Parningotan ni Haheheon ni Tuhan Jesus 1 April 2018: Gabe Sitindangi Haheheon ni Kristus (Ulaon Apostel 10: 39-43)

    4 bulan lalu

    Oleh: Pdt. Dr. Robinson Butarbutar, Sian Parsameanta, STT-HKBP PematangsiantarBarita nauli taringot tu haheheon ni Jesus Kristus sian hamatean nunga marrumangkun barita klassik di portibion mamungka s

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet